2 Onwanɔ 24 - WE NU GALE 1995

¹ Do 'da fala dɛa to nwa 'da Yoakimɛ ngɔ nù Yuda, nɛ Nabukɔdɔnɔzɔrɛ, nwa ngɔ nù Babilonia tɛa do osodanɔ 'da a, nɛ wa bi nù Yuda, nɛ wa ba ma, nɛ Nabukɔdɔnɔzɔrɛ e mbula ngɔ nɛ. Yoakimɛ dɛa mbula 'da nwa ngɔ nù Babilonia 'do sabɛlɛ talɛ, nɛ 'do nɛ, nɛ a dɛ nga zu, nɛ a bɛ̃ we dɛ mbula 'da a.

² Nɛ NWA Gale tombo gba dɔa Owi 'danga mɔ, kɛ wa a Owi ngɔ nù Babilonia, Siri, Moabɛ do Amoni ni, nɛ wa tɛa, nɛ wa 'danga nù Yuda, kpasaa ɔ nɛ kɛ Owi gba olo nu Gale wa tɔ̃a zi do zu li NWA Gale ni.

³ Ĩ na, NWA Gale hã a tumba zi 'bakonɔ ni dɛ ngɔ nù Yuda, we duzu kɛ a kɔ̃ zi 'bɔ we zɔ Oyuda gɔ. Mba gɔ, nwa Manase dɛa zi 'dã mɔ la li ngele.

⁴ A gbɛa zi Owele kɛ wa dɛ̀ 'dã mɔ gɔ ni. Nɛ le Yeruzalɛmɛ dunu zi do tɔkɔ tɛ winɔ ni, nɛ NWA Gale kɔ̃ zi 'bɔ we mbɔkɔ 'dã mɛ ni gɔ.

⁵ Tala mɛnɔ vɛ̃ kɛ Yoakimɛ dɛa ni, wa kɔma ma kɔ 'buki li nɛ a: “Dɛa tonɔ 'da onwa ngɔ nù Yuda.”

⁶ Yoakimɛ fia, nɛ be 'da a Yoakinɛ dungu nwa olo a.

⁷ Do 'da fala ni, nwa ngɔ nù Ezipeto do sodanɔ 'da a, wa wè zi tɛ hɔ nza ngɔ nù 'da wa gɔ. Mba gɔ, nwa ngɔ nù Babilonia kala zi nùnɔ kɛ ma zi ti mbula 'da nwa ngɔ nù Ezipeto ni vɛ̃. Mɛ zi a nùnɔ yolo tɛ ngbala nù Ezipeto, kɛ ma si gbãlã ngɔ gbaa we hɔ tɛ nu lì Efratɛ.

Yoakinɛ hɔa nwa ngɔ nù Yuda

⁸ Yoakinɛ hɔa nwa ngɔ nù Yuda, nɛ nde a zi do sabɛlɛ 'bu ngɔ nɛ ngbɛ'dɛ'dɛ. Nɛ a dɛa to nwa 'da a tɛ Yeruzalɛmɛ 'do zɛkɛ talɛ. Li naa a zi a Nɛhusɛta, be 'da Ɛlnatanɛ, wi Yeruzalɛmɛ.

⁹ Yoakinɛ dɛa zi mɔ kɛ ma dè tɛ NWA gɔ ni, kpasaa ɔ nɛ baa a ni.

¹⁰ Do 'da fala kɛ Yoakinɛ zi a nwa ni, nɛ ogã wi ngɔ sodanɔ 'da nwa ngɔ nù Babilonia, wa kala osodanɔ 'da wa, nɛ wa linggi le Yeruzalɛmɛ.

¹¹ Nɛ 'da fala kɛ osodanɔ wa linggi le do'do ni, nɛ nwa Nabukɔdɔnɔzɔrɛ do tɛ̃ a ngboo tɛa we bi le.

¹² Nɛ nwa Yoakinɛ zila we nɛ, nɛ wa do naa a, do ogã wi ngɔ sodanɔ, do owi ti nu a, wa hɔ nza kɔ le Yeruzalɛmɛ, nɛ wa hã tɛ wa hã nwa ngɔ nù Babilonia, nɛ a kala wa, nɛ a si do wa. Mɛ ni ma dɛa tɛ̃ ɛ do kɔ ngbɛ'dɛ'dɛ sabɛlɛ dɛa to nwa 'da Nabukɔdɔnɔzɔrɛ.

¹³ Nabukɔdɔnɔzɔrɛ kala kpamɛnɔ kɔ tɔa Tɛmpɛloe, do kɛnɔ kɔ tɔa 'da nwa ni, nɛ a tombo ma dɛ 'da a i. Nɛ a gbini sanga mɔ dɛ tonɔ kɛ wa dɛa ma do mɔ mbali, nɛ nwa Salɔmɔ a zi ma we dɛ do sambala kɔ Tɛmpɛloe ni. A dɛa zi kpasaa ɔ nɛ kɛ NWA Gale tɔ̃a zi na, ma dɛ sɛ tɛ̃ ɛ ni.

¹⁴ A kala owinɔ kɔ le Yeruzalɛmɛ ni, nɛ a tombo wa kɔlɔ 'duli. Winɔ a kala zi wa ni a owi ti nu nwa, mba do ogã winɔ vɛ̃ koto 'bu, do owinɔ kɛ wa ĩ ti dɛ si'bili mɔ wena, do owi dolo mɔ, nɛ a la dɛ di ni tati a owi sãnɔ.

¹⁵ 'Do nɛ, nɛ a kulu ngɔ we si dɛ ngɔ nù Babilonia, nɛ a kala nwa Yoakinɛ, do naa a, do owukonɔ 'da a, do ogã wi ngɔ sodanɔ, do ogã winɔ ngɔ nù Yuda ni vɛ̃, nɛ a la do wa.

¹⁶ A kala zi ogã winɔ vɛ̃, Owi wili koto sambo. A kala zi 'bɔ owi dɛ si'bili mɛnɔ do Owi dolo mɛnɔ vɛ̃, owi wili koto kpo, mba do owinɔ vɛ̃ wa wia zi do dɛ to soda ni, nɛ a si do wa dɛ ngɔ nù Babilonia.

¹⁷ 'Do nɛ, nɛ Nabukɔdɔnɔzɔrɛ saka Matania, yamba Yoakinɛ na, a dungu nwa olo Yoakinɛ, nɛ a kpolo li Matania na Sedekiasi.

Sedekiasi hɔa nwa ngɔ nù Yuda

¹⁸ Sedekiasi hɔa zi nwa ngɔ nù Yuda, nɛ nde a zi do 'bu sabɛlɛ bɔa ngɔ nɛ kpo. Nɛ a dɛa to nwa 'da a tɛ Yeruzalɛmɛ 'do sabɛlɛ 'bu ngɔ nɛ kpo. Li naa a zi a Hamutalɛ, be 'da Irmeya, wi Libna.

¹⁹ Nwa Sedekiasi dɛa zi mɔ kɛ ma dè tɛ NWA Gale gɔ ni, kpasaa ɔ nɛ kɛ Yoakinɛ dɛa zi ni.

²⁰ Ĩ na, NWA Gale hã a tumba zi 'bakonɔ ni dɛ kɔ le Yeruzalɛmɛ, do ngɔ nù Yuda vɛ̃. Nɛ a 'dɔlɔ zi owinɔ 'da a ndũu nyɛlɛ do a, we kɛ zã a nɔ̃lɔ̃ zi dɛ tɛ wa wena.