2 Onwanɔ 18 - WE NU GALE 1995

Ezekiasi hɔa nwa ngɔ nu Yuda

¹ Oze, be 'da Ela ɔa tɛ to nwa ngɔ nù Israɛlɛ sabɛlɛ talɛ, nɛ Ezekiasi, be 'da Ahazɛ hɔ nwa ngɔ nù Yuda.

² A hɔa nwa, nɛ nde a do sabɛlɛ 'bu nɛ bɔa ngɔ nɛ mɔlɔ, nɛ a dɛa to nwa 'da a kɔ le Yeruzalɛmɛ 'do 'bu sabɛlɛ bɔa ngɔ nɛ kusi. Lì naa a a Abi, nɛ a zi a be 'da Zakaria.

³ Ezekiasi dɛa zi mɔ kɛ ma dia tɛ NWA kpasaa ɔ nɛ kɛ yaa a Davidi dɛa zi ni.

⁴ Ezekiasi 'danga zi fala wa 'dafa we dɔnggɔ do ogalenɔ, nɛ a gbini otanɔ kɛ wa ndɛngɛlɛ zi ma dɛ ngɔ ngbɛ ɛ ni, nɛ a 'bili sanga okpikima Asera, nɛ a gbini 'bɔ sanga hi gɔ̃ɛ kɛ Mɔizɛ dula zi ma do tũ mɔ bole ni. Mba gɔ, Oisraɛlɛ wa dɔ zi fũ yɔmbɔ we dɔnggɔ do gɔ̃ɛ ni dɔa fai gbaa, we hɔ ngba soe 'da Ezekiasi, nɛ wa sa zi li gɔ̃ɛ ni na Nɛhustanɛ.

⁵ Ezekiasi gbini zi zã a do NWA Gale 'da obe Israɛlɛ nɛa ngɔ tala Onwanɔ wa dungu zi nwa ngɔ nù Yuda dati hã a, do Onwanɔ wa dungu dɛ olo a ni vɛ̃.

⁶ Ezekiasi ba zi tɛ̃ a vɛ̃ hã NWA, nɛ a bɛ̃̀ mbe we nu NWA fala kpo gɔ. A dɛa zi mbulanɔ vɛ̃ kɛ NWA hã zi ma hã Mɔizɛ ni.

⁷ Nɛ NWA zi fala nɛ kpo do a. Ma hã mɛnɔ a dɛ zi ni, ma Sɔkpɔ zi vɛ̃ do dia nɛ. Ezekiasi dɛa zi nga zu hã nwa ngɔ nù Asiri, nɛ a bɛ̃ we dɛ 'bɔ mbulanɔ 'da a.

⁸ Dɛ ngɔ nɛ, a bi zi Ofilisti, nɛ a ndaka wa gbaa, nɛ a a wa kɛ zã le Gaza, nɛ a kala lenɔ olo wa ni vɛ̃. Lenɔ a kala zi ni a gã lenɔ kɛ gba ngboe zĩ ma takpa ni, do be lenɔ.

⁹ Ma hɔa tɛ nalɛ sabɛlɛ dɛa toe 'da Ezekiasi nwa ngɔ nù Yuda, kɛ mɛ a sambo sabɛlɛ dɛa toe 'da Oze, nwa ngɔ nù Israɛlɛ, nɛ Salmanazarɛ, nwa ngɔ nù Asiri, nɛa zi ngɔ nù Israɛlɛ do osodanɔ 'da a, nɛ a linggi le Samaria.

¹⁰ A linggi zi le gbaa 'do sabɛlɛ talɛ, nɛ kɔ talɛ sabɛlɛ ni, nɛ Salmanazarɛ ba le. A nɛa we ba le, nɛ nde Ezekiasi dɛa zi to nwa 'da a sabɛlɛ gazɛlɛ, nɛ Oze dɛa sabɛlɛ kusi ia.

¹¹ Nwa ngɔ nù Asiri kala Oisraɛlɛ, nɛ a tombo wa kɔlɔ 'duli. A a ombe ngɔ nù Hala, nɛ a a ombe kɛ zã nu lì Habɔrɛ tɛ ngɔ nù Gozanɛ, nɛ a a tala ombe tɛ kɔ lenɔ ngɔ nù Medi.

¹² Mɛnɔ ni vɛ̃ ma dɛa tɛ̃ ɛ, we kɛ Oisraɛlɛ wa zèlè zi nu NWA Gale 'da wa gɔ. Nɛ wa 'danga gba tɔkɛ kɛ a gba zi do wa ni, nɛ wa bɛ̃ 'bɔ gɛnɛ dɛ mbulanɔ kɛ Mɔizɛ, wi dɛa to 'da Gale hã zi ma hã wa ni.

