2 SAMUƐLƐ 13 - WE NU GALE 1995

Amnoni do Tamarɛ

¹ Nɛ zɔ́ mɛ ma la 'do nɛ gɛ. Absalɔmɛ, be 'da Davidi zi do 'bundu be zɔnga nya a kɛ a de zi zɔnga wena, li a Tamarɛ. Nɛ Amnoni, mbee be 'da Davidi, kpa wɔ a.

² Zu Amnoni vĩ, nɛ a wè tɛ kunu sila a we boko nya a gɔ, gbaa nɛ zɛlɛ ba a. Mba gɔ, a zi na, ɛ wé sɛ we kɔlɔ do a gɔ, tua kɛ a tɛ ĩ̀ ti wili gɔ.

³ Nɛ nde Amnoni zi do mbe yali ngba a kpo, wi a Yonadabɛ, li a sɔ̃ wena. A a be 'da Sama, nɛ a 'bɔ a yamba Davidi.

⁴ Nɛ Yonadabɛ aka Amnoni na: “Be 'da nwa, gulu kɛ do titole kpo kpo, nɛ mɔ dungu ɔ nɛ mɔ do zɛlɛ ni we ge nde? Mɔ wè do tɔ̃ gulu nɛ hã mi gɔ nde?” Nɛ Amnoni gese hã a na: “Mi kɔ̃ gɛnɛ Tamarɛ, boko nya zagbãlã nya mi Absalɔmɛ wena.”

⁵ Yonadabɛ nɛa we zele ni, nɛ a tɔ̃ hã Amnoni na: “Mɔ ɔ́ nù, nɛ mɔ dɛ ɔ nɛ mɔ do zɛlɛ ni. Kɔ 'da fala baa mɔ tɛ we zɔ mɔ, nɛ mɔ tɔ̃ hã a na: ‘Mɔ hã wala hã nya mi Tamarɛ, kɔ a tɛ we gi nyɔngɔmɔ hã mi. A gi sɛ mɛ ni dɛ gbali mi, nɛ a tɛ nɛ hã mi do tɛ̃ a, nɛ mi nyɔngɔ.’ ”

⁶ Nɛ Amnoni ɔa nù, nɛ a dɛa ɔ nɛ kɛ a do zɛlɛ ni. Nɛ nwa Davidi tɛ we zo a, nɛ Amnoni tɔ̃ hã a na: “Mɔ hã wala hã nya mi Tamarɛ, kɔ a tɛ we dɔ be mukate bɔa hã mi dɛ kɛ zã mi gɛ. A 'dafa sɛ ma hã mi do tɛ a, nɛ mi nyɔngɔ ma.”

⁷ Nɛ Davidi tumba hã Tamarɛ na, a nɛ 'da nya a Amnoni i, kɔ a gi mɔ hã a.

⁸ Tamarɛ zila toe ni, nɛ a nɛ 'da Amnoni i, nɛ a kpa a, nɛ nde a ɔa nù. A zanga farini, nɛ a dɛ do mukate dɛ li Amnoni ni, nɛ a dɔ ma.

⁹ 'Do nɛ, nɛ Tamarɛ ba pani mukate, nɛ a e na Amnoni nyɔngɔ, nɛ a bɛ̃ nyɔngɔ nɛ do'do. A ba nu a na, wa fo winɔ vɛ kɛ zã ɛ dɛ nza. Nɛ winɔ vɛ̃ wa hɔa.

¹⁰ Nɛ a tɔ̃ hã Tamarɛ na: “Mɔ tɛ́ do mukate hã mi gbaa dɛ fala ɔi 'da mi nga. Mɔ tɛ́ do ma, nɛ mɔ hã ma hã mi do tɛ mɔ, nɛ mi nyɔngɔ sɛ.” Tamarɛ ba mukate a dɛa ni, nɛ a nɛ gbaa tɛ fala ɔi 'da Amnoni i, nɛ a hã ma hã a.

¹¹ 'Da fala a hã nyɔngɔmɛ hã a ni, nɛ a ba a do nga nɛ, nɛ a tɔ̃ hã a na: “Tamarɛ, mɔ tɛ́, kɔ mi ɔ do mɔ.”

¹² Nɛ Tamarɛ he mɔ na: “Gɔ! Amnoni, mɔ tɛ ɔ̀ do mi gɔ. Wa dɛ́ mɔ ɔ ni ngɔ nù Israɛlɛ gɛ gɔ. Tɛ dé 'dã mɔ ɔ nɛ kɛ gɛ gɔ!

