2 Onwanɔ 20 - WE NU GALE 1995

Nwa Ezekiasi ba zɛlɛ, nɛ a kpasa

¹ Do ngba soe ni, nɛ zɛlɛ fio ba nwa Ezekiasi. Nɛ Ezai, wi gba olo nu Gale, kɛ a a be 'da Amɔtisi ni kulu ngɔ, nɛ a nɛ we zɔ Ezekiasi. A hɔa i mɔ, nɛ a tɔ̃ hã Ezekiasi na: “NWA Gale tɔ̃a hã mɔ na, mɔ 'dafa mɛnɔ 'da mɔ vɛ̃ do dia nɛ. Mba gɔ, zɛlɛmɛ tɛ mɔ gɛ ma gbɛ sɛ mɔ.”

² Kɔ Ezekiasi nɛa we zele ni, nɛ a siki li a dɛ ngu'du dɛlɛ tɔa, nɛ a sambala nwa na:

³ “Aa nwa, mɔ kɔ̃, nɛ mɔ lénggé do kɛ mi dɛa zi mɔ tɛ mi li mɔ do bɔlɔ nɛ, nɛ mi dɛa to hã mɔ do sila mi kpo, nɛ mi fa zi fai we hã yangga hã mɔ ni.” A nɛa we tɔ̃ ni do'do, nɛ a ma ngɔ he nɛ.

⁴ 'Do nɛ, nɛ Ezai la, kɔ a tɛ hɔ̀ li fanda tɛ gbogbo ngboe 'da NWA ni hɔa gɔ, nɛ Gale ba nu ɛ hã Ezai na,

⁵ a kpolo tɛ̃ a hã a tɔ̃ hã Ezekiasi gã wi ngɔ owinɔ 'da ɛ na: “Mi NWA Gale 'da yaa mɔ Davidi, mi zila sambala 'da mɔ, nɛ mi zɔa mili kɔ̃a li mɔ. Kɔ mi kpasa sɛ mɔ. 'Do tũ talɛ, nɛ mɔ kulu sɛ ngɔ, nɛ mɔ nɛ kɔ tɔa Tɛmpɛloe 'da mi i.

⁶ Mi kɔ̃a we e mɔ na, mɔ ɔ 'bɔ mbé nɛ sabɛlɛ 'bu ngɔ nɛ mɔlɔ, sɛ nɛ mɔ fe de. Mi fo sɛ mɔ do owi Yeruzalɛmɛ ti kɔ̃ nwa ngɔ nù Asiri. Nɛ mi zɔ sɛ mɔ tɛ le Yeruzalɛmɛ fai, we be dɔ̃lɔ̃ li 'da mi, do we lengge Davidi, wi toe 'da mi.”

⁷ 'Do nɛ, nɛ Ezai ba nu a na, wa to wala te figɛ, nɛ wa zanga fũ nɛ, hã wa ɛnzɛ do ngɔ hɛ̃a mɛ tɛ nwa Ezekiasi ni, nɛ a kpasa sɛ.

⁸ Nɛ nwa Ezekiasi aka a na: “Mɔ sá mbe li mɔ kpo kɛ ma wia we be hã mi na, NWA Gale a kpasa sɛ mi, nɛ 'do tũ talɛ, nɛ mi nɛ sɛ 'bɔ kɔ Tɛmpɛloe 'da a i ni.”

⁹ Nɛ Ezai gese hã a na: “NWA Gale a be sɛ mɔ kpo hã mɔ, takɔ mɔ ĩ na, a dɛ sɛ mbuli kɛ a kpua ma hã mɔ ni. Ti gɔ̃lɔ̃ ma yolo sɛ, nɛ ma la we nyanga wi 'bu dɛ ngɔ ngalangala olo nwa Ahazɛ. Kɔ mɔ kɔ̃a na gɔ̃lɛ̃ ni, ma la dɛ dati, tabi ma kpolo tɛ̃ ɛ dɛ 'do nde?”

¹⁰ Nɛ Ezekiasi gese na: “Takɔ na gɔ̃lɔ̃ la dɛ dati we nyanga wi 'bu ni, ma a nga gɔ. Kɔ mi kɔ̃a na, ma kpolo tɛ̃ ɛ dɛ 'do.”

