2 SAMUƐLƐ 1 - WE NU GALE 1995

Davidi zila we fio 'da Saulo

¹ 'Do kɛ Saulo fia ni, nɛ Davidi yolo tɛ ndaka Oamalɛkɛ, nɛ a si dɛ Siklagɛ, nɛ a ɔ tũ bɔa.

² Nɛ do talɛ tũi, nɛ mbe wele kpo yolo tɛ fala ɔi 'da Saulo i, nɛ a hɔ. A hi'da ɛ̃a tulu, nɛ a a bũ zu a we be na, a dungu gɛla. A nɛa we kɔlɔ do Davidi, nɛ a bili gbaa nɛ zu a to nù, we dɔnggɔ a.

³ Nɛ Davidi aka a na: “Mɔ yula do nde?” Nɛ a gese na: “Mi yula tɛ fala ɔi 'da osoda Israɛlɛ.”

⁴ Nɛ Davidi aka 'bɔ a na: “Ma dɛa nɛ nde?” Nɛ wi ni gese na: “Osoda Israɛlɛ wa yu bole, nɛ dɛlɛ wa wena, wa fia. Nɛ Saulo do be 'da a Yonatanɛ, wa fia 'bɔ.”

⁵ Nɛ Davidi aka 'bɔ na: “Mɔ dɛa fala ĩ na, Saulo do Yonatanɛ wa fia ni nɛ nde?”

⁶ Nɛ a tɔ̃ hã a na: “Mi hɔa ngo kala Gilboa do da gbalɛ, nɛ mi zɔ Saulo, nɛ nde a tɛ bili dɛ li sɛlɛ 'da a, nɛ ongilingili do Owi kũ mbalatanɔ wa linggi a.

⁷ Nɛ Saulo nɛa we siki tɛ̃ a, nɛ a zɔ mi, nɛ a sa mɔ hã mi,

⁸ nɛ a aka mi na, mi a wio nde? Nɛ mi tɔ̃ hã a na, mi a be Amalɛkɛ.

⁹ Nɛ a sa mɔ hã mi na, mi tɛ, kɔ mi gbɛ ɛ, we kɛ gɛnɛ kɔ ɛ 'bana ɔmɔ nɛ, nɛ nde ɛ kɔlɔ do fio ia.

¹⁰ Mi nɛa, nɛ mi gbɛ a, we kɛ mi ĩ na, a kpásá sɛ 'bɔ olo kɛ bole nɛa ngɔ a ni gɔ. 'Do nɛ, nɛ mi kala ndasa nwa do mɔ nu kɔ̃ wi, kɛ a hi'da ni, ma a mi tɛa nɛ hã mɔ gɛ!”

¹¹ Davidi nɛa we zele ni, nɛ a ɛ̃ tulu tɛ̃ a, nɛ owinɔ vɛ̃ kɛ zã a ni, wa ɛ̃a tɛ mɛ 'bɔ tulu tɛ wa.

¹² Wa hia, nɛ wa bɛ̃ nyɔngɔmɔ gbaa gɛ̃a wese. Wa dɛa na mɛ ni we duzu Saulo, Yonatanɛ, do obe Israɛlɛ vɛ̃, kɛ wa a owinɔ 'da NWA, nɛ wa fia li bole ni.

¹³ Olo nɛ, nɛ Davidi aka wi toe ni na: “Mɔ a wio nde?” Nɛ a gese na: “Mi a be Amalɛkɛ, nɛ lɛ kulu do baa mi dɛ ngɔ nùi 'da Oisraɛlɛ gɛ.”

¹⁴ Nɛ Davidi na: “Nɛ mɔ mbe do kili we gbɛ nwa kɛ NWA Gale saka a ni bina nde?”

^15-16 Nɛ a sa mɔ hã mbe kpo kɔ Owi dɛa tonɔ 'da a na, a tɛ, kɔ a gbɛ wi ni. Nɛ a tɔ̃ hã wi ni na: “Tɔkɛ 'da mɔ dɛ zu mɔ wele nɛ. Mɔ gbɛa tɛ mɔ, we kɛ mɔ tɔ̃a na, wi a ɛ hã ɛ gbɛa nwa, kɛ NWA Gale saka a ni.” Nɛ wi dɛa toe ni zɛa be Amalɛkɛ, nɛ a gbɛ a.

Davidi ga zuma 'bako we he kɔ̃a Saulo do Yonatanɛ

¹⁷ Nɛ Davidi 'dafa zuma 'bako we he kɔ̃a Saulo do Yonatanɛ.

¹⁸ A ba nu a na, wa be zuma ni hã owinɔ ngɔ nù Yuda vɛ̃. Li zuma ni zi a “Zuma Nzabele.” Nɛ wa kɔma ma kɔ 'buki li ma a “'Buki 'da wi bɔlɔ zu.”

¹⁹ Aa obe Israɛlɛ, onganga bolonɔ 'da lɛ wa fia, Wɔlɔ nga wi bolonɔ pɛsa do ngɔ kalanɔ.

²⁰ Nɛ tɛ tɔ̃̀ sakoe gɛ kɔ le Gatɛ gɔ. Nɛ tɛ yɛ̀'bɛ̀ ma kɔ le Askaloni gɔ. Da dɛ kɔ owuko Filisti wa dɛ́ yangga gɔ, dɔ ma té fũ zã oboko benɔ 'da opaganɔ gɔ.

²¹ E kɔ mbɔɛ do kolo tɛ àlà 'bɔ ngɔ kala Gilboa gɔ. Da dɛ kɔ kpalɛ ga tɛ nyanga li kala ni gɔ. We kɛ mɛ a fala wa faka do ngelenɔ 'da wi bolonɔ 'da lɛ. Nɛ wa faka 'bɔ ngele 'da Saulo dɛ di ni, wa ndɔ́ sɛ 'bɔ nɔ tɛ nɛ na, ma bi bolo gɔ.

²² Nzabele 'da Yonatanɛ kɔtɔ wi sɛnɛ a fala kpo gɔ. Nɛ du kɔya 'da Saulo kpa wi sɛnɛ a kpa fai.

²³ Saulo do Yonatanɛ, wa zi a wi dia sila ngboo. Kɔ dungi 'da wa vɛ̃ wa zi fala nɛ kpo, nɛ fio kɛ 'bɔ sanga tɛ ngba wa gɔ. Tɛ wa gbɛnga nɛa ngɔ oziki, nɛ ngawi 'da wa la kɛ 'da ogbɔgbɔ.

²⁴ Aa nɛ, owuko Israɛlɛ, nɛ hé kɔ̃a Saulo. A ia zi otulu gã gole, kɛ wa gɛzɛ ma do odia mɔ mbali ni tɛ nɛ.

²⁵ Gulu kɛ onga soda bolo ngboo, wa fia li bole ni we ge nde? Gulu kɛ wɔlɔ Yonatanɛ ɔ do ngɔ kalanɔ ni we ge nde?

²⁶ Aa mɔ Yonatanɛ, nya mi, sila mi zɛlɛ la li we fio mɔ. Mɔ a 'bia mi ngboo, mɔ kɔ̃a gɛnɛ mi la mɔ vɛ̃. Mɔ kɔ̃a mi nɛa ngɔ kɛ wuko kɔ̃ do wili ɛ ni.

²⁷ Onga soda bolonɔ 'da lɛ wa fia vɛ̃, nɛ mɔ bi do bolonɔ 'da wa ma ɔ iko.