2 SAMUƐLƐ 14 - WE NU GALE 1995

Absalɔmɛ kpolo tɛ a dɛ Yeruzalɛmɛ

¹ Yoabɛ, be 'da Sɛruya zɔa na, sila nwa Davidi gɛ̃a dɛ tɛ Absalɔmɛ ia.

² Nɛ a sa mɔ hã mbe wuko hã zã tɛ kɔ le Tekoa, nɛ a tɔ̃ hã a na: “Mɔ dɛ́ ɔ nɛ mɔ dungu gɛla ni, nɛ mɔ he'de tulu gɛla. Mɔ tɛ fɛlɛ nɔ yɔmbɔ tɛ mɔ gɔ. Nɛ mɔ dɛ́ tɛ mɔ ɔ nɛ wuko kɛ a dungu 'bako olo fio wi 'da a 'do nɛ nyɛlɛ wena ni.

³ Mɔ nɛ sɛ, nɛ mɔ kpa nwa Davidi, nɛ mɔ tɔ̃ wenɔ mi nɛ tɔ̃ hã mɔ gɛ hã a.” Nɛ Yoabɛ tɔ̃a we ma wia sɛ na a tɔ̃ ni hã a.

⁴ Wuke ni nɛa, nɛ a kpa nwa, nɛ a gu li a nù dɛ dati a ni, nɛ a na: “Aa nwa, mɔ gbáká mi!”

⁵ Nɛ nwa aka a na: “Mɔ kɔ̃a ge nde?” Nɛ a gese na: “Aa nwa, mi gɛ a wi fio wili,

⁶ nɛ mi zi do obulu be bɔa. Obulu benɔ ni wa kpa we tɛ safɔ i, nɛ mbe kpo gbɛ ngba a, we kɛ fo zi wi amba wa bina.

⁷ Ma kɛ Owi nu fɛlɛ mi vɛ̃ wa bɛ̃a, nɛ wa tɔ̃ hã mi na, mi ba wi gbɛ wi hã lo na, lo gbɛ a olo kɛ a gbɛa nya a ni. Na mɛ ni, lo nɛ gbɛ tala wele kɛ a dungu sɔ ngɔ mɛnɔ olo wele a ni do ti. Wa dɛ na mɛ ni, nɛ nde mi sɛ 'bɔ do tala be kɛ mi wia we gbini zã mi do a ni bina, nɛ nu fɛlɛ wili mi ma mbiti sɛ do'do. Li a 'báná sɛ 'bɔ ngɔ nù gɛ gɔ.”

⁸ Nɛ nwa Davidi gese hã a na: “Mɔ sí! Mi ba sɛ nu mi ngɔ we 'da mɔ.”

⁹ Nɛ wuke ni tɔ̃ 'bɔ hã a na: “Aa nwa, mɛ kɛ ma hɔ sɛ ni, we nɛ ma zɔ sɛ mi, do nu fɛlɛ kula 'da mi. E kɔ ma tɛ té ngɔ mɔ do to nwa 'da mɔ gɔ.”

¹⁰ Nɛ nwa tɔ̃ na: “Fala kɛ wele dãlã dɛ tɛ mɔ we duzu ma, nɛ mɔ tɛ do a 'da mi nga, nɛ a dã́lã́ sɛ 'bɔ mbé nɛ do mɔ gɔ.”

¹¹ Wuke ni tɔ̃a 'bɔ hã nwa na: “Aa nwa, mɔ kɔ̃́, nɛ mɔ kpo mbulu hã mi do zu li NWA Gale 'da mɔ, da dɛ kɔ wi nɛ si olo fie 'da be 'da mi ni, a gbɛ́ 'bɔ tala wele kɛ 'bana ni, kɔ ma gã 'da zɛlɛ tɛ 'da mi dɛ dati gɔ.” Nɛ nwa Davidi gese hã a na: “Mi kana tɛ mi do zu li nwa wele kpasi na, mɔ kpo dɛ́ sɛ be 'da mɔ gɔ.”

¹² Nɛ wuke tɔ̃ na: “Aa nwa, mɔ mbɔkɔ mi, kɔ mi tɔ̃ 'bɔ mbe gele we hã mɔ.” Nɛ nwa gese na: “Mɔ tɔ̃́.”