Oasiri wa bi nù Yuda

¹³ Ezekiasi, nwa ngɔ nù Yuda, dɛa zi to nwa 'da a sabɛlɛ 'bu ngɔ nɛ nalɛ, nɛ Sɛnakeribɛ, nwa ngɔ nù Asiri nɛa, nɛ a bi lenɔ 'da Oyuda kɛ gba ngboe zĩ ma takpa ni, nɛ a kala ma vɛ̃.

¹⁴ Ezekiasi nɛa we zɔ ní, nɛ a tombo to hã Sɛnakeribɛ kɛ a ɔ zi tɛ Lakisi ni na: “Mi dɛ̃ de gɔ. Kɔ mɔ kɔ̃, nɛ mɔ ɔmɔ tɛ bi lɛ, nɛ mi hã sɛ mbili kɛ mɔ aka we nɛ ni hã mɔ vɛ̃.” Nwa Sɛnakeribɛ nɛa we zele ni, nɛ a gese hã Ezekiasi na, a tombo fɛ̃a mɔ bolo kilo koto 'bu, do mɔ mbali kilo koto kpo hã ɛ.

¹⁵ Nɛ Ezekiasi kala fɛ̃a mɔ bole kɛ ma zi kɔ tɔa Tɛmpɛloe, do kɛ kɔ 'bili tɔa usu do kpamɛnɔ 'da nwa ni vɛ̃, nɛ a tombo nɛ hã a.

¹⁶ Nɛ a gbini ogbangga nu tɔa Tɛmpɛloe, nɛ a ɛ̃lɛ̃ mɔ mbali kɛ wa nãlã zi ma tɛ nɛ ni, nɛ a tombo do nɛ hã nwa Sɛnakeribɛ.

Lɛnggɛ 'da mbe gã wi ngɔ sodanɔ 'da Sɛnakeribɛ

¹⁷ Nwa ngɔ nù Asiri 'bana dɛ kɔ le Lakisi i, nɛ a tombo mbe gã wi ngɔ osodanɔ 'da a talɛ hã nwa Ezekiasi dɛ Yeruzalɛmɛ i. Gã wi ni kulu ngɔ do gba gili osoda, nɛ wa la do li wala 'da Owi Fɔlɔ Tulunɔ, nɛ wa 'bɔ dɛ kɛ zã wala lì wa gba ma yolo tɛ ndɔnɔ si ngɔ i ni.

¹⁸ 'Do nɛ, nɛ wa aka we wele we do nwa. Nɛ nwa tumba obe Yuda talɛ kɛ wa dɛ toe kɔ tɔa 'da a ni we kpa ngba wa do wa. Wi zi a Eliakimɛ, gã wi ngɔ Owi dɛa tonɔ kɔ tɔa 'da nwa, a a be 'da Hilkia, do Sɛbna, wi kɔmɔ mbɛti 'da nwa, do Yoa, gã wi nɛ toe 'da nwa, nɛ a a be 'da Asafɛ.

¹⁹ Wa hɔa, nɛ gã wi ngɔ osoda Asiri kpo tɔ̃ hã wa na, wa nɛ́ hã wa tɔ̃ toe 'da gã nwa ngɔ nù Asiri hã nwa Ezekiasi na: “Mi kɔ̃a we ĩ gulu kɛ mɔ dɛ́ kili mi gɔɛ ni.

²⁰ Mɔ lengge na, wila we nu mɔ wia tɛ nɛ ngɔ osoda do ngawi, we bi bolo olo wa nde? Mɔ bɛ̃a we nu mi, nwa ngɔ nù Asiri. Nɛ wi mɔ gbini zã mɔ do a, nɛ mɔ dɛ nga zu hã mi ni a wio nde?

²¹ Ngangga ni, mɔ gbini zã mɔ do Oezipeto, nɛ nde wa ɔ nɛ ka gole iko ni. Wele tɔndɔ ma do tɛ̃ ɛ, nɛ ma gbini, nɛ ma le kɔ̃ a surr. Mɔ zɔ́ mɛ kɛ nwa ngɔ nù Ezipeto dɛ do owinɔ vɛ̃, kɛ wa gbini zã wa do a gɛ a ni.”

²² Nɛ gã wi ngɔ osoda Asiri tɔ̃ 'bɔ na: “Mɔ tɔ̃ sɛ na, lo gbini zã lo do NWA Gale 'da lo. Nɛ nde mɔ, Ezekiasi, mɔ 'danga ogbagalanɔ do fala santonɔ wa 'dafa we dɔnggɔ do Gale ni do'do. Nɛ mɔ ba nu mɔ hã obe Yuda do owi Yeruzalɛmɛ na, wa dɔnggɔ Gale tati nɛ dɛ dati gbagala Yeruzalɛmɛ gɛ iko.

