2 SAMUƐLƐ 11 - WE NU GALE 1995

Davidi do Baseba

¹ Zɔlɔ ngangga 'do nɛ ni, do 'da fala Onwanɔ wa nɛ do bole fai ni, nɛ nwa Davidi sa mɔ hã Yoabɛ na, a kpe dati osoda Israɛlɛ do ogã wi ngɔ wa, kɔ wa nɛ we bi Oamoni. Wa nɛa, nɛ wa bi wa, nɛ wa gbɛ wa fai, nɛ wa linggi 'bɔ gã le 'da wa Raba. Nɛ nde Davidi 'bana kɛ 'da ɛ dɛ tɛ Yeruzalɛmɛ i.

² Mbe gɛ̃a wese kpo, 'do kɛ Davidi kpia tɛ̃ a, kɔ a kulu ngɔ ni, nɛ a kũ dɛ zu tɔa nwa i, takɔ a ngbala mbe nyanga a dɛ di ni. A hɔa ngɔ mɔ, nɛ a zɔ mbe wuko tɛ fɔlɔ tɛ̃ a, nɛ nde a de zi zɔnga wena.

³ Nɛ Davidi tumba Owele na, wa aka gulu wuke ni. Wa aka, nɛ wa tɔ̃ hã Davidi na: “Wuke ni a Baseba, be 'da Eliamɛ, nɛ a a kɛnɛ Uri, be Hiti.”

⁴ Davidi tumba owi to na, wa sa mɔ hã a, kɔ a tɛ. A tɛa, nɛ Davidi ɔ do a. 'Do nɛ, nɛ a si. (Ĩ na, a yula zi tɛ zɔ zɛkɛ, kɔ a fɔlɔ tɛ̃ a olo nɛ.)

⁵ 'Do nɛ, nɛ zã wuke ni gɔnɔ, nɛ a tombo hã Davidi na, ɛ do zã.

⁶ Davidi nɛa we zele toe ni, nɛ a ba nu a hã Yoabɛ na, a tombo Uri, be Hiti 'da ɛ nga. Yoabɛ tumba Uri,

⁷ nɛ a hɔ 'da nwa Davidi. Nɛ Davidi aka a do lɛnggɛ si ngɔ Yoabɛ do osodanɔ, do tɛlɛ tɛ kɛ bole la nɛ ni.

⁸ 'Do nɛ, nɛ a tɔ̃ hã a na, a si, kɔ a ɔmɔ tɛ̃ a. Nɛ Uri hɔa nza kɔ tɔa nwa ni, nɛ nwa tombo dia mɔ hã a nu tɔa 'da a i.

⁹ Nɛ nde Uri sì dɛ nu tɔa 'da a i gɔ. A nɛa, nɛ a ɔ tɛ nu ngbo tɔa nwa, fala nɛ kpo do osodanɔ wa zɔ mɔ tɛ Davidi ni.

¹⁰ 'Da fala Davidi zila na Uri sì gɔ ni, nɛ a aka Uri na: “Gulu kɛ mɔ yula du wala, nɛ mɔ sì dɛ nù tɔa 'da mɔ i gɔ we ge nde?”

¹¹ Nɛ Uri gese na: “Aa nwa, Sanduku Gba Tɔkɛ 'da NWA Gale, do osoda Israɛlɛ do Yuda wa ɔ dɛ ti tɔa tande iko. Nɛ Yoabɛ do ogã wi ngɔ sodanɔ 'da mɔ, wa ɔ dɛ nù gɛ dɛ zã wɔkɔsɔnɔ. Nɛ mi si dɛ nu tɔa 'da mi, we nyɔngɔ mɔ, do nɔ dɔ̃ do mba ngɔ te do kɛnɛ mi nde? Mi kana tɛ mi hã mɔ na, mi dɛ̃ sɛ mɔ ɔ ni fala kpo gɔ.”

¹² Nɛ Davidi gese hã Uri na: “Ma a dia, mɔ 'báná 'bɔ dɛ dɛ sɔɛ gɛ. Bindɛ sɛ nɛ mi hã sɛ wala hã mɔ na, mɔ la de.” Uri zila, nɛ do ngba soe ni a 'bana 'bɔ dɛ Yeruzalɛmɛ ni.

¹³ Davidi sa mɔ hã a we nyɔngɔ mɔ do nɔ dɔ̃ do a fala nɛ kpo. Davidi hã dɔ̃ɛ hã a, nɛ ma ba a. Nɛ nde wese gɛ̃a, nɛ Uri sì 'bɔ gɔ. A nɛa, nɛ a ɔ fala nɛ kpo do osodanɔ wa zɔ mɔ tɛ nwa Davidi ni.