¹³ Nɛ a na: “Gulu kɛ mɔ dɛa 'dã mɔ na mɛ gɛ do winɔ 'da Gale we ge nde? Mɔ wele we nɛ́ kɛ di ni ni, nɛ nde ma ɔ nɛ mɔ 'bili ngbangga dɛ zu mɔ wele nɛ ni. We kɛ mɔ kɔ̃̀ we tɔ̃ hã Absalɔmɛ na, a yolo kɔlɔ 'duli kɔ a si gɔ.

¹⁴ Mbe tũ kpo, nɛ lɛ vɛ̃ lɛ fe sɛ. Lɛ ɔ nɛ lì kɛ wa a nù, nɛ nde wa wè tɛ so 'bɔ ma gɔ ni. Nɛ nde we duzu Gale, mɛ kɛ a 'dafa hã Absalɔmɛ gɛ a ni gɔ. Linggamɛ 'da a na, Absalɔmɛ tɛ 'bànà dɛ kɔlɔ 'duli i gɔ.

¹⁵ Aa nwa, mi tɛa we tɔ̃ we gɛ vɛ̃ hã mɔ, we kɛ wa a kili li sila mi. Ma a mi tɔ̃a na, mi tɔ̃ sɛ 'da nɛ hã mɔ nwa. Nɛ mbe gɔ, nɛ mɔ dɛ sɛ linggamɛ mi nɛ tɔ̃ hã mɔ ni.

¹⁶ Mɔ kɔ̃ sɛ we fo mi ti kɔ̃ wi kɛ a fa we kumu lɛ do be 'da mi, nɛ a fa 'bɔ we fo lɛ ngɔ nùi Gale hã ma hã lɛ owinɔ 'da a ni nde?

¹⁷ Mba gɔ, nwa, mi lengge sɔ na, we mɔ nɛ tɔ̃ sɛ hã mi ni, ma hã sɛ gɛ̃a dungu hã mi. We kɛ mɔ ɔ nɛ anzɛ 'da Gale ni. Mɔ ĩ ti gɔnɔ sanga 'dã mɔ do dia mɔ. E kɔ NWA Gale 'da mɔ dungu do mɔ.”

¹⁸ Nɛ nwa Davidi tɔ̃ hã wuke na: “Mi nɛ aka mɔ do we kpo, nɛ ma wia na mɔ gese nu nɛ hã mi, nɛ mɔ tɛ ùsù we gɔ.” Nɛ wuke ni gese na: “Aa nwa, mɔ kɔ̃, nɛ mɔ tɔ̃!”

¹⁹ Nɛ Davidi aka a na: “Wi tɔ̃a hã mɔ na, mɔ dɛ mɛ gɛ vɛ̃ wi a Yoabɛ gɔ nde?” Nɛ a gese na: “Aa nwa, mi kana tɛ mi na, mɔ tɔ̃a gbãlã we ngboo. Wi a wi toe 'da mɔ Yoabɛ, hã a tɔ̃a wenɔ gɛ vɛ̃ dɛ nu mi na, mi tɔ̃ sɛ ma.

²⁰ A dɛa ní, takɔ we ni ma e. Nɛ nde mɔ nwa, mɔ ĩ ti mɛnɔ vɛ̃ ma la ngɔ nù gɛ, we kɛ mɔ do hã ɔ nɛ anzɛ 'da Gale ni.”

²¹ Nɛ nwa Davidi nɛa, nɛ a tɔ̃ hã Yoabɛ na: “Mi 'bili na, mi dɛ linggamɛ 'da mɔ. Kɔ mɔ nɛ́ hã mɔ fa zagbãlã Absalɔmɛ tɛ do a dɛ dɛ.”

²² Yoabɛ nɛa we zele ni, nɛ a gu li a nù dati nwa Davidi, nɛ a hã iɔ̃nae hã a, nɛ a na: “Aa nwa, mi ĩ di ni na, dia zã 'da mɔ 'bana dɛ 'da mi fai, we kɛ mɔ kɔ̃a we dɛ mɛ kɛ mi lingga ni.”

