2 SAMUƐLƐ 23 - WE NU GALE 1995

Sɔkpɔ wenɔ kɛ Davidi wila zi ni

¹ Nɛ zélé tala wenɔ kɛ Davidi wila zi ma ni. Davidi a be 'da Yɛse, nɛ a zi a gã wi ngboo. Gale 'da Yakɔbɔ saka a, nɛ a e a do nwa. Nɛ obe Israɛlɛ wa ga zi zuma do zu li a, nɛ ma de zi tɛ wa wena. Kɛ gɛ mɛ a Sɔkpɔ wenɔ kɛ Davidi wila zi ni. A na:

² “Hi Wi 'da nwa ia wila we kɔ nu mi, nɛ mi tɔ̃ tati a wenɔ kɛ a kɔ̃a ni.

³ Gale 'da lɛ obe Israɛlɛ wele we, Gale, wi amba zu lɛ obe Israɛlɛ tɔ̃a hã mi na: ‘Nwa kɛ a zɔ mɔ tɛ owinɔ 'da a do bɔlɔ zu, nɛ a dɛ to nwa 'da a nɛ́ kɛ zã mi Gale kɔ̃a ni,

⁴ a ɔ nɛ wese, kɛ ma gba do fala dia li nza, nɛ nde fo gba kutu we kele li nɛ bina ni. Wese ni to olo kolo, nɛ wɔkɔsɔnɔ ma hɔ, nɛ ma 'bɔ de wena.’

⁵ “Nɛ zélé tɛlɛ tɛ kɛ Gale wele nu a tɛ mi, fala nɛ kpo do tɛ obe zã mi gɛ. A gba tɔkɔ do mi, nɛ a e mbula ngɔ nɛ na, da dɛ kɔ ma 'dángá gɔ, hã ma ɔ fai. 'Da falanɔ vɛ̃, a dɛ na mi nɛ ngɔ owi sɛnɛ mi, nɛ a hã omɛnɔ kɛ zã mi kɔ̃a ni hã mi.

⁶ Nɛ nde owinɔ vɛ̃ kɛ wa ĩ̀ ti Gale gɔ ni, wa ɔ nɛ nyaka tɛ̃, kɛ wa zu'du, nɛ wa da zamɔ, nɛ nde wa 'bé tɛ nɛ do wila kɔ̃ wa gɔ ni.

⁷ Wi kɛ a kɔ̃ we dɛ to fala tɛ̃ ni, nɛ a ba te, tabi kunggu mɔ bolo dɛ kɔ̃ a, nɛ a ngɛmɛ do wɔkɔsɔ tɛ̃, nɛ a dɔ ma vɛ̃ dɛ di ni.”

Onga sodanɔ 'da Davidi

⁸ Kɛ gɛ mɛ a li onga sodanɔ 'da Davidi. Wi kɛ dati a Isɛbalɛ, wi Hakmoni. A zi a nwa ngɔ onwa bolonɔ 'da Davidi talɛ. A gbɛa zi Owele kama ngbɛ'dɛ'dɛ li bolo kpo.

⁹ Wi kɛ bɔa a Elazarɛ, be 'da Dodo, nɛ a a wi kɔ le Ahoa. A a mbe kpo kɔ nwa bolonɔ 'da Davidi talɛ, kɛ wa kã zi a do 'da fala Ofilisti wa mba ngba wa, nɛ wa bi bolo do obe Israɛlɛ, nɛ obe Israɛlɛ wa yu dati Ofilisti ni.

¹⁰ Nɛ nde Elazarɛ kpãlã zi sila a, nɛ a gbɛa Ofilisti gbaa, nɛ kɔ̃ a gɛ̃a, nɛ ma dɛ yɛɛ tɛ 'be te go'do du kɔya 'da a. Tɛlɛ tɛ kɛ NWA hã zi ngawi hã obe Israɛlɛ ngba soe ni, nɛ wa nɛa ngɔ owi sɛnɛ wa gã wena gɛ a ni. Osoda Israɛlɛ kɛ wa yu bole dati Ofilisti ni, wa kpolo tɛ wa dɛ 'da Elazarɛ nga, tati a we kala dia mɔ tɛ winɔ a gbɛa wa ni iko.

¹¹ Wi kɛ talɛ a Sama, be 'da Age, wi kɔ le Hararɛ. 'Da fala Ofilisti, wa mba ngba wa tɛ le Lehi, tɛ kɔ fɔ kpalɛ li ma a lɛntiɛ ni, nɛ osoda Israɛlɛ wa yu 'bɔ dati wa do'do. Lɛntiɛ ma ɔ nɛ gbali ni.

¹² Nɛ Sama yula dɛ gbogbo fɔɛ ni, nɛ a bɛ̃ zu nɛ hã Ofilisti, nɛ a gbɛ wa. Tɛlɛ tɛ kɛ NWA hã zi ngawi hã obe Israɛlɛ na, wa nɛ ngɔ owi sɛnɛ wa gã wena gɛ a ni.

¹³ 'Do nwa bolonɔ 'da Davidi talɛ ni, mbe onga soda bolo wa zi 'bɔ fala wa bi do bole ni boe. Wa mba zi ngɔ gili wa 'bu wa talɛ. Nɛ mbe tũ kpo, 'da fala kala kpalɛnɔ, nɛ onga soda talɛ kɔ wanɔ ngɔ gili wa 'bu wa talɛ ni, wa nɛa, nɛ wa kpa Davidi tɛ kɔ ta tɛ Adulamɛ. 'Da fala ni, nɛ nde Ofilisti wa 'dafa fala ɔi 'da wa tɛ kɔ gbangɔlɔ̃ 'da Orɛfa.

