2 Onwanɔ 6 - WE NU GALE 1995

Kpɛnɛmɔ yɔa, nɛ Elize dɛ na wa kpa ma

¹ Mbe ngba soe kpo, nɛ ngɔ gili owi gba olo nu Gale, wa tɔ̃ hã Elize na: “Mɔ zɔ́, tɔa lɛ mba ngba lɛ do mɔ dɛ kɔ nɛ gɛ, ma gã gɔ.

² Kɔ mɔ kɔ̃, nɛ lɛ zĩlĩ tɛ nu lì Yɔrdanɛ i, hã wele do wele gɔmɔ gã te kpo, takɔ lɛ dɛ do mbé gele tɔa ɔi dɛ dɛ.” Nɛ Elize tɔ̃ hã wa na, wa nɛ́.

³ Nɛ mbe kpo kɔ wa tɔ̃ na: “Nwa, mɔ kɔ̃́, nɛ mɔ nɛ do lɛ!” Nɛ Elize gese na: “Ma wia, mi a mi nɛ ni.”

⁴ A zĩlĩ do wa tɛ nu lì Yɔrdanɛ i, nɛ wa ma ngɔ gɔmɔ tenɔ.

⁵ Nɛ mbe kpo kɔ wa ma ngɔ gɔmɔ te 'da ɛ, nɛ gbali kpɛnɛmɛ 'da a hɔ, nɛ ma te 'dɔ lì. Nɛ a he mɔ na: “Nwa, kɛ gɛ a 'bako ge nde! Mi gba kpɛnɛmɛ gɛ gba iko!”

⁶ Nɛ Elize aka a na: “Gbali kpɛnɛmɛ tia do nde?” Nɛ wi ni be fala nɛ hã a. Nɛ Elize 'bili dɔ te, nɛ a da ma dɛ fala ni, nɛ gbali kpɛnɛmɛ kulu ngɔ ngɔ lì do ti.

⁷ Nɛ Elize tɔ̃ hã a na: “Mɔ bá ma!” Nɛ wi ni ɛfɛ kɔ̃ ɛ iko, nɛ a ba ma.

Elize kala osoda Siri

⁸ 'Da fala kɛ nwa ngɔ nù Siri zi tɛ bi Oisraɛlɛ ni, nɛ a ngɛmɛ ogã wi ngɔ osodanɔ 'da a, nɛ a be fala kɛ a kɔ̃a na, osodanɔ wa dɛ do fala ɔi 'da wa ni hã wa.

⁹ Nɛ Elize tumba to hã nwa ngɔ nù Israɛlɛ na: “Lì mɔ sɔ̃́! Da dɛ kɔ nɛ lá wala do fala ni gɔ, tua kɛ osoda Siri wa dɛa fala ɔi 'da wa dɛ di ni.”

¹⁰ Nɛ nwa ngɔ nù Israɛlɛ tumba mbe osodanɔ 'da a na, wa nɛ hã wa wɛ fala Elize bia ni. Elize zi tɛ mbese nwa ngɔ nù Israɛlɛ ngɔ linggamɛ 'da Osiri 'do ngbɛ ɛ do 'do ngbɛ ɛ fai,

¹¹ nɛ ma zɛlɛ zi sila nwa ngɔ nù Siri wena. Nɛ a sa mɔ hã ogã wi ngɔ osodanɔ 'da a, nɛ a tɔ̃ hã wa na: “Mbe wele kpo kɔ lɛ gɛ, a vũ to tɛ lɛ hã nwa ngɔ nù Israɛlɛ vũ! Kɔ gulu kɛ nɛ sá li a hã mi gɔ we ge nde?”

¹² Nɛ mbe gã wi ngɔ osodanɔ kpo gese hã a na: “Aa nwa, fo wi vũ to tɛ wi kɔ lɛ gɛ bina! Nɛ nde Elize, wi gba olo nu Gale tɛ ngɔ nù Israɛlɛ, a hã a gba 'da nu wenɔ kɛ mɔ tɔ̃ kɔ tɔa ɔi 'da mɔ i ni hã nwa 'da a.”

