2 SAMUƐLƐ 10 - WE NU GALE 1995

Owi olo li Davidi wa kpa sape

¹ 'Do nɛ là nyɛlɛ gɔ, nɛ nwa 'da Oamoni fe, nɛ be 'da a Hanunɛ dungu nwa olo a.

² Davidi nɛa we zele ni, nɛ a tɔ̃ na: “Mi nɛ be dia zã hã Hanunɛ, be 'da Nahasi, ɔ nɛ kɛ baa a dɛa zi do mi ni.” Nɛ a tombo ombe Owi olo li a na wa nɛ, kɔ wa ɔ do Hanunɛ olo fio baa a. Owi olo li Davidi wa nɛa we hɔ ngɔ nùi 'da Oamoni i,

³ nɛ ogã wi ngɔ nù Amoni wa tɔ̃ hã wele wa Hanunɛ na: “Mɔ lénggé na, Davidi tumba Owi olo li a na, wa tɛ kɔ wa ɔ do mɔ, olo fio baa mɔ iko nde? Wa tɛa ɔ nɛ owi miã, takɔ mbe ngba soe kpo, nɛ wa bi le 'da lɛ.”

⁴ Hanunɛ nɛa we zele ní, nɛ a ba nu a na, wa kala owi olo li Davidi. Wa kala wa, nɛ wa kɛlɛ nzɛlɛ wa vɛ̃, nɛ wa 'bili nu tulu tɛ wa dɛ ti ka go'do wa, nɛ wa gese wa na, wa si.

⁵ Davidi zila we nɛ, nɛ a tombo Owele dati Owi olo li a, kɛ wa kpa zi gã sape ni. Wa kpa wa, nɛ wa tɔ̃ toe 'da a hã wa na, wa 'bana dɛ Yeriko ni gbaa na, nzɛlɛ wa dulu dɛ olo nɛ, sɛ nɛ wa ĩ ti si nɛ de.

Davidi bi Oamoni do Osiri

⁶ Oamoni wa zɔa na, mɛ lo dɛa ni ma hã dã hã Davidi. Nɛ wa futa osoda Siri na, wa bi bolo zu lo. Osoda 'bu koto bɔa wa yula kɔ le Bɛtɛ-Rɛhɔbɛ do Soba, nɛ osoda koto kpo wa zi a osodanɔ 'da nwa kɔ le Maaka, nɛ osoda koto 'bu ngɔ wa bɔa wa yula kɔ le Tɔbɛ.

⁷ Davidi nɛa we zele ní, nɛ a sa mɔ hã Yoabɛ, gã wi ngɔ sodanɔ 'da a, nɛ a tombo a do osodanɔ tɛ fala ni we bi do wa.

⁸ Nɛ osoda Amoni wa hɔa nza kɔ gã le 'da wa, nɛ wa 'dafa tɛ wa we bi bole. Nɛ osoda Siri, kɛ wa yula kɔ le Soba do Bɛtɛ-Rɛhɔbɛ, do osoda kɔ le Tɔbɛ do Maaka, wa usu do si gele fala do zamɔ i.

⁹ Yoabɛ ĩ na, ɛ nɛ bi bolo do ngɔ gili osoda bɔa, wanɔ dati ɛ nga, do wanɔ 'do ɛ. Ma kɛ a saka onga soda Israɛlɛ ngboo, nɛ a a wa dati osoda Siri.

¹⁰ Nɛ a kala tala sodanɔ hã nya a Abisai, nɛ a a wa dati osoda Amoni we bi do wa.

¹¹ Nɛ Yoabɛ tɔ̃ hã nya a na: “Fala kɛ osoda Siri wa nganda nɛ ngɔ mi nde, nɛ mɔ tɛ we gala mi. Kɔ ni gɔ, hã Oamoni wa nganda nɛ ngɔ mɔ, nɛ mi nɛ sɛ we gala mɔ.

¹² Mɔ bí do sɔ̃a gbãlã tɛ, nɛ lɛ kpãlã sila lɛ. Lɛ bí nganda we duzu owinɔ 'da lɛ, do olenɔ 'da Gale 'da lɛ. E kɔ NWA Gale a dɛ mɛ kɛ zã a kɔ̃a we dɛ nɛ ni!”

¹³ Yoabɛ do sodanɔ 'da a wa nɛa we bi osoda Siri, nɛ osoda Siri wa yu.

¹⁴ Osoda Amoni wa nɛa we zɔ kɛ osoda Siri wa yu ni, nɛ wa yu tɛ mɛ 'bɔ dati Abisai, nɛ wa si. Nɛ Yoabɛ la fala bi osoda Amoni, nɛ a si dɛ Yeruzalɛmɛ i.

¹⁵ Osoda Siri wa nɛa we zɔ na, osoda Israɛlɛ wa bi lo, kɔ wa nɛa ngɔ lo ni, nɛ wa mba li gili osodanɔ 'da wa vɛ̃.

¹⁶ Nɛ nwa Hadadezɛrɛ tombo Owele tɛ kulu gã lì Efratɛ na, wa nɛ, kɔ wa sa mɔ hã onya lo kɛ wa ɔ i mɔ ni. Osodanɔ ni wa hɔa, nɛ Sobakɛ, gã wi ngɔ sodanɔ 'da Hadadezɛrɛ kpia dati wa, nɛ wa nɛa gbaa nɛ wa hɔ tɛ kɔ le Helamɛ.

¹⁷ Davidi zila we nɛ, nɛ a mba tɛ mɛ 'bɔ li osoda Israɛlɛ vɛ̃. Nɛ wa nɛ, nɛ wa kũ lì Yɔrdanɛ, nɛ wa la dɛ kɔ le Helamɛ. Osoda Siri wa 'dafa tɛ wa we bi bole do Davidi. Wa bi osoda Israɛlɛ,

¹⁸ nɛ osoda Israɛlɛ wa ndaka wa. Nɛ Davidi do osodanɔ 'da a wa gbɛ ombalatanɔ wa gbɔtɔ ngilingilinɔ ni kama sambo, nɛ wa gbɛ 'bɔ osoda kũ mbalata koto 'bu nɛ nalɛ. Nɛ wa ia dani tɛ Sobakɛ, gã wi ngɔ osoda Siri, nɛ a fe dɛ di ni.

¹⁹ 'Da fala Onwanɔ vɛ̃, kɛ wa zi ti mbula 'da Hadadezɛrɛ ni, wa nɛa we zɔ na, osoda Israɛlɛ wa bi wa, nɛ wa nɛ ngɔ wa ni, nɛ wa dɛa na do obe Israɛlɛ, nɛ wa le ti mbula 'da wa. Nɛ osoda Siri wa bì zi 'bɔ zu Oamoni mbé nɛ gɔ.