2 SAMUƐLƐ 4 - WE NU GALE 1995

Baana do Rekabɛ wa gbɛa Isɛbalɛ

¹ Isɛbalɛ, be 'da Saulo nɛa we zele na, Abnɛrɛ fia tɛ Hebroni i, nɛ ma hã kili hã a wena. Nɛ zu obe Israɛlɛ vɛ̃ ma vĩ 'bɔ do'do.

² Isɛbalɛ zi do ogã wi bɔa, kɛ wa ngɔ gili onga soda bolonɔ ni. Li wa a Baana do Rekabɛ. Wa zi a obenɔ 'da Rimoni, wi nu fɛlɛ Bɛnzamɛ tɛ kɔ le Bɛerɔtɛ. (Bɛerɔtɛ hɔa zi mbe le ngɔ nù Bɛnzamɛ,

³ yolo do 'da fala Okuti winɔ kɔ le ni wa yu zi dɛ kɔ le Gitaimɛ i ni. Nɛ obe zã wa wa 'bana dɛ Gitaimɛ mɔ tia do sɔɛ gɛ.)

⁴ Mbe be yaa Saulo zi boe, li a a Mɛfibalɛ, be 'da Yonatanɛ. Nɛ nyanga Mɛfibalɛ do bɔa nɛ 'danga zi 'danga. Do 'da fala wa gbɛa Saulo do Yonatanɛ ni, nɛ nde Mɛfibalɛ do sabɛlɛ mɔlɔ. Nɛ 'da fala to fie 'da wa hɔa zi tɛ Yizreɛlɛ i ni, nɛ wuko kɛ a dala a ni, kɔ̃a zi we ba a we yu do a. A kɔa Mɛfibalɛ do gbɛnga tɛ, nɛ Mɛfibalɛ zɔlɔ kɔ̃ a, nɛ a te, nɛ nyanga a 'danga.

⁵ Rekabɛ do Baana, wa nɛa 'da Isɛbalɛ i. Nɛ wa hɔ i mɔ do 'da fala tua wese ngboo, nɛ nde Isɛbalɛ ɔa nù.

^6-7 Wa lia kɔ tɔa i, ɔ nɛ wa tɛa do kpalɛ ni. Nɛ wa kpa Isɛbalɛ, nɛ nde a ɔa nù dɛ ngɔ mɔ ɔi 'da a, tɛ kɔ usu tɔa 'da a i. Wa kɔlɔ do a, nɛ wa dumu zã a do du kɔya 'da wa, nɛ wa gbɛa a. 'Do nɛ, nɛ wa 'bili gɛlɛ a, nɛ wa yu do zu a. Nɛ wa la si li wala gbangɔlɔ̃ lì Yɔrdanɛ. Nɛ wa nɛa do tũi gbaa nɛ fala sa wa dɛ ngɔ gɛ.

⁸ Wa hɔa do zu Isɛbalɛ tɛ Hebroni i, nɛ wa hã ma hã Davidi, nɛ wa tɔ̃ hã a na: “Aa nwa, mɔ zɔ zu Isɛbalɛ, be 'da wi sɛnɛ mɔ Saulo, kɛ a kɔ̃a zi we gbɛ mɔ ni, ma kɛ. Kɔ̃ tũi gɛ, nwa bili nu gbã 'dã mɛ kɛ Saulo do onu fɛlɛ a, wa kɔ̃a zi we dɛ do mɔ ni hã wa.”

⁹ Davidi nɛa we zele ni, nɛ a he mɔ na: “Do zu li NWA wele kpasi, kɛ a fua mi kɔ onga mɛnɔ ni, mɛ nɛ dɛa gɛ ma gàlà mi gɔ.

¹⁰ Wi tɔ̃a zi to fie 'da Saulo ni lingga zi na, ɛ tɛa do dia sako hã mi. Nɛ nde mi ba a, nɛ mi 'bili gɛlɛ a tɛ Siklagɛ. Tɛlɛ tɛ kɛ mi si zi do olo dia sakoe 'da a gɛ a ni.

¹¹ Nɛ nde kɛ 'da nɛ ma nganda sɛ nɛ ngɔ kɛ 'da wi ni. We kɛ nɛ lia kɔ tɔa 'da wele kɛ a dɛ̃ 'dã mɔ gɔ, nɛ nɛ gbɛ a dɛ ngɔ mɔ ɔi 'da a ni. We duzu nɛ, ma hã mi nɛ gbɛ nɛ ngɔ nù gɛ do'do, we si olo 'dã mɛ nɛ dɛa ni.”

¹² Davidi ba nu a hã obe zagbãlã sodanɔ 'da a, nɛ wa 'bili gɛlɛ Rekabɛ do Baana. 'Do nɛ, nɛ wa 'bili kɔ̃ wa do onyanga wa, nɛ wa gãlã ma dɔ̃ɔ do zã lì tɛ Hebroni. Nɛ wa ba zu Isɛbalɛ, nɛ wa mi ma kɔ zuni 'da Abnɛrɛ tɛ Hebroni.