2 SAMUƐLƐ 17 - WE NU GALE 1995

Husai 'danga mbula 'da Ahitofɛlɛ

¹ Ma là 'do nɛ nyɛlɛ gɔ, nɛ Ahitofɛlɛ tɔ̃ hã Absalɔmɛ na: “Mɔ hã wala hã mi, kɔ mi saka wi wili koto 'bu ngɔ wa bɔa, kɔ mi la we ndaka 'do Davidi tũi gɛ.

² Mi gbanga sɛ a do 'da fala a mbɔkɔ, nɛ linggamɔ zu a ma vĩ do'do ni. Nɛ kili ma ba sɛ a, nɛ winɔ 'da a vɛ̃ wa yu sɛ. Na mɛ ni, nɛ mi gbɛ sɛ a zu a kpo,

³ nɛ mi gese sɛ winɔ 'da a vɛ̃ hã mɔ. Mba gɔ, wi kɛ mɔ fa a ni fe, nɛ tala winɔ vɛ̃, wa si sɛ dɛ 'da mɔ, nɛ wa kpa sɛ dungu fio.”

⁴ Linggamɛ ni dia tɛ Absalɔmɛ, do okumu Israɛlɛ vɛ̃ wena.

⁵ Nɛ nde Absalɔmɛ ba nu a na: “Wa sá mɔ hã Husai, be Arkɛ na, a hã linggamɛ 'da a hã lɛ.”

⁶ Wa sa mɔ, kɔ Husai nɛa we hɔ nɛ ni, nɛ Absalɔmɛ tɔ̃ linggamɛ sɔ Ahitofɛlɛ tɔ̃a ni hã a, nɛ a aka a na: “Ma wia na, lɛ dɛ kɛ Ahitofɛlɛ tɔ̃a ni nde? Ni gɔ, nɛ mɔ tɔ̃ kɛ 'da mɔ hã lɛ.”

⁷ Nɛ Husai gese na: “Mbula kpo kɛ Ahitofɛlɛ tɔ̃a gɛ, ma dè wá mbe gɔ.

⁸ Mɔ ĩ ti baa mɔ do owinɔ 'da a de wena. Wa vɛ̃ a onga soda, nɛ wa do dã, ɔ nɛ naa gbɔgbɔ kɛ be 'da a yɔa dɛ zamɔ ni. Baa mɔ a ã wi bi bolo, do tũi, nɛ nde a ɔ́ do owinɔ 'da a fala nɛ kpo gɔ.

⁹ Ngangga ni, mi ĩ de wena na, a usu tɛ̃ a kɔ ta, tabi gele fala. Nɛ nde fala kɛ wa ndo bole, kɔ mbe winɔ 'da lɛ wa fe, nɛ sako nɛ ma yɛ'bɛ sɛ na, sodanɔ 'da Absalɔmɛ wa fia li bole.

¹⁰ Nɛ osɔ̃a sodanɔ 'da mɔ, kɛ sila wa nganda wena ni, wa mbɔkɔ sɛ. We kɛ obe Israɛlɛ vɛ̃ wa ĩ na, baa mɔ a nga soda bi bolo, nɛ winɔ 'da a wa sɔ̃ wi wili wena.

¹¹ “Mɔ zɔ linggamɛ 'da mi ma kɛ: Mɔ ngɛmɛ osoda Israɛlɛ vɛ̃, yolo ndɔti le we hɔ Sɔkpɔ nɛ, kɔ wa dɛlɛ ɔ nɛ kɛnzɛ ni. Nɛ mɔ do tɛ mɔ ngboo mɔ kã wa li bole.

¹² Lɛ kpa sɛ Davidi tɛ fala a do ma ni, nɛ lɛ ala sɛ dɛ ngɔ a, ɔ nɛ kɛ odɔla wa ala ngɔ kpalɛ ni. Nɛ lɛ gbɛ sɛ a do owinɔ 'da a vɛ̃, wele kpo yú sɛ gɔ.

¹³ Fala kɛ a usu tɛ̃ a kɔ le nde, nɛ osodanɔ 'da lɛ vɛ̃, wa tɛ sɛ do ofɛlɛ, nɛ lɛ gbɔtɔ sɛ le ni gbaa dɛ kɔ gbangɔlɔ̃ i. Nɛ mbamba sɛkɛkɛ ta 'báná sɛ olo nɛ gɔ.”

¹⁴ Absalɔmɛ do obe Israɛlɛ, wa nɛa we zele we ni, nɛ wa na: “Linggamɛ 'da Husai dia la kɛ 'da Ahitofɛlɛ.” Ĩ na, NWA Gale kɔ̃a na mɛ ni, takɔ wa bɛ̃ dia linggamɛ 'da Ahitofɛlɛ, sɛ a Absalɔmɛ kpa ngamɔ de.

Davidi la li zɔ̃ Yɔrdanɛ do'do

¹⁵ Husai nɛa we kpa onganga Sadɔkɛ do Abiatarɛ, nɛ a tɔ̃ 'da we Ahitofɛlɛ lingga, kɔ a tɔ̃a hã Absalɔmɛ do okumu Israɛlɛ ni vɛ̃ hã wa. Nɛ a tɔ̃ tɛ mɛ 'bɔ kɛ a lingga, nɛ a tɔ̃a hã wa ni.

¹⁶ Nɛ a tɔ̃ hã Sadɔkɛ do Abiatarɛ na: “Nɛ tómbó wele ngangga ni, kɔ a wɛlɛ tɛ̃ a do to hã Davidi. Nɛ tómbó hã a na, a tɛ ɔ̃ dɛ li zɔ̃ Yɔrdanɛ do tũi gɛ gɔ, kɔ a kũ gã lì Yɔrdanɛ dɛ kulu nɛ i, dɔ Owi sɛnɛ a wa bá a, hã wa gbɛ a do owinɔ 'da a vɛ̃ gɔ.”

