2 Onwanɔ 19 - WE NU GALE 1995

Nwa Ezekiasi aka Ezai do we

¹ Nwa Ezekiasi nɛa we zele toe wa tumba hã a ni, nɛ a ɛ̃ tulu tɛ̃ a do 'bako, nɛ a he'de tulu gɛla. 'Do nɛ, nɛ a kulu ngɔ, nɛ a nɛ kɔ Tɛmpɛloe 'da NWA Gale.

² Do 'da fala ni, nɛ nwa Ezekiasi sa mɔ hã Eliakimɛ, gã wi ngɔ owi dɛa tonɔ kɔ tɔa 'da a, do Sɛbna, wi kɔmɔ mbɛti, do okpasa nganganɔ. Wa zi vɛ̃ do tulu gɛla tɛ wa. Wa hɔa, nɛ a tombo wa hã Ezai, wi gba olo nu Gale, kɛ a a be 'da Amɔtisi ni

³ na: “Sɔɛ gɛ, mɛ a kɔ̃ tũ etumbu 'da lɛ. Lɛ kpa 'bako do sape. Lɛ ɔ nɛ wuko kɛ a do zɛlɛ kula, nɛ nde a do ngawi we ko nɛ bina ni.

⁴ Nwa ngɔ nù Asiri tumba gã wi ngɔ sodanɔ 'da a na, a tɛ hã a dã Gale, wele kpasi. Mi ala nu mi na, e kɔ NWA Gale 'da mɔ zele dɛlanɔ ni, nɛ a hã etumbu hã wi dã a. Mi aka mɔ na, mɔ sambala nwa we duzu tala owinɔ 'da a kɛ wa 'bana gɛ.”

⁵ Ezai nɛa we zele toe kɛ nwa Ezekiasi tumba hã ni,

⁶ nɛ a gese na: “NWA Gale tɔ́a na, mɔ tɛ dɛ̃ kili ogã wi ngɔ osoda Asiri kɛ a dã ɛ ni gɔ.

⁷ Ɛ dɛ sɛ na, mbe lɛnggɛ kpo le zala nwa ngɔ nù Asiri, nɛ a kulu ngɔ, nɛ a si dɛ ngɔ nùi 'da a. Kɔ a hɔ i mɔ, nɛ ɛ Gale ɛ dɛ sɛ 'bɔ na, wa gbɛ a.”

Sɛnakeribɛ tulu 'bɔ Owi Yeruzalɛmɛ

⁸ Gã wi ngɔ osoda Asiri zila na, nwa ngɔ nù Asiri kulu ngɔ Lakisi, hã a la dɛ Libna we bi ma. Nɛ gã wi ni nɛa, nɛ a kpa a dɛ Libna ni.

⁹ Do fala ni, nɛ wa tɔ̃ hã nwa ngɔ nù Asiri na, Tiraka, wi Etiopi, kɛ a a nwa ngɔ nù Ezipeto ni, a kulu ngɔ do osodanɔ 'da a we bi a. Kɔ nwa ngɔ nù Asiri nɛa we zele ni, nɛ a tombo mbɛti hã Ezekiasi,

¹⁰ nwa ngɔ nù Yuda na: “Mɔ dɛ́ gã zu, nɛ mɔ tɔ̃ na, Gale kɛ mɔ gbini zã mɔ do a ni, a amba sɛ mi na, mi tɛ bà le Yeruzalɛmɛ gɔ. Nɛ nde mɔ tɛ mbɔ̀kɔ̀ li mɔ gɔ, a ɔkɔlɔ mɔ iko.

¹¹ Mɔ zèlè tɛlɛ tɛ kɛ onwa ngɔ nù Asiri wa bi zi ogele nùnɔ, nɛ wa 'danga ma ni gɔ nde? Kɔ mɔ lengge na, wa bá sɛ nùi 'da nɛ gɔ nde?

¹² Oyaa mi wa 'danga zi le Gozanɛ, Haranɛ do Rɛsɛfɛ, nɛ wa bi zi Telasarɛ, gã le 'da Oedeni, nɛ wa 'danga ma. Nɛ nde galenɔ kɔ lenɔ ni, wa kpàsà zi owinɔ 'da wa gɔ.

¹³ Nɛ mɔ lénggé 'bɔ do mɛ ma dɛa zi onwa ngɔ nù Hamatɛ, Arpadɛ, Sɛfarvaimɛ, Hena do Ava ni. Onwanɔ ni wa sɔɛ gɛ a do nde?”

Nwa Ezekiasi sambala Gale

¹⁴ Nwa Ezekiasi ba mbɛti kɛ Owi to Asiri wa tɛa nɛ hã a ni, nɛ a tɔlɔ ma. 'Do nɛ, nɛ a ba mbɛti ni dɛ kɔ̃ a, nɛ a nɛ do ma kɔ tɔa Tɛmpɛlo i, nɛ a be ma hã NWA Gale.

