2 Onwanɔ 5 - WE NU GALE 1995

Elize kpasa Namanɛ

¹ Namanɛ zi a gã wi ngɔ osoda Siri vɛ̃. Nwa ngɔ a kɔ̃ zi a wena, nɛ a be zi 'bɔ dia zã hã a wena. Mba gɔ, NWA Gale dɛa zi na, osoda Siri wa nɛ ngɔ ngba wa we duzu a. A zi a nwa bolo, nɛ nde a zi a wi zɛlɛ ngbɛlɛ.

² Mbe ngba soe kpo, nɛ gba gili Owi zũ wa yula tɛ ngɔ nù Siri, nɛ wa lia ngɔ nù Israɛlɛ dɛlɛ wena. Wa zũ be boko be kpo, nɛ wa si do a, nɛ a hɔ wi toe 'da kɛnɛ Namanɛ.

³ Mbe tũ kpo, nɛ boko be ni tɔ̃ hã wele a wuko wele kɛ na: “Mi lengge na, fala kɛ nwa, wili mɔ nɛ sɔ 'da wi gba olo nu Gale tɛ Samaria i, nɛ mbe gɔ, nɛ zɛlɛ ngbɛlɛ tɛ̃ a gɛ ma e sɔ, nɛ a kpasa sɔ.”

⁴ Namanɛ zila ni, nɛ a nɛ 'da nwa ngɔ nù Siri i, nɛ a yɔlɔ gulu we boko be Israɛlɛ tɔ̃a ni hã a vɛ̃.

⁵ Nɛ nwa gese na: “Ma a dia, mɔ bá mbɛti mi nɛ dɛ hã mɔ gɛ, hã mɔ nɛ do ma hã nwa ngɔ nù Israɛlɛ.” Nɛ Namanɛ kala fɛ̃a mɔ bolo kilo kama talɛ, mɔ mbali kilo 'bu nɛ gazɛlɛ, do tulu ɛngga 'bu, nɛ a la do ma.

⁶ A hɔa i mɔ, nɛ a hã mbɛti 'da nwa ngɔ nù Siri hã nwa ngɔ nù Israɛlɛ. A kɔma zi mbɛti ni na: “Mi tumba gã wi ngɔ sodanɔ 'da mi Namanɛ do mbɛti gɛ hã mɔ na, mɔ kɔ̃, nɛ mɔ kpasa a, hã zɛlɛ ngbɛlɛ ma e tɛ̃ a do'do.”

⁷ Nwa ngɔ nù Israɛlɛ nɛa we tɔlɔ mbɛti ni, nɛ a ɛ̃ tulu tɛ̃ a, nɛ a he mɔ na: “Nwa ngɔ nù Siri lengge na, mi a Gale, nɛ mi do ngawi gbɛ wele, tabi kpasa wele kɔ fio nde? Kɔdɛ kɛ a nɛ tombo wele na, mi fo zɛlɛ ngbɛlɛ tɛ̃ a ni nɛ nde? Kafi bina, a fa we bi bolo do mi.”

⁸ Kɔ Elize nɛa we zele na, nwa ngɔ nù Israɛlɛ ɛ̃a tulu tɛ̃ ɛ, nɛ a tombo to hã a na: “Gulu kɛ mɔ ɛ̃a tulu tɛ mɔ we ge nde? Mɔ tómbó wi ni hã mi, nɛ mi be sɛ hã a na, wi gba olo nu Gale ngɔ nù Israɛlɛ gɛ boe.”

⁹ Namanɛ tɛa do ngilingili, do mbalatanɔ 'da a, nɛ a yolo nù dɛ nu tɔa 'da Elize.

¹⁰ Nɛ Elize tombo wele kpo we tɔ̃ hã a na, a nɛ, kɔ a fɔlɔ tɛ̃ a 'dɔ lì Yɔrdanɛ fala sambo, nɛ a kpasa sɛ, nɛ tɛ̃ a ma sa sɛ.

