2 SAMUƐLƐ 5 - WE NU GALE 1995

Davidi hɔa nwa ngɔ nù Israɛlɛ

¹ 'Do nɛ, nɛ onu kpala Israɛlɛ vɛ̃ wa nɛa, nɛ wa kpa Davidi tɛ Hebroni, nɛ wa tɔ̃ hã a na: “Lɛ gɛ a kili tɛ mɔ ngboo.

² Do 'da fala zi Saulo a nwa ngɔ lɛ ni, nɛ nde mɔ zi a mɔ kpe dati osoda Israɛlɛ. Nɛ nwa tɔ̃a zi hã mɔ na, mɔ a mɔ nɛ zɔ sɛ mɔ tɛ obe Israɛlɛ, winɔ 'da ɛ. Mɔ sɛ a nwa ngɔ wa.”

³ Wa tɔ̃a ni do'do, nɛ okumu Israɛlɛ vɛ̃ wa tɛa tɛ Hebroni, nɛ Davidi gba tɔkɔ do wa dati NWA Gale. Nɛ wa a nɔ zu a, takɔ a hɔ nwa ngɔ nù Israɛlɛ.

⁴ Davidi hɔa nwa, nɛ nde a zi do 'bu sabɛlɛ talɛ, nɛ a dɛa to nwa 'da a 'bu sabɛlɛ nalɛ.

⁵ Dati, a ɔa tɛ Hebroni, nɛ a dungu nwa ngɔ nù Yuda sabɛlɛ sambo do zɛkɛ gazɛlɛ. 'Do nɛ, nɛ a kulu dɛ Yeruzalɛmɛ, nɛ a dungu nwa ngɔ nù Israɛlɛ do Yuda vɛ̃ 'do 'bu sabɛlɛ talɛ ngɔ nɛ talɛ.

Davidi ba le Yeruzalɛmɛ

⁶ Ngba soe kpo, nɛ nwa Davidi do owinɔ 'da a, wa nɛa we bi Yeruzalɛmɛ. Nɛ Oyebuzi kɛ wa ɔ zi tɛ kɔ 'bili tɛ nùi ni, wa tɔ̃ hã Davidi na: “Mɔ lé sɛ kɔ le gɛ gɔ. Gɛnɛ kɔ Owi lɔa li do Owi mbi ku, nɛ wa ndi sɛ mɔ iko.” Wa tɔ̃a ni we be na, Davidi wé sɛ we ba le 'da lo fala kpo gɔ.

⁷ (Nɛ nde gɛnɛ kɔ na mɛ ni, nɛ Davidi ba gba ngbo Sioni. Sɔɛ gɛ, wa sa li gba ngboe ni na: “Gba Ngbo nwa 'da Davidi.”)

⁸ Do ngba soe ni, nɛ Davidi tɔ̃a na: “Fala kɛ wele kɔ̃ we nɛ ngɔ Oyebuzi, nɛ ma wia na, a la do wala lì kɛ wa zã do ti nù, nɛ ma hɔ dɛ gbogbo le ni, sɛ nɛ a kpa sɛ wa de. Mi sɛnɛ owi mbi kunɔ do Owi lɔa linɔ ni wena.” (Gulu nɛ hã wa tɔ̃ na: “Owi lɔa li do Owi mbi ku, wa wè tɛ le kɔ tɔa 'da NWA gɔ.”)

⁹ Davidi nɛa, nɛ a kulu dɛ kɔ gba ngboe ni, nɛ a e li ma na: “Gba Ngbo nwa 'da Davidi.” 'Do nɛ, nɛ a tɔ̃a, nɛ wa dɛ 'bɔ ombe gele gba'da kɛ zã gba ngboe ni, yolo tɛ Milo, we hɔ tɛ fala a ɔ nɛ ni.

¹⁰ Na mɛ ni, ngawi 'da Davidi kũ zi dɛ dati kũ fai, we kɛ NWA Gale 'da obe Israɛlɛ zi do a boe.

¹¹ Hiramɛ, nwa kɔ le Tirɛ tumba Owele hã Davidi, nɛ a tombo do te sɛdrɛ, do Owi sɛ te do Owi sɛ ta na, wa dɛ gã tɔa hã Davidi.

