2 SAMUƐLƐ 8 - WE NU GALE 1995

Davidi bi olenɔ kɛ zã Israɛlɛ

¹ Olo nɛ la sĩ, nɛ nwa Davidi bi 'bɔ Ofilisti, nɛ a nɛ ngɔ wa. A dɛa na mɛ ni, nɛ a ba nùi ni kɔ̃ wa do'do, nɛ ma hã sape hã wa wena.

² A bi 'bɔ Omoabɛ, nɛ a nɛ ngɔ wa. Nɛ a ba nu a hã wa na, wa ɔ nù dɛ 'do ngba wa do 'da fɛlɛ wala talɛ. Wa ɔa nù, nɛ a gbɛ 'da fɛlɛ wa bɔa, nɛ a la wa do tunu li wa tati nɛ a 'da fɛlɛ wala kpo iko. Do 'da fala ni, nɛ Omoabɛ wa lia zi ti mbula 'da Davidi, nɛ wa futa tako hã a.

³ 'Do nɛ, nɛ a nɛ we bi 'bɔ do Hadadezɛrɛ, nwa ngɔ nù Soba, mbee 'bili tɛ nù Siri. Hadadezɛrɛ zi a be 'da Rɛhɔbɛ. 'Da fala kɛ Hadadezɛrɛ nɛa do osodanɔ 'da a we ba nùi kɛ zã nu lì Efratɛ we e mbula ngɔ nɛ ni, nɛ Davidi bi wa dɛ li wala, nɛ a nɛ ngɔ wa.

⁴ A kala osoda kũ mbalatanɔ 'da Hadadezɛrɛ koto kpo do kama sambo, nɛ a si do wa. Nɛ a si 'bɔ do osoda nyanga winɔ 'da a koto 'bu nɛ bɔa. A kala ombalata ɔ nɛ kama kpo ni, we gbɔtɔ ongilingili, nɛ a 'bili fɛlɛ nzabele nyanga tala mbalatanɔ ni vɛ̃.

⁵ Osiri tɛ kɔ le Damasi wa nɛa we zele we nɛ, nɛ wa tɛ we gasa bole zu Hadadezɛrɛ. Nɛ Davidi bi wa, nɛ a gbɛ osoda sanga wa koto 'bu wa bɔa ngɔ wa bɔa.

⁶ Nɛ a saka obe Israɛlɛ na, wa ɔ Owi fɔmɔ le Siri. Na mɛ ni, Osiri wa lia ti mbula 'da a, nɛ wa futa tako hã a. NWA dɛa zi na, Davidi nɛ ngɔ owi sɛnɛ a li bolonɔ vɛ̃.

⁷ Davidi kala Ongele mɔ mbalinɔ, kɛ Owi zɔ mɔ tɛ Hadadezɛrɛ wa bi zi do bole ni, nɛ a si do ma dɛ Yeruzalɛmɛ i.

⁸ A kala 'bɔ ogili tũ mɔ bolo ngɔ nùi 'da Hadadezɛrɛ tɛ kɔ le Beta do Berotai.

⁹ Tou, nwa ngɔ nù Hamatɛ zila na, Davidi bi sodanɔ 'da Hadadezɛrɛ, kɔ a nɛa ngɔ wa,

¹⁰ nɛ a tombo be 'da a Yoramɛ na, a fana Davidi, nɛ a dɔnggɔ 'bɔ a, we kɛ a bi Hadadezɛrɛ, nɛ a nɛa ngɔ a ni. Mba gɔ, Hadadezɛrɛ do Tou, wa sɛnɛ zi ngba wa wena. Yoramɛ nɛa do mɔ mbali, fɛ̃a mɔ bolo, do tũ mɔ bolo, nɛ a hã ma hã Davidi.

¹¹ Nɛ Davidi hã mɛnɔ ni hã NWA Gale, ɔ nɛ kɛ a dɛa zi do fɛ̃a mɔ bole do tũ mɔ bole kɛ a kala ma kɔ gele lenɔ kɛ ma ti mbula 'da a ni.

¹² A kala zi mɛnɔ ni kɔ̃ Osiri, Omoabɛ, Oamoni, Ofilisti do Oamalɛkɛ, mba 'bɔ do odia mɛnɔ a kala kɔ̃ Hadadezɛrɛ ni.

¹³ Na mɛ ni, nɛ sako li Davidi dɔ̃lɔ̃ zi dɛ dati fai. 'Do kɛ Davidi bi Osiri, kɔ a nɛa ngɔ wa ni, nɛ a si, nɛ a bi 'bɔ Oedɔmɛ tɛ kɔ gbangɔlɔ̃ Tɔ̃. Nɛ a gbɛ wa koto 'bu ngɔ wa ngbɛ'dɛ'dɛ.

¹⁴ Nɛ a a mbe ogã wi ngɔ sodanɔ 'da a ngɔ wa, nɛ wa le ti mbula 'da a. Na mɛ ni, NWA Gale dɛa zi na, Davidi nɛ ngɔ owi sɛnɛ a li bolonɔ vɛ̃.

Owi dɛa tonɔ 'da Davidi

¹⁵ Davidi dɛa to nwa 'da a ngɔ nù Israɛlɛ vɛ̃. A gɔnɔ zi we 'da winɔ vɛ̃ do bɔlɔ nɛ, nɛ nde a gɔ́nɔ́ zi ma we bula li wele gɔ.

¹⁶ Yoabɛ, be 'da Sɛruya, zi a gã wi ngɔ sodanɔ. Yosafatɛ, be 'da Ahiludɛ, zi a wi sa mbula 'da Davidi.

¹⁷ Sadɔkɛ, be 'da Ahitubɛ, do Ahimelɛkɛ, be 'da Abiatarɛ, wa zi a onganga. Sɛraya zi a wi kɔma mbɛti 'da Davidi.

¹⁸ Bɛnaya, be 'da Yoyada, zi a wi kpe ti Okrɛtɛ do Opeleti, kɛ wa zɔ zi mɔ nu tɔa nwa ni. Nɛ obenɔ 'da Davidi, wa zi tɛ mɛ 'bɔ a onganga.