2 Onwanɔ 9 - WE NU GALE 1995

Yehu hɔa nwa ngɔ nù Israɛlɛ

¹ Mbe ngba soe kpo, nɛ Elize, wi gba olo nu Gale sa mɔ hã mbe zagbãlã kpo sanga owi gba olo nu Gale, nɛ a tɔ̃ hã a na: “Mɔ 'dafa tɛ mɔ, hã mɔ ba daka nɔɛ gɛ, kɔ mɔ wɛlɛ do tɛ mɔ dɛ Ramɔtɛ, tɛ ngɔ nù Galadɛ.

² Mɔ hɔ i mɔ, nɛ mɔ fa Yehu, kɛ a a be 'da Yozafatɛ, nɛ a 'bɔ a be yaa Nimsi ni. Kɔ mɔ kpa a, nɛ nɛ le do a dɛ kɔ 'bili tɔa nyɛlɛ do ongba a, nɛ mɔ kpe nu tɔa dɛ nu nɛ.

³ Nɛ mɔ ba nɔɛ kɔ daka ni, nɛ mɔ a ma zu a, nɛ mɔ tɔ̃ hã a na: ‘NWA tɔ̃a na, ɛ a nɔ zu mɔ, nɛ ɛ e mɔ do nwa ngɔ nù Israɛlɛ.’ Kɔ fala kɛ mɔ tɔ̃ hã a ni do'do, nɛ mɔ hũi nu tɔa, nɛ mɔ gbo nza, nɛ mɔ yu.”

⁴ Nɛ be zagbãlã, wi gba olo nu Gale ni la tɛ Ramɔtɛ, tɛ ngɔ nù Galadɛ i.

⁵ A hɔa i mɔ, nɛ a kpa ogã wi ngɔ osodanɔ tɛ mba ngba wa. Nɛ a tɔ̃ na: “Aa nwa, mi tɛa we tɔ̃ to hã mɔ.” Nɛ Yehu na: “Wi kɛ mɔ fa a sanga lɛ gɛ a wio nde?” Nɛ a gese na: “Wi a mɔ, nwa.”

⁶ Yehu nɛa we zele ni, nɛ a kulu ngɔ, nɛ wa la do a dɛ tɔa i. Nɛ be zagbãlã ni ba nɔɛ, nɛ a a ma zu a, nɛ a tɔ̃ hã a na: “NWA Gale 'da obe Israɛlɛ tɔ̃a na, ɛ a nɔ zu mɔ, nɛ ɛ e mɔ do nwa ngɔ nù Israɛlɛ.

⁷ Wi a mɔ hã mɔ gbɛ sɛ obe zã Akabɛ, kɛ a zi a nwa 'da mɔ ni. Do wala ni, sɛ nɛ ɛ bili sɛ nu gbã kɛ Yezabɛlɛ gbɛa owi gba olo nu ɛ, do Owi dɛa tonɔ 'da ɛ vɛ̃ ni de.

⁸ Nu fɛlɛ kula 'da Akabɛ ma kumu sɛ vɛ̃. Ɛ gbɛ sɛ Owi wilinɔ kɔ nu fɛlɛ a ni, obe do okpasa wi vɛ̃.

⁹ Ɛ dɛ sɛ do nu fɛlɛ kula 'da Akabɛ, ɔ nɛ kɛ ɛ dɛa zi do kɛ 'da Yeroboamɛ, be 'da Nɛbatɛ, do nu fɛlɛ kula 'da Basa, be 'da Ahia ni.

¹⁰ Nɛ kɛ 'da Yezabɛlɛ, wa mí sɛ wɔlɔ a gɔ, nɛ nde otolo wa nyɔngɔ sɛ wɔlɔ a dɛ kɔ le Yizreɛlɛ ni.” A wila we ni ia do'do, nɛ a hũi nu tɔa, nɛ a gbo nza, nɛ a yu.

