2 Onwanɔ 2 - WE NU GALE 1995

Gale ba Elia dɛ li nza i do tunu li a

¹ 'Da fala wia zi, nɛ NWA fi ogba bũ zikili, nɛ ma ba Elia kũ do a dɛ li nza i. Nɛ zélé tɛlɛ tɛ kɛ ma la zi ni! Elia do Elize wa kulu ngɔ te Gilgalɛ, nɛ wa la fala nɛ kpo,

² kɔ wa nɛa we hɔ sanga wala i, nɛ Elia tɔ̃ hã Elize na: “Mɔ 'báná dɛ dɛ, we kɛ NWA tumba mi tɛ Betɛlɛ.” Nɛ Elize gese hã a na: “Mi kana tɛ mi do zu li NWA wele kpasi, nɛ mi kana 'bɔ tɛ mi do zu li mɔ ngboo na, mi lá sɛ mɔ gɔ!” Nɛ wa la dɛ Betɛlɛ i.

³ Kɔ wa hɔa i mɔ, nɛ owi gba olo nu Gale, kɛ wa ɔ di ni ni, wa tɛ, nɛ wa aka Elize na: “Mɔ ĩ̀ na, NWA nɛ ba wele mɔ dɛ li nza i sɔɛ gɛ gɔ nde?” Nɛ Elize gese na: “Mi ĩ ĩ. Kɔ nɛ lá fala tɔ̃ we nɛ hã mi do'do!”

⁴ Nɛ Elia tɔ̃ 'bɔ hã Elize na: “Mɔ 'báná dɛ dɛ, we kɛ NWA tumba mi tɛ Yeriko.” Nɛ Elize gese hã a na: “Mi kana tɛ mi do zu li NWA wele kpasi, nɛ mi kana 'bɔ tɛ mi do zu li mɔ ngboo na, mi lá sɛ mɔ gɔ!” Nɛ wa la dɛ Yeriko i.

⁵ Kɔ wa hɔa i mɔ, nɛ owi gba olo nu Gale, kɛ wa ɔ di ni ni, wa tɛ, nɛ wa aka Elize na: “Mɔ ĩ̀ na, NWA nɛ ba wele mɔ dɛ li nza i sɔɛ gɛ gɔ nde?” Nɛ Elize gese na: “Mi ĩ ĩ. Kɔ nɛ lá fala tɔ̃ we nɛ hã mi do'do!”

⁶ Nɛ Elia tɔ̃ 'bɔ hã Elize na: “Mɔ 'báná dɛ dɛ, we kɛ NWA tumba mi tɛ nu lì Yɔrdanɛ.” Nɛ Elize gese hã a na: “Mi kana tɛ mi do zu li NWA wele kpasi, nɛ mi kana 'bɔ tɛ mi do zu li mɔ ngboo na, mi lá sɛ mɔ gɔ!” Nɛ wa la dɛ nu lì Yɔrdanɛ i.

⁷ Nɛ owi gba olo nu Gale 'bu wa mɔlɔ, wa nɛa 'dɔkɔlɔ Elia do Elize tɛ nu lì i. Owinɔ ni wa kpa wa, nɛ nde wa yula nù dɛ nu lì ni. Nɛ wa yolo nyɛlɛ do Elia do Elize be sĩ.

⁸ Nɛ Elia hɔlɔ tulu gɛ̃ɛ 'da a, nɛ a kasa ma, nɛ a zɛ do lì. Nɛ lì gɔnɔ sanga tɛ ngbɛ ɛ bɔa, nɛ Elia do Elize wa kũ do kula nyanga wa.

⁹ Wa hɔa kulu lì i, nɛ Elia tɔ̃ hã Elize na: “Mɔ aka we mɛ zã mɔ kɔ̃a na, mi dɛ hã mɔ, dati kɛ na, nwa ba mi dɛ li nza i ni.” Nɛ Elize gese na: “Mi kɔ̃a sɔ we kpa ngawi gba olo nu Gale olo mɔ fala bɔa.”

¹⁰ Nɛ Elia na: “Fala kpa mɛ mɔ aka we nɛ gɛ, ma nganda wena. Nɛ nde fala kɛ mɔ zɔ mi tɛ kũ dɛ li nza i, nɛ mɔ kpa sɛ ma. Kɔ mɔ zɔ̀ mi gɔ, nɛ nde mɔ kpá sɛ ma gɔ.”

¹¹ 'Da fala wa tɛ wele we tɛ la nɛ ni, nɛ ombalata bɔa kɛ wa nyɛ ɔ nɛ we ni, wa hɔ do ngilingili kɛ ma nyɛ 'bɔ nɛ we ni, nɛ ma gɔnɔ sanga tɛ ngba wa. Nɛ Gale fi gba bũ zikili, nɛ ma ba Elia kũ do a dɛ li nza i.