¹² Davidi nɛa we zɔ ni, nɛ a ĩ wá na, NWA do tɛ̃ a ngboo ia ɛ do nwa ngɔ nù Israɛlɛ, nɛ a dɛa 'bɔ na, dɔ̃lɔ̃ li nwa 'da ɛ ma yɛ'bɛ, we duzu kɛ obe Israɛlɛ wa a winɔ 'da a.

Obenɔ kɛ Davidi kua wa tɛ Yeruzalɛmɛ

¹³ 'Do kɛ Davidi kulu Hebroni, nɛ a la dɛ Yeruzalɛmɛ 'di ni, nɛ a kala 'bɔ ogele wuko. Mɛ zi a owuko nu tɔa do omakango. Wa kua zi ombe gele bulu be do oboko be.

¹⁴ Li obenɔ Davidi kua wa tɛ Yeruzalɛmɛ i ni ma kɛ: Samua, Sobabɛ, Natanɛ, Salɔmɔ,

¹⁵ Ibarɛ, Elisua, Nefɛgɛ, Yafia,

¹⁶ Elisama, Eliada do Elifelɛtɛ.

Davidi nɛa ngɔ Ofilisti

¹⁷ Ofilisti wa zila na, wa ia Davidi do nwa ngɔ nù Israɛlɛ, nɛ wa vɛ̃ wa tɛa we bi a, takɔ wa ba a. Davidi zila we nɛ, nɛ a yu dɛ tɛ mbe fala kɛ gba ngbo zĩ ma takpa.

¹⁸ Nɛ Ofilisti wa hɔ kɔ gbangɔlɔ̃ 'da Orɛfa, nɛ wa 'danga mɛnɔ di ni ni.

¹⁹ Davidi nɛa we zɔ ni, nɛ a aka nwa na: “Mi wia we bi Ofilisti nde? Mɔ dɛ sɛ na, mi nɛ ngɔ wa nde?” Nɛ nwa gese na: “Mɔ nɛ́, hã mɔ bi wa. Mi e sɛ wa dɛ kɔ̃ mɔ.”

²⁰ Nɛ Davidi la dɛ Bala-Pɛrasimɛ, nɛ a bi Ofilisti, nɛ a nɛ ngɔ wa. Nɛ a tɔ̃ na: “NWA fi gbongbo sanga Owi sɛnɛ mi, ɔ nɛ kɛ ngele lì gbini do ngbo ni.” Yolo dɛ di ni, nɛ wa sa li fala ni na: “Gale Wele Gbini Ngbo.”

²¹ Ofilisti wa nɛa we yu nɛ, nɛ wa la okpikimanɔ 'da wa dɛ di ni. Nɛ Davidi do owinɔ 'da a, wa kala ma, nɛ wa si nɛ.

²² 'Do nɛ là nyɛlɛ wena gɔ, nɛ Ofilisti wa nɛ 'bɔ mbé nɛ, nɛ wa 'danga mɛnɔ kɔ gbangɔlɔ̃ 'da Orɛfa.

²³ Davidi aka 'bɔ NWA mbé nɛ, nɛ NWA gese hã a na: “Mɔ tɛ bì wa dɛ dɛ gɔ. Mɔ nɛ́, kɔ mɔ yolo do 'do wa i, nɛ mɔ hala wa hala. Nɛ mɔ hɔ dɛ 'da wa do mbee kulu zamɔ ote mikokulie.

²⁴ Kɔ mɔ zele giti mɔ ɔ nɛ giti nyanga Owele tɛ la do zu tenɔ, nɛ mɔ bi wa do gbɛngɛ tɛ̃, we kɛ do 'da fala ni, nɛ nde mi tɛ kpe dati mɔ we bi osoda Filisti.”

²⁵ Davidi dɛa ɔ nɛ kɛ NWA ba do nu ɛ ni. Nɛ a bi Ofilisti, nɛ a nɛ ngɔ wa. Nɛ a ndaka wa yolo Geba gbaa we hɔ Gezɛrɛ.