2 Onwanɔ 22 - WE NU GALE 1995

Yoziasi hɔa nwa ngɔ nù Yuda

¹ Yoziasi hɔa zi nwa, nɛ nde a do sabɛlɛ ngbɛ'dɛ'dɛ. Nɛ a dɛa to nwa 'da a tɛ Yeruzalɛmɛ 'do sabɛlɛ 'bu nɛ talɛ ngɔ nɛ kpo. Li naa a a Yɛdida, be 'da Adaya, wi Bɔskatɛ.

² Yoziasi dɛa zi mɔ kɛ ma dia tɛ NWA ni kpasaa nɛ yaa a Davidi ni, nɛ a yɔ mbe mbula kpo gɔ.

Gã nwa nganga kpa 'buku mbula ma yɔa zi ni

³ Yoziasi dɛa to nwa 'da a sabɛlɛ 'bu ngɔ nɛ ngbɛ'dɛ'dɛ. Nɛ mbe ngba soe kpo, nɛ a sa mɔ hã wi kɔma mbɛti 'da a kɛ li a a Safanɛ, be 'da Asalia, nɛ a 'bɔ a be yaa Mɛsulamɛ ni,

⁴ nɛ a tombo a na, a nɛ kɔ tɔa Tɛmpɛlo 'da NWA i, hã a kpa gã nwa nganga Hilkia, nɛ a tɔ̃ hã a na: “Mɔ tɔ́lɔ́ mbili kɛ owinɔ wa hã ma hã onganganɔ wa zɔ mɔ tɛ nu tɔa Tɛmpɛloe ni.

⁵ Nɛ mɔ hã ma hã ogã wi dɛ tɔanɔ kɛ wa a wa we 'dafa tɔa ni,

⁶ takɔ wa futa do Owi sɛ tenɔ, do wi dɛ tɔanɔ, do tala mbe wi dɛa tonɔ, nɛ wa oso 'bɔ mbili ni do te, do ta we 'dafa do tɔa Tɛmpɛloe.

⁷ Mɔ hã mbili hã owinɔ ni do'do, nɛ mɔ tɛ àkà wa na, wa dɛa do ma nɛ nde gɔ, we kɛ wa a wi bɔlɔ zu.”

⁸ Safanɛ nɛa, nɛ a tɔ̃ toe ni hã gã nwa nganga Hilkia. Nɛ Hilkia tɔ̃ hã a na: “Mɔ zɔ́, mi kpa 'buku mbula 'da Mɔizɛ kɛ ma yɔa zi ni kɔ tɔa Tɛmpɛlo 'da NWA.” Nɛ Hilkia ba 'buki, nɛ a hã ma hã Safanɛ, nɛ Safanɛ tɔlɔ.

⁹ A tɔla do'do, nɛ a kpolo tɛ̃ a dɛ 'da nwa i, nɛ a tɔ̃ hã a na: “Onganganɔ wa kala mbili kɔ sanduki, hã wa hã ma hã ogã wi dɛ tɔanɔ kɛ wa a wa we 'dafa tɔa Tɛmpɛloe ni ia.”

¹⁰ Nɛ a tɔ̃ 'bɔ na: “Aa nwa, mɔ zɔ̃ 'buki gɛ, gã nwa nganga Hilkia ba ma na mi tɔlɔ.” Nɛ a ma ngɔ tɔlɔ ma hã nwa.

¹¹ Nwa Yoziasi nɛa we zele wenɔ kɔ 'buku mbula ni, nɛ a dɛ 'bako wena, nɛ a ɛ̃ tulu tɛ̃ a.

¹² Nɛ a sa mɔ hã gã nwa nganga Hilkia, do Ahikamɛ be 'da Safanɛ, do Akbɔrɛ be 'da Mikaya, do Safanɛ wi kɔmɔ mbɛti 'da a, do Asaya mbe kpo sanga owi ti nu a, nɛ a tɔ̃ hã wa na:

¹³ “Nɛ nɛ́, hã nɛ aka NWA Gale we duzu mi do Owi ngɔ nù Yuda na, a tɔ̃ gulu wenɔ kɔ 'buki kɛ wa kpa ma gɛ hã lɛ. Mi ĩ na, sila a wia tɛ nɔ̃lɔ̃ dɛ tɛ lɛ 'danga wena, tua kɛ oyaa lɛ wa dɛ̃ mbulanɔ kɛ wa kɔma ma kɔ 'buki gɛ gɔ.”