¹¹ Nɛ Yehu hɔa nza, nɛ a kpolo tɛ̃ a dɛ 'da ongba a gã wi ngɔ osodanɔ. Nɛ wa aka a na: “Ma dɛa nɛ nde? Lɛnggɛ yia wi gɛ tɔ̃a hã mɔ ni a ge nde?” Nɛ Yehu gese na: “Mɔ bina. Nɛ ĩ ti wenɔ kɛ winɔ ɔ nɛ mɛ ni, wa tɔ̃ ma fai ni.”

¹² Nɛ wa gese na: “Mɔ 'bili bɛlɛ. Mɔ tɔ̃ we ngboo kɛ a tɔ̃a hã mɔ ni hã lɛ.” Nɛ Yehu gese na: “Nɛ zélé! We a tɔ̃a hã mi gɛ ma kɛ: NWA tɔ̃a na, ɛ a nɔ zu mi, nɛ ɛ ia mi nwa ngɔ nù Israɛlɛ.”

¹³ Ogã wi ngɔ osodanɔ wa nɛa we zele ni, nɛ wa hɔlɔ gã tulunɔ tɛ wa, nɛ wa a ma dɛ kpongbo nu tɔa ni, takɔ Yehu yolo dɛ ngɔ nɛ. Nɛ wa dama mɔtũlũ, nɛ wa ma ngɔ zɛ kaliã na: “Yehu hɔa nwa!”

Yehu ba zã zu nwa Yoramɛ

^14-15 Do ngba soe ni, nɛ nde osoda Israɛlɛ wa zi vɛ̃ a tɛ Ramɔtɛ, tɛ ngɔ nù Galadɛ we bi do Hazaɛlɛ, nwa ngɔ nù Siri na, dɔ a bá le ni gɔ. Nɛ li bole ni, nwa Yoramɛ kpa zi dani, nɛ a la dɛ Yizreɛlɛ, takɔ wa a daninɔ ni. Nɛ Yehu, kɛ a a be 'da Yozafatɛ, nɛ a 'bɔ a be yaa Nimsi ni, a ba zã zu dɛ Yoramɛ 'danga, nɛ a tɔ̃ hã ogã wi ngɔ sodanɔ ni na: “Fala kɛ nɛ kɔ̃ we si 'do mi nde, nɛ nɛ zɔ na, wele kpo tɛ kùlù ngɔ, kɔ a hɔ nza kɔ le gɛ gɔ. Nɛ ma wè 'bɔ na, wele la si Yizreɛlɛ, takɔ a tɔ̃ we mɛnɔ kɛ ma la i nga gɛ i mɔ gɔ.”

¹⁶ A tɔ̃a we ni do'do, nɛ a kũ kɔ ngilingili 'da a, nɛ a la dɛ Yizreɛlɛ i. Nɛ nde Yoramɛ 'bana zi ngɔ tangge zɛlɛ, nɛ Ahazia, nwa ngɔ nù Yuda kɛ a nɛa zi we zɔ a ni, zi 'bɔ di ni boe.

¹⁷ Nɛ 'da fala Yehu do osodanɔ 'da a wa nɛa we kɔlɔ do le ni, nɛ wi ɔ ngi'di le kɛ a zi ngɔ gba'da we ka mɔ ngɔ le ni, zɔ wa li wala i tɛ tɛ ma, nɛ a tɔ̃ hã nwa na: “Mɔ zɔ́ ngɔ gili Owele a wa tɛ dɛ i nga gɛ.” Nɛ nwa Yoramɛ tɔ̃ na: “Wi kũ mbalata gɔ́nɔ́ dati wa, kɔ a aka wa na, we boe nde?”

¹⁸ Nɛ wi kũ mbalata ni gɔna dati wa, nɛ a kpa wa, nɛ a tɔ̃ hã wa na: “Nwa aka na, we boe nde?” Nɛ Yehu gese na: “Ki ni ma zɔ̃ mɔ gɔ. Mɔ kpé dɛ 'do lɛ gɛ.” Nɛ wi ɔ ngi'di ni zɔa mɛ kɛ ma la i mɔ ni, nɛ a tɔ̃ hã nwa na: “Wi kũ mbalata hɔa 'da wa i, nɛ a 'bana do zu a dɛ i mɔ.”