¹¹ Namanɛ nɛa we zele ni, nɛ a la do nɔ̃lɔ̃ zã, nɛ a na: “Mi lengge sɔ na, wi gba olo nu Gale a hɔ sɛ we gɔnɔ dati mi, nɛ a sambala NWA Gale 'da a, nɛ a tamba fala do zɛlɛ ni, nɛ a fo zɛlɛ ngbɛlɛ tɛ mi do'do.

¹² Wa lengge na ge nde? Ofua lì Abana, do Parparɛ tɛ kɔ le Damasi, ma dè nɛ ngɔ fua lìnɔ tɛ ngɔ nù Israɛlɛ vɛ̃ gɔ nde? Mi wè tɛ fɔlɔ tɛ mi 'dɔ nɛ, nɛ mi hɔ sa wi gɔ nde?” Namanɛ tɔ̃a ni do'do, nɛ a siki tɛ̃ a, nɛ a la do nɔ̃lɔ̃ zã.

¹³ Nɛ Owi tonɔ 'da a wa tɛa, nɛ wa kɔlɔ do a, nɛ wa tɔ̃ hã a na: “Aa nwa, fala kɛ wi gba olo nu Gale aka mɔ na, mɔ dɛ mɔ kɛ ma nganda wena, nɛ nde mɔ dɛ́ sɛ gɔ nde? Nɛ nde a aka tati nɛ na, mɔ nɛ́ hã mɔ fɔlɔ tɛ mɔ 'dɔ lì iko. Kɔ gulu kɛ mɔ kɔ̃̀ we dɛ ma gɔ we ge nde?”

¹⁴ Namanɛ zila ni, nɛ a nɛ tɛ nu lì Yɔrdanɛ, nɛ a le 'dɔ nɛ fala sambo, ɔ nɛ kɛ Elize tɔ̃a ni. Nɛ a kpasa, nɛ tɛ̃ a sa nɛ tɛ bi nzɔ be ni.

¹⁵ A nɛa we zɔ ni, nɛ a kpolo tɛ̃ a dɛ 'da Elize i do ti, fala nɛ kpo do owinɔ vɛ̃ kɛ wa kã zi a ni. A bia tɛ̃ a hã Elize, nɛ a tɔ̃ na: “Ngangga ni, mi ĩ na, ngɔ nù gɛ vɛ̃, fo gele Gale bina, tati a Gale 'da obe Israɛlɛ. Kɔ mɔ kɔ̃, nɛ mɔ kala mɛnɔ mi 'dɔlɔ hã mɔ gɛ.”

¹⁶ Nɛ Elize gese na: “Do zu li nwa wele kpasi kɛ mi a wi toe 'da a ni, mi tɔ̃ hã mɔ na, mi kɔ̃̀ sɛ gɛnɛ mɔ kɔ̃ mɔ kpo gɔ.” Namanɛ dala nu ɛ, nɛ Elize bɛ̃.

¹⁷ Nɛ Namanɛ tɔ̃ 'bɔ na: “Mɔ bɛ̃a mɛnɔ vɛ̃ mi 'dɔlɔ hã mɔ ni ia. Kɔ fala kɛ mɔ kɔ, nɛ wa so mbe nù le 'da mɔ hã mi, nɛ ma we tole ba mɔ opunda bɔa, kɔ mi si nɛ we dɛ do gbagala we dɔ do sa'de hã Gale 'da mɔ. We kɛ mi kɔ̃̀ sɛ 'bɔ we dɔ sa'de we dɔnggɔ gele gale gɔ. Nɛ mi gbɛ́ sɛ 'bɔ sa'de we be dɛa na do zu li gele gale gɔ. Mi dɛ sɛ ma we dɔnggɔ tati a NWA Gale 'da Oisraɛlɛ.

¹⁸ Nɛ nde dati ngboo, mi aka NWA Gale na, a fo ku'da 'dã mɛ zu mi ngɔ mɛnɔ gɛ: 'Da fala kɛ wele mi, nwa ngɔ nù Siri le kɔ tɔa tɛmpɛloe 'da gale Rimoni we sambala a, nɛ ma wia tɛ mɛ 'bɔ na, mi gu nù fala nɛ kpo do a. We duzu kɛ mi a dɔndɔlɔ tɔɛ do tɛ̃ a. E kɔ NWA fo ku'da 'dã mɛ ni zu mi do'do.”

