2 SAMUƐLƐ 24 - WE NU GALE 1995

Davidi tɔlɔ obe Israɛlɛ

¹ Mbe ngba soe kpo, nɛ zã NWA nɔ̃lɔ̃ 'bɔ mbé nɛ dɛ tɛ obe Israɛlɛ. Nɛ a dɛa na, nwa Davidi dɛ mɔ kɛ ma fa ngamɔ dɛ tɛ wa ni. Nɛ a e dɛ kɔ sila a na, a nɛ, kɔ a tɔlɔ Oisraɛlɛ do Oyuda vɛ̃.

² Nɛ nwa Davidi ba nu a hã Yoabɛ, nwa ngɔ osodanɔ 'da a na: “Mɔ yɛ́nggɛ́ ngɔ nù Israɛlɛ vɛ̃, yolo ndɔti le, we hɔ Sɔkpɔ nɛ, nɛ wa tɔlɔ winɔ, we kɛ mi kɔ̃a we ĩ ti dɔa wa.”

³ Nɛ Yoabɛ gese hã a na: “Aa nwa, e kɔ NWA Gale 'da mɔ dɛ na, ngɔ gili winɔ gɛ wa dɔ dɛ dati fala kama kpo, nɛ a dɛ ní dati fie 'da mɔ. Nɛ nde gulu kɛ mɔ kɔ̃a we tɔlɔ wa we ge nde?”

⁴ Gɛnɛ kɔ na mɛ ni, nɛ nde nwa sula zi 'do we a tɔ̃a ni nganda wena, nɛ Yoabɛ do ogã wi ngɔ sodanɔ, wa wè zi we bɛ ma gɔ. Wa hɔa nza kɔ tɔa 'da nwa, nɛ wa la we tɔlɔ obe Israɛlɛ.

⁵ Wa kũ lì Yɔrdanɛ, nɛ wa ndo tɔlɔ winɔ kɔ le Arɔɛrɛ, do wanɔ kɔ le kɛ kɔ gbangɔlɔ̃ i ni. Wa yolo di ni, nɛ wa ba si gbãlã ngɔ, nɛ wa la do ngɔ nù 'da Ogadɛ we nɛ dɛ Yazɛrɛ.

⁶ Wa lia ngɔ nù Galadɛ, nɛ wa la dɛ Danɛ-Yanɛ do olenɔ kɛ zã nɛ ni tɛ ngɔ nùi 'da Ohiti. Nɛ 'do nɛ, nɛ wa la dɛ Sidoni.

⁷ Wa nɛa ni gbaa, nɛ wa la dɛ Tirɛ, le kɛ gba ngbo zĩ ma takpa, nɛ wa hɔ 'bɔ tɛ lenɔ vɛ̃ kɛ ma zi dati a mɔ́ Ohivi do Okanana ni, nɛ wa Sɔkpɔ tɛ Bɛrseba. Mɔ yolo ngɔ nù Yuda, nɛ nde Bɛrseba do si ba gɔtɔ.

⁸ Ma nɛa we la zɛkɛ kusi do 'bu tũ bɔa, nɛ nde wa ia lenɔ vɛ̃ ia, nɛ wa si 'do dɛ Yeruzalɛmɛ i.

⁹ Wa hɔa i mɔ, nɛ Yoabɛ ba li winɔ wa tɔlɔ wa ni hã nwa Davidi. Nɛ nde nù Israɛlɛ zi do owi wili koto kama ngbɛ'dɛ'dɛ, nɛ nù Yuda do Owi wili koto kama mɔlɔ. Wi wilinɔ ni a wanɔ kɛ wa wia we nɛ bolo ni.

Gale hã etumbu hã Davidi we 'dã mɛ 'da a

¹⁰ Davidi nɛa we tɔlɔ winɔ do'do, nɛ a ĩ do kɔ sila a na, ɛ dɛa 'dã mɔ. Nɛ a tɔ̃ hã NWA na: “Mi dɛa gã 'dã mɔ. Mi ĩ di ni na, mi dɛa mɔ yɔnda. Kɔ NWA, mɔ fó ku'da 'dã mɛ ni zu mi do'do.”

^11-12 Nɛ NWA Gale tɔ̃ hã Gadɛ, wi gba olo nu a, kɛ a 'bɔ a wi tɔ̃ mbula hã Davidi ni na, a nɛ́, kɔ a kpa Davidi, nɛ a tɔ̃ hã a na: “NWA ia ongamɔ talɛ dati mɔ na, mɔ saka mbe kpo kɔ nɛ, nɛ a tombo sɛ ngamɛ mɔ saka ni dɛ ngɔ mɔ.” Fala sa, kɔ Davidi nɛa we kulu ngɔ ngɔ mɔ ɔi 'da a ni,

¹³ nɛ nde Gadɛ hɔa 'da a i, nɛ a tɔ̃ toe 'da Gale hã a. A aka Davidi na: “Mɔ kɔ̃a na, gba wɔ te ngɔ nùi 'da mɔ we sabɛlɛ sambo, tabi wi sɛnɛ mɔ wa ndaka mɔ, nɛ mɔ yu wa 'do zɛkɛ talɛ, tabi 'dã zɛlɛ te ngɔ nùi 'da mɔ 'do tũ talɛ nde? Mɔ lénggé ngɔ nɛ, hã mɔ gese nu nɛ hã mi, kɔ mi tɔ̃ hã NWA Gale kɛ a tumba mi ni.”

