2 SAMUƐLƐ 21 - WE NU GALE 1995

Ogabaoni wa gbɛa owi nu fɛlɛ Saulo

¹ Do 'da fala kɛ Davidi dungu zi nwa ni, nɛ gba wɔ tia ngɔ nùi 'do sabɛlɛ talɛ. Nɛ Davidi aka NWA Gale we ĩ ti gulu nɛ, nɛ nwa gese hã a na: “Ma dɛa ni, we duzu 'dã mɛ kɛ Saulo do Owi nu fɛlɛ a wa dɛa zi, 'da fala a gbɛa Ogabaoni ni.”

² Ogabaoni wa zi a Oisraɛlɛ gɔ. Wa zi a nu kpala Oamori, kɛ Oisraɛlɛ wa kpua zi mbulu hã wa na, wa gbɛ́ sɛ wa gɔ. Nɛ nde Saulo fa zi we kumu wa, we kɛ a kɔ̃̀ zi na, do 'do, nɛ Oisraɛlɛ do Oyuda wa kpa ngamɔ ti kɔ̃ ogele nu kɔnggɔ gɔ.

³ Nwa Davidi sa mɔ hã Ogabaoni, nɛ a aka wa na: “Mɛ ma wia na, mi dɛ hã nɛ ni a ge nde? Wa dɛa zi nɛ 'danga wena, nɛ mi kɔ̃a we si olo nɛ. Kɔ mi nɛ dɛ nɛ nde, takɔ nɛ wele nu nɛ tɛ lɛ winɔ 'da NWA Gale ni.”

⁴ Nɛ Ogabaoni wa gese na: “Wa wè tɛ hã fɛ̃a mɔ bolo tabi mɔ mbali hã lɛ na, ma mbɔkɔ mãlã 'da lɛ dɛ 'da Saulo do nu fɛlɛ a gɔ. Nɛ lɛ wè we gbɛ be Israɛlɛ kpo we 'dafa do ma gɔ.” Nɛ Davidi tɔ̃ hã wa na: “Kɔ nɛ tɔ̃ mɛ kɛ nɛ kɔ̃a ni, nɛ mi hã sɛ ma hã nɛ.”

⁵ Nɛ wa tɔ̃ hã a na: “Saulo fa zi we kumu lɛ na, wele kpo kɔ lɛ tɛ 'bànà ngɔ nù Israɛlɛ gɛ gɔ.

⁶ Kɔ ma wia na, wa kala wi wili sambo kɔ nu fɛlɛ a, hã lɛ nɛ do wa tɛ Gibea, le 'da Saulo kɛ NWA Gale saka zi a do nwa ni, nɛ lɛ gãlã wa nu fɛlɛ, nɛ lɛ gbɛ wa dati NWA.” Nɛ nwa Davidi tɔ̃ hã wa na: “Mi hã sɛ wa hã nɛ.”

⁷ Nɛ Davidi usu Mɛfibalɛ, be 'da Yonatanɛ, kɛ a 'bɔ a be yaa Saulo ni, we duzu mbuli wa kpua zi sanga ngba wa do Yonatanɛ do zu li NWA ni.

⁸ Nɛ a kala Armoni do Mɛfibosɛtɛ, obenɔ kɛ Rispa, boko be kɛ Aya kua zi wa do Saulo ni, mba do Owi wilinɔ mɔlɔ, kɛ Mikalɛ, boko be 'da Saulo kua zi wa do Adriɛlɛ, be 'da Barzilai, tɛ kɔ le Abɛlɛ-Mɛhola ni,

⁹ nɛ a 'dɔlɔ wa hã Ogabaoni na, wa gãlã wa nu fɛlɛ, kɔ wa gbɛ wa tɛ ngɔ kala dɛ dati NWA. Wa sambo nɛ vɛ̃ wa fia fala kpo. Wa gbɛa wa do 'da fala wa ndua kala kpalɛ, li nɛ a ɔrzɛ dɛ nza ni.

¹⁰ 'Do nɛ, nɛ Rispa, wuko olo Saulo, ba saki kɛ a he'de zi tɛ gɛla ni, nɛ a tata ma dɛ ngɔ ta, nɛ a ɔ dɛ kɛ zã wɔlɔnɔ ni. A 'bana dɛ di ni, do ndo nyanga kala kpalɛnɔ dɛ nza, gbaa we hɔ 'da fala kolo ma ngɔ tɛ nɛ ni. Do gbo gba wese, nɛ a ndi onɔɛnɔ na, wa tɛ zĩ̀lĩ̀, hã wa gɔmɔ wɔlɔnɔ ni gɔ. Nɛ do tũi, nɛ a ndi osa'de zamɛnɔ tɛ nɛ.

