2 Onwanɔ 21 - WE NU GALE 1995

Manase hɔa nwa ngɔ nù Yuda

¹ Manase hɔa zi nwa ngɔ nu Yuda, nɛ nde a do sabɛlɛ 'bu ngɔ nɛ bɔa. Nɛ a dɛa to nwa tɛ Yeruzalɛmɛ 'do 'bu sabɛlɛ mɔlɔ ngɔ nɛ mɔlɔ. Li naa a a Hɛfsi-Ba.

² Manase dɛa zi mɔ kɛ ma dè tɛ NWA gɔ ni. A dɛa zi kpo kpo gã 'dã mɛnɔ olo Okanana kɛ nwa ndaka zi wa, takɔ a hã nùi olo wa hã Oisraɛlɛ ni.

³ A 'dafa zi fala dɔnggɔ do ogele galenɔ kɛ baa a Ezekiasi 'danga zi ma ni dɛ olo nɛ. Nɛ a dɛ ombé gbagala we dɔnggɔ do gale Bala. Nɛ a dɛ kpikima gale Asera, ɔ nɛ kɛ Akabɛ, nwa ngɔ Oisraɛlɛ dɛa zi ni, nɛ a dɔnggɔ 'bɔ osɔla.

⁴ Manase dɛa zi ogele gbagala hã ogale bɛlɛnɔ, dɛ kɔ tɔa Tɛmpɛloe tɛ Yeruzalɛmɛ ni ngboo. Ĩ na, NWA tɔ̃a zi na: “Tɔa Tɛmpɛloe tɛ Yeruzalɛmɛ, mɛ sɛ a fala dɔnggɔ tati a do mi zu mi kpo.”

⁵ Nɛ Manase dɛa 'bɔ ombé gele gbagala tɛ li fandanɔ bɔa kɛ zã Tɛmpɛloe ni, we dɔnggɔ do osɔla.

⁶ Nɛ a gbɛ 'bɔ be 'da a, nɛ a dɔ a do dɔnggamɔ hã ogale bɛlɛnɔ. A dɛa zi 'bɔ osɔ̃ kpi do kpi, nɛ a nɛ 'da owinɔ kɛ wa wele we do bɔzɔnɔ ni we aka wa do we. A dɛa zi 'dã mɔ kɛ ma 'danga tɛ NWA ni, nɛ ma nɔ̃lɔ̃ zã a nganda wena.

⁷ A dɛa kpikima gale Asera, nɛ a e ma kɔ tɔa Tɛmpɛloe tɛ Yeruzalɛmɛ ni. Ĩ na, NWA, tɔ̃a zi hã Davidi do be 'da a Salɔmɔ na: “Mi saka le Yeruzalɛmɛ sanga olenɔ 'da nu kpala obe Israɛlɛ 'bu ngɔ nɛ bɔa gɛ, nɛ mi kɔ̃a na, dɛ kɔ tɔa Tɛmpɛloe ni, wa dɔnggɔ tati a mi zu mi kpo.

⁸ Kɔ fala kɛ obe Israɛlɛ wa zele we nu mi, hã wa dɛ mbulanɔ vɛ̃ kɛ Mɔizɛ, wi dɛa toe 'da mi, tɔ̃a zi hã wa ni, nɛ mi dɛ sɛ na, wele kpo tɛ fò wa ngɔ nùi kɛ mi hã zi hã oyaa wa ni gɔ.”

⁹ Gɛnɛ kɔ na mɛ ni, nɛ nde Oyuda wa zèlè we nu NWA gɔ. Nɛ nwa Manase 'dusu go'do wa na, wa dɛ 'bɔ o'dã mɔ dɛ dati nɛ ngɔ 'dã mɛnɔ 'da Okanana, kɛ NWA kumu zi wa, takɔ a hã nùi olo wa hã owinɔ 'da a ni.

¹⁰ NWA zɔa ní, nɛ a tombo Owi gba olo nu a we tɔ̃ hã Oyuda na:

¹¹ “Nwa Manase dɛ 'dã mɔ wena. Mɛ a dɛa ni, ma 'danga nɛa ngɔ kɛ 'da Oamori zi dati gɛ. A dɛa okpikima, nɛ ma tumba Oyuda we dɛ 'dã mɔ.

