2 Onwanɔ 25 - WE NU GALE 1995

Nabukɔdɔnɔzɔrɛ bi 'bɔ le Yeruzalɛmɛ

¹ Nwa Sedekiasi bɛ̃a zi we nu Nabukɔdɔnɔzɔrɛ, nwa ngɔ nù Babilonia. Kɔ ma hɔa kɔ̃ zɛkɛ 'bu, zɛkɛ 'da 'bu, tɛ kɔ kusi sabɛlɛ dɛa to nwa 'da Sedekiasi tɛ ngɔ nù Yuda, nɛ nwa Nabukɔdɔnɔzɔrɛ kulu ngɔ do osodanɔ 'da a vɛ̃, nɛ wa nɛ, nɛ wa linggi gba ngbo nu le Yeruzalɛmɛ, nɛ wa a nù nyanga nɛ zĩ takpa, gbaa we hɔ ngɔ.

² Wa a ma ia do'do, nɛ wa ɔ dɛ di ni gbaa we hɔ tɛ sabɛlɛ kɛ 'bu ngɔ nɛ kpo kɔ dɛa to nwa 'da Sedekiasi tɛ ngɔ nù Yuda.

³ Nɛ gba wɔ tia kɔ le, nɛ ma fila kerr, nɛ fo zi mbe mbamba nyɔngɔmɔ be sĩ na owinɔ wa nyɔngɔ ma bina. Kɔ ma nɛa we hɔ kɔ̃ zɛkɛ kusi, zɛkɛ 'da nalɛ, tɛ kɔ sabɛlɛ kɛ 'bu ngɔ nɛ kpo kɔ dɛa to nwa 'da Sedekiasi,

⁴ nɛ osoda Babilɔnɛ wa gbo li holo tɛ dɛlɛ gba ngbo nu le Yeruzalɛmɛ, nɛ wa le. Sedekiasi do osodanɔ 'da a, wa nɛa we zɔ ni, nɛ wa hɔ nza kɔ le Yeruzalɛmɛ do tũ, nɛ wa yu, nɛ nde osoda Babilɔnɛ wa ĩ̀ fala nɛ gɔ. Nɛ wa la do nu ngboe kɛ ma tɛ ngbala gba ngbonɔ bɔa ni, nɛ wa ba li wala fɔɛ 'da Sedekiasi, nɛ wa yu si li wala kɔ gbangɔlɔ̃ lì Yɔrdanɛ.

⁵ Nɛ osoda Babilɔnɛ wa ndaka 'do wa gbaa, nɛ wa kpa nwa Sedekiasi tɛ li zɔ̃ɛ dɔ̃ɔ do Yeriko, nɛ nde osodanɔ 'da a wa yu vɛ̃, nɛ wa la a zu a kpo.

⁶ Nɛ wa ba a, nɛ wa kã a hã nwa Nabukɔdɔnɔzɔrɛ. 'Da fala ni, nɛ nde a zi a kɔ le Ribla. Nɛ a 'bili we 'da Sedekiasi dɛ di ni.

⁷ Nɛ Nabukɔdɔnɔzɔrɛ ba nu a, nɛ wa 'bili gɛlɛ obulu benɔ 'da Sedekiasi dɛ gbali baa wa ni. Nɛ wa 'bili 'bɔ gɛlɛ ogã wi ngɔ nù Yuda vɛ̃. 'Do nɛ, nɛ a ba 'bɔ nu a, nɛ wa 'dɔ gbali Sedekiasi, nɛ wa ɛnzɛ a kiti kiti, nɛ wa la do a dɛ Babilɔnɛ.

Wa gbini tɔa Tɛmpɛloe

⁸ Nwa Nabukɔdɔnɔzɔrɛ dɛa sabɛlɛ 'bu ngɔ nɛ kusi kɔ dɛa to nwa 'da a tɛ ngɔ nù Babilonia, kɔ ma nɛa we hɔ tɛ kɔ̃ zɛkɛ sambo, zɛkɛ 'da mɔlɔ, nɛ Nɛbuzaradanɛ, gã wi ngɔ Owi zɔ mɔ tɛ nwa ngɔ nù Babilonia le kɔ le Yeruzalɛmɛ.

⁹ A hɔa, nɛ a fi we tɛ tɔa Tɛmpɛloe, do tɔa 'da nwa, do tɔanɔ 'da ogã winɔ kɔ le Yeruzalɛmɛ ni vɛ̃.