¹⁴ Nɛ ombe wa zi tɛ Bɛtleɛmɛ. Nɛ Davidi zi a tɛ fala usu do tɛ wi 'da a i,

¹⁵ nɛ a ma ngɔ lengge le 'da a Bɛtleɛmɛ, nɛ wɔ tɛ le 'da a ba a wena, nɛ a aka na: “Wi wia we nɛ we so lì nɔ nɔa kɔ kɔ̃ lì tɛ nu ngba le Bɛtleɛmɛ i hã mi a wio nde?”

¹⁶ Nɛ onga sodanɔ talɛ ni, wa nɛa, nɛ wa gbo do kɔ Ofilisti ni, nɛ wa so lì kɔ kɔ̃ɛ ni, nɛ wa si do ma hã Davidi. Davidi nɛa we zɔ ni, nɛ a bɛ̃ we nɔ lì ni, nɛ a a ma nù, we dɔnggɔ do NWA Gale.

¹⁷ Nɛ a tɔ̃ na: “nwa, mi wè we nɔ lì gɛ fala kpo gɔ. Ma ɔ nɛ tɔkɔ tɛ winɔ kɛ wa nɛa, we so ma ni, we kɛ wa hɔa fɛna fio.” Nɛ a bɛ̃a nɔ lì wa tɛa nɛ ni. Ki ni a gba mɛ kɛ onga sodanɔ talɛ ni wa dɛa gɛ a ni.

¹⁸ Abisai, nya Yoabɛ be 'da Sɛruya, a zi a nwa ngɔ gili osoda 'bu wa talɛ. Nɛ mbe tũ kpo, nɛ Abisai ba sɛlɛ 'da a, nɛ a bi do owi sɛnɛ wa, nɛ a gbɛ wa kama talɛ. Nɛ a kpa dɔlɔ li sanga onga sodanɔ 'bu wa talɛ ni.

¹⁹ Sanga osodanɔ ni, Abisai zi lɔ wanɔ sako sɔ̃a gbãlã tɛ 'da wa yɛ'bɛ wena ni. Nɛ a zi 'bɔ a nwa ngɔ ongba a, nɛ nde a wè kɔ̃ do nwa bolonɔ 'da Davidi talɛ ni gɔ.

²⁰ Bɛnaya, be 'da Yoyada, wi kɔ le Kabseɛlɛ, a zi a be yaa mbe nganga bolo kpo, nɛ a dɛ zi 'bɔ mɔ sɔ̃a gbãlã tɛ wena. Bɛnaya gbɛa zi Oariɛlɛnɔ bɔa ngɔ nù Moabɛ ni. Nɛ mbe ngba soe kpo, nɛ a zĩlĩ kɔ kɔ̃̀ lì, nɛ a gbɛ gbɔgbɔ. Do 'da fala ni nɛ nde gɛ̃ɛ ba wena, nɛ be sɛsɛ kolo tɛ ala do omɔ ɔ nɛ gbãlã mũlũ ni, nɛ ma kpe ngɔ nùi vɛ̃.

²¹ A gbɛa zi 'bɔ mbe du soda Ezipeto kpo. Soda ni zi do sɛlɛ kɔ̃ a, nɛ Bɛnaya bi a do te, nɛ a ba sɛlɛ kɔ̃ a, nɛ a gbɛ do a.

²² Ki ni a gba mɛnɔ kɛ Bɛnaya dɛa zi, nɛ a kpa do dɔ̃lɔ̃ li sanga onga sodanɔ 'bu wa talɛ gɛ a ni.

²³ Sanga osodanɔ ni, Bɛnaya zi kɔ wanɔ gbãlã tɛ wa sɔ̃ wena ni, nɛ nde a wè kɔ̃ do nwa bolonɔ 'da Davidi talɛ ni gɔ. Davidi ia zi a do nwa ngɔ osodanɔ wa zɔ mɔ tɛ̃ a ni.

^24-39 Kɛ gɛ a li ombe kɔ onga sodanɔ 'bu wa talɛ ni. Wi zi a: Asaɛlɛ, nya Yoabɛ Elananɛ, be 'da Dodo, wi Bɛtleɛmɛ Sama do Elika, owi Harɔdɛ Helɛsi, wi Pelɛtɛ Ira, be 'da Ikɛsi wi Tekoa Abiezɛrɛ, wi Anatɔtɛ Mɛbunai, wi Husa Salmoni, wi Ahoa Marai, wi Nɛtofa Helɛbɛ, be 'da Baana, wi Nɛtofa Itai, be 'da Ribai, wi Gibea, ngɔ nù Bɛnzamɛ Bɛnaya, wi Piratoni Hidai wi Gasɛ, le kɛ ma do osulu lì Abialboni, wi Bɛtɛ-Araba Azmavɛtɛ, wi Bahurimɛ Eliaba, wi Salboni Yonatanɛ, mbe kɔ obenɔ 'da Yasɛnɛ Sama, wi Hararɛ Ahiamɛ, be 'da Sararɛ, wi Hararɛ Elifelɛtɛ be 'da Ahasibai. A zi 'bɔ a be yaa mbe wi wili kɔ le Maaka. Eliamɛ, be 'da Ahitofɛlɛ, wi Gilo Hɛsarai, wi Karmɛlɛ Parai, wi Arabɛ Igalɛ, be 'da Natanɛ, wi Soba Bani, wi nu kpala Gatɛ Selɛkɛ, wi Amoni Narai, wi Bɛerɔtɛ. A zi a wi 'be mɔ bi bolonɔ 'da Yoabɛ, be 'da Sɛruya. Ira do Garɛbɛ, owi nu fɛlɛ Yetɛrɛ Uri, wi Hiti. Wa mba zi vɛ̃ 'bu wa talɛ ngɔ wa sambo.