¹³ Nwa ngɔ nù Siri zila ni, nɛ a ba nu a na: “Nɛ nɛ́, hã nɛ zɔ fala a ɔ se'de ni, takɔ mi nɛ we ba a.” 'Da fala kɛ wa mbese a na, Elize ɔ kɔ le Dotanɛ ni,

¹⁴ nɛ a tombo gba gili osoda, do ongilingili, do ombalata, nɛ wa nɛa, nɛ wa hɔ Dotanɛ do tũ, nɛ wa linggi le.

¹⁵ Fala sa do titole belee, nɛ wi toe 'da Elize kulu ngɔ, nɛ a hɔ dɛ 'do le nza i. Nɛ a zɔ osodanɔ, nɛ nde wa linggi le do ombalatanɔ, do ongilingilinɔ 'da wa. Nɛ a si 'do, nɛ a he mɔ hã Elize na: “Aa nwa, ngamɔ boe! Lɛ nɛ dɛ nɛ nɛ nde?”

¹⁶ Nɛ Elize gese na: “Mɔ tɛ dɛ kili gɔ! Wanɔ wa si 'do lɛ ni, wa dɛlɛ nɛa ngɔ wanɔ wa si 'do wa ni.”

¹⁷ 'Do nɛ, nɛ a sambala na: “Aa NWA, mɔ hũi li a kɔ a zɔ mɛ ma la ni.” Nɛ NWA hũi li wi toe 'da Elize, nɛ a zɔ na, ngɔ kala kɛ zã Elize ni vɛ̃, ma dunu do ombalata, do ongilingili kɛ ma nyɛ we ngbangge ngbangge ngbangge ni.

¹⁸ Osoda Siri wa ma ngɔ nɛ dɛ 'da Elize i, nɛ a sambala 'bɔ na: “Aa NWA, mɔ lɔ́ li osodanɔ gɛ vɛ̃.” Nɛ Gale lɔa li wa ɔ nɛ kɛ Elize aka do a ni.

¹⁹ Nɛ Elize tɔ̃ hã wa na: “Nɛ yɔa wala do'do. Le nɛ fa ma gɛ a kɛ gɛ gɔ. Nɛ tɛ́, hã mi kã nɛ dɛ 'da wi nɛ fa a ni.” Nɛ Elize kã wa dɛ Samaria.

²⁰ Wa nɛa we hɔ dɛ 'da le i, nɛ Elize sambala 'bɔ na: “Aa nwa, ngangga ni mɔ hũi li wa, kɔ wa zɔ mɔ.” 'Da fala Gale hũi li wa, kɔ wa nɛa we ka mɔ, nɛ nde wa dɛ gbogbo le Samaria ngboo.

²¹ Kɔ nwa ngɔ nù Israɛlɛ nɛa we zɔ osoda Siri, nɛ a aka Elize na: “Baa mi, lɛ wia we gbɛ wa nde?”

²² Nɛ Elize gese na: “Ɔ̃ ɔ̃! Mɔ tɛ gbɛ wa gɔ. Kɛ fai ni, mɔ gbɛ́ winɔ kɛ osodanɔ 'da mɔ, wa kala wa li bolo ni gɔ. Mɔ hã nyɔngɔmɔ do lì hã wa, 'do nɛ, nɛ mɔ la wa, hã wa si dɛ 'da nwa 'da wa i.”

²³ Nɛ nwa ngɔ nù Israɛlɛ dɛa gbalimɔ hã osodanɔ ni. 'Do kɛ wa nyɔngɔ mɛ ia do'do, nɛ a la wa na wa si. Yolo dɛ di ni, Osiri wa la fala le ngɔ nù Israɛlɛ we bi lenɔ.