¹⁰ Nɛ sodanɔ 'da a wa gbini ngbo nu le Yeruzalɛmɛ.

¹¹ 'Do nɛ, nɛ Nɛbuzaradanɛ kala owinɔ kɛ wa 'bana zi dɛ di ni ni, do owanɔ wa hã zi tɛ wa hã owi Babilɔnɛ, do tala owi dɛ si'bili mɛnɔ, nɛ a si do wa kɔlɔ 'duli.

¹² Nɛ a la dɛ ngɔ nù Yuda tati a Owi sãnɔ, kɛ wa zi do mɔ kpo bina ni na, wa wa fɔ, nɛ wa 'dafa ti te vinɔnɔ.

¹³ Osoda Babilɔnɛ wa gbini obɛlɛduma tũ mɔ bole, kɛ ma zi dɛ nu tɔa Tɛmpɛloe ni. Nɛ wa 'danga 'bɔ ongilingilinɔ, kɛ wa ia zi mɛ ɔ nɛ gba sani tũ mɔ bole dɛ ngɔ nɛ, nɛ ma ɔ zi dɛ li fanda kɛ zã tɔa Tɛmpɛloe ni. Wa kala tũ mɔ bole ni vɛ̃, nɛ wa tombo ma dɛ Babilɔnɛ i.

¹⁴ Nɛ wa kala 'bɔ mɛnɔ vɛ̃ kɛ wa dɛa ma do tũ mɔ bolo, nɛ wa dɛ zi do to we dɔnggɔ do Gale ni. Mɛ zi a omɔ a do bũ, opau, omɔ 'be do mɔ, do obila.

¹⁵ Nɛ gã wi ngɔ Owi zɔ mɔ tɛ nwa kala mɛnɔ vɛ̃ kɛ wa dɛa ma do mɔ mbali, tabi do fɛ̃a mɔ bolo ni. Mɛ zi a omɔ u do we, do sani kpɔ do tɔkɔ sa'denɔ.

¹⁶ Omɛnɔ vɛ̃ kɛ nwa Salɔmɔ dɛa zi ma do tũ mɔ bolo we 'dafa do Tɛmpɛloe 'da NWA ni, wa wè zi we e ma ngɔ kilo we ĩ ti dĩ nɛ gɔ, we kɛ ma gã zi la li ngele. Mɛ zi a obɛlɛduma tũ mɔ bolo bɔa, do mɔ ɔ korr nɛ gba sani ni, do ongilingili.

¹⁷ 'Da ngala bɛlɛduma kpo kpo zi a mɛtrɛ kusi. Wa dula zi 'bɔ mɔ ɔ nɛ ndasa ni bɔa do tũ mɔ bolo, nɛ wa gu zu bɛlɛdumanɔ ni. 'Da ngala mɛ ni a mɛtrɛ kpo do dɔ nɛ. Nɛ wa gɛzɛ odɔkpɔ kɛ ma kasa ngbɛ ɛ ni dɛ tɛ zu bɛlɛduma kpo kpo. Nɛ wa gɛzɛ lɔnggɔ fɛlɛ wala te grɛnadɛ bɔa do tũ mɔ bolo dɛ zu obɛlɛdumanɔ ni. Obɛlɛdumanɔ bɔa ni, do ogɛzɛmɛnɔ tɛ nɛ ni vɛ̃, ma wia zi kɔ̃.

¹⁸ Nɛbuzaradanɛ, gã wi ngɔ Owi zɔ mɔ tɛ nwa ba nu a, nɛ wa kala gã nwa nganga Sɛraya, do kosolo nwa nganga Sɛfania, do ogele nganganɔ talɛ kɛ wa zɔ mɔ tɛ nu tɔa Tɛmpɛloe ni.

¹⁹ Nɛ a ba 'bɔ nu a, nɛ wa kala mbe gã wi ngɔ sodanɔ, do owi dɛa tonɔ 'da nwa zu wa mɔlɔ, do wi kɔmɔ mbɛtinɔ 'da nwa ngɔ osodanɔ, do obe Yuda 'bu wa gazɛlɛ. Winɔ ni vɛ̃, wa zi dɛ kɔ le Yeruzalɛmɛ ni.

^20-21 Nɛbuzaradanɛ kala wa, nɛ a kã wa hã nwa ngɔ nù Babilonia tɛ Ribla, tɛ ngɔ nù Hamatɛ. Wa hɔa i mɔ, nɛ nwa ba nu a, nɛ wa gbɛ owinɔ ni do ti. Tɛlɛ tɛ kɛ Oyuda wa la zi nɛ kɔlɔ 'duli nyɛlɛ ndũu do nùi 'da wa gɛ a ni.

