2 SAMUƐLƐ 6 - WE NU GALE 1995

Davidi kɔ̃a na Sanduku Gba Tɔkɛ si dɛ Yeruzalɛmɛ

¹ Davidi ngɛmɛ 'bɔ li onga soda bolo Israɛlɛ vɛ̃ Owele koto 'bu wa talɛ.

² Nɛ a la do wa dɛ Bala, tɛ ngɔ nù Yuda, we ba Sanduku Gba Tɔkɛ 'da Gale. Sanduki ni, mɛ a kɛ wa sa li NWA Gale zu nɛ, nɛ a dungu ngɔ nɛ tɛ sanga okerubinɛnɔ ni.

³ Do 'da fala ni, nɛ nde Sanduku Gba Tɔkɛ zi a kɔ tɔa 'da Abinadabɛ, tɛ ngɔ kala. Wa hɔa i mɔ, nɛ wa ba ma, nɛ wa e ma ngɔ mbé ngilingili, nɛ wa la do ma. Uza do Ahio, obenɔ 'da Abinadabɛ hã wa kã zi ngilingili,

⁴ kɛ Sanduki ngɔ nɛ ni. Ahio kpia dati,

⁵ nɛ Davidi do obe Israɛlɛ vɛ̃, wa kala omɔ ga zuma kpi do kpi, nɛ wa zɛ ma we be yangga 'da wa dati NWA. Mɛ a omɔ ga zuma kɛ wa dɛa do te pinɛ ɔ nɛ obe kundu, ogã kundu, be biã, nzanga, do mbala mɔ bolo kɛ wa zɛ do ngbɛ ɛ ni.

⁶ Wa nɛa we kɔlɔ do fala zɛ do kpalɛ tɛ Nakoni ni, nɛ ongɔmbɔnɔ wa dɛa ɔ nɛ wa nɛ fi Sanduki Gba Tɔkɛ nù fi ni. Uza nɛa we zɔ ni, nɛ a ɛfɛ kɔ̃ a we 'be tɛ nɛ.

⁷ Nɛ zã nwa nɔ̃lɔ̃ dɛ tɛ̃ a, nɛ a gbɛ a dɛ di ni do ti, we kɛ a 'bia tɛ Sanduku Gba Tɔkɛ, kɛ tati nɛ a olevitɛnɔ hã wa wia zi we 'be tɛ nɛ ni. Nɛ Uza fia dɛ kɛ zã Sanduki ni.

⁸ Davidi nɛa we zɔ ni, nɛ zã a nɔ̃lɔ̃ wena, we kɛ Gale zɛa Uza, nɛ a gbɛa a ni. Ma hã Davidi sa li fala ni na Perɛsi-Uza. Nɛ li ni ma 'bana gbaa tia do sɔɛ gɛ.

⁹ Nɛ Davidi dɛa zi kili NWA do ngba soe ni, nɛ a tɔ̃ na: “Mi wè do kpɔ kɔ̃ mi ti Sanduki 'da NWA na, ma si dɛ 'da mi i gɔ.”

¹⁰ Nɛ a kɔ̃̀ zi we si do ma dɛ nu tɔa kɔ Gba Ngbo nwa 'da a tɛ Yeruzalɛmɛ i gɔ. Nɛ a ia ma kɔ tɔa 'da Obɛdɛ-Edɔmɛ, wi Gatɛ.

¹¹ Nɛ sanduki ɔa zi dɛ 'da Obɛdɛ-Edɔmɛ ni zɛkɛ talɛ, nɛ NWA wila nu ɛ tɛ̃ a do owinɔ 'da a vɛ̃.

Sanduku Gba Tɔkɛ hɔa Yeruzalɛmɛ

¹² Wa tɔ̃a hã nwa Davidi na, NWA wila nu a tɛ nu fɛlɛ Obɛdɛ-Edɔmɛ do omɛnɔ 'da a vɛ̃, we duzu Sanduki Gba Tɔkɛ. Ma kɛ Davidi kala Owele, nɛ wa nɛa 'da Obɛdɛ-Edɔmɛ i, we ba Sanduki si do ma, nɛ gili winɔ wa kã ma do yangga dɛ kɔ Gba Ngbo nwa 'da Davidi.