Gba wɔ tia kɔ le Samaria

²⁴ Mbe ngba soe kpo, nɛ Bɛnɛ-Hadadɛ, nwa ngɔ nù Siri, ngɛmɛ li osodanɔ 'da a vɛ̃, nɛ wa nɛ, nɛ wa linggi le Samaria.

²⁵ Wa linggi ma ngboo, nɛ gba wɔ tia kɔ le do tɛlɛ tɛ kɛ na, gɛnɛ kɔ mbamba zu punda iko, nɛ wa oso ma do mbili 'bu nɛ ngbɛ'dɛ'dɛ, nɛ lã Sanggo kpo do mbili mɔlɔ.

²⁶ Mbe tũ kpo, nɛ nwa ngɔ nù Israɛlɛ zi tɛ yɛnggɛ do zu dɛlɛ ngbo nu le, nɛ wuko kpo he mɔ hã a na: “Aa nwa, mɔ kɔ̃, nɛ mɔ gbaka mi!”

²⁷ Nɛ nwa gese hã a na: “Fala kɛ NWA Gale a gbàkà mɔ gɔ, nɛ nde mi wè tɛ mɛ 'bɔ we gbaka mɔ gɔ. Mi 'bɔ do tala kpalɛ, tabi tala dɔ̃ bina.

²⁸ Kɔ mɔ kɔ̃a ge nde?” Nɛ wuke ni gese na: “Mɔ zɔ́ mbaa gɛ! Mbe tũ kpo, nɛ a tɔ́a hã mi na, lɛ gbɛ be 'da mi, hã lɛ nyɔngɔ a, kɔ 'do nɛ, nɛ lɛ nyɔngɔ tɛ mɛ 'bɔ wele kɛ 'da ɛ.

²⁹ Nɛ lɛ gbɛa be 'da mi, nɛ lɛ gi a, nɛ lɛ nyɔngɔ a. Nɛ nde fala sa 'do nɛ, kɔ mi nɛ tɔ̃ hã a na, a tɛ do wele kɛ 'da a, kɔ lɛ gbɛ a, hã lɛ nyɔngɔ a, nɛ a usu a do'do.”

³⁰ Nwa ngɔ nù Israɛlɛ nɛa we zele lɛnggɛ 'da wuke ni, nɛ a ɛ̃ tulu tɛ̃ a. Nɛ owinɔ kɔ le ni vɛ̃, wa zɔa a, we kɛ a zi do zu dɛlɛ ngbo nu le. Nɛ wa zɔa na, a hi'da tati a saki ti tulu 'da a iko, we be na a do 'bako.

³¹ Nɛ nwa hia mɔ na: “E kɔ Gale gbɛ mi, fala kɛ gɛ̃a wese gɛ mi gbɛ Elize, be 'da Safatɛ gɔ ni.”

Elize mbisa na gba wɛ ma Sɔkpɔ sɛ

³² Ĩ na Elize zi do mba li ngba wi do okumu lenɔ tɛ 'da a i, nɛ nwa ngɔ nù Israɛlɛ tombo wele hã a. Nɛ nde dati hɔa 'da wi toe ni, nɛ Elize tɔ̃ hã okumu lenɔ na: “Nɛ a nɛ zɔ ni nde? Nwa, wi gbɛ wi gɛ tumba wele na, a tɛ hã a 'bili gɛlɛ mi. Kɔ li nɛ sɔ̃́! Fala kɛ wi ni hɔ, nɛ nɛ kpé nu tɔa, nɛ nɛ bɛ̃ na a tɛ lè gɔ. Kafi bina, nwa 'da a tɛ tɛ 'do a.”

³³ Elize 'bana tɔ̃ tɔ̃a iko, nɛ nwa hɔ, nɛ a na: “Wi hã ngamɛnɔ gɛ vɛ̃ hã lɛ wi a NWA Gale. Ma ɔ ni, nɛ nde mi wè 'bɔ we gbini zã mi do a gɔ.”