2 SAMUƐLƐ 3 - WE NU GALE 1995

¹ 'Do bole sanga onu fɛlɛ Saulo do owinɔ 'da Davidi nyɛlɛ zi wena. Nɛ nde ngawi 'da Davidi kũ zi dɛ dati kũ fai, nɛ ngawi 'da Owi nu fɛlɛ Saulo, ma si nù si fai.

Obenɔ kɛ Davidi kua wa tɛ Hebroni

² Tɛ Hebroni i, Davidi kua zi obe dɛlɛ wena. Li wa ma kɛ: Kuti be wi a Amnoni, a kua a do Ahinoamɛ, boko Yizreɛlɛ.

³ Be kɛ bɔa a Kilabɛ, a kua a do Abigailɛ, boko Karmɛlɛ, kɛ a a wuko olo Nabalɛ ni. Be kɛ talɛ a Absalɔmɛ, a kua a do Maka, be 'da Talmai, nwa ngɔ nù Gesurɛ.

⁴ Be kɛ nalɛ a Adonia, a kua a do Hagitɛ. Be kɛ mɔlɔ a Sɛfatia, a kua a do Abitalɛ.

⁵ Be kɛ gazɛlɛ a Itreamɛ, a kua a do Egla. Obulu benɔ Davidi kua zi wa tɛ Hebroni i gɛ wa a ni.

Abnɛrɛ ba da nu ngba a do Isɛbalɛ

⁶ Ɔ nɛ kɛ 'do bole sanga nu fɛlɛ Saulo do owinɔ 'da Davidi nyɛlɛ zi nyɛla fai ni, nɛ owinɔ wa yolo 'do Saulo ni, wa zele zi nu Abnɛrɛ dɛ dati zila fai.

⁷ Saulo zi do mbe wuko 'do mɔ a, li a a Rispa, nɛ a a be 'da Aya. Mbe tũ kpo, nɛ Isɛbalɛ aka Abnɛrɛ na, gulu kɛ a ɔa do kɛnɛ baa ɛ we ge nde?

⁸ Abnɛrɛ nɛa we zele ni, nɛ zã a nɔ̃lɔ̃ nganda wena, nɛ a tɔ̃ na: “Mi a tolo yɛnggɛ 'do Oyudanɔ nde? Gbaa mɔ zi belee, mi bia hã nu fɛlɛ baa mɔ Saulo na, mi yolo 'do a, nɛ mi 'bɔ 'do onya a do oyali ngba a. Mi dɛa vɛ̃ na, mɔ tɛ té dɛ kɔ̃ Davidi gɔ. Nɛ sɔɛ gɛ, mɔ dãlã do mi na, mi ɔa do wuke ni nde?

^9-10 Yolo do sɔɛ gɛ, mi nɛ si 'do Davidi. NWA kpua mbulu hã a na, a ba sɛ to nwa kɔ̃ Saulo do obe zã a, nɛ a e sɛ a do nwa ngɔ nù Israɛlɛ do Yuda vɛ̃, yolo ndɔti nùi we hɔ Sɔkpɔ nɛ. Kɔ mi tɔ̃ hã mɔ na, mi gala sɛ Davidi na, mbuli kɛ NWA kpua hã a ni, ma dɛ tɛ̃ ɛ gbãlã we. Mi dɛ̀ ni gɔ, nɛ NWA a gbɛ mi.”

¹¹ Isɛbalɛ nɛa we zele we ni, nɛ kili ba a wena, nɛ a kpà ngawi gese we kpo hã Abnɛrɛ gɔ.

Abnɛrɛ si 'do Davidi

¹² Abnɛrɛ tumba owi to we tɔ̃ hã Davidi na: “Wi nɛ dungu nwa ngɔ nùi gɛ vɛ̃ a wio nde? Mɔ gbá tɔkɔ do mi, nɛ mi gala sɛ mɔ na, obe Israɛlɛ vɛ̃ wa ngɛmɛ ngba wa dɛ ti kɔ̃ mɔ.”

¹³ Nɛ Davidi gese hã a na: “Ma a dia, mi kɔ̃a. Mi gba sɛ tɔkɔ do mɔ. Nɛ nde mi aka mɔ tati a we mɔ kpo, ma wia na, mɔ kpe kɛnɛ mi Mikalɛ, be 'da Saulo dati mɔ, hã mɔ tɛ do a hã mi. Mɔ dɛ na mɛ ni, sɛ nɛ mɔ we sɛ we hɔ dati mi de.”