²³ Yoabɛ tɔ̃a ni do'do, nɛ a kulu ngɔ, nɛ a la tɛ Gesurɛ i, nɛ a kpa Absalɔmɛ, nɛ a si do a dɛ Yeruzalɛmɛ.

²⁴ Nɛ nwa Davidi na, Absalɔmɛ sí dɛ 'da a i, a tɛ hɔ dati ɛ gɔ. Nɛ Absalɔmɛ si dɛ 'da a i, nɛ nde wa zɔ̀ tɛ ngba wa do nwa gɔ.

Davidi 'dafa sanga tɛ ngba a do Absalɔmɛ

²⁵ Tɛ ngɔ nù Israɛlɛ vɛ̃, wi de zi zagbãlã nɛ ngɔ Absalɔmɛ bina, nɛ wa dɔnggɔ zi dia zagbãlã 'da a nɛ ngɔ tala winɔ vɛ̃. Yolo zu a we hɔ tɛ nyanga a, fo kunda kpo tɛ̃ a bina.

²⁶ Ma hɔ Sɔkpɔ sabɛlɛ kpo kpo, nɛ nde mili zu a dulu wena, nɛ a kɛlɛ ma, we kɛ ma dĩlĩ a dĩlĩ. A kɛlɛ do'do, nɛ wa we dĩ nɛ ngɔ kilo we do mɛnɔ 'da nwa, nɛ nde dĩ nɛ nɛa ngɔ kilo bɔa.

²⁷ Absalɔmɛ kua zi obulu be talɛ, nɛ boko be kpo. Li boko be ni a Tamarɛ, nɛ a de zi zɔnga wena.

²⁸ Absalɔmɛ dɛa sabɛlɛ bɔa dɛ Yeruzalɛmɛ ni, nɛ nde a kpà wala we le 'da nwa i gɔ.

²⁹ Mbe tũ kpo, nɛ a tombo na wa sa mɔ hã Yoabɛ, kɔ ɛ tombo a 'da nwa i. Nɛ Yoabɛ bɛ̃a we nɛ 'da Absalɔmɛ i do'do. Absalɔmɛ tombo 'bɔ mbé wele hã a fala bɔa, nɛ Yoabɛ bɛ̃ 'bɔ mbé nɛ.

³⁰ Na mɛ ni, Absalɔmɛ tɔ̃a hã Owi tonɔ 'da a na: “Nɛ zɔ́ fɔ kpalɛ 'da Yoabɛ ma dɛ kɛ zã kɛ 'da mi ni. Nɛ nɛ́, kɔ nɛ dɔ ma!” Nɛ owi tonɔ wa dɛa mbula Absalɔmɛ ba ni, nɛ wa dɔ fɔɛ 'da Yoabɛ.

³¹ Yoabɛ nɛa we zɔ na, wa fi we tɛ fɔɛ 'da a ni, nɛ a nɛ 'da Absalɔmɛ i we aka a na: “Gulu kɛ Owi tonɔ 'da mɔ wa fi we tɛ fɔɛ 'da mi we ge nde?”

³² Nɛ Absalɔmɛ gese hã a na: “We kɛ mi sa mɔ hã mɔ na, mɔ tɛ 'da mi nga, nɛ mɔ bɛ̃a. Mi kɔ̃a sɔ we tombo mɔ 'da nwa i do toe gɛ: Gulu kɛ mi yula Gesurɛ i kɔ mi si we ge nde? Ma dia sɔ fɛ̃ na, mi 'bana dɛ i mɔ gbaa sɔɛ gɛ. Nɛ nde mi kɔ̃a na, mɔ nɛ 'da nwa i, nɛ mɔ 'dafa na, mi le 'da a i. Kɔ fala kɛ mi ɔ do 'dã gulu we nde, nɛ a gbɛ́ mi.”

³³ Yoabɛ nɛa, nɛ a tɔ̃ toe 'da Absalɔmɛ hã nwa Davidi. Nwa nɛa we zele toe ní, nɛ a tombo na, wa sa mɔ hã a. Wa sa mɔ, nɛ a tɛ do gbɛnga tɛ, nɛ a gu li a nu dɛ dati nwa ni. Nɛ nwa ba a dɛ tɛ̃ a.