2 Onwanɔ 7 - WE NU GALE 1995

¹ Nɛ Elize gese na: “Nɛ zélé wenɔ vɛ̃ kɛ NWA tɔ́a gɛ. A na: ‘Bindɛ do kpo sa gɛ, nɛ gole mɛnɔ ngɔ zando Samaria gɛ, ma zĩlĩ sɛ, nɛ wa oso sɛ fũ farini kilo 'bu nɛ bɔa ngɔ nɛ bɔa do mbili kpo, nɛ fũ ɔrzɛ kilo 'bu nɛ bɔa ngɔ nɛ nalɛ, ma sɛ 'bɔ we mbili kpo.’ ”

² Nɛ mbe wi zɔ mɔ tɛ nwa ngɔ nù Israɛlɛ kpo gese hã Elize na: “Gɛnɛ kɔ nwa fi gba kolo bindɛ, hã ma tɛ dɛ ngɔ kpalɛnɔ, nɛ nde we mɔ tɔ̃ gɛ, ma dɛ́ sɛ tɛ̃ ɛ gɔ.” Nɛ Elize gese na: “We bina, mɔ zɔ sɛ mɛnɔ ni do li mɔ ngboo, nɛ nde mɔ nyɔ́ngɔ́ sɛ ma gɔ.”

Osoda Siri wa yu fala ɔi 'da wa

³ Owi zɛlɛ ngbɛlɛ nalɛ wa ɔ zi do 'do gã nu ngbo le ni, nɛ wa tɔ̃ dɛ sanga tɛ ngba wa na: “Gulu kɛ lɛ 'bɔ we fe dɛ dɛ we ge nde?

⁴ Fala kɛ lɛ le dɛ kɔ le i, nɛ lɛ fe sɛ we duzu gba wɛ tia i mɔ ni. Kɔ lɛ 'bana dɛ dɛ, nɛ lɛ fe sɛ 'bɔ iko! Kɔ ma wia na, lɛ nɛ dɛ fala ɔi 'da osoda Siri i. Fala kɛ wa la lɛ do tunu li lɛ, nɛ lɛ kpasa sɛ. Kɔ fala kɛ wa gbɛ lɛ, nɛ nde we bina, nɛ lɛ fe iko!”

⁵ Wese ma ngɔ gɛ̃ nɛ, nɛ wa kulu ngɔ, nɛ wa nɛ gbaa, nɛ wa hɔ fala ɔi 'da osoda Siri, nɛ nde wa kpà wele kpo gɔ.

⁶ Ĩ na NWA dɛa zi na, osoda Siri wa zele giti gba gili osoda, do ombalata, do ongilingili. Wa zila ni, nɛ wa tɔ̃ dɛ sanga tɛ ngba wa na: “Nwa ngɔ nù Israɛlɛ futa onwa ngɔ Ohiti do Oezipeto, takɔ wa tombo osodanɔ 'da wa we bi lɛ!”

⁷ Nɛ do gɛ̃a wese ni, nɛ wa kulu ngɔ, nɛ wa yu, nɛ wa la otɔa tandenɔ, do ombalatanɔ, do opundanɔ 'da wa dɛ fala ɔi ni.

⁸ Owi zɛlɛ ngbɛlɛnɔ nalɛ ni wa hɔa tɛ fala ɔi 'da Osiri, nɛ wa le kɔ tɔa tande kpo, nɛ wa nyɔngɔ mɛnɔ, nɛ wa nɔ dɔ̃nɔ kɛ wa kpa zi di ni ni. 'Do nɛ, nɛ wa kala fɛ̃a mɔ bolonɔ, do mɔ mbali, do otulunɔ kɔ nɛ ni, nɛ wa usu ma gele fala. 'Do nɛ, nɛ wa le kɔ gele tɔa tande, nɛ wa kala gele mɛnɔ kɔ nɛ ni, nɛ wa nɛ, nɛ wa usu ma.

Ngamɛ 'da Oisraɛlɛ ma ia

⁹ Nɛ Owi zɛlɛ ngbɛlɛnɔ ni, wa tɔ̃ 'bɔ dɛ sanga tɛ ngba wa na: “Mɛ lɛ dɛ gɛ ma dè gɔ. Sɔɛ gɛ lɛ kpa dia sako, nɛ ma wè na, lɛ usu ma we duzu lɛ iko gɔ. Fala kɛ lɛ 'bɔ na fala sa sɛ, nɛ lɛ tɔ̃ we nɛ de, nɛ Gale a hã sɛ etumbu hã lɛ. Lɛ nɛ́ di ngangga ni, hã lɛ tɔ̃ we nɛ tɛ kɔ ngboe 'da nwa i.”