Gɛdalia hɔa gã wi ngɔ nù Yuda

²² 'Da fala kɛ Nabukɔdɔnɔzɔrɛ, nwa ngɔ nù Babilonia kala zi Owi ngɔ nù Yuda ni, nɛ a la tala ombe winɔ dɛ i mɔ. Nɛ a saka wele kpo li a a Gɛdalia, be 'da Ahikamɛ, nɛ a 'bɔ a be yaa Safanɛ na, a ɔ wi fɔmɔ nùi ni.

²³ 'Da fala kɛ ogã wi ngɔ osoda Yuda, mba do sodanɔ kɛ wa è zi tɛ wa ti mbula 'da osoda Babilɔnɛ gɔ ni, wa nɛa we zele na, nwa ngɔ nù Babilonia ia Gɛdalia do wi fɔmɔ nù Yuda vɛ̃ ni, nɛ wa kulu ngɔ do owinɔ 'da wa, nɛ wa nɛ 'da Gɛdalia tɛ Mispa i. Ogã wi ngɔ sodanɔ ni zi a: Ismaɛlɛ, be 'da Nɛtania, Yohananɛ, be 'da Karea, Seraya, be 'da Tanɛhumɛtɛ, wi Nɛtofa, do Yozania, wi Maka.

²⁴ Wa hɔa i mɔ, nɛ Gɛdalia yaka zala wa na: “Nɛ tɛ dɛ̃ kili ɔ ti mbula 'da Owi Babilɔnɛ gɔ, nɛ nde nɛ dɛ́ lenɔ 'da nɛ dɛ ngɔ nùi gɛ, nɛ nɛ dɛ to hã nwa ngɔ nù Babilonia. Kɔ nɛ dɛ ni, nɛ nɛ dungu sɛ do dia nɛ.”

²⁵ Kɔ ma hɔa tɛ zɛkɛ 'da sambo kɔ sabɛlɛ ni, nɛ Ismaɛlɛ, wi nu fɛlɛ nwa, kɛ li baa a a Nɛtania, nɛ li yaa a Elisama ni, a nɛ tɛ Mispa do Owi wili 'bu, nɛ wa ba Gɛdalia, nɛ wa gbɛ a, nɛ wa gbɛ 'bɔ Oyuda, do Owi Babilɔnɛ kɛ wa zi dɛ 'da a ni.

²⁶ 'Do nɛ, nɛ Oyuda vɛ̃, wi kpamɛnɔ, do wi sãnɔ, do ogã wi ngɔ sodanɔ, wa kulu ngɔ, nɛ wa kpolo tɛ wa dɛ ngɔ nù Ezipeto i, we kɛ wa dɛa kili osoda Babilɔnɛ.

Nwa ngɔ nù Babilonia da kɔ̃ a tɛ Yoakinɛ

²⁷ Yoakinɛ, nwa ngɔ nù Yuda ɔa 'bu sabɛlɛ talɛ ngɔ nɛ sambo tɛ kɔlɔ 'duli, nɛ Evilɛ-Merodakɛ hɔ nwa ngɔ nù Babilonia. Kɔ ma nɛa we hɔ kɔ̃ zɛkɛ 'bu nɛ bɔa ngɔ nɛ sambo, zɛkɛ 'da 'bu ngɔ nɛ bɔa, do kpo kɔ sabɛlɛ ni, nɛ nwa Evilɛ-Merodakɛ ĩ 'bako hã Yoakinɛ, nɛ a fo a kɔ bɔlɔkɛ dɛ nza.

²⁸ Nɛ a wele we do a do dia sila, nɛ a e a ngɔ ongba a nwanɔ kɛ wa zi do a kɔlɔ 'duli tɛ kɔ le Babilɔnɛ i ni.

²⁹ Nɛ a tɔ̃ hã Yoakinɛ na, a tɛ hè'dè 'bɔ tuli 'da Owi bɔlɔkɔnɔ gɔ. Nɛ yolo dɛ di ni, Yoakinɛ nyɔngɔ zi mɔ fala nɛ kpo do nwa ngɔ nù Babilonia.

³⁰ Na mɛ ni, nɛ nwa ngɔ nù Babilonia hã zi mɛ kɛ ma wia tɛ gala Yoakinɛ ni hã a tũ kpo kpo, gbaa nɛ Yoakinɛ fe do ma.