¹¹ A tɔ̃a ni do'do, nɛ Ezai wi gba olo nu Gale sambala, nɛ NWA Gale tili gɔ̃lɛ̃ ngɔ ngalangala ni dɛ 'do we nyanga wi 'bu.

Nwa ngɔ nù Babilonia tumba Owele hã Ezekiasi

¹² Do ngba soe ni, nɛ Merodakɛ-Baladanɛ, be 'da Baladanɛ, kɛ a a nwa ngɔ nù Babilonia ni zila na, Ezekiasi ba zɛlɛ, kɔ a kpasa. Nɛ a sa mɔ hã Owi nɛ tonɔ 'da a, nɛ a tombo wa do mbɛti hã Ezekiasi do omɔ we 'dɔlɔ hã a.

¹³ Ezekiasi zɔa ni, nɛ ma de tɛ̃ a wena. Nɛ a kpia ti owinɔ ni, nɛ a le do wa kɔ tɔa kɛ a usu do mɔ olo gã golenɔ, do mbili, mɔ mbali, yɔmbɔ, dia unu nɔ, do tɔa kɛ a a do mɔ bi bolonɔ 'da a ni. Nɛ a bia kpamɛnɔ vɛ̃ kɛ a do ma ni hã wa. A bia mɔ kɔ tɔa 'da a, do mɔ ngɔ nùi 'da a vɛ̃ hã wa, nɛ a ùsù mɔ kpo gɔ.

¹⁴ 'Do nɛ, nɛ Ezai, wi gba olo nu Gale nɛa 'da nwa Ezekiasi i, nɛ a aka a na: “Owinɔ gɛ wa yula do nde? Nɛ wa tɔ̃a hã mɔ na ge nde?” Nɛ Ezekiasi gese na: “Wa yula gbaa tɛ ngɔ nù Babilonia, ma nyɛlɛ wena.”

¹⁵ Nɛ Ezai 'bɔ na: “Nɛ mɛ kɛ wa zɔa kɔ tɔa 'da mɔ ni a ge nde?” Nɛ Ezekiasi na: “Wa zɔa mɛnɔ kɔ tɔa 'da mi ni vɛ̃. Nɛ mi bia kpamɛnɔ 'da mi vɛ̃ hã wa, mi ùsù mɔ kpo do wa gɔ.”

¹⁶ Nɛ Ezai tɔ̃ hã Ezekiasi na: “NWA Gale tɔ̃a na:

¹⁷ ‘Mbe ngba soe kpo, nɛ Owi Babilonia wa tɛ sɛ, nɛ wa kala sɛ omɛnɔ kɔ tɔa nwa 'da mɔ gɛ vɛ̃, do omɛnɔ kɛ oyaa mɔ wa usu zi ni, nɛ wa si do ma. Wa lá sɛ tala mɔ kpo gɔ.

¹⁸ Nɛ wa kala sɛ 'bɔ ombe wi wili sanga obe zã mɔ, nɛ wa hɔlɔ wa, nɛ wa a wa we dɛ to kɔ tɔa 'da ngɔ nù Babilonia.’ ”

¹⁹ Nwa Ezekiasi zila ni, nɛ a gese hã Ezai na: “Toe kɛ NWA tumba do mɔ hã mi gɛ, mɛ a dia to.” Ezekiasi lingga zi na, kɔ dungu nza 'dɛ ɛ, lo sɛ do dungu fio, nɛ bolo sɛ bina.

²⁰ Tala mɛnɔ vɛ̃ kɛ Ezekiasi dɛa ni, wa kɔma ma kɔ 'buki li nɛ a: “Dɛa tonɔ 'da onwa ngɔ nu Yuda.” Nɛ kɔ 'buki ni, wa kɔma 'bɔ tɛlɛ tɛ kɛ a zã zi kɔ̃ lì, nɛ a gba wala nɛ, takɔ ma la dɛ kɔ le Yeruzalɛmɛ i ni.

²¹ Ezekiasi fia, nɛ be 'da a Manase dungu nwa olo a.