¹⁹ Nɛ Elize gese hã a na: “Mɔ sí do dia nɛ!” Nɛ Namanɛ la, nɛ a si. Namanɛ la, kɔ a tɛ nyɛlɛ ngboo gɔ,

Gehazi dɛa 'dã mɔ

²⁰ nɛ Gehazi, wi toe 'da Elize ndo lengge na: “Wele mi bɛ̃a mɛnɔ vɛ̃ kɛ Namanɛ, wi Siri 'dɔlɔ hã a ni kpaa nde. Do zu li nwa wele kpasi, mi kɔ̃a we ndaka 'do a, kɔ mi kpa a, nɛ mi kpa sɛ mɔ kɔ̃ a.”

²¹ Nɛ Gehazi ndaka 'do a, nɛ a kpa a. 'Da fala Namanɛ nɛa we zɔ a tɛ yu 'do wa ni, nɛ a bũlũ kɔ ngilingili 'da a, nɛ a zĩ nù, nɛ a wɛlɛ tɛ̃ a dɛ 'da Gehazi i, nɛ a aka a na: “Ma dɛa nɛ nde?”

²² Nɛ Gehazi gese na: “Mɔ bina! Wele mi tumba mi we tɔ̃ hã mɔ na, ombe wele bɔa kɔ Owi gba olo nu Gale, wa yula tɛ kɔ lenɔ ngɔ kala Efraimɛ, kɔ wa hɔa 'da ɛ ni. Ma kɛ a aka mɔ na, mɔ hã fɛ̃a mɔ bolo kilo 'bu nɛ talɛ, do tulu ɛngga bɔa we duzu wa.”

²³ Nɛ Namanɛ tɔ̃ hã a na: “Mɔ kɔ̃, nɛ mɔ kala fɛ̃a mɔ bolo kilo 'bu nɛ gazɛlɛ.” A dala nu a, nɛ Gehazi kɔ̃, nɛ Namanɛ a fɛ̃a mɔ bole ni kɔ saki bɔa, nɛ a ɛnzɛ nu nɛ, nɛ a kala tulu bɔa, nɛ a gu ma, nɛ a kala mɛnɔ ni vɛ̃ hã Owi tonɔ 'da a bɔa, nɛ wa kã Gehazi do ma.

²⁴ Wa nɛa we hɔ tɛ fala li nɛ a Ofɛlɛ ni, nɛ Gehazi kala sakinɔ, do tulunɔ, nɛ a zɛ ma ngɔ 'baka a, nɛ a gese wi tonɔ 'da Namanɛ na, wa si 'do. Kɔ wa la do'do, nɛ a nɛ, nɛ a e ma kɔ tɔa 'da a i.

²⁵ Nɛ Gehazi kpolo tɛ̃ ɛ dɛ 'da Elize i, nɛ Elize aka a na: “Gehazi, mɔ yula do nde?” Nɛ a gese na: “Mi nɛ nɔ gɔ.”

²⁶ Nɛ Elize tɔ̃ hã a na: “'Da fala kɛ nɛ kpa ngba nɛ do Namanɛ, kɔ a zĩlĩ kɔ ngilingili 'da a we gɔnɔ dati mɔ ni, nɛ Gale dɛa na, mi zɔ nɛ. Kɔ mɔ ĩ na, ngba soe gɛ, mɛ a ngba soe kɔ̃ gɛnɛ odia tulu gɔ. Nɛ mɛ 'bɔ a ngba soe kɔ̃ gɛnɛ mbili we oso do fɔ olivɛ, tabi fɔ vinɔ, onadalamɔ, tabi Owi wili, do owuko wi dɛa to gɔ.

²⁷ Hã mɔ ĩ na, zɛlɛ ngbɛlɛ tɛ Namanɛ, ma te sɛ tɛ mɔ, do obe zã mɔ, nɛ ndɔti nɛ sɛ bina.” Kɔ 'da fala Gehazi nɛa we la Elize, nɛ zɛlɛ ngbɛlɛ kutu tɛ̃ a vɛ̃.