¹⁹ Nɛ nwa tombo mbe gele wi kũ mbalata, nɛ wele ki ni nɛ, nɛ a hɔ 'da wa i, nɛ a tɔ̃ hã wa na: “Nwa aka na, we boe nde?” Nɛ Yehu gese na: “Ki ni ma zɔ̃ mɔ gɔ. Mɔ kpé dɛ 'do lɛ gɛ.”

²⁰ Nɛ wi ɔ ngi'di tɔ̃ 'bɔ hã nwa na: “Wi kũ mbalata hɔa 'da wa i, nɛ a 'bana do zu a.” Nɛ a tɔ̃ 'bɔ na: “Wi kpe dati winɔ ni yu do ngilingili 'da a ɔ nɛ wi bɔ ni. Kɔ mi zɔa na, wi ni sɛ a Yehu.”

²¹ Nɛ Yoramɛ ba nu ɛ na, wa 'dafa ngilingili 'da ɛ. Wa hɔa nɛ, nɛ a kũ kɔ nɛ, nɛ a la we kpa ngba a do Yehu. Nɛ nwa Ahazia kũ tɛ mɛ 'bɔ kɔ kɛ 'da ɛ, nɛ a la 'dɔkɔlɔ Yoramɛ. Wa nɛa, nɛ wa kpa Yehu dɔ̃ɔ do fɔɛ zi olo Nabɔtɛ, wi Yizreɛlɛ ni.

²² Nɛ Yoramɛ aka Yehu na: “Yehu, we boe nde?” Nɛ Yehu gese na: “Mɔ nɛ dɛ do aka we ni ni nɛ nde? Naa mɔ ɔ́mɔ́ tɛ dɛ ina do sambala ogele galenɔ gɔ ni, nɛ mɔ aka na, we boe kpaa nde?”

²³ Yoramɛ nɛa we zele ni, nɛ a kifi nu ngilingili 'da a, nɛ a he mɔ hã Ahazia na: “Ahazia, mɔ dɛ zĩ! Yehu hɔa wi sɛnɛ lɛ do'do.” A nɛa we tɔ̃ ni, nɛ a yu.

²⁴ Nɛ Yehu bɔlɔ nzabele 'da ɛ, nɛ a da, nɛ kpili le ngbala kele 'baka Yoramɛ, nɛ ma kpa sila a. Nɛ Yoramɛ te nù kɔ ngilingili 'da a, nɛ a fe.

²⁵ Nɛ Yehu sa mɔ hã Bidkarɛ, wi kɛ a gala a ni, nɛ a tɔ̃ hã a na: “Mɔ bá wɔlɔ a, hã mɔ da ma dɛ kɔ fɔɛ olo Nabɔtɛ gɛ. Mba gɔ, mɔ lengge do ngba soe kɛ lɛ kã zi baa a Akabɛ, nɛ nwa tɔ̃a zi hã a na,

²⁶ ɛ zɔa tɛlɛ tɛ kɛ wa gbɛa do Nabɔtɛ do obenɔ 'da a ni, kɔ ɛ hã sɛ etumbu hã a dɛ kpo kpo kɔ fɔɛ 'da Nabɔtɛ gɛ. Kɔ mɔ nɛ́, hã mɔ dɛ ɔ nɛ kɛ nwa tɔ̃a zi ni. Mɔ bá wɔlɔ Yoramɛ, hã mɔ da ma dɛ kɔ fɔɛ ni.”

Ahazia nwa ngɔ nù Yuda fia

²⁷ Ahazia, nwa ngɔ nù Yuda nɛa we zɔ ni, nɛ a yu dɛ si 'biti le Bɛtɛ-Ganɛ. Nɛ Yehu ndaka 'do a, nɛ a ba nu a hã owinɔ 'da a na, wa gbɛ 'bɔ a. Nɛ wa nɛa 'do a, nɛ wa kpa a tɛ li wala kɛ ma nɛ dɛ Gurɛ, dɔ̃ɔ do Ibleamɛ ni, nɛ wa e dani tɛ̃ a. Nɛ Ahazia yu 'bɔ dɛ dati gbaa, kɔ a nɛa we hɔ tɛ Megido, nɛ a fe.