¹⁰ Nɛ wa kpula tɛ wa dɛ le i, nɛ wa sa mɔ hã owi zɔ mɔ nu ngbonɔ, nɛ wa mbese wa na, lo nɛa tɛ fala ɔi 'da osoda Siri i, nɛ nde wele kpo bina, nɛ lo zèlè mbamba gɛlɛ wele kpo gɔ, tati a ombalatanɔ do opundanɔ, kɛ wa kpua wa ni, do otɔa tandenɔ wa la ma ni.

¹¹ Owi zɔ mɔ nu ngbonɔ wa zila ni, nɛ wa sa mɔ hã wele kpo na, a wɛlɛ tɛ̃ a, hã a tɔ̃ toe ni tɛ kɔ tɔa 'da nwa i.

¹² Nɛ nwa kulu ngɔ do tũi ni, nɛ a tɔ̃ hã owi olo li a na: “Mi nɛ tɔ̃ gulu 'dã hã 'da osoda Siri hã nɛ. Wa ĩ na lɛ tɛ fe wɛ, gulu nɛ hã wa la fala ɔi 'da wa, hã wa nɛa we usu tɛ wa zamɔ i. Nɛ wa lengge na, lɛ hɔ sɛ nza kɔ Samaria, hã wa kala lɛ do tunu li lɛ, sɛ nɛ wa le kɔ le nga de.”

¹³ Nɛ mbe wi olo li nwa kpo tɔ̃ hã a na: “Lɛ sáká ombe winɔ le gɛ, hã lɛ tombo wa do ombalata mɔlɔ kɔ wanɔ wa 'bana ni, hã wa nɛ we zɔ mɛ ma la ni. We kɛ owinɔ kɔ le gɛ, do ombalatanɔ vɛ̃ wa 'bɔ fio iko.”

¹⁴ Ma kɛ nwa ba nu ɛ, nɛ wa ɛnzɛ ombalatanɔ ni dɛ tɛ ngilingili bɔa, nɛ a tombo Owele na, wa nɛ we fa osoda Siri, nɛ wa zɔ 'bɔ mɛ ma la ni.

¹⁵ Owinɔ ni wa 'bã olo nyanga osoda Siri gbaa, nɛ wa hɔ tɛ nu lì Yɔrdanɛ. Nɛ nde li wala vɛ̃ dunu do otulu, do omɛnɔ kɛ ma dĩlĩ osoda Siri, nɛ wa da ma nù, sɛ a tɛ wa hãsã, hã wa yu nganda de ni. Owi nɛ tonɔ wa zɔa ni, nɛ wa kpolo tɛ wa we tɔ̃ we nɛ hã nwa.

¹⁶ Nɛ owi Samaria wa nɛa tɛ fala ɔi olo osoda Siri, nɛ wa kala omɛnɔ olo wa ni, nɛ wa be gole nɛ. Nɛ winɔ wa usa fũ farini kilo 'bu ngɔ nɛ bɔa do mbili kpo, nɛ fũ ɔrzɛ kilo 'bu nɛ bɔa ngɔ nɛ nalɛ do mbili kpo, ɔ nɛ kɛ nwa tɔ̃a zi ni.

¹⁷ Nɛ nwa ngɔ nù Israɛlɛ ba nu ɛ hã wi zɔ mɔ tɛ̃ a, wele kɛ wa yɛnggɛ do a ni na, a nɛ ngɔ zando tɛ nu ngbo i, we zɔ mɔ tɛ mɛnɔ ma la ni. A hɔa i mɔ, nɛ owinɔ ngɔ zandoe ni wa ili a, nɛ a te, nɛ wa ma a, nɛ a fe, ɔ nɛ kɛ Elize tɔ̃a zi 'da fala kɛ nwa ngɔ nù Israɛlɛ nɛa we zɔ a ni.

¹⁸ Elize tɔ̃a zi hã nwa na: “Bindɛ do kpo sa gɛ, nɛ gole mɛnɔ ngɔ zando Samaria gɛ, ma zĩlĩ sɛ, nɛ wa oso sɛ fũ farini kilo 'bu ngɔ nɛ bɔa do mbili kpo, nɛ fũ ɔrzɛ kilo 'bu nɛ bɔa ngɔ nɛ nalɛ, ma sɛ 'bɔ we mbili kpo!”

¹⁹ Nɛ wi zɔ mɔ tɛ nwa ngɔ nù Israɛlɛ gisa zi na: “Gɛnɛ kɔ NWA fi gba kolo bindɛ, hã ma tɛ dɛ ngɔ kpalɛnɔ, nɛ nde we mɔ tɔ̃ gɛ ma dɛ́ sɛ tɛ̃ ɛ gɔ.” Nɛ Elize gese na: “We bina, mɔ zɔ sɛ mɛnɔ ni do li mɔ, nɛ nde mɔ nyɔ́ngɔ́ sɛ ma gɔ.”

²⁰ Mɛ ma dɛa zi wi zɔ mɔ tɛ nwa gɛ a ni. Owinɔ ngɔ zandoe ni, wa ili a, nɛ a te, nɛ wa ma a, nɛ a fe.