¹⁴ 'Do nɛ, nɛ Davidi tombo Owi to hã Isɛbalɛ, be 'da Saulo na, a gese kɛnɛ ɛ Mikalɛ hã ɛ. We kɛ ɛ ba zi a, nɛ ɛ hã do'bolo nu ga Ofilisti kama kpo 'do a.

¹⁵ Nɛ Isɛbalɛ ba nu a hã Abnɛrɛ na, a ba Mikalɛ kɔ̃ wili a Paltiɛlɛ, be 'da Laisi, kɔ a nɛ do a hã Davidi.

¹⁶ Wa nɛa we la nɛ, nɛ Paltiɛlɛ kã zi Mikalɛ. A nɛa do 'do wa ni tɛ he kɔ̃a ni gbaa, nɛ a hɔ kɔ le Bahurimɛ, nɛ Abnɛrɛ tɔ̃ hã a na, a kpolo tɛ̃ a, nɛ Paltiɛlɛ kpula tɛ̃ ɛ.

¹⁷ Abnɛrɛ wila we do okumunɔ 'da Oisraɛlɛ. A tɔ̃a hã wa na: “Gbaa mɔ zi belee, nɛ kɔ̃a na, Davidi hɔ nwa ngɔ nɛ.

¹⁸ Kɔ ngangga ni, mɛ a dia 'da fala dɛ linggamɔ zu nɛ. Nɛ ĩ na, nwa tɔ̃a do zu li Davidi na, ɛ fo sɛ winɔ 'da ɛ obe Israɛlɛ ti mbula 'da Ofilisti, do ogele wi sɛnɛ wa vɛ̃ do wala 'da Davidi, wi toe 'da ɛ.”

¹⁹ Abnɛrɛ wila 'bɔ we do onu fɛlɛ Bɛnzamɛ. 'Do nɛ, nɛ a la Hebroni i, we yɔlɔ gulu nɛ hã Davidi na, onu kpala Bɛnzamɛ do ogele Oisraɛlɛ vɛ̃ wa kɔ̃a wila we ɛ tɔ̃a hã a ni de wena.

²⁰ A la do Owele 'bu ngɔ wa bɔa, nɛ wa hɔa 'da Davidi tɛ Hebroni i, nɛ Davidi dɛa mɔ dɔ hã wa.

²¹ Nɛ Abnɛrɛ tɔ̃ hã Davidi na: “Aa nwa, mɔ kɔ̃, nɛ mi si, kɔ mi ngɛmɛ li obe Israɛlɛ vɛ̃ dɛ ti kɔ̃ mɔ. Wa gba sɛ tɔkɔ do mɔ, nɛ mɔ we sɛ we dɛ to nwa tɛ ngɔ nùi gɛ vɛ̃, ɔ nɛ kɛ mɔ kɔ̃a ni.” Davidi hã wala hã Abnɛrɛ na a si, nɛ a si do dia nɛ.

Yoabɛ gbɛa Abnɛrɛ

²² 'Do nɛ la sĩ, nɛ Yoabɛ do osodanɔ wa zɔ mɔ tɛ Davidi ni, wa hɔ. Nɛ nde wa yula tɛ bi bolo, nɛ wa si do dia mɛnɔ wa kala li bole ni dɔ wena. Abnɛrɛ 'bànà zi 'da Davidi tɛ Hebroni ni gɔ, we kɛ nwa Davidi hã wala hã a na, a si do dia nɛ.

²³ 'Da fala Yoabɛ nɛa we hɔ do osodanɔ 'da a ni, nɛ mbe wele kpo tɔ̃ hã a na, Abnɛrɛ, be 'da Nɛrɛ tɛa we zɔ nwa. Nɛ nwa ia a ni, nɛ a si do lɔa tɛ̃ a.

²⁴ Yoabɛ nɛa we zele ni, nɛ a le 'da nwa Davidi, nɛ a tɔ̃ hã a na: “Kɛ mɔ dɛa ni a ge nde? Abnɛrɛ tɛa 'da mɔ nga, nɛ mɔ la a, nɛ a si iko nde?

²⁵ Mɔ ĩ̀ ti Abnɛrɛ gɔ nde? A tɛa we ɔlɔ mɔ iko, takɔ a ĩ ti mɛnɔ mɔ dɛ ni, do falanɔ mɔ yɛnggɛ nɛ ni vɛ̃.”

