2 Onwanɔ 8 - WE NU GALE 1995

Wuko Sunɛmɛ si dɛ nu tɔa 'da a

¹ Ĩ na Elize tɔ̃a zi hã wuke kɛ bulu be 'da a fia zi, nɛ a tunu a ni na: “nwa 'bili do kɔ sila a na, a tombo sɛ gba wɔ dɛ ngɔ nù Israɛlɛ. Nɛ gba wɛ ni, ma ba sɛ 'do sabɛlɛ sambo. Kɔ ma wia na, mɔ kulu ngɔ do nu fɛlɛ kula 'da mɔ, hã mɔ la dɛ gele fala, nɛ mɔ ɔ dɛ i mɔ.”

² Wuke ni zila ni, nɛ a dɛ ɔ nɛ kɛ Elize tɔ̃a hã a ni. Nɛ a la si kɔ le 'da Ofilisti, nɛ a ɔ dɛ i mɔ gbaa sabɛlɛ sambo.

³ Kɔ 'da fala kɛ sabɛlɛ sambo ni ia, nɛ a si dɛ ngɔ nù Israɛlɛ. Nɛ a nɛ 'da nwa i, we ala nu a hã a na, wa gese tɔa 'da ɛ do fɔɛ 'da ɛ kɛ wa kala ma olo ɛ ni hã ɛ.

⁴ A hɔa i mɔ, nɛ nde nwa tɛ wele we do Gehazi, wi dɛa toe 'da Elize. Nɛ nwa aka Gehazi na, a tɔ̃ we gba ɔngbamɛnɔ kɛ Elize dɛa zi ma ni.

⁵ Nɛ 'da fala kɛ Gehazi ma ngɔ tɔ̃ lɛnggɛ ngɔ be kɛ a fia zi, nɛ Elize tunu a ni, kɔ a tɛ dà nu a gɔ, nɛ wuke hɔ. Kɔ Gehazi nɛa we zɔ a, nɛ a tɔ̃ hã nwa na: “Aa nwa, mɔ zɔ̃ wuke kɛ mi tɔ̃ we 'da a hã mɔ ni, a kɛ! Wa fala nɛ kpo do bulu be 'da a kɛ Elize tunu zi a ni.”

⁶ Nɛ nwa aka wuke ni, nɛ wuke tɔ̃ we 'da ɛ vɛ̃ hã a. Nɛ nwa sa mɔ hã mbe wi ti nu a, nɛ a tɔ̃ hã a na: “Mɔ nɛ́, nɛ mɔ dɛ na, wa gese mɛnɔ 'da wuke gɛ hã a vɛ̃. Nɛ wa si olo kpalɛnɔ kɛ fɔɛ 'da a ma kua zi ni hã a vɛ̃. Wa si sɛ olo nɛ hã a ndo do fala kɛ a la zi gbaa we hɔ sɔɛ gɛ ni.”

Elize do Hazaɛlɛ

⁷ Mbe ngba soe kpo, nɛ Elize nɛa tɛ kɔ le Damasi, nɛ nde do ngba soe nɛ ni, Bɛnɛ-Hadadɛ, nwa ngɔ nù Siri zi do zɛlɛ. Nɛ wa tɔ̃ hã a na, wi gba nu Gale hɔa le gɛ.

⁸ A zila ni, nɛ a sa mɔ hã wi toe 'da a Hazaɛlɛ, nɛ a tɔ̃ hã a na: “Mɔ nɛ́ hã mɔ zɔ́ wi gba olo nu Gale, nɛ mɔ 'dɔlɔ mbe odia mɔ hã a. Nɛ mɔ tɔ̃ 'bɔ hã a na, a aka NWA we ĩ tabi mi kpasa sɛ tɛ zɛlɛ tɛ mi gɛ nde?”

