2 SAMUƐLƐ 7 - WE NU GALE 1995

Gale kpua mbulu hã Davidi do nu fɛlɛ a

¹ Do 'da fala ni, nɛ nde nwa Davidi si kɔ tɔa nwa 'da a. Nɛ NWA Gale pɛsa owi sɛnɛ a, kɛ wa zĩ nùi 'da a takpa ni, nɛ a e dungu fio ngɔ nùi ni.

² Mbe ngba soe kpo, nɛ Davidi tɔ̃ hã Natanɛ, wi gba olo nu Gale na: “Mi ɔ kɔ tɔa kɛ wa dɛa ma do te sɛdrɛ, nɛ Sanduku Gba Tɔkɛ 'da Gale ɔ kɛ 'dɛ ɛ ti tɔa tande iko. Kɔ mɔ lengge na ge nde?”

³ Nɛ Natanɛ gese na: “Mɔ dɛ mɛ vɛ̃ kɛ zã mɔ kɔ̃a ni, we kɛ NWA Gale fala nɛ kpo do mɔ boe.”

⁴ Nɛ do kpo tũi ni, nɛ NWA Gale wila we hã Natanɛ na:

⁵ “Mɔ nɛ́, hã mɔ kpa Davidi, wi toe 'da mi, nɛ mɔ tɔ̃ hã a na, a zélé we kɛ mi NWA, mi tɔ̃a gɛ: Mɔ a mɔ dɛ́ sɛ tɔa Tɛmpɛloe hã mi na, mi ɔ kɔ nɛ gɔ.

⁶ We kɛ yolo do ngba soe mi fua obe Israɛlɛ ngɔ nù Ezipeto gbaa we hɔ kɔ̃ tũi gɛ, mi ɔ̃ kɔ tɔa gɔ, mi ɔ zi ti tɔa tande.

⁷ Dɛ ngɔ nɛ, 'da falanɔ vɛ̃ kɛ mi ia zi Owele we zɔ mɔ tɛ winɔ 'da mi, obe Israɛlɛ ni, nɛ nde mi àkà wele kpo kɔ wa na, gulu kɛ nɛ dɛ̃ tɔa Tɛmpɛlo hã mi do te sɛdrɛ gɔ we ge nde ni gɔ.

⁸ “We duzu ma, mɔ tɔ̃ sɛ 'bɔ hã Davidi na, a zélé we kɛ mi NWA Gale 'da nɛ obe Israɛlɛ, mi tɔ̃a gɛ: 'Da fala mɔ zi a wi dala obata iko ni, nɛ mi ba mɔ nu ba'de, nɛ mi e mɔ do nwa ngɔ owinɔ 'da mi, obe Israɛlɛ.

⁹ Mi zi fala nɛ kpo do mɔ kɔ mɛnɔ vɛ̃ mɔ dɛa ma ni, nɛ mi gbɛa owi sɛnɛ mɔ dati mɔ. Nɛ mi dɛ sɛ na, sako li mɔ dɔ̃lɔ̃ ɔ nɛ kɛ 'da ogã winɔ nù gɛ.

¹⁰ Mi hã sɛ fala tɔa hã owinɔ 'da mi, obe Israɛlɛ, nɛ wa 'bana sɛ dɛ di ni, nɛ wa dɛ́ sɛ kili gɔ. O'dã winɔ wa zɛ́lɛ́ sɛ 'bɔ tɛ wa ɔ nɛ kɛ zi dati,

¹¹ 'da fala mi ia zi Owele ngɔ wa na, wa kpe dati wa ni gɔ. Mi amba sɛ zu mɔ ti kɔ̃ Owi sɛnɛ mɔ vɛ̃. Do Sɔkpɔ nɛ, mi tɔ̃ 'bɔ hã mɔ na, mi NWA, mi hã sɛ odɔa be hã mɔ, nɛ nu tɔa 'da mɔ ma 'bɔ.

¹² Hã fala kɛ tũ fio 'da mɔ we, hã mɔ fe, nɛ mi saka sɛ mbe kpo kɔ benɔ 'da mɔ ngboo na, a dungu nwa olo mɔ. Nɛ mi dɛ sɛ na, to nwa 'da a nganda.

¹³ Nɛ a hã a dɛ sɛ tɔa Tɛmpɛlo hã mi. Nɛ mi hã, sɛ ngawi hã a na, dɛa to nwa 'da a 'bana fai.

¹⁴ Mi ɔ sɛ nɛ baa a, nɛ a ɔ nɛ be 'da mi ni. Fala a dɛ 'dã mɔ, nɛ mi hã sɛ etumbu hã a, ɔ nɛ kɛ baa be hã do etumbu hã be 'da a ni.