¹³ 'Da fala Owi ba Sanduki wa nɛa we ba nyanga wa gazɛlɛ iko ni, nɛ Davidi tɔ̃ hã wa na, wa yolo nù. Nɛ Davidi gbɛa wili ngɔmbɔ do be ngɔmbɔ kɛ a dɛ nɔ wena ni, nɛ a dɔnggɔ do NWA.

¹⁴ 'Do nɛ, nɛ a ma ngɔ yɔ yɔla nganda wena hã NWA. A kpua tati a gbau fɛ̃a tuli 'da onganganɔ dɛ tɛ̃ a.

¹⁵ Davidi do obe Israɛlɛ, wa la do Sanduku Gba Tɔkɛ 'da NWA dɛ Yeruzalɛmɛ i, nɛ wa he mɔ yangga, nɛ wa dama mɔtũlũ.

¹⁶ Do 'da fala Sanduki hɔa tɛ kɔ Gba Ngbo nwa 'da Davidi ni, nɛ Mikalɛ, boko be 'da Saulo ka mɔ do li holo tɔa, nɛ a zɔ Davidi tɛ yɔ yɔla tɛ zĩ 'do Sanduki korr ni, nɛ a nyɛ nu a tɛ̃ a.

¹⁷ Wa nɛa do Sanduki, nɛ wa e ma tɛ fala wa 'dafa kɔ tɔa tande Davidi zĩ we duzu Sanduki ni. 'Do nɛ, nɛ Davidi dɔa osa'de we dɔnggɔ do nwa, kɛ a do nganda vɛ̃, nɛ a gbɛa 'bɔ mbee nɛ we be dɛa na.

¹⁸ A hã odɔnggamɛnɔ ni do'do, nɛ a wele nu a tɛ owinɔ do zu li NWA Gale 'da obe Israɛlɛ,

¹⁹ nɛ a kɛ̃ onyɔngɔmɔ hã gili obe Israɛlɛ vɛ̃ wa tɛa ni. Wi wili kpo kpo do wuko kpo kpo kpa bisikiti, do mukate bɔa kɛ mbe nɛ wa dɛa do wala te datɛ, nɛ mbe nɛ wa dɛ do kula wala te vinɔ. Wa nyɔngɔ do'do, nɛ wele do wele si dɛ nu tɔa 'da ɛ.

²⁰ Nɛ Davidi si tɛ mɛ 'bɔ dɛ sanga Owi nanɔ 'da a, tɛ nu tɔa 'da a i. Nɛ Mikalɛ gɔnɔ dati a, nɛ a mɔmɔ a, nɛ a tɔ̃ na: “Kɛ nwa ngɔ Israɛlɛ kpa dɔ̃lɔ̃ li sɔɛ gɛ ni ɛ! A bia tɛ̃ a hã owuko ngbánɔ 'da Owi dɛa tonɔ 'da a, nɛ nde mbee tɛ̃ a do wila nɛ ɔ nɛ wi bɔ ni.”

²¹ Nɛ Davidi gese na: “Mi dɛa na mɛ ni, we be dɔ̃lɔ̃ li 'da NWA. A a a saka mi olo li baa mɔ do nu fɛlɛ a vɛ̃, we e mi do nwa ngɔ winɔ 'da a, obe Israɛlɛ. Nɛ mi yɔ sɛ yɔla ni fai we dɛ yangga dɔ̃lɔ̃ li 'da a.

²² Nɛ mi ba sɛ tɛ mi dɛ nù wena, nɛ mi zɔ tɛ mi ɔ nɛ mɔ yala iko ni. Nɛ wuko ngbánɔ mɔ tɔ̃ sɔ do wa ni, mi kpa sɛ dɔ̃lɔ̃ li do wa fala nɛ kpo.”

²³ Mikalɛ, be 'da Saulo kò be gɔ gbaa, nɛ a fe do ma.