2 SAMUƐLƐ 16 - WE NU GALE 1995

Davidi kpa ngba a do Siba

¹ Davidi nɛa we la zu kala dɛ 'do nɛ i bi sĩ ni, nɛ wa kpa ngba wa do Siba, wi toe 'da Mɛfibalɛ tɛ gɔnɔ dati a. Siba kpia opunda bɔa, kɛ wa a mɔ dungu li 'do wa dɛ dati a. Opundanɔ ni, wa kala mapa kama bɔa, 'bua kula wala te kama kpo, owala tenɔ kɛ ma fila do 'da fala ni kama kpo, do gã daka dɔ̃.

² Nɛ nwa Davidi aka a na: “Mɔ nɛ dɛ ki do ge nde?” Nɛ Siba gese na: “Aa nwa, opundanɔ wa gala sɛ nu fɛlɛ mɔ na, wa kũ ngɔ wa. Nɛ mapanɔ do wala tenɔ gɛ, mɛ a nyɔngɔmɔ we osodanɔ 'da mɔ. Nɛ dɔ̃ɛ gɛ, ma we gala winɔ kɛ wa mbɔkɔ sɛ tɛ li gba zɔ̃ i ni.”

³ Nwa aka Siba na: “Mɛfibalɛ, be yaa wele mɔ Saulo, a a do nde?” Nɛ Siba gese na: “A 'bana tɛ Yeruzalɛmɛ i, we kɛ a lingga na, obe Israɛlɛ wa nɛ gese to nwa olo yaa ɛ Saulo dɛ kɔ̃ ɛ.”

⁴ Nɛ nwa tɔ̃ hã Siba na: “Yolo do sɔɛ gɛ, mɛnɔ 'da Mɛfibalɛ vɛ̃ a kɛ 'da mɔ.” Siba nɛa we zele ni, nɛ a bili gbaa, nɛ zu a to nù, nɛ a tɔ̃ na: “Iɔ̃nae hã mɔ nwa, we kɛ mɔ bia dia zã 'da mɔ hã mi.”

Simei fɔmbɔ Davidi

⁵ Nwa Davidi nɛa we kɔlɔ do Bahurimɛ ni, nɛ mbe wele kpo li a a Simei, a a be 'da Gera, nɛ nu fɛlɛ wa do Saulo kpo, a hɔa nza kɔ le ni, nɛ a ma ngɔ fɔmbɔ Davidi.

⁶ Nɛ gɛnɛ kɔ owinɔ do osodanɔ wa fi zi Davidi dɛ gbogbo wa ni, nɛ a lo a do ta, fala nɛ kpo do owi olo li a,

⁷ nɛ a fɔmbɔ a, nɛ a he mɔ na: “Fó tɛ mɔ, fó tɛ mɔ, yia wi, wi gbɛ wi!

⁸ NWA Gale dɛa na, tɔkɔ tɛ onu fɛlɛ Saulo vɛ̃ kɛ mɔ gbɛa wa ni, ma te dɛ ngɔ mɔ. Mɔ zũ to nwa 'da Saulo, ma kɛ NWA ba ma kɔ̃ mɔ, kɔ a hã ma hã be 'da mɔ Absalɔmɛ ni. Kɔ di dɔ̃ ni, mɔ kɔ 'bako, we kɛ mɔ a wi gbɛ wi.”

⁹ Nɛ Abisai be 'da Sɛruya tɔ̃ hã nwa na: “Aa nwa, gulu kɛ 'dã fio mɛ gɛ fɔmbɔ mɔ fai ni we ge nde? Mɔ la mi, hã mi nɛ, kɔ mi 'bili gɛlɛ a do'do.”

¹⁰ Nɛ nwa Davidi gese na: “Abisai, gulu kɛ mɔ do nya mɔ Yoabɛ, nɛ le kɔ we gɛ we ge nde? Fala kɛ NWA hã nu a hã a na, a fɔmbɔ mi, nɛ ma wè na, wele kpo dãlã do a gɔ.”