¹³ Mɔ dɛ ní, nɛ mi la sɛ do sape nɛ dɛ do nde? Nɛ wa zɔ sɛ mɔ ngɔ nù Israɛlɛ gɛ na, mɔ a yɔndɔ wi. Mɔ tɔ̃ we nɛ hã nwa Davidi, nɛ a bɛ̃́ sɛ we ba mi hã mɔ gɔ.”

¹⁴ Nɛ nde Amnoni kɔ̃̀ we zele we ni gɔ. A sanga a do nga nɛ, nɛ a ɔ do a.

¹⁵ A nɛa we ɔ do Tamarɛ do'do, nɛ yolo dɛ di ni, nɛ a sɛnɛ a 'danga wena, nɛ a kɔ̃̀ 'bɔ mbé gɛnɛ a gɔ. A ndaka a, nɛ a tɔ̃ hã a na: “Mɔ fó tɛ mɔ!”

¹⁶ Nɛ Tamarɛ hia mɔ na: “Gɔ! Mɔ ndi mi na mɛ ni, nɛ nde mɔ dɛa gã 'dã mɔ nɛa ngɔ kɛ mɔ dɛa gɛ.” Nɛ Amnoni kɔ̃̀ 'bɔ mbé nɛ we zele a gɔ.

¹⁷ Nɛ a sa mɔ hã be zagbãlã wi toe 'da a, nɛ a tɔ̃ hã a na: “Fó be zɔnga gɛ ngɔ li mi do'do! Tɔnda a da a dɛ nza i, nɛ mɔ kã nu tɔa.”

¹⁸ Wi toe da a nza, nɛ a kã nu tɔa. Tamarɛ he'de zi gba tulu olo gã gole, ɔ nɛ kɛ oboko benɔ 'da nwanɔ wa he'de fai, dati a kɛ na wa ba wili ni.

¹⁹ A ɛ̃a tulu tɛ̃ a, nɛ a so bũ dɛ zu a we be na, a do 'bako. Nɛ a gu kɔ̃ a li a, nɛ a la, nɛ a tɛ zɛ nu a.

²⁰ Nya a Absalɔmɛ zɔ a, nɛ a aka a na: “Tamarɛ, be hɔ dɛ 'do mi, Amnoni dɛa 'dã mɔ do mɔ dɛa nde? Mɔ tɛ wèlè we nɛ gɔ, we kɛ a a nya mɔ, nɛ mɔ zɔ́ ma li mɔ yala iko.” Na mɛ ni, Tamarɛ ɔa dɛ 'da zagbãlã nya a Absalɔmɛ ni, ɔ nɛ wuko 'bako kɛ fo wi lengge do a bina ni.

²¹ Nwa Davidi zila we mɛ kɛ ma la ni, nɛ dã ba a nganda wena. Nɛ nde a dã̀lã̀ dɛ tɛ Amnoni gɔ, we kɛ a a kuti be 'da a, nɛ a kɔ gɛnɛ a wena.

²² Nɛ Absalɔmɛ sɛnɛ zi Amnoni wena, nɛ a kɔ̃̀ 'bɔ wele we hã a gɔ, we duzu kɛ a wɛlɛ boko nya a Tamarɛ, nɛ a ɔ do a ni.

Absalɔmɛ gbɛa Amnoni, nɛ a yu

²³ 'Do mɛ ni la sabɛlɛ bɔa, nɛ mbe tũ kpo, nɛ Owi kɛlɛ sala tɛ batanɔ wa zi tɛ 'da Absalɔmɛ tɛ kɔ le Bala-Hasɔrɛ, dɔ̃ɔ do nù Efraimɛ. Nɛ Absalɔmɛ sa mɔ hã obenɔ 'da nwa Davidi vɛ̃ na, wa tɛ 'dɛ ɛ nga sɛ.

²⁴ A nɛa, nɛ a kpa Davidi, nɛ a tɔ̃ hã a na: “Aa nwa, Owi kɛlɛ sala tɛ bata wa hɔa 'da mi ni. Kɔ mɔ kɔ̃́, nɛ mɔ nɛ tɛ mɔ dɔɛ ni do owi olo li mɔ.”

²⁵ Nɛ nwa Davidi gese hã a na: “Gɔ, be 'daa! Lɛ nɛ vɛ̃, nɛ ma hã sɛ dĩ tole hã mɔ.” Nɛ Absalɔmɛ dala nu a, nɛ nwa bɛ̃ do'do. Nɛ a wila nu a tɛ̃ a na, a dɛ mɔ dɔɛ do dia nɛ.

