2 SAMUƐLƐ 22 - WE NU GALE 1995

Davidi ga zuma we hã iɔ̃nae hã Gale

¹ Davidi ga zuma gɛ hã NWA, do 'da fala NWA kpasa a ti kɔ̃ Saulo do ti kɔ̃ Owi sɛnɛ a vɛ̃ ni. A na:

² Aa NWA, mɔ a wi amba bolo zu mi, mɔ a wi kele zu mi.

³ Aa Gale 'da mi, mɔ a kpangba ta, kɛ mi wia we usu kɔ nɛ ni, mɔ a ngele kɛ ma kele mi li bolo, mɔ a gba ngbo kɛ ma usu zu mi. Mɔ amba zu mi, nɛ mɔ kpasa mi ti kɔ̃ owi sɛnɛ mi.

⁴ Ma wia na, lɛ dɔnggɔ NWA, we kɛ mi sa mɔ hã a, nɛ a gbaka mi, nɛ a fua mi ti kɔ̃ owi sɛnɛ mi.

⁵ Fio nɛa ngɔ mi ɔ nɛ ngele lì ni, ma sulu dɛ ngɔ mi ɔ nɛ hɛ̃a lì.

⁶ Fio ba mi nɛ́ bili ni, nɛ fɛlɛ nɛ ma kasa mi.

⁷ Mi tia kɔ 'bako, nɛ mi sa mɔ hã NWA. Mi zɛa nu mi hã Gale 'da mi na, a gbaka mi. Hiamɛ 'da mi ma lia zala a, nɛ a zila gɛlɛ mi kɔ tɔa 'da a li nza i.

⁸ Nùi ma tana, nɛ nyanga li nza ma yaka, nɛ nùi do li nza ma zĩ gilamboo, we kɛ dã ba NWA Gale wena.

⁹ Zɛ̃ we kutu nu zɔ̃ Gale, nɛ nu a nyɛ we. Be tolo we hɔa kɔ nu a, nɛ ma bɛlɛ mɛnɔ.

¹⁰ NWA 'dɔlɔ li nza, nɛ a zĩlĩ dɛ nù nga, nɛ nde tũ gba kutu ti nyanga a.

¹¹ A kũ dɛ li 'do anzɛ, nɛ a bũlũ do a, nɛ a la do kɔ gba bũ kamba.

¹² A fi gba tũ ngɔ a, nɛ ogba kutunɔ, ma 'bua ngbɛ ɛ do lì, nɛ ma kele a vɛ̃.

¹³ Gba nyɛa we kpia dati a, nɛ be tolo we hɔ kɔ nyɛa we ni.

¹⁴ NWA ba nu a, nɛ kolo ua dã li nza i. Nɛ wa zila wala gɛlɛ a Gale, kɛ a nɛa ngɔ mɛnɔ vɛ̃ ni.

¹⁵ A tombo nyɛa li kolo, nɛ ma vĩ zu owi sɛnɛ a. Nɛ a da kpilinɔ 'da a, nɛ ma pɛsɛ wa.

¹⁶ Dã ba NWA wena, nɛ a fi gba bũ kamba, nɛ ma ɔ̃sɔ̃ gba lìnɔ, nɛ ma na nù, nɛ nyanga nza ɔa dɛ wila fala.

¹⁷ NWA 'bana dɛ ngɔ i, nɛ a ɛfɛ kɔ̃ a, nɛ a ba mi, nɛ a fo mi kɔ ngamɛnɔ kɛ ma gulu zu mi ni.

¹⁸ A kpasa mi ti kɔ̃ owi sɛnɛ mi, kɛ wa nganda nɛa ngɔ mi wena ni.

¹⁹ Mi zi do ngawi bina, nɛ wa bi mi, nɛ NWA yula gba sala 'do mi.

²⁰ NWA kɔ̃a gɛnɛ mi, ma hã a fua mi kɔ ngamɔ, nɛ a hã dia dungu hã mi ni.

²¹ Mi élé dɛ olo nu NWA gɔ, nɛ dɛa to tɛ mi fai ɔ bɔlɔ. We duzu ma, NWA si olo nɛ hã mi do dia mɔ.

²² Mi dɛ mbulanɔ 'da NWA Gale 'da mi, nɛ mi bɛ̃ we nu a gɔ.

²³ Mɛ a gbãlã we, mbulanɔ kɛ NWA e ni, mi dɛ ma, nɛ nde mi lá fala nɛ gɔ.

²⁴ Mi kɔ̃̀ na, mi dɛ 'dã mɔ gɔ, da dɛ kɔ a kɔ́'dɔ́ mi gɔ.

²⁵ NWA dɛa dia mɔ hã mi, we kɛ mi élé dɛ olo nu a gɔ, nɛ mi dɛ bɔlɔ zu dɛa mɔ dati a.

²⁶ Aa NWA, wi kɛ a èlè dɛ olo nu mɔ gɔ, nɛ nde mɔ élé a gɔ. Wi kɛ a dɛ de mɔ, nɛ mɔ si olo nɛ hã a do dia mɔ.