¹⁵ Nɛ nde mi dá sɛ sila mi ngɔ a gɔ. Mi dɛ́ sɛ do a, ɔ nɛ kɛ mi dɛa zi do Saulo, kɛ mi bɛ̃a gɛnɛ a, nɛ mi e mɔ olo a ni gɔ.

¹⁶ Obe zã mɔ wa dungu sɛ nwa olo mɔ fai, nɛ to nwa ma 'bana sɛ kɔ nu fɛlɛ mɔ fai.”

¹⁷ Natanɛ nɛa, nɛ a gba nu wenɔ NWA tɔ̃a hã a ni vɛ̃ hã Davidi.

Sambala 'da Davidi

¹⁸ Nɛ nwa Davidi lia kɔ tɔa Tande 'da NWA Gale, nɛ a yolo dati a, nɛ a tɔ̃ na: “NWA Gale 'da mi, mi do nu fɛlɛ mi, lɛ wè zi do kɛ na mɔ dɛ dia mɛnɔ gɛ vɛ̃ do lɛ gɔ.

¹⁹ Ĩ na mɔ NWA, mɔ zɔa ki ni li mɔ bi sĩ iko, nɛ mɔ kpua 'bɔ mbulu hã nu fɛlɛ mi 'do gba dɔa sabɛlɛ. Nɛ mɔ tɔ̃a we mbuli ni hã mi, kɛ mi a kili tɛ wi nùi gɛ iko ni.

²⁰ Aa NWA, mbé we kɛ mi nɛ tɔ̃ 'bɔ ngɔ nɛ ni a ge nde? Mɔ ĩ ti mi, wi dɛa toe 'da mɔ.

²¹ Mɔ dɛa dia mɛnɔ gɛ, we duzu kɛ mɔ kɔ̃a zi na mɛ ni, nɛ mɔ kpua zi mbulu nɛ. Nɛ mɔ bia ma hã mi wi toe 'da mɔ.

²² NWA Gale 'da mi, mɔ gã wena. Fo wi we kɔ̃ do mɔ bina. Mɔ zu mɔ kpo a Gale, ɔ nɛ kɛ lɛ zele fai ni.

²³ Nɛ fo ombe gele wele ngɔ nù gɛ, kɛ wa wia kɔ̃ do lɛ, obe Israɛlɛ ni bina. Mɔ fua 'dikita lɛ obe Israɛlɛ zu lɛ kpo kɔ ngbá ti kɔ̃ Oezipeto do ogalenɔ 'da wa na, lɛ hɔ owinɔ 'da mɔ. Mɔ dɛa ogba mɔ, do oɔngbamɔ hã lɛ, nɛ lɛ kpa dɔ̃lɔ̃ li we nɛ.

²⁴ Mɔ dɛa na, lɛ 'bana winɔ 'da mɔ fai, nɛ mɔ NWA, mɔ hɔa Gale 'da lɛ.

²⁵ “Ngangga ni, NWA, mɔ dɛ́ mɛ kɛ mɔ kpua mbulu nɛ hã mi do nu fɛlɛ mi ni. Mɔ dɛ́ kɛ mɔ tɔ̃a ni.

²⁶ Na mɛ ni, nɛ Owele wa dɔnggɔ sɛ zu li mɔ fai, nɛ wa tɔ̃ sɛ na: ‘NWA Gale ngɔ mɔ nyanga nza vɛ̃ a Gale 'da obe Israɛlɛ.’ Nɛ dɛa to nwa 'da mi do nu fɛlɛ mi ma 'bana sɛ fai.

²⁷ Gale 'da mi, mɔ a NWA ngɔ mɔ nyanga nza vɛ̃, do Gale 'da lɛ obe Israɛlɛ, mɔ a mɔ bia linggamɛ 'da mɔ hã mi na, onu fɛlɛ mi, wa dungu sɛ nwa olo mi. Gulu nɛ hã mi kpa ngawi we sambala mɔ ni.

²⁸ NWA, mɔ a Gale. Mɔ kpua mbuli dia 'dɔkɔlɛ gɛ hã mi. E kɔ kɛ mɔ tɔ̃a ni, ma dɛ tɛ̃ ɛ.

²⁹ E kɔ mɔ wele nu mɔ tɛ obe zã mi na, dɛa to nwa 'da onu fɛlɛ mi ma 'bana fai. E kɔ mɔ NWA Gale 'da mi, mɔ wele nu mɔ tɛ nu fɛlɛ mi fai, ɔ nɛ kɛ mɔ tɔ̃a ni.”