¹² Kɔ Elize nɛa we zɔ ní, nɛ a he mɔ na: “Baa mi! Baa mi! Mɔ a ngawili kɔ̃ Israɛlɛ, mɔ hã zi ngawi hã Oisraɛlɛ nɛa ngɔ ngilingilinɔ do owi kũ mbalatanɔ 'da wa vɛ̃!” Nɛ a zɔ̃ 'bɔ Elia mbé nɛ gɔ. Nɛ a ɛ̃a tulu tɛ̃ a do 'bako vɛ̃.

¹³ Nɛ 'do nɛ, nɛ a ba tulu gɛ̃ɛ kɛ Elia fi sɔ ma dɛ nu lì Yɔrdanɛ ni,

¹⁴ nɛ a zɛ do ngɔ lì, nɛ a he mɔ na: “NWA Gale 'da Elia, mɔ a do nde?” A nɛa we zɛ lì ni, nɛ ma gɔnɔ sanga tɛ ngbɛ ɛ, nɛ a kũ dɛ kulu nɛ i.

¹⁵ Owi gba olo nu Gale kɛ wa yula tɛ Yeriko i ni, wa nɛa we zɔ ni, nɛ wa na: “Elize kpa ngawi gba olo nu Gale olo Elia!” Nɛ wa nɛ, nɛ wa kpa Elize, nɛ wa bili zu wa nù dati a,

¹⁶ nɛ wa tɔ̃ hã a na: “Lɛ vɛ̃ 'bu lɛ mɔlɔ gɛ a sɔ̃a gbãlã tɛ Owele. Kɔ lɛ kɔ̃a we nɛ, hã lɛ fa wele mɔ. Mbe gɔ, nɛ nde Hi Wi 'da nwa ba a, nɛ a e a ngɔ kala kpo, tabi kɔ gbangɔlɔ̃.” Nɛ Elize bɛ̃ na, wa tɛ nɛ̀ gɔ.

¹⁷ Nɛ wa dala nu wa hã a ni gbaa, nɛ a kɔ̃. Nɛ owinɔ 'bu wa mɔlɔ ni, wa nɛa, nɛ wa fa Elia 'do tũ talɛ, nɛ nde wa kpà a gɔ.

¹⁸ Nɛ wa kpolo tɛ wa dɛ 'da Elize tɛ Yeriko nga, nɛ a tɔ̃ hã wa na: “Mi tɔ̃a zi hã nɛ na, nɛ tɛ nɛ̀ do yala gɔ!”

Elize dɛa oɔngbamɔ

¹⁹ Owi Yeriko wa nɛa, nɛ wa tɔ̃ hã Elize na: “Aa nwa, mɔ ĩ na, fala wa dɛa do le 'da lɛ gɛ ma de wena, nɛ nde lì ma dè gɔ, nɛ nùi ma kó 'bɔ kpalɛ gɔ.”

²⁰ Nɛ Elize tɔ̃ hã wa na: “Nɛ só tɔ̃ dɛ kɔ mbé gbala, hã nɛ tɛ do ma.” Wa tɛa nɛ,

²¹ nɛ a ba ma, nɛ a nɛ nɛ tɛ nu lì i, nɛ a a ma 'dɔ lì, nɛ a na: “nwa tɔ̃a na, ɛ kifi lì gɛ do dia lì. Ma gbɛ́ sɛ 'bɔ Owele, do osa'de gɔ, nɛ ma 'dángá sɛ 'bɔ kpalɛnɔ ngɔ nùi gɛ gɔ.”

²² Ma kɛ lì ni ma kifi dia lì, nɛ ma 'bana na mɛ ni tia do sɔɛ gɛ, ɔ nɛ kɛ Elize tɔ̃a zi do zu li nwa ni.

²³ 'Do nɛ, nɛ Elize kulu ngɔ tɛ Yeriko, nɛ a la dɛ Betɛlɛ. Kɔ a nɛ hɔ li wala i, nɛ obe gbɛ̃ wa hɔ, nɛ wa ma ngɔ mɔmɔ a. Wa na: “Aa mɔ, wi bɛlɛ zui gɛ, mɔ wɛ́lɛ́ tɛ mɔ! Aa mɔ, wi bɛlɛ zui gɛ, mɔ wɛ́lɛ́ tɛ mɔ!”

²⁴ Nɛ Elize siki tɛ̃ ɛ, nɛ a zɔ wa, nɛ a fɔmbɔ wa do zu li NWA. Nɛ ogã sa'de bɔa, kɛ wa sa li wa na ursi ni, wa yolo zamɔ i, nɛ wa hɔ nza, nɛ wa kala obe 'bu wa nalɛ ngɔ wa bɔa kɔ obenɔ ni, nɛ wa 'bili sanga wa sikili sikili.

²⁵ 'Do nɛ, nɛ Elize la dɛ ngɔ kala Karmɛlɛ, nɛ a yolo di ni, nɛ a si dɛ Samaria i.