¹⁷ Do fala nɛ ni, Yonatanɛ, be 'da Abiatarɛ, do Ahimasi, be 'da Sadɔkɛ, wa ɔa zi dɔ̃ɔ do zu lì 'da Owi fɔlɔ mɔ, we kɛ ma wè zi na, wa le kɔ le Yeruzalɛmɛ i gɔ, da dɛ kɔ wa zɔ wa gɔ. Nɛ wa ia mbe wuko dɛa to kpo na, a tɔ̃ tonɔ kɛ ma la tɛ Yeruzalɛmɛ hã wa, sɛ nɛ wa nɛ we tɔ̃ ma hã nwa Davidi de.

¹⁸ Mɛ ni, nɛ mbe be zagbãlã kpo zɔa wa, nɛ a nɛ, nɛ a tɔ̃ we nɛ hã Absalɔmɛ. Yonatanɛ do Ahimasi wa nɛa we zɔ ni, nɛ wa yu, nɛ wa usu tɛ wa kɔ tɔa 'da mbe wi kɔ le Bahurimɛ. Kɔ̃ lì zi tɛ kɔ ngboe 'da wi ni boe. Nɛ wa nɛa, nɛ wa usu tɛ wa kɔ nɛ.

¹⁹ Nɛ wuko wele tɔa ni ba tande, nɛ a fi ma nu kɔ̃ɛ ni, nɛ a yɛlɛ kpalɛ dɛ ngɔ nɛ, do tɛlɛ tɛ kɛ na, wele wè tɛ ĩ̀ fala kɔ̃ɛ ni gɔ.

²⁰ Owi tonɔ 'da Absalɔmɛ wa hɔa 'da wuke ni, nɛ wa aka a na: “Ahimasi do Yonatanɛ wa a do nde?” Nɛ a gese na: “Wa kũ lì dɛ kulu nɛ i.” Owi tonɔ ni wa fa wa, nɛ nde wa kpà wa gɔ. Nɛ wa kpolo tɛ wa dɛ Yeruzalɛmɛ i.

²¹ Wa nɛa we la do'do, nɛ Ahimasi do Yonatanɛ, wa hɔ nza kɔ kɔ̃ li, nɛ wa nɛ we mbese nwa Davidi. Wa hɔa i mɔ, nɛ wa tɔ̃ we Ahitofɛlɛ lingga we dɛ do wa ni, nɛ wa tɔ̃ hã a na, a wɛ́lɛ́ tɛ̃ a, kɔ a kũ lì Yɔrdanɛ do'do.

²² Davidi nɛa we zele ni, nɛ a do owinɔ 'da a wa kulu ngɔ, nɛ wa kũ lì. Do titole belee, nɛ nde wa vɛ̃ wa kũ lì ia, wele kpo 'bànà 'do gɔ.

²³ Ahitofɛlɛ nɛa we zɔ na, wa bɛ̃a linggamɛ 'da a do'do ni, nɛ a e mɔ dungu ngɔ punda 'da a, nɛ a kũ ngɔ a, nɛ a kpolo tɛ̃ a dɛ kɔ le 'da a. Nɛ a wele tala lɛnggɛ hã onu fɛlɛ a, nɛ a kpo fɛlɛ gɛlɛ a wele nɛ, nɛ a gbɛ tɛ̃ a. Nɛ wa mi a kɔ zuni 'da baa a.

Davidi hɔa kɔ le Mahanaimɛ

²⁴ Davidi hɔa kɔ le Mahanaimɛ, do 'da fala Absalɔmɛ kũ tɛ mɛ 'bɔ lì Yɔrdanɛ do obe Israɛlɛ vɛ̃, kɛ wa do a ni.

²⁵ Absalɔmɛ saka Amasa do nwa ngɔ osodanɔ 'da a dɛ olo Yoabɛ. Amasa zi a be 'da mbe be Israɛlɛ kpo li a a Yetɛrɛ. Yetɛrɛ ba zi Abigalɛ do kɛnɛ a. Abigalɛ a be 'da Nahasi, nɛ a 'bɔ a boko nya Sɛruya, naa Yoabɛ.

²⁶ Absalɔmɛ do obe Israɛlɛ, wa 'dafa fala ɔi 'da wa ngɔ nù Galadɛ.

²⁷ Davidi nɛa we hɔ Mahanaimɛ, nɛ a kpa ngba a do Sobi, be 'da Nahasi, kɛ a a wi kɔ le Raba. Raba zi a gã le 'da Oamoni. A kpa 'bɔ ngba a do Makirɛ, be 'da Amiɛlɛ, wi kɔ le Lo-Dabarɛ. Nɛ a kpa 'bɔ Barzilai, wi kɔ le Rogɛlimɛ, tɛ ngɔ nu Galadɛ.

^28-29 Owinɔ ni, wa tɛa do mɔ ɔi, tulu, mɔ gi do mɔ, do nyɔngɔmɔ hã Davidi do owinɔ 'da a. Nyɔngɔmɛnɔ ni zi a: okpalɛ kpi do kpi, farini, hana kpalɛ, nwá Sanggo kpi do kpi, nɔ gɔlɔ, nyɔngɔmɛnɔ wa dɛa do ma'bɛlɛ, do obata. Wa tɛa do mɛnɔ ni, mba gɔ, we kɛ wa lengge zi na, ɔ nɛ kɛ Davidi do owinɔ 'da a wa kũ li gba zɔ̃ɛ gɛ, wa do wɔ, nɛ wa ala wɔ lì, nɛ wa mbɔka.