¹¹ Nɛ Davidi tɔ̃ 'bɔ hã Abisai do owi olo li a vɛ̃ na: “Nɛ zɔ kɛ be kala zã mi ngboo kɔ̃a we gbɛ mi ni, kɔ wi nu kpala Bɛnzamɛ gɛ dɛ ni, nɛ nde nɛ wè tɛ ɔngbɔ we nɛ gɔ. Fala kɛ NWA ba nu ɛ hã a nde, nɛ nɛ e a ni, hã a fɔmbɔ mi.

¹² Mbe gɔ, nɛ NWA a zɔ sɛ 'bako 'da mi, nɛ a kpolo sɛ fɔmba ni do wila nu.”

¹³ Davidi do owinɔ 'da a wa tɛ la nɛ, nɛ Simei la tɛ mɛ 'bɔ do wa kpo do mbee nyanga li kala. Nɛ a tɛ mɛ tɛ fɔmbɔ Davidi, tɛ lo wa do ta do kili nù.

¹⁴ Nwa Davidi do owinɔ 'da a, wa nɛa wá ni gbaa, nɛ wa hɔ nu kolo lì Yɔrdanɛ, nɛ nde wa mbɔkɔ wena. Nɛ wa 'bana dɛ di ni we ɔmɔ tɛ̃ wa.

Husai kpa ngba a do Absalɔmɛ

¹⁵ Absalɔmɛ lia kɔ le Yeruzalɛmɛ do gili obe Israɛlɛ. Ahitofɛlɛ zi tɛ mɛ 'bɔ do a.

¹⁶ 'Da fala Husai, be Arkɛ, kɛ a a yali ngba nwa Davidi ngboo ni, nɛa we kɔlɔ do Absalɔmɛ, nɛ a he mɔ na: “E kɔ nwa 'bana fai!”

¹⁷ Absalɔmɛ nɛa we zele ni, nɛ a aka Husai na: “Ki ni a kɔ̃a zã 'da mɔ dɛ 'da yali ngba mɔ Davidi, kɛ mɔ élé a gɔɛ gɛ a ni nde? Gulu kɛ mɔ là do a gɔ we ge nde?”

¹⁸ Nɛ Husai gese na: “Mi kɔ̃̀ we la do a gɔ. We kɛ mi yolo fai 'do wi kɛ NWA Gale, mba do obe Israɛlɛ vɛ̃ wa saka a do nwa ni. Mi 'bana sɛ do mɔ.

¹⁹ Bɔa nɛ, mi lé to ti wele mba mba iko gɔ. Mɔ a be 'da yali ngba mi ngboo. Mi kɔ̃a ngangga ni na, mi dɛ to hã mɔ, ɔ nɛ kɛ mi dɛa zi do toe hã baa mɔ gbaa we hɔ sɔɛ gɛ ni.”

Absalɔmɛ ɔa do makangonɔ 'da Davidi

²⁰ Nɛ Absalɔmɛ tɔ̃ hã Ahitofɛlɛ na: “Nɛ wele we sanga ngba nɛ, we mɛ ma gɔa na lɛ dɛ ni.”

²¹ Nɛ Ahitofɛlɛ tɔ̃ hã Absalɔmɛ na: “Mɔ nɛ́, kɔ mɔ ɔ́ do makangonɔ kɛ baa mɔ la wa na, wa zɔ mɔ tɛ tɔa nwa ni. Mɔ dɛ na mɛ ni, nɛ obe Israɛlɛ vɛ̃ wa ĩ sɛ na, mɔ dɛa 'dã mɔ kɛ ma dɛ sɛ na, baa mɔ sɛnɛ mɔ fai. Nɛ ma nganda sɛ 'bɔ sila owinɔ 'da mɔ.”

²² Wa dɛa tɔa tande tɛ fala wa 'dafa we dungu nɛ ngɔ zu tɔa nwa i ni, nɛ Absalɔmɛ nɛa, nɛ a le kɔ nɛ, nɛ a ɔ do makangonɔ 'da baa a dɛ gba li obe Israɛlɛ vɛ̃.

²³ Do 'da fala ni, wa ba zi mbulanɔ Ahitofɛlɛ tɔ̃ ni do gã gulu nɛ wena, ɔ nɛ we nu Gale ngboo ni. Davidi do Absalɔmɛ wa zele zi 'bɔ a na mɛ ni.