2 SAMUƐLƐ 20 - WE NU GALE 1995

Seba bɛ̃a we nu Davidi

¹ Mbe wele zi kpo tɛ kɔ le Gilgalɛ, li a a Seba, nɛ dɛa to tɛ̃ a dè gɔ. Seba, a a be 'da Bikri, wi nu kpala Bɛnzamɛ. Mbe tũ kpo, nɛ Seba dama mɔtũlũ, nɛ a he mɔ na: “Lɛ do mɔ we dɛ do Davidi kɔ̃ lɛ bina. Lɛ tɛ nɛ 'bɔ 'do Davidi, be 'da Yɛse gɔ. Ma wia na, Oisraɛlɛ wa si, wele do wele dɛ nu tɔa 'da a.”

² Ma kɛ Oisraɛlɛ wa la Davidi, nɛ wa si 'do Seba. Nɛ tati a Oyuda hã wa dɛa we nu Davidi, nɛ wa kã a yolo nu lì Yɔrdanɛ, we hɔ Yeruzalɛmɛ.

³ Nwa Davidi nɛa we hɔ kɔ tɔa nwa 'da a i, nɛ a ba nu a na, wa kala oko 'donɔ 'da ɛ 'bu, kɛ ɛ la zi wa we zɔ mɔ nu tɔa ni, hã wa a wa kɔ tɔa kɛ wa zɔ mɔ nu ma ɔ dia ni, nɛ wa 'bana dɛ di ni. A gala oko 'donɔ ni do mɛnɔ wa kɔ̃a ni, nɛ nde a mbà ngu'du ngba a do wa gɔ. Nɛ wa fɔmɔ wa dɛ kɔ tɔa yolo do ngba soe ni, gbaa we hɔ 'da fala fie 'da wa. Wa ɔ zi nɛ owi fio wili ni, nɛ nde wili wa 'bana nza.

Yoabɛ gbɛa Amasa

⁴ 'Do nɛ, nɛ nwa Davidi tɔ̃ hã Amasa na: “Mɔ nɛ́, hã mɔ mba li osoda Yuda vɛ̃ kpo. Nɛ mbasa, nɛ mɔ hɔ́ do wa dati mi gɛ.”

⁵ Amasa nɛa, nɛ a dɛ olo nu nwa. Nɛ nde a la li kɔ̃ tũi nwa wia hã a ni do'do.

⁶ Ma a Davidi tɔ̃a hã Abisai na: “Di ngangga ni, Seba hã ngamɔ hã lɛ nɛ ngɔ kɛ Absalɔmɛ hã zi hã lɛ ni. Kɔ mɔ kpé ti osodanɔ wa zɔ mɔ tɛ mi gɛ, nɛ nɛ ndi 'do a dati kɛ na, a usu tɛ̃ a kɔ lenɔ kɛ gba ngbo zĩ ma takpa ni. Ní gɔ, nɛ nde lɛ kpá sɛ a gɔ.”

⁷ Osodanɔ kɛ Yoabɛ ngɔ wa ni, wa mba do Okrɛtɛ, do Opeleti, kɛ wa zɔ mɔ tɛ nwa ni, nɛ wa la do Abisai. Wa a onga soda ngboo. Wa hɔa nza Yeruzalɛmɛ, nɛ wa ma ngɔ ndi 'do Seba.

⁸ Wa nɛa we kɔlɔ do gã ta tɛ Gabaoni ni, nɛ wa kpa ngba wa do Amasa. Yoabɛ he'de zi tulu bolonɔ 'da a, nɛ a gãlã du kɔya 'da a kɛ ma dɛ li foko nɛ ni tɛ 'dɛ̃ 'da a. 'Da fala Yoabɛ tɛ la nɛ ni, nɛ du kɔya te, nɛ a ba ma do gale kɔ̃ a.

⁹ Nɛ Yoabɛ tɔ̃ hã Amasa na: “Nya mi, kɛ gɛ nɛ nde?” A nɛa we tɔ̃ ni, nɛ a 'be nzɛlɛ a do ngawili kɔ̃ a, we 'be a dɛ tɛ̃ a.

¹⁰ Amasa lènggè zi do du kɔya Yoabɛ 'bia do gale kɔ̃ ɛ ni gɔ. Yoabɛ ba du kɔya ni, nɛ a dumu do zã a. Nɛ kala zã Amasa ma tingbi dɛ nù, nɛ a fe do ti, nɛ Yoabɛ è 'bɔ mbe dani tɛ̃ a gɔ. 'Do nɛ, nɛ Yoabɛ do nya a Abisai, wa ndo 'bɔ ndi 'do Seba.

Wa gbɛa Seba

¹¹ Mbe soda 'da Yoabɛ kpo 'bana zi dɛ kɛ zã wɔlɔ Amasa ni. Nɛ a tɔ̃ na: “E kɔ oyali ngba Yoabɛ do owinɔ 'da Davidi wa la 'do Yoabɛ.”