¹⁵ Nɛ a sambala na: “Aa NWA Gale 'da lɛ obe Israɛlɛ, mɔ a mɔ dɛa li nza do nù. Nɛ mɔ dungu ngɔ kpongbo nwa 'da mɔ, ngɔ okerubinɛnɔ. Nɛ mɔ zu mɔ kpo a Gale, nwa ngɔ lenɔ ngɔ nù gɛ vɛ̃.

¹⁶ Aa NWA, mi aka mɔ na, mɔ ká mɔ, hã mɔ zɔ mɛnɔ ma la do lɛ gɛ. Nɛ mɔ zélé 'bɔ dɛlanɔ vɛ̃ kɛ owi nɛ tonɔ 'da Sɛnakeribɛ, wa dã do mɔ Gale, wele kpasi ni.

¹⁷ Aa nwa, lɛ ĩ na, onwa ngɔ nù Asiri wa bi zi ogele winɔ, nɛ wa gbɛ wa, nɛ wa 'danga lenɔ 'da wa.

¹⁸ Wa dɔa galenɔ 'da owinɔ ni, nɛ wa bɛlɛ, we kɛ wa a ngbongbo gale gɔ. Wa tati a okpikima kɛ wele wa sɛa ma do te, tabi wa dɛa do ta iko ni.

¹⁹ Nɛ nde nganga ni, mi aka mɔ NWA Gale 'da lɛ na, mɔ kpásá lɛ ti kɔ̃ Sɛnakeribɛ do'do. Mɔ dɛ́ na mɛ ni, nɛ owinɔ ngo nù gɛ vɛ̃ wa ĩ sɛ na, mɔ NWA, mɔ zu mɔ kpo a ngbongbo Gale.”

Ezai tumba to hã nwa Ezekiasi

²⁰ Ezai, be 'da Amɔtisi tumba to hã Ezekiasi, we tɔ̃ tɛlɛ tɛ kɛ NWA Gale 'da obe Israɛlɛ, gisa do nu sambala 'da a dɛ ngɔ Sɛnakeribɛ ni.

²¹ A tumba olo nu NWA Gale na: “Owi Yeruzalɛmɛ wa mɔmɔ mɔ Sɛnakeribɛ gbɔlɔ gbɔlɔ, nɛ wa zɔ mɔ li wa ɔ nɛ yia wi ni.

²² Wi kɛ mɔ dã a, nɛ mɔ nɔ̃lɔ̃ zã a ni, wi a wio nde? Wi kɛ mɔ dɛ gã zui hã a, nɛ mɔ bɛ̃ we dɔnggɔ a ni, wi a wio nde? Wi a mi NWA Gale santo 'da obe Israɛlɛ.

²³ Mɔ tumba owi dɛa tonɔ 'da mɔ we dã mi NWA. Mɔ tɔ̃a na, mɔ Sɛnakeribɛ, mɔ kũ gbaa zu ongala kalanɔ tɛ Libanɛ, do ogili ngilingilinɔ 'da mɔ, nɛ mɔ gɔmɔ ogba dia te sɛdrɛnɔ do odu te siprɛnɔ i mɔ ni, nɛ mɔ si do ma. Nɛ mɔ le sɛ 'bɔ gbaa, nɛ zu mɔ kpa kɔ̃ tũ kɔlanɔ i mɔ ni vɛ̃.

²⁴ Nɛ mɔ tɔ̃ 'bɔ na, mɔ zã o'de mɔ mɔ, nɛ mɔ nɔ lì kɔ 'de 'da ogele winɔ. Nɛ mɔ tɔ̃ na, mɔ le sɛ ngɔ nù Ezipeto, nɛ mɔ dɛ sɛ na, osodanɔ 'da mɔ wa ma ogbakɔ̃ lì Nilɛ do nyanga wa, nɛ ma ɔ̃sɔ̃ vɛ̃.

²⁵ “Nɛ nde mɔ Sɛnakeribɛ, mɔ ĩ̀ na, mɛnɔ ma dɛ tɛ̃ ɛ ni, wi a mi NWA hã mi 'dafa zi ma belee ni gɔ nde? Mɛnɔ kɛ mi 'dafa zi ma ni, ma kɛ mi dɛ ma ngangga gɛ. Mi hã ngawi hã mɔ, nɛ mɔ bi lenɔ kɛ gba ngbo zĩ ma takpa ni, nɛ mɔ gbini ma dɛ nù.

²⁶ Owi kɔ lenɔ ni wa mbɔka, nɛ wa kpa gã sape, nɛ wa tana kili. Wa ɔ nɛ owɔkɔsɔ kɔ fɔ, tabi owɔkɔsɔ kɛ ma hɔ ngɔ tɔa, nɛ ma 'bana do bɔlɔ nɛ, nɛ ma kolo ni.