²⁶ Nɛ Absalɔmɛ tɔ̃ hã a na: “Mɔ bɛ̃a we nɛ tɛ mɔ dɔɛ, kɔ mɔ hã wala hã nya mi Amnoni na, a kã lɛ i mɔ.” Nɛ nwa Davidi aka a na: “Gulu nɛ we ge nde?”

²⁷ Nɛ Absalɔmɛ dala 'bɔ nu ɛ mbé nɛ, nɛ do sɔkpɔ nɛ, nɛ nwa Davidi kɔ̃a na, Amnoni do ogele nya a wa la do Absalɔmɛ.

²⁸ Wa hɔa i mɔ, nɛ Absalɔmɛ ba nu a hã Owi tonɔ 'da a na: “Li nɛ sɔ̃ tɛ Amnoni. Fala kɛ a nɔ dɔ̃ɛ, kɔ ma ba a, nɛ mi tɔ̃ sɛ hã nɛ na, nɛ gbɛ a. Nɛ nɛ tɛ dɛ̀ kili gɔ, we fie 'da a ma zɔ sɛ tati a mi. Nɛ kpala sila nɛ, nɛ nɛ ɔ do ngawi!”

²⁹ Owi tonɔ wa dɛa mbula Absalɔmɛ ba hã wa ni, nɛ wa gbɛa Amnoni. Nɛ tala obenɔ 'da Davidi wa nɛa we zɔ ní, nɛ wa kulu ngɔ nu mɛsa, nɛ wele do wele kũ ngɔ mbalata 'da a, nɛ a yu.

³⁰ Do 'da fala wa 'bana li wala i ni, nɛ Davidi zele na, Absalɔmɛ gbɛa benɔ 'da a vɛ̃, a là tala be kpo gɔ.

³¹ Davidi nɛa we zele na mɛ ni, nɛ a ɛ tulu tɛ̃ a, nɛ a te dɛ bulu nù. Nɛ owi olo li a wa ɛ̃a tɛ mɛ 'bɔ tulu tɛ wa, nɛ wa linggi a.

³² Nɛ Yonadabɛ, be 'da Sama, kɛ a a yamba Davidi ni tɔ̃ hã a na: “Aa nwa, mɔ tɛ lènggè na, wa gbɛa benɔ 'da mɔ vɛ gɔ, wi fia kpo a Amnoni iko. Absalɔmɛ kana zi tɛ ɛ we gbɛ a do 'da fala a wɛla zi boko nya a Tamarɛ, nɛ a ɔ do a ni.

³³ Mɔ tɛ dùngù do linggamɔ na, obenɔ 'da mɔ wa fia Vɛ gɔ. Wi fia kpo a Amnoni iko,

³⁴ nɛ Absalɔmɛ yu do'do.” Do 'da fala ni, nɛ be zagbãlã kɛ a zɔ mɔ nu ngboe ni, zɔa ogili wele dɔ wena tɛ zĩlĩ kala do wala Honoraimɛ. Nɛ a nɛ, nɛ a tɔ̃ hã nwa Davidi na: “Mi zɔa Owele wa hɔa do Honoraimɛ, kɔ wa tɛ zĩlĩ kala.”

³⁵ Nɛ Yonadabɛ tɔ̃ hã Davidi na: “Aa nwa, winɔ ni a obenɔ 'da mɔ, hã wa tɛ ni. Mɛnɔ dɛa tɛ̃ ɛ vɛ̃, ɔ nɛ kɛ mi tɔ̃a sɔ hã mɔ ni.”

³⁶ Yonadabɛ nɛa we da nu a tɛ wila we ni, nɛ obenɔ 'da nwa wa hɔ, nɛ wa ndo he kɔ̃a. Nɛ Davidi do owi olo li a vɛ̃ wa hia 'bɔ wena.

^37-38 Absalɔmɛ yu dɛ 'da Talmai, kɛ a a be 'da Amihudɛ, nɛ a a nwa ngɔ nù Gesurɛ ni, nɛ a ɔ i mɔ sabɛlɛ talɛ. 'Da falanɔ ni vɛ̃, nɛ nde Davidi tɛ dungu gɛla be 'da a Amnoni.

³⁹ Sila Davidi nɛa we gɛ̃ olo fio be 'da a do'do, nɛ a la fala sɛnɛ Absalɔmɛ.