¹² Amasa kimili tɛ̃ ɛ do 'dɔ tɔkɔ tɛ̃ a, dɛ gbogbo wala ni. Nɛ soda ni zɔ na, winɔ vɛ̃ wa hɔ di ni, nɛ wa yolo nù. Ma hã a gbɔtɔ wɔlɛ li wala do'do, nɛ a e ma kɔ mbe fɔ di ni, nɛ a gu tulu ngɔ ma.

¹³ A dɛa ni do'do, nɛ osodanɔ wa la 'do Yoabɛ we ndi 'do Seba ni, wa yòlò 'bɔ nù fala wɔlɛ ni gɔ.

¹⁴ Seba la nùnɔ 'da onu kpala Israɛlɛ vɛ̃ do 'do a, nɛ a hɔ kɔ le Abɛlɛ-Bɛtɛ-Maka. Nɛ Oberi vɛ̃ wa mba tɛ mɛ 'bɔ ngba wa do a.

¹⁵ Yoabɛ do owinɔ 'da a wa zila ní, nɛ wa nɛ, nɛ wa linggi Seba kɛ a zi a kɔ le ni. Wa zã nù dɛ ngɔ, nɛ wa da ma dɛ nyanga ngbo kɛ nza nga ni, gbaa nɛ ma we kɔ̃ do zu ngboe. 'Do nɛ, nɛ wa ma ngɔ zã ti ngboe ni na, ma gbini.

¹⁶ Nɛ mbe wuko hã zã kpo zi kɔ le ni hia mɔ na: “Nɛ zélé, nɛ zélé mi sɛ! Nɛ tɔ̃ hã Yoabɛ na, a tɛ gbaa 'da mi nga. Mi do we we tɔ̃ hã a.”

¹⁷ Yoabɛ nɛa, nɛ wuke ni aka a na: “Wi a mɔ Yoabɛ nde?” Nɛ a gese na: “Ĩi, wi a mi.” Nɛ wuke tɔ̃ na: “Aa nwa, mɔ zélé we mi nɛ tɔ̃ hã mɔ gɛ.” Nɛ Yoabɛ tɔ̃ hã a na: “Mi a mi zele ni.”

¹⁸ Nɛ wuke na: “'Da oyaa lɛ, wa tɔ̃ zɛ́ mbe we na: ‘Wi kɛ a do ngbangga boe, nɛ a tɛ kɔ le 'da lɛ Abɛlɛ-Bɛtɛ-Maka gɛ, nɛ wa 'dafa sɛ ma iko.’

¹⁹ Le 'da lɛ gɛ, ma kɔ lenɔ kɛ ma do dungu fio wena, nɛ owi kɔ nɛ wa dɛ mbula 'da Oisraɛlɛ do wala olo nɛ. Nɛ nde mɔ kɔ̃a we 'danga ma na mɛ ni we ge nde? Mɔ kɔ̃a we 'danga mɔ mɔ NWA Gale nde?”

²⁰ Nɛ Yoabɛ he mɔ na: “Fala kpo gɔ! Mi do linggamɔ 'danga mɔ zu mi gɛ kpo bina.

²¹ Lɛ tɛ̃ we ki ni gɔ. Lɛ tɛa tati a we wele kpo iko. A a wi kɔ le ngɔ kalanɔ tɛ Efraimɛ, nɛ li a a Seba, be 'da Bikri. A bɛ̃a we dɛ tɛ nwa Davidi. Kɔ nɛ 'dɔlɔ tati a a zu a kpo hã mi, nɛ mi la sɛ fala linggi le.” Nɛ wuke ni tɔ̃ hã a na: “Ma a dia, lɛ da sɛ zu a hã mɔ do zu ngbo le.”

²² Wuke ni nɛa, nɛ a kpa owinɔ kɔ le ni, nɛ a tɔ̃ we a 'dafa do Yoabɛ ni hã wa. Nɛ wa ba Seba, nɛ wa 'bili zu a, nɛ wa da do zu ngboe hã Yoabɛ. Yoabɛ nɛa we zɔ zu Seba, nɛ a dama mɔtũlũ, nɛ sodanɔ wa la fala linggi le do ti, nɛ wa si dɛ 'da wa. Nɛ Yoabɛ kpolo tɛ̃ a dɛ 'da nwa Davidi tɛ Yeruzalɛmɛ i.

Li gã wi ngɔ tonɔ 'da Davidi

²³ Yoabɛ zi a nwa ngɔ osoda Israɛlɛ vɛ̃. Bɛnaya, be 'da Yoyada zi a wi kpe ti Okrɛtɛ do Opeleti kɛ wa zɔ mɔ tɛ nwa ni.

²⁴ Adoramɛ zi a wi zɔ mɔ tɛ owi dɛ kolofenɔ. Yosafatɛ, be 'da Ahiludɛ zi a wi gba olo nu Davidi.

²⁵ Sɛva zi a wi kɔmɔ mbɛti 'da nwa. Sadɔkɛ do Abiatarɛ wa zi a onganga.

²⁶ Ira, wi nu fɛlɛ Yairɛ zi tɛ mɛ 'bɔ a nganga ti to nwa 'da Davidi.