2 SAMUƐLƐ 12 - WE NU GALE 1995

Natanɛ tɔ̃a hã Davidi na Gale a hã sɛ etumbu hã a

¹ 'Do nɛ, nɛ NWA tumba wi gba olo nu a, Natanɛ, tɛ 'da Davidi i. Natanɛ hɔa i mɔ, nɛ a le dɛ 'da Davidi, nɛ a tɔ̃ gba wia we gɛ hã a na: “Mbe Owele bɔa wa zi kɔ mbe le kpo. Mbe kpo a wi kpamɔ, nɛ mbee nɛ a wi sã.

² Wele kɛ a a wi kpamɛ ni, a zi do ogili ngɔmbɔ do obata.

³ Nɛ wele kɛ a a wi sã ni, a zi tati nɛ do be naa bata kpo, kɛ a oso a usa ni. A zi tɛ dala a fai, nɛ a gã fala nɛ kpo do obenɔ 'da a. Be bata ni nyɔngɔ zi kpo kpo nyɔngɔmɛ kɛ wele a nyɔngɔ ni, nɛ a nɔ kpo kpo mɔ kɛ wele a nɔ ni. A ɔ zi fai dɛ kɛ zã wele a nɛ́ boko be 'da a ni.

⁴ Nɛ mbe tũ kpo, nɛ gɛnɛ hɔ 'da wi kpamɛ ni. Nɛ a kɔ̃̀ we gbɛ mbe sa'de kpo kɔ ogili nadalamɛnɔ 'da a, we dɛ do gbɛla gɛnɛ 'da a ni gɔ. Nɛ a ba be bata 'da wi sã ni, nɛ a gbɛ a, we gi hã gɛnɛ 'da a.”

⁵ Davidi nɛa we zele we ni, nɛ zã a nɔ̃lɔ̃ dɛ tɛ wi kpamɛ wena, nɛ a tɔ̃ hã Natanɛ na: “Mi kana tɛ mi do zu li nwa, wele kpasi na, wi dɛa mɛ ni wia do fio!

⁶ A zũ be bata, nɛ a ĩ̀ mbe 'bako bi sĩ gɔ, ma kɛ a gese sɛ olo nɛ do obata nalɛ.”

⁷ Nɛ Natanɛ tɔ̃ hã a na: “Wi dɛa mɛ ni, wi a mɔ. Kɔ mɔ zélé we NWA Gale 'da obe Israɛlɛ a tɔ̃ hã mɔ gɛ. A na: ‘Mi ia mɔ do nwa ngɔ nù Israɛlɛ, nɛ mi kpasa mɔ ti kɔ̃ Saulo.

⁸ Mi ia nu fɛlɛ nwa 'da mɔ Saulo ti mbula 'da mɔ. Nɛ mi hã 'bɔ wukonɔ 'da a hã mɔ. Mi ia mɔ do nwa ngɔ Oisraɛlɛ do Oyuda. Kɔ fala kɛ ma tɛ wè li mɔ gɔ, nɛ mi dɛ sɔ 'bɔ mbé mɔ hã mɔ nɛ ngɔ ki ni.

⁹ Kɔ gulu kɛ mɔ zɔa ombulanɔ 'da mi li mɔ yala, nɛ mɔ dɛ mɔ kɛ ma dè tɛ mi gɔ ni we ge nde? Mɔ gbɛa Uri, be Hiti. Mɔ ba wala hã Oamoni na, wa gbɛ a li bolo. 'Do nɛ, nɛ mɔ ba kɛnɛ a do wuke 'da mɔ.

¹⁰ Kɔ mɔ zɔ́, yolo do sɔɛ gɛ, nga fio zɔlɔ sɛ kɔ nu fɛlɛ mɔ gɔ, we duzu kɛ mɔ mɔmɔ mi, nɛ mɔ ba kɛnɛ Uri do wuke 'da mɔ.

¹¹ Mi nwa, mi tɔ̃ hã mɔ na, mi dɛ sɛ na, mbe wele kpo kɔ nu fɛlɛ mɔ ngboo, a hã 'bako hã mɔ. Mi kala sɛ owukonɔ 'da mɔ dɛ li mɔ ni, nɛ mi hã sɛ wa hã gele wele, nɛ a ɔ sɛ do wa, nɛ winɔ vɛ̃ wa ĩ we nɛ.

¹² Mɛ mɔ dɛa do usu nɛ ni, mi dɛ sɛ na, ma hɔ dɛ wila fala dɛ li winɔ 'da mɔ vɛ̃.’ ”

¹³ Davidi nɛa we zele ni, nɛ a tɔ̃ hã Natanɛ na: “Mi ĩ na, mi dɛa 'dã mɔ dati NWA.” Nɛ Natanɛ gese hã a na: “NWA a fo sɛ 'dã mɛ zu mɔ, nɛ mɔ fé sɛ gɔ.

¹⁴ Nɛ nde be mɔ kua a ni, a fe sɛ. We kɛ mɛ mɔ dɛa ni, ma hã wala hã owi sɛnɛ nwa na, wa zɔ a li wa yala iko.”

¹⁵ Natanɛ tɔ̃a ni do'do, nɛ a si dɛ 'da a i. NWA hã zɛlɛ hã be kɛ Baseba, wuko olo Uri kua a hã Davidi ni,

Be 'da Baseba fia

¹⁶ nɛ Davidi ala nu a hã Gale we duzu be. A bɛ̃a nyɔngɔmɔ, nɛ tũ kpo kpo fala kɛ a nɛ le tɔa we ɔ nù ni, nɛ a ɔ dɛ bulu nù iko.