²⁷ “Nɛ nde mi ĩ ti mɔ de wena. Mi ĩ ti mɛnɔ mɔ dɛ ma ni, do li wala mɔ ba nɛ ni. Mi ĩ ti tɛlɛ tɛ kɛ zã mɔ nɔ̃lɔ̃ dɛ tɛ mi ni.

²⁸ Mɔ dɛa dã dɛ tɛ mi, nɛ mɔ dã mi, nɛ mi zila. We duzu ma, mi gbo sɛ zɔ̃ mɔ ɔ nɛ kɛ wa gbo do zɔ̃ dã sa'de ni, nɛ mi yulu te kɔ nɛ, nɛ mi kpo fɛlɛ tɛ nɛ, nɛ wa gbɔtɔ mɔ si do mɔ. Mi gese sɛ mɔ dɛ ngɔ nùi 'da mɔ do kpo li wala mɔ tɛa zi do ma ni.”

²⁹ Nɛ Ezai bia 'bɔ tɛlɛ tɛ mɛnɔ kɛ ma la sɛ ni hã Ezekiasi. A na: “Sabɛlɛ gɛ do kɛ 'do gɛ, nɛ mí sɛ kpalɛ gɔ. Ble ma hɔ sɛ do tɛ̃ ɛ iko, nɛ nɛ nyɔngɔ sɛ ma. Nɛ nde sabɛlɛ 'do ki ni, nɛ nɛ mi sɛ oblenɔ 'da nɛ, nɛ nɛ kala ma. Nɛ nɛ 'dafa sɛ ti vinɔnɔ 'da nɛ, nɛ nɛ nɔ dɔ̃ nɛ.

³⁰ Nɛ tala nɛ Oyudanɔ kɛ nɛ 'bana sɛ nza ni, nɛ dɔ sɛ wena. Nɛ ɔ sɛ nɛ te kɛ hã nɛ ba nù, nɛ ma wala wena ni.

³¹ Tala Owi Yeruzalɛmɛ, tɛ ngɔ kala Sioni, wa sanza sɛ, nɛ wa dɛlɛ sɛ wena. Mba gɔ, nwa do hɛ̃lɛ̃ we dɛ mɛ a 'dafa ni.”

³² Nɛ NWA Gale tɔ̃a 'bɔ lɛnggɛ gɛ hã Ezai dɛ ngɔ nwa ngɔ nù Asiri na: “A lé sɛ kɔ le Yeruzalɛmɛ gɔ, nɛ a dá sɛ okpili dɛ kɔ nɛ gɔ. Osodanɔ 'da a wa kálá sɛ Ongele dɛ kɔ̃ wa we bi le ni gɔ, nɛ wa dɛ́ sɛ 'dingba kɛ zã gba ngbo nu le ni, we kũ do ngɔ nɛ gɔ.

³³ Nwa ngɔ nù Asiri a si sɛ do kpo kpo li wala a tɛa zi do ma ni, nɛ nde a lé sɛ Yeruzalɛmɛ gɔ. Mi nwa, mi tɔ̃a ni.

³⁴ Mi zɔ sɛ mɔ tɛ le Yeruzalɛmɛ, nɛ mi kpasa sɛ Owi kɔ nɛ, we be dɔ̃lɔ̃ li 'da mi, do we lengge Davidi, wi toe 'da mi.”

Oasiri wa si

³⁵ Do tũi 'do ki ni, nɛ anzɛ 'da nwa nɛa tɛ fala ɔi 'da osoda Asiri, nɛ a gbɛ wa koto kama do 'bu wa ngbɛ'dɛ'dɛ ngɔ wa mɔlɔ. Nɛ fala sa titole, nɛ Owi Yeruzalɛmɛ wa kulu ngɔ, nɛ wa gbanga wɔlɔ owinɔ ni vɛ̃ do li wa.

³⁶ Nɛ nwa Sɛnakeribɛ ba nu a, nɛ wa kala mɛnɔ 'da wa, nɛ wa si nɛ dɛ Ninivɛ, gã le ngɔ nùi 'da wa Asiri.

³⁷ Wa hɔa i mɔ, nɛ mbe tũ kpo, nɛ Sɛnakeribɛ nɛa kɔ Tɛmpɛloe 'da gale 'da a Nisrɔkɛ, we sambala a. Nɛ ombe bulu benɔ 'da a bɔa, li wa a Adramelɛkɛ do Sarɛsɛrɛ, wa nɛa, nɛ wa dumu a do du kɔya, nɛ wa gbɛa a, nɛ wa yu dɛ ngɔ nù Araratɛ. Nɛ mbe kɔ obulu benɔ 'da a kpo, li a a Asaradoni, a dungu nwa olo a.