²⁶ Nɛ Yoabɛ hɔa nza 'da nwa ni, nɛ a tombo Owi to na, wa nɛ 'do Abnɛrɛ, kɔ wa ba a. Wa nɛa, nɛ wa kpa Abnɛrɛ tɛ nu kɔ̃ lì Sira, nɛ wa ba a si do a, nɛ nde Davidi ĩ̀ fala nɛ gɔ.

²⁷ Abnɛrɛ nɛa we hɔ nu ngba le Hebroni nga, nɛ Yoabɛ sa mɔ hã a dɛ gele fala, ɔ nɛ kɛ a nɛ ba zã zu we do a ni. Wa hɔa i mɔ, nɛ a dumu zã a do du kɔya 'da a, nɛ a gbɛ a olo kɛ a gbɛa zi tɛ mɛ 'bɔ nya a Asaɛlɛ ni.

²⁸ Davidi nɛa we zele we mɛ ma la ni, nɛ a tɔ̃ na: “nwa ĩ de wena na, tɔkɔ tɛ Abnɛrɛ, be 'da Nɛrɛ zu mi, do zu owinɔ ngɔ nùi 'da mi bina.

²⁹ E kɔ tati a Yoabɛ do nu fɛlɛ a vɛ̃, hã wa kpa si olo nɛ. E kɔ kɔ nu fɛlɛ kula 'da wa, wa kpa Owi sɔpisi do Owi zɛlɛ ngbɛlɛ fai, nɛ wa kpa 'bɔ Owi kunda, do Owi wɔ, do wanɔ kɛ wa fe sɛ li bolo ni.”

³⁰ A tɔ̃a ni mba gɔ, we kɛ Yoabɛ do nya a Abisai wa gbɛa zi Abnɛrɛ, olo kɛ a gbɛa nya wa Asaɛlɛ li bole tɛ Gabaoni i ni.

³¹ Nwa Davidi tɔ̃a hã Yoabɛ do osodanɔ 'da a na, wa ɛ̃ tulu tɛ wa, nɛ wa he'de saki, kɔ wa dungu gɛla Abnɛrɛ. Nɛ Davidi do tɛ̃ a ngboo la do 'do wɔlɛ ni.

³² Nɛ wa nɛa, nɛ wa mi Abnɛrɛ tɛ Hebroni. Davidi tia dɛ ngɔ zunu Abnɛrɛ, nɛ a ma ngɔ he nɛ. Nɛ ogili winɔ vɛ̃, wa ma zi tɛ mɛ 'bɔ ngɔ he kɔ̃a.

³³ 'Do nɛ, nɛ Davidi ga zuma 'bakoe gɛ, we duzu Abnɛrɛ na: “Aa Abnɛrɛ, gulu kɛ wa gbɛa mɔ we ge nde? Gulu kɛ mɔ fia ɔ nɛ yɔndɔ wi ni we ge nde?

³⁴ Wa ɛ̀nzɛ̀ nu kɔ̃ mɔ do dɔkpɔ gɔ. Wa fì 'bɔ mɔ bolo nyanga mɔ gɔ. Nɛ nde o'dã wi wa gbanga mɔ, nɛ wa gbɛ mɔ.” Owinɔ vɛ̃ di ni ni wa he zi hia fai.

³⁵ 'Do nɛ, nɛ wa tɛa do nyɔngɔmɔ hã nwa Davidi, nɛ nde wese 'bana. Nɛ Davidi kana tɛ̃ ɛ na, e kɔ Gale gbɛ ɛ, fala kɛ ɛ nyɔngɔ be 'bulu nyɔngɔmɔ, dati kɛ na wese gɛ̃ ni.

³⁶ Owinɔ vɛ̃ wa zila we ni, nɛ ma dia tɛ wa. Mɛnɔ vɛ̃ kɛ nwa Davidi dɛ zi ni, ma de zi tɛ owinɔ wena.

³⁷ Na mɛ ni, Oyuda do Oisraɛlɛ vɛ̃ wa ĩ zi do ngba soe ni na, nwa Davidi hã a bà nu a na, wa gbɛ Abnɛrɛ, be 'da Nɛrɛ gɔ.

³⁸ Davidi tɔ̃a 'bɔ hã Owi olo li a na: “Nɛ ĩ fala kɛ na, gã wi ngɔ nù Israɛlɛ fia ni nde?

³⁹ Sɔɛ gɛ, gɛnɛ kɔ mi a nwa, nɛ nde mi mbɔkɔ wena. Nɛ obenɔ 'da Sɛruya ni, sila wa nganda la mi. Nɛ nde e kɔ NWA Gale do tɛ̃ a, a hã etumbu hã wa olo 'dã mɛ wa dɛa ni.”