¹⁷ Okpasa wi ngɔ wi tonɔ 'da a, wa zɔa kɛ a ɔ dɛ nù gɛ ni, nɛ wa tɛ, nɛ wa tɔ̃ hã a na, a kulu ngɔ. Nɛ nde a bɛ̃a, nɛ a kɔ̃̀ 'bɔ we nyɔngɔ mɔ kpo do wa gɔ.

¹⁸ Olo nɛ la tũ sambo, nɛ be fe. Nɛ owi tonɔ wa dɛ kili tɔ̃ we nɛ hã Davidi. Wa na: “'Da fala be zi do tunu li a ni, nɛ nwa kɔ̃̀ zi we zele lɛ gɔ. Kɔ lɛ nɛ dɛ di fala tɔ̃ hã a na, be fia ni nɛ nde? A zele ni, nɛ mbe gɔ, nɛ a dɛ sɛ 'dã mɔ do kili tɛ̃ a.”

¹⁹ Davidi nɛa we zɔ kɛ wa tɛ fɔ̃lɔ̃ we sanga ngba wa ni, nɛ a ĩ na be fia. Nɛ a aka wa na: “Be 'da mi fia nde?” Nɛ wa gese hã a na: “Ĩi, a fia.”

²⁰ Nɛ Davidi nɛa we zele ni, nɛ a kulu ngɔ nù ni, nɛ a fɔlɔ tɛ̃ a, nɛ a fɛlɛ nɔ yɔmbɔ, nɛ a kpolo tulu tɛ̃ a. Nɛ a nɛ, nɛ a le kɔ tɔa 'da NWA Gale we dɔnggɔ a. A nɛa we si dɛ nu tɔa i, nɛ a ba nu a na, wa tɛ do nyɔngɔmɔ hã ɛ. Wa tɛa nɛ, nɛ a nyɔngɔ.

²¹ Nɛ wi tonɔ 'da a wa aka a na: “Aa nwa, gulu mɛ mɔ dɛa ni a ge nde? 'Da fala be 'da mɔ 'bana zi do tunu li a ni, nɛ mɔ bɛ̃a zi nyɔngɔmɔ, nɛ mɔ hia kɔ̃a. Kɔ a nɛa we fe ma, nɛ mɔ kulu ngɔ, nɛ mɔ ndo nyɔngɔ mɔ nde?”

²² Davidi gese hã wa na: “Ma nɛ mɛ ni. Mi bɛ̃a zi nyɔngɔmɔ, nɛ mi hia do 'da fala be 'bana do tunu li a ni. Mi lengge zi na, mbe gɔ, nɛ nwa a ĩ sɛ 'bako hã mi, nɛ be kpasa.

²³ Kɔ kɛ a fia ia ni, gulu kɛ mi nɛ bɛ̃ 'bɔ nyɔngɔmɔ we ge nde? Mi wè do dɛ na a tunu 'bɔ gɔ. Mi a mi nɛ kpa sɛ li ngba mi do a, nɛ nde a kpóló sɛ 'bɔ tɛ̃ a we kpa mi gɔ.”

Davidi kua Salɔmɔ

²⁴ 'Do nɛ, nɛ Davidi nɛa, nɛ a dungu do kɛnɛ a Baseba, we fo 'bako kɔ sila a. Nɛ wa mba ngɔ te do a, nɛ a ko be, nɛ a e li a na Salɔmɔ. NWA kɔ̃a gɛnɛ be ni,

²⁵ nɛ a tombo Natanɛ, wi gba olo nu a na, a tɔ̃ hã Davidi na, a e li be na Yɛdidia, gulu nɛ na: “Wi kɛ nwa kɔ̃a gɛnɛ a.”

Davidi bi le Raba, nɛ a ba ma

²⁶ Do 'da fala ni, nɛ nde Yoabɛ, gã wi ngɔ sodanɔ 'da obe Israɛlɛ, 'bana zi tɛ bi Raba, gã le nwa 'da Oamoni, nɛ a kɔlɔ dɔ̃ɔ we ba ma.

²⁷ Nɛ Yoabɛ tombo owi to hã Davidi na: “Mi bi le Raba, nɛ mi ba 'bɔ fala wa usu do li nɔ nɔa ni.

²⁸ Kɔ mɔ ba nu mɔ hã tala sodanɔ, hã mɔ tɛ do tɛ mɔ, nɛ mɔ linggi le we ba ma. Mi kɔ̃̀ na, mi a mi ba le vɛ̃, kɔ dɔ̃lɔ̃ li vɛ̃ ɔ do mɔ́ mi iko gɔ.”

²⁹ Davidi nɛa we zele ni, nɛ a ba nu a hã tala sodanɔ. Nɛ a nɛa, nɛ a bi le Raba, nɛ a ba ma.

³⁰ Nɛ a ba ndasa nwa zu kpikima Milkɔmɛ, gale 'da Oamoni ni. Ndasa ni, wa dɛa zi ma do mɔ mbali, dĩ nɛ kilo 'bu nɛ talɛ, nɛ ma zi do ta olo gã gole tɛ nɛ. Nɛ wa ba ma, nɛ wa gu zu Davidi. Nɛ wa kala 'bɔ odia mɔ kɔ le ni wena.

³¹ Wa kala owinɔ kɔ lenɔ ni, nɛ Davidi a wa we dɛ kolofe. Owinɔ ni zi a owi gba te, owi sɛ ta, Owi gɔmɔ te, do owi zɛ biliki. A dɛa zi na mɛ ni do tala gele winɔ kɔ lenɔ 'da Oamoni vɛ̃. 'Do nɛ, nɛ Davidi si do sodanɔ 'da a vɛ̃ dɛ Yeruzalɛmɛ.