⁹ Hazaɛlɛ la, nɛ a kala mɔ olo gã gole kɔ dia mɛnɔ kpi do kpi kɛ a kpa zi ma tɛ kɔ le Damasi ni, nɛ a a ma vɛ̃ dɛ li 'do osamo 'bu nɛ nalɛ, nɛ a nɛ we hã ma hã wi gba olo nu Gale. A hɔa 'da wi gba olo nu Gale i, nɛ a tɔ̃ hã a na: “Be 'da mɔ, Bɛnɛ-Hadadɛ, nwa ngɔ nù Siri, tumba mi wi toe 'da a, we aka mɔ na, ɛ kpasa sɛ tɛ zɛlɛ tɛ̃ ɛ ni nde?”

¹⁰ Nɛ Elize gese hã a na: “Mɔ nɛ́, nɛ mɔ tɔ̃ hã a na, a kpasa sɛ. Nɛ nde 'bali mɔ kpo a kɛ NWA tɔ̃a hã mi ngboo na, a fe sɛ.”

¹¹ A tɔ̃a we ni do'do, nɛ a 'danga sanga li a, nɛ a soko mɔ tɛ Hazaɛlɛ fio gbaa, nɛ a te nù ngɔ kɔa, nɛ a ma ngɔ he ma.

¹² Nɛ Hazaɛlɛ aka a na: “Nwa 'daa, mɔ he kɔa ge nde?” Nɛ Elize gese na: “Mi he we duzu kɛ mi zɔa 'dã mɛ kɛ mɔ dɛ sɛ do obe Israɛlɛ ni. Mɔ dɔ sɛ gba ngbo lenɔ 'da wa, nɛ mɔ 'bili gɛlɛ obe zagbãlãnɔ, nɛ mɔ mbɔtɔ obenɔ, nɛ mɔ gba zã owuko wi naa zãnɔ.”

¹³ Nɛ Hazaɛlɛ aka na: “Kɛ mi gɛ a wele yala iko, nɛ mi nɛ kpa ngawi dɛ mɔ na mɛ ni do nde?” Nɛ Elize na: “NWA bia hã mi na, mɔ dungu sɛ nwa ngɔ nù Siri.”

¹⁴ Nɛ Hazaɛlɛ kulu ngɔ 'da Elize ni, nɛ a kpolo tɛ̃ a dɛ 'da nwa 'da a Bɛnɛ-Hadadɛ i, nɛ Bɛnɛ-Hadadɛ aka a na: “Elize tɔ̃a hã mɔ na ge nde?” Nɛ Hazaɛlɛ gese na: “Elize tɔ̃a hã mi na, kafi bina, do gbãlã we, mɔ kpasa sɛ tɛ zɛlɛ tɛ mɔ gɛ.”

¹⁵ Nɛ fala sa 'do ki ni, nɛ Hazaɛlɛ ba bolangiti, nɛ a fi ma 'dɔ lì, nɛ a ba ma, nɛ a isi ma dɛ sanga li Bɛnɛ-Hadadɛ ni gbaa, nɛ hi a gɔnɔ, nɛ a fe. Nɛ 'do nɛ, nɛ Hazaɛlɛ ba to nwa olo a.

Yoramɛ hɔa nwa ngɔ nù Yuda

¹⁶ Yoramɛ, be 'da Akabɛ ɔa tɛ to nwa 'da a ngɔ nù Israɛlɛ sabɛlɛ mɔlɔ, nɛ Yoramɛ, be 'da Yozafatɛ, hɔ nwa ngɔ nù Yuda.

¹⁷ Yoramɛ, be 'da Yozafatɛ nɛa we ba to nwa ni, nɛ nde a zi do sabɛlɛ 'bu nɛ talɛ ngɔ nɛ bɔa, nɛ a dɛa to nwa 'da a tɛ Yeruzalɛmɛ 'do sabɛlɛ ngbɛ'dɛ'dɛ.

¹⁸ Wuke 'da Yoramɛ zi a be 'da Akabɛ. Nɛ Yoramɛ dɛa zi 'dã mɔ kɛ ma dè tɛ NWA gɔ ni. A dɛa zi 'bɔ kpo kpo 'dã dɛa mɔ te Onwanɔ wa dungu zi ngɔ nù Israɛlɛ, kpasaa ɔ nɛ Owi nu fɛlɛ Akabɛ ni.