¹⁴ Nɛ Davidi gese na: “Mi a kɔ gã 'bako. Nɛ nde mi kɔ̃̀ na, Owele hã wa hã etumbu hã mi gɔ. Mi kɔa na, NWA a a hã etumbu hã mi, we kɛ a do 'bako li a boe.”

¹⁵ Nɛ NWA tumba 'dã zɛlɛ dɛ ngɔ nù Israɛlɛ. Nɛ zɛlɛ ni ba wa yolo do titole ni gbaa we hɔ 'da fala a wia ma ni. Nɛ yolo ndɔti le we hɔ Sɔkpɔ nɛ, owi wili koto 'bu wa sambo wa fia.

¹⁶ 'Da fala anzɛ 'da NWA nɛa we kala kɔ̃ ɛ dɛ ngɔ na, ɛ tombo zɛlɛ dɛ ngɔ owi Yeruzalɛmɛ ni, nɛ NWA kpolo linggamɛ 'dɛ ɛ, nɛ a tɔ̃ hã anzɛ ni na: “Ma wia ia, mɔ bá kɔ̃ mɔ dɛ nù!” Do 'da fala ni, nɛ nde anzɛ 'da NWA zi dɔ̃ɔ do fala kɛ Arvana, be Yebuzi, 'dafa we zɛ do kpalɛ ble 'da a ni.

¹⁷ Davidi zɔa anzɛ kɛ a gbɛ winɔ ni, nɛ a tɔ̃ hã NWA na: “Wi a mi a mi tia do ngbangga, wi a mi a mi dɛa 'dã mɔ. Nɛ nde owinɔ kɛ wa kpa 'bakoe gɛ, wa dɛ̀ 'dã mɔ gɔ. Kɔ ma wia na, mɔ hã etumbu hã mi, do nu fɛlɛ mi.”

Davidi dɛa gbagala we dɔ do sa'de hã NWA

¹⁸ Do kpo ngba soe ni, nɛ Gadɛ nɛa, nɛ a kpa Davidi, nɛ a tɔ̃ hã a na: “Mɔ kṹ ngɔ kala kɛ Arvana 'dafa we zɛ do kpalɛ ble 'da a ni, nɛ mɔ dɛ gbagala dɛ di ni we dɔ sa'de ngɔ nɛ hã NWA.”

¹⁹ Davidi la dɛ ngɔ kala i ɔ nɛ kɛ NWA ba do nu ɛ hã a do wala 'da Gadɛ ni.

²⁰ 'Da fala ni, nɛ nde Arvana zi ngɔ kala ni, nɛ a ka mɔ, nɛ a zɔ nwa Davidi do owi olo li a, nɛ nde wa tɛ dɛ 'da a nga. Nɛ a gɔnɔ dati wa, nɛ a gu li a nù dati Davidi,

²¹ nɛ a aka na: “Nwa, gulu kɛ mɔ tɛa 'da mi nga we ge nde?” Nɛ Davidi gese na: “Mi do wɔ na, mi oso fala gɛ kɔ̃ mɔ. Mi kɔ̃a we dɛ gbagala tɛ dɛ, kɔ mi dɔ sa'de ngɔ nɛ hã nwa, takɔ 'dã zɛlɛ kɛ ma tia ngɔ owinɔ gɛ ma e.”

²² Nɛ Arvana tɔ̃ na: “Nwa, mɔ bá mɛ kɛ mɔ kɔ̃a ni, hã mɔ hã do dɔnggamɔ hã Gale. Ongɔmbɛnɔ 'da mi wa kɛ. Mɔ kálá wa, hã mɔ dɔnggɔ do Gale. Nɛ te ngilingili do kunggu gɛlɛ ongɔmbɛnɔ sɛ a gua.

²³ Mi hã mɛnɔ ni vɛ̃ hã mɔ. E kɔ NWA Gale 'da mɔ kɔ̃ gɛnɛ dɔnggamɛ 'da mɔ.”

²⁴ Nɛ nwa Davidi tɔ̃ hã Arvana na: “Mɔ hã́ sɛ mɔ kpo hã mi iko gɔ. Mi kɔ̃a we oso ma kɔ̃ mɔ usa. Mi kɔ̃̀ we dɔnggɔ NWA Gale 'da mi do mɛ 'da mɔ, nɛ nde mi òsò ma usa gɔ ni gɔ.” Nɛ Davidi usa ngɔmbɛnɔ 'da Arvana, mba do fala zɛ kpalɛnɔ, do mbili 'bu nɛ mɔlɔ.

²⁵ A dɛa gbagala dɛ di ni, nɛ a dɔ osa'de ngɔ nɛ hã NWA Gale, nɛ a gbɛ ombe sa'denɔ we be dɛa na. Ma a NWA ĩ 'bako hã owinɔ, nɛ 'dã zɛlɛ kɛ ma tia ngɔ nù Israɛlɛ ni, ma ia.