²⁷ Wi kɛ a do dia zã ni, nɛ mɔ be dia zã 'da mɔ hã a. Nɛ nde wi kɛ a do 'dã zã, nɛ mɔ hã ngamɔ hã a.

²⁸ Fala kɛ Owele wa kpa sape, nɛ mɔ gbaka wa. Nɛ nde mɔ zɔ wi walinɔ li mɔ yala iko.

²⁹ Aa NWA, mɔ a nyɛa we 'da mi, do tũi, nɛ mɔ yele kɛ zã mi.

³⁰ Mɔ hã ngawi hã mi, nɛ mi bi do Owi sɛnɛ mi, nɛ mi waka ngɔ gba ngboe 'da wa.

³¹ Gale kpe dati mi, nɛ a be dia wala hã mi. A tɔ̃ mbula hã mi, nɛ olo nu a dɛ tɛ̃ ɛ. NWA ɔ nɛ ngele ni, a kele zu owinɔ wa yu dɛ 'da a ni.

³² NWA a Gale zu a kpo, a a Gale 'da lɛ, wi amba zu lɛ wi a a zu a kpo.

³³ NWA do ngawi wena, a bi bolo zu mi do ngawi 'da a. A ndaka Owi sɛnɛ mi dati mi, nɛ a fĩ wala hã mi.

³⁴ A dɛa na, tɛ mi gbɛngɛ nɛ́ tɛ dɛngbɛ ni. Fala kɛ mi yɛnggɛ zu kala i, nɛ a yolo 'do mi na, da dɛ kɔ mi té gɔ.

³⁵ Wi be hã zã bi bolo hã mi, wi a NWA. A dɛ na, kɔ̃ mi hãsã tɛ gbɔtɔ nzabele kɛ ma nganda ɔ nɛ mɔ bolo ni.

³⁶ Aa NWA, mɔ ɔ nɛ ngele ni, mɔ amba zu mi, nɛ mɔ kpasa mi. Mi sa mɔ hã mɔ, nɛ mɔ kɔ̃ nu mi, nɛ tɛ mi nganda.

³⁷ Mɔ dɛa na, mi yu do hãsã tɛ, nɛ mi tɛ kɔ̃ zu nyanga mi gɔ.

³⁸ Mi ndaka 'do Owi sɛnɛ mi, nɛ mi gbɛ wa vɛ̃. Mi gbɛa wa fai, nɛ wa ia, nɛ nde mi ɔ̀mɔ̀ tɛ mi gɔ.

³⁹ Mi fi wa nù, nɛ mi ɛ̃ sanga wa, nɛ mi ma wa do nyanga mi. Wa kúlú sɛ 'bɔ mbé nɛ ngɔ gɔ.

⁴⁰ Mɔ hã ngawi bi bolo hã mi. Nɛ mɔ dɛa na, mi nɛ ngɔ owi bi mi, nɛ mi ma wa ti nyanga mi.

⁴¹ Mɔ ndaka owi sɛnɛ mi, nɛ wa yu dati mi do'do, nɛ mi kumu owi bi mi.

⁴² Wa ka mɔ kɛ zã wa, nɛ nde fo wi gbaka wa bina. Nɛ wa siki li wa dɛ 'da NWA Gale, nɛ nde a lènggè do wa gɔ.

⁴³ Mi mbutuku wa, nɛ wa hɔ fumbɛlɛ. Mi ma wa do nyanga mi, nɛ wa 'bu.

⁴⁴ Owinɔ 'da mi wa bɛ̃a nu mi, nɛ wa bi mi, nɛ mɔ kpasa mi ti kɔ̃ wa. Mɔ ia mi na, mi dungu nwa ngɔ owele, nɛ owinɔ kɛ mi ĩ̀ zi ti wa gɔ ni, wa lia ti mbula 'da mi.

⁴⁵ Ogele winɔ wa gu nù ti mi, mi ba nu mi hã wa, nɛ wa zele.

⁴⁶ Ngawi 'da wa ma ia, wa tana kili, nɛ wa yu kɔ gba ngboe 'da wa do'do.

⁴⁷ NWA a wele kpasi. Mi hã iɔ̃nae hã a, we kɛ a a wi amba zu mi. Ma wia na, wa tɔ̃ sako gã wi 'da Gale, we kɛ a a wi kpasa mi.

⁴⁸ Gale dɛa na, mi bili gbã hã owi sɛnɛ mi, nɛ a ia Owele ti mbula 'da mi.

⁴⁹ Aa NWA, mɔ fua mi ti kɔ̃ owi sɛnɛ mi, nɛ mɔ dɛa na, mi nɛ ngɔ owi bi mi, nɛ mɔ kpasa mi ti kɔ̃ owi hã zɛlɛ tɛ hã mi.

⁵⁰ Ma hã mi be dɔ̃lɔ̃ li 'da mɔ sanga ogele winɔ, nɛ mi ga zuma we dɔnggɔ do mɔ.

⁵¹ NWA Gale dɛa gba mɔ we gbaka mi Davidi do obe zã mi. A saka lɛ, nɛ a be dia zã hã lɛ, nɛ a e lɛ do nwa fai.