¹⁴ Nɛ gã nwa nganga Hilkia, do Ahikamɛ, Akbɔrɛ, Safanɛ do Asaya, wa nɛa 'da mbe wuko kpo, wi gba olo nu Gale, li a a Hulda. Wuke ni ɔ zi kɔ le Yeruzalɛmɛ, tɛ mbé falanɔ wa gba ma ni, nɛ a zi a wuke 'da Salumɛ, be 'da Tikaya, nɛ a 'bɔ a be yaa Harasi. Salumɛ zi a wi zɔ mɔ tɛ tulunɔ kɛ onganganɔ wa he'de 'da fala dɛ sambala kɔ tɔa Tɛmpɛloe ni. Owinɔ nwa tumba wa ni wa nɛa, nɛ wa hɔ 'da Hulda i, nɛ wa tɔ̃ wenɔ kɛ ma la ni hã a.

¹⁵ A nɛa we zele wenɔ ni do'do, nɛ a tombo wa do to hã nwa Yoziasi na, NWA Gale tɔ̃a na:

¹⁶ “Mi tombo sɛ 'bako dɛ ngɔ le Yeruzalɛmɛ, do ngɔ owinɔ kɛ wa ɔ kɔ nɛ ni, ɔ nɛ kɛ wa kɔma ma kɔ 'buku mbula kɛ wa tɔlɔ ma hã mɔ ni.

¹⁷ Mba gɔ, Owi Yeruzalɛmɛ, wa bɛ̃a gɛnɛ mi, nɛ wa hã dɔnggamɔ hã ogele gale. Nɛ mɛnɔ vɛ̃ wa dɛa ni ma nɔ̃lɔ̃ zã mi. Gulu nɛ a nɔ̃lɔ̃ zã 'da mi dɛ tɛ le Yeruzalɛmɛ ma gã wena, nɛ sila mi gɛ̃ sɛ ngɔ nɛ dɔ̃ gɔ.

¹⁸ Nɛ kpóló tɛ nɛ 'da nwa kɛ a tombo nɛ we aka mi ni, nɛ nɛ tɔ̃ hã a na, mi NWA Gale 'da nɛ obe Israɛlɛ, mi tɔ̃a hã a na, mɔ zila we kɔ 'buki ni,

¹⁹ nɛ mɔ zila 'bɔ we mɛ kɛ mi dɛ sɛ do le Yeruzalɛmɛ, do winɔ kɔ nɛ ni vɛ̃. 'Bakoe kɛ Owi Yeruzalɛmɛ wa kpa sɛ ni, Owele wa zele sɛ we nɛ, nɛ kili ma ba sɛ wa wena. Fala kɛ wele kɔ̃ we fɔmbɔ mbe le nde, nɛ a e sɛ li Yeruzalɛmɛ kɔ fɔmba 'da a. Nɛ nde mɔ nwa, 'da fala kɛ mɔ zila wenɔ kɔ 'buki ni, nɛ mɔ ĩ ti 'dã mɛ 'da mɔ, nɛ sila mɔ 'bɔa, nɛ mɔ gbala ma hã mi, nɛ mɔ ɛ̃a tulu tɛ mɔ, nɛ mɔ hia kɔ̃a dati mi. We duzu kɛ mɔ dɛa na mɛ ni, mi zila sambala 'da mɔ, nɛ mi kɔ̃a gɛnɛ nɛ.

²⁰ Ma kɛ 'bakonɔ kɛ mi nɛ tombo sɔ ma dɛ ngɔ le Yeruzalɛmɛ ni, mi tómbó sɛ do ti gɔ gbaa, hã mɔ fe do'do sɛ nɛ de. Mɔ fe sɛ fio tɔa, nɛ wa mi mɔ ngɔ mabi'donggo 'da oyaa mɔ.” Owi nɛ tonɔ 'da nwa wa zila ni, nɛ wa kpolo tɛ wa dɛ 'da nwa i, nɛ wa tɔ̃ wenɔ ni vɛ̃ hã a.