²⁸ Nɛ Owi dɛa tonɔ 'da a wa ba wɔlɔ a, nɛ wa e ma kɔ ngilingili, nɛ wa la do ma dɛ Yeruzalɛmɛ, nɛ wa mi a ngɔ mabi'donggo 'da Onwanɔ tɛ kɔ Gba Ngbo nwa 'da Davidi.

²⁹ Ahazia hɔa zi nwa ngɔ nu Yuda do kɔ sabɛlɛ kɛ 'bu ngɔ nɛ kpo kɔ dɛa to nwa 'da Yoramɛ, be 'da Akabɛ.

Yezabɛlɛ fia

³⁰ Yezabɛlɛ zila we mɛ kɛ ma la ni, nɛ a nɛ, nɛ a kɔ mɔ ngɔ li a, nɛ a 'dafa mili zu a vɛ̃, nɛ ma e. Nɛ a nɛ, nɛ a yolo tɛ li holo tɔa we 'bɔ 'da Yehu kɛ a tɛ si dɛ Yizreɛlɛ nga ni.

³¹ Kɔ 'da fala Yehu hɔa we le dɛ kɔ le i ni, nɛ Yezabɛlɛ he mɔ na: “Aa mɔ! Mbee ngba Zimri, wi gbɛ nwa 'da ɛ, kɛ gɛ nɛ nde?”

³² Nɛ Yehu ba li a ngɔ, nɛ a zɔ mɔ tɛ̃ a, nɛ a he mɔ na: “Wi kɔ̃a we si 'do mi a wio nde?” Nɛ owi zɔ mɔ tɛ tɔa 'da nwa bɔa tabi talɛ, wa ge'de gɛlɛ wa do li hole dɛ 'da a nza i, nɛ Yehu tɔ̃ hã wa na:

³³ “Nɛ ílí a dɛ nù nga!” Nɛ winɔ ni wa ili Yezabɛlɛ do li hole ni, nɛ a te, nɛ tɔkɔ tɛ̃ a kpã dɛ tɛ 'bolo zã tɔa do tɛ mbalatanɔ 'da Yehu. Nɛ Yehu la do ngilingili 'da a do ngɔ wɔlɔ a ni.

³⁴ Nɛ a le dɛ kɔ tɔa i, nɛ a dungu nù we nyɔngɔ mɔ. 'Do nɛ, nɛ a tɔ̃ hã owinɔ 'da a na: “Nɛ bá 'dã wuke gɛ, hã nɛ mi a, we kɛ a tɛ mɛ 'bɔ a be 'da nwa.”

³⁵ Nɛ winɔ ni wa hɔa we mi wɔlɔ a, nɛ nde wa kpa tati a gbãlã zu a, do onyanga, do okɔ̃ a iko.

³⁶ Wa zɔa ni, nɛ wa kpolo tɛ wa we tɔ̃ we nɛ hã Yehu. Nɛ Yehu tɔ̃ na: “Ma dɛa tɛ̃ ɛ ngboo ɔ nɛ kɛ nwa tɔ̃a zi we nɛ do wala 'da wi gba olo nu a Elize, wi Tisbe ni. A tɔ̃a zi na, tolo wa ɛ̃ sɛ sanga mulu tɛ Yezabɛlɛ dɛ kɔ le Yizreɛlɛ, nɛ wa nyɔngɔ ma vɛ̃.

³⁷ Nɛ wɔlɔ a ma pɛsɛ sɛ, nɛ ma kpa do ngɔ nùi ni ɔ nɛ mbulu wɔkɔsɔ kɛ wa a ma na, ma de kpalɛ ni. Nɛ fo wi tɔ̃ sɛ na, ngɔ zunu Yezabɛlɛ hã ɛ ni bina.”