¹¹ Wa tɔ̃a 'da we mɛ Rispa dɛa ni hã Davidi.

¹² Nɛ a nɛ we kala gbãlã Saulo, do kɛ 'da be 'da a Yonatanɛ tɛ 'da Oyabɛsi, tɛ ngɔ nù Galadɛ. Mba gɔ, 'da fala Ofilisti wa nɛa zi ngɔ Saulo li bole tɛ Gilboa i ni, nɛ wa gãlã zi wɔlɔ a do kɛ 'da Yonatanɛ tɛ li fanda le Bɛtɛ-Seanɛ. Nɛ Oyabɛsi wa tɛa, nɛ wa zũ wɔlɔnɔ ni, nɛ wa si nɛ.

¹³ Davidi kala gbãlã Saulo do Yonatanɛ tɛ Yabɛsi i, nɛ a si do ma. 'Do nɛ, nɛ wa mba li gbãlã winɔ sambo ni,

¹⁴ nɛ wa mi ma fala nɛ kpo do kɛ 'da Saulo do Yonatanɛ tɛ kɔ zuni 'da Kisi, baa Saulo, tɛ kɔ le Sela. Sela ma ngɔ nù Bɛnzamɛ. 'Do kɛ wa dɛa mbulanɔ 'da nwa Davidi vɛ̃ ni, nɛ Gale bia dia zã hã wa.

Bolonɔ sanga Israɛlɛ do Ofilisti

¹⁵ Mbé bolo tia sanga Ofilisti do Oisraɛlɛ. Nɛ Davidi do osodanɔ 'da a wa nɛa, nɛ wa bi Ofilisti. 'Da fala bole ni, nɛ Davidi mbɔkɔ wena.

¹⁶ Nɛ Isɛbi-Bɛnɔbɛ, mbe wi nu fɛlɛ Harafa ba sɛlɛ 'da a dɛ kɔ̃ a we gbɛ Davidi. Omɔ bolonɔ 'da a vɛ̃ a mbé nɛ, nɛ wa dɛa sɛlɛ 'da a do tũ mɔ bolo, nɛ dĩ gbali nɛ nɛa ngɔ kilo talɛ.

¹⁷ Nɛ nde Abisai, be 'da Sɛruya, tɛa we gala Davidi, nɛ a gbɛ wi Filisti ni. Ma hã osodanɔ wa tɔ̃a hã Davidi na, a tɛ nɛ 'bɔ do lo li bole gɔ, da dɛ kɔ a fé, kɔ to nwa olo a ni, ma mbiti ngɔ nù Israɛlɛ gɔ.

¹⁸ 'Do lá ni, nɛ mbé bolo te 'bɔ sanga Oisraɛlɛ do Ofilisti tɛ Gɔbɛ. Do 'da fala ni, nɛ Sibkai, wi Husa gbɛ Safɛ, mbe be zã Harafa.

¹⁹ 'Do nɛ, nɛ wa bi 'bɔ bolo do Ofilisti tɛ kɔ le Gɔbɛ. Nɛ 'da fala bole ni, nɛ Elananɛ, be 'da Yari tɛ Bɛtleɛmɛ gbɛ Goliatɛ, wi Gatɛ. Te sɛlɛ 'da Goliatɛ ni gã zi ɔ nɛ te nyanga tɔa ni.

²⁰ Mbé bolo tia 'bɔ tɛ Gatɛ. Nɛ mbe soda Filisti zi di ni, gbãlã zu kɔ̃ a gazɛlɛ tɛ kɔ̃ a bɔa nɛ. Nɛ gbãlã zu nyanga a 'bɔ ní tɛ nyanga a bɔa nɛ. Ma mba vɛ̃ 'bu nɛ bɔa ngɔ nɛ nalɛ. A zi 'bɔ a be zã Harafa. Soda ni kɔ̃ bolo wena.

²¹ Nɛ a dã obe Israɛlɛ, nɛ mbe nya Davidi li a a Yonatanɛ, be 'da Sama gbɛa a.

²² Onga soda Filistinɔ nalɛ ni, wa a obe zã Harafa, wi Gatɛ. Nɛ wa fia zi li bole 'da Davidi do osodanɔ 'da a.