¹⁴ Fala sa do titole, nɛ Davidi kɔma mbɛti hã Yoabɛ, nɛ a e ma dɛ kɔ̃ Uri.

¹⁵ Kɔ mbɛti ni, Davidi kɔma na: “Fala mɔ zɔ na bole nganda wena, nɛ mɔ kpé Uri dati. Nɛ nɛ fo tɛ nɛ 'do a, nɛ nɛ la a zu a kpo, takɔ owi sɛnɛ nɛ wa gbɛ a.”

Wa gbɛa Uri wili Baseba

¹⁶ Yoabɛ kɛ a zɔ zi mɔ tɛ nu ngbo le wa linggi ma ni, a ia Uri si fala a ĩ na, onga soda Amoni wa do ma ni.

¹⁷ Nɛ owinɔ wa bi ngɔ le ni wa hɔa, nɛ wa bi Yoabɛ do osodanɔ 'da a, nɛ wa gbɛa mbe osoda Israɛlɛ do ogã wi ngɔ wa. Nɛ wa gbɛa 'bɔ Uri.

¹⁸ Yoabɛ nɛa we zɔ ní, nɛ a tombo lɛnggɛ bole nɛ́ kɛ ma la nɛ ni hã Davidi.

¹⁹ Nɛ a tɔ̃ hã wi nɛ toe ni na: “Fala kɛ mɔ tɔ̃ lɛnggɛ bole gɛ vɛ̃ hã nwa Davidi,

²⁰ nɛ mbe gɔ, nɛ zã a ma nɔ̃lɔ̃ sɛ, nɛ a aka sɛ mɔ na: ‘Gulu kɛ nɛ nɛa, hã nɛ kɔlɔ dɔ̃ɔ do le do 'da fala bole gɛ we ge nde? Nɛ ĩ̀ na, wa da kpili do zu ngbo le da ni gɔ nde?

²¹ Wi gbɛ zi Abimelɛkɛ, be 'da Yɛrubalɛ tɛ kɔ le Tebɛsi a wio nde? Mbe wuko hã a dà zi gã ta do zu ngbo le, nɛ ma gbɛ a gɔ nde? Gulu kɛ nɛ nɛa kɛ zã ngbo le ni we ge nde?’ Kɔ fala kɛ nwa aka mɔ na mɛ ni, nɛ mɔ tɔ̃ sɛ hã a na: ‘Uri, mbe gã wi ngɔ osodanɔ kɛ a a be Hiti ni, a fia 'bɔ.’ ”

²² Wi toe ni nɛa, nɛ a hɔ 'da Davidi i, nɛ a tɔ̃ toe Yoabɛ tombo do a ni hã a na:

²³ “Ngawi 'da Owi bi ngɔ le nɛa ngɔ lɛ. Wa hɔa dɛ 'da lɛ we bi lɛ ngɔ mbɛ nùi zã wɔkɔsɔnɔ. Nɛ nde lɛ ndi wa gbaa, nɛ lɛ e wa tɛ nu ngbo le.

²⁴ Nɛ Owi da nzabele, wa yula do ngɔ ngboe, nɛ wa da kpili dɛ ngɔ lɛ nga. Ma a wa gbɛa ombe gã wi ngɔ sodanɔ. Nɛ kɔ wanɔ wa fia ni, Uri, be Hiti do wa.”

²⁵ Nɛ nwa Davidi gese hã wi toe ni na: “Mɔ nɛ́ hã mɔ ngándá sila Yoabɛ, nɛ mɔ tɔ̃ hã a na, a tɛ bà we bole ni dɛ li sila a 'danga wena gɔ. Kɔ bolo fai, nɛ nde fio zɔ́lɔ́ gɔ. Mɔ tɔ̃ sɛ 'bɔ hã a na, a bí le ni nganda, nɛ a 'danga ma.”

²⁶ 'Da fala kɛ Baseba zila na, wili ɛ fia ni, nɛ a dungu gɛla.

²⁷ Kɔ tũ gɛla nɛa we la do'do ni, nɛ Davidi ba a dɛ 'dɛ ɛ nga. A ba Baseba do kɛnɛ a, nɛ wa kua bulu be do a. Nɛ mɛ Davidi dɛa ni, ma dè zi tɛ NWA gɔ.