¹⁹ Gɛnɛ kɔ ní, nɛ nde NWA kɔ̃̀ zi we kumu obe Yuda gɔ. Mba gɔ, a kpua zi mbulu hã wi dɛa toe 'da a Davidi na, obe zã a wa dungu sɛ nwa fai.

²⁰ 'Da fala kɛ Yoramɛ zi tɛ to nwa ni, nɛ Oedɔmɛ wa dɛ nga zu, nɛ wa bɛ̃ na be Yuda é mbula ngɔ lo gɔ, nɛ wa saka nwa mɔ́ wa ngboo.

²¹ Yoramɛ zɔa na mɛ ni, nɛ a kala ongilingili bolonɔ 'da a vɛ̃, nɛ a la dɛ tɛ Sairɛ. A hɔa i mɔ, nɛ Oedɔmɛ wa linggi a. Nɛ ma hɔa gbogbo zã tũi, nɛ nwa Yoramɛ do ogã wi ba ngilingilinɔ 'da a, wa la do sanga Oedɔmɛ do ngawi, nɛ wa hɔ nza sanga wa dɛ kɔ le ni, nɛ osodanɔ 'da a, wa yu, nɛ wa si dɛ nu tɔanɔ 'da wa.

²² Ndo do ngba soe ni, nɛ Oedɔmɛ wa 'bànà zi 'bɔ ti mbula 'da Oyuda gɔ. Nɛ do kpo 'da fala ni, nɛ Owi Libna wa dɛa 'bɔ nga zu.

²³ Tala mɛnɔ vɛ̃ kɛ Yoramɛ dɛa ni, wa kɔma ma kɔ 'buki li nɛ a: “Dɛa tonɔ 'da onwa ngɔ nù Yuda.”

²⁴ Yoramɛ fia, nɛ wa mi a kɔ zuni 'da Onwanɔ tɛ kɔ Gba Ngbo nwa 'da Davidi. Nɛ be 'da a Ahazia dungu nwa olo a.

Ahazia hɔa nwa ngɔ nù Yuda

²⁵ Yoramɛ, be 'da Akabɛ ɔa tɛ to nwa 'da a ngɔ nù Israɛlɛ sabɛlɛ 'bu ngɔ nɛ bɔa, nɛ Ahazia, be 'da Yoramɛ, hɔ nwa ngɔ nù Yuda.

²⁶ Ahazia zi do sabɛlɛ 'bu nɛ bɔa ngɔ nɛ bɔa, nɛ a dɛa to nwa 'da a kɔ le Yeruzalɛmɛ 'do sabɛlɛ kpo. Li naa a a Atali, nɛ Atali zi a be kɔ nu fɛlɛ kula 'da Omri, nwa ngɔ nù Israɛlɛ.

²⁷ Nɛ ɔ nɛ kɛ Ahazia ba zi wuko kɔ tɔa 'da Akabɛ ni, nɛ a dɛa zi 'dã mɔ kɛ ma dè tɛ nwa gɔ ni. A dɛa 'dã mɔ kpasaa ɔ nɛ kɛ Owi nu fɛlɛ Akabɛ wa dɛa zi ni.

²⁸ Nwa Ahazia wa mba zi do Yoramɛ, nwa ngɔ nù Israɛlɛ, nɛ wa nɛ we bi Hazaɛlɛ, nwa ngɔ nù Siri. Wa nɛa, nɛ wa kpa ngba wa do Hazaɛlɛ tɛ mbe fala kpo, wa sa li ma na Ramɔtɛ, tɛ ngɔ nù Galadɛ, nɛ wa bi dɛ di ni. Nɛ li bole ni, nɛ osoda Siri wa e dani tɛ nwa Yoramɛ.

²⁹ Nɛ Yoramɛ yolo di ni, nɛ a si dɛ kɔ le Yizreɛlɛ, takɔ wa a daninɔ tɛ̃ a ni. Nɛ Ahazia nɛa 'dɔkɔlɔ a, we zɔ dani tɛ̃ a.