¹² Gulu nɛ hã mi NWA Gale 'da obe Israɛlɛ, mi tɔ̃a na, mi tombo sɛ 'bako dɛ ngɔ le Yeruzalɛmɛ, do ngɔ nù Yuda. Nɛ 'bakoe ni ma gã sɛ wena. Nɛ owinɔ kɛ wa zele sɛ we nɛ ni, ma hã sɛ kili hã wa wena.

¹³ Mi 'danga sɛ le Yeruzalɛmɛ, ɔ nɛ kɛ mi 'danga zi do le Samaria do nu fɛlɛ Akabɛ ni. Nɛ mi fo sɛ winɔ kɔ le Yeruzalɛmɛ, nɛ le ma sa sɛ ɔ nɛ sani, kɛ wa fɔlɔ kɔ nɛ, nɛ ma sa, nɛ wa gu nu nɛ nù ni.

¹⁴ Nɛ owinɔ kɛ wa kpasa sɛ kɔ ngamɛ ni, mi da sɛ kɔ̃ mi tɛ wa, nɛ Owi sɛnɛ wa wa 'danga sɛ nùi 'da wa, nɛ wa kala sɛ mɛnɔ 'da wa vɛ̃.

¹⁵ Mi dɛ sɛ do wa na mɛ ni, we kɛ ndo do ngba soe kɛ mi fua zi oyaa wa ngɔ nù Ezipeto, gbaa tia do sɔɛ gɛ, wa 'bana tɛ dɛ mɛ kɛ ma dè li mi gɔ ni, nɛ wa nɔ̃lɔ̃ zã mi wena.”

¹⁶ Manase gbɛa zi Owi bɔlɔ zu wena, do tɛlɛ tɛ kɛ na tɔkɔ tɛ wa dunu zi kɔ le Yeruzalɛmɛ vɛ̃. A dɛa 'bɔ ki ni dɛ ngɔ kɛ a tumba zi Oyuda we dɛ 'dã mɔ kɛ ma dè tɛ nwa gɔ ni.

¹⁷ Tala mɛnɔ vɛ̃ kɛ Manase dɛa ni, wa kɔma ma kɔ 'buki li nɛ a: “Dɛa tonɔ 'da onwa ngɔ nù Yuda.” Nɛ kɔ 'buki ni, wa kɔma we 'dã mɛnɔ vɛ̃ kɛ a dɛa zi ni.

¹⁸ A fia, nɛ wa mi a dɛ 'do tɔa nwa 'da a, tɛ fala kɛ wa sa li nɛ na: “Nùi 'da Uza” ni. Nɛ be 'da a Amoni dungu nwa olo a.

Amoni hɔa nwa ngɔ nù Yuda

¹⁹ Amoni hɔa zi nwa, nɛ nde a do 'bu sabɛlɛ bɔa ngɔ nɛ bɔa, nɛ a dɛa to nwa 'da a tɛ Yeruzalɛmɛ 'do sabɛlɛ bɔa. Li naa a a Mɛsulemɛtɛ, be 'da Harusi, nɛ a a boko Yotba.

²⁰ Amoni dɛa zi mɔ kɛ ma dè tɛ NWA gɔ kpasaa nɛ́ baa a Manase ni.

²¹ A dɛa zi mɔ tɛ̃ a 'danga nɛ́ kɛ 'da baa a ni, nɛ a dɔnggɔ zi ogale bɛlɛnɔ ɔ nɛ baa a ni.

²² A dɛ̀ mɔ tɛ̃ a ɔ nɛ kɛ zã NWA kɔ̃a ni gɔ. A kifi zi 'do a lua do NWA Gale 'da oyaa a.

²³ Mbe ngba soe kpo, nɛ ogã wi ngɔ sodanɔ 'da a wa ba zã zu a, nɛ wa gbɛ a dɛ kɔ tɔa nwa 'da a ni.

²⁴ Oyuda wa nɛa we zɔ ni, nɛ wa kala owinɔ ni, nɛ wa gbɛ wa vɛ̃. Nɛ wa saka be 'da a Yoziasi, nɛ a dungu nwa olo a.

²⁵ Tala mɛnɔ vɛ̃ kɛ Amoni dɛa ni, wa kɔma ma kɔ 'buki li nɛ a: “Dɛa tonɔ 'da onwa ngɔ nù Yuda.”

²⁶ Amoni fia, nɛ wa mi a tɛ kɔ zunu 'da a tɛ ngɔ nùi 'da Uza. Nɛ be 'da a Yoziasi dungu nwa olo a.