²³ Kɔ mi kɔ̃a we dɛ na do mɔ do zu li wele mi, nwa ngɔ nù Asiri. Mi wia sɔ we hã ombalata koto bɔa hã mɔ, nɛ nde mɔ do owi kũ ngɔ wa bina.

²⁴ Gɛnɛ kɔ be soda Asiri iko, nɛ nde mɔ wè tɛ bɛ̃ we hã a gɔ. Nɛ mɔ tɛ gbìnì zã mɔ do Oezipeto na, wa hã sɛ ongilingili do ombalata hã mɔ gɔ.

²⁵ Mɔ lengge na, nwa ngɔ nù Asiri bi le 'da nɛ, we ba ma, nɛ nde NWA Gale kɔ̃̀ gɔ nde? NWA Gale do tɛ̃ a ngboo hã a ba nu a hã nwa ngɔ nù Asiri na, a bi le 'da nɛ hã a 'danga ma.”

²⁶ Gã wi ngɔ osoda Asiri nɛa we da nu ɛ, nɛ Eliakimɛ, do Sɛbna do Yoa, wa tɔ̃ hã a na: “Mɔ kɔ̃́, nɛ mɔ tɔ̃ lɛnggɛ hã lɛ do nu aramenyɛ, nɛ lɛ zele sɛ ma. Mɔ tɛ tɔ̃̀ do nu hebre gɔ. Mba gɔ, mɔ tɔ̃ do hebre, nɛ ogili winɔ vɛ̃ wa kũ dɛ zu ngboe gɛ, wa zele sɛ.”

²⁷ Nɛ gã wi ngɔ osoda Asiri gese hã wa na: “Nɛ lengge na, nwa ngɔ nù Asiri tumba toe gɛ hã nɛ mba do nwa ngɔ nɛ iko nde? Toe gɛ ma zɔa tɛ mɛ 'bɔ owinɔ vɛ̃ kɛ wa kũ dɛ zu ngboe gɛ. Mba gɔ, 'da kala be sĩ, nɛ lɛ ba sɛ le 'da nɛ, nɛ nɛ do owinɔ gɛ, nɛ nyɔngɔ sɛ 'dɔlɔ go'do nɛ, nɛ nɛ nɔ sɛ ini go'do nɛ ngboo.”

²⁸ Nɛ gã wi ngɔ osoda Asiri kulu ngɔ, nɛ a he mɔ do hebre na: “Nɛ zélé toe kɛ nwa ngɔ nù Asiri tumba hã nɛ gɛ!

²⁹ A na, nɛ tɛ mbɔ̀kɔ̀ li nɛ, hã Ezekiasi ɔkɔlɔ nɛ gɔ. Mba gɔ, a wé sɛ we kpasa nɛ ti kɔ̃ mi gɔ.

³⁰ Nɛ tɛ zèlè bele kɛ a 'bili hã nɛ ni gɔ. Ezekiasi tɔ̃a hã nɛ na, nɛ gbini zã nɛ do NWA Gale, nɛ a kpasa sɛ nɛ ti kɔ̃ lɛ osoda Asiri, nɛ a dɛ sɛ na, lɛ tɛ bà le 'da nɛ gɔ. Nɛ nde nɛ tɛ kɔ̃̀ gɛnɛ lɛnggɛ 'da Ezekiasi gɔ.

³¹ Nɛ zélé tati a toe kɛ nwa ngɔ nù Asiri tumba hã nɛ na, nɛ hɔ nza kɔ le 'da nɛ, hã lɛ dɛ na do nɛ ni. Fala kɛ nɛ dɛ ni, nɛ wele do wele sanga nɛ gɛ, a nɔ sɛ dɔ̃ vinɔɛ kɛ a mi ma ni, nɛ a nyɔngɔ sɛ kpalɛ li fɔɛ 'da a, nɛ a nɔ sɛ lì kɔ 'de 'da a.

³² 'Do nɛ, nɛ nwa a si sɛ do nɛ dɛ ngɔ dia nù ɔ nɛ kɛ 'da nɛ gɛ. Nùi ni, ma do nɔ gɔlɔ, nɛ ma 'bɔ do ble wena we dɛ do mapa. Ma do wala te vinɔ wena we dɛ do dɔ̃, do wala te olivɛ we dɛ do nɔ. Na mɛ ni, nɛ hɔ i mɔ, nɛ nɛ kpasa sɛ de wena, olo li kɛ na nɛ fe dɛ dɛ ni. Kɔ nɛ tɛ kɔ̃̀ gɛnɛ lɛnggɛ 'da Ezekiasi gɔ. Mba gɔ, a ɔkɔlɔ nɛ na, NWA Gale kpasa sɛ nɛ, kɔ nɛ tɛ kɔ̃̀ gɔ.

³³ Nwa ngɔ nù Asiri kala zi lenɔ 'da ogele winɔ, nɛ galenɔ 'da wa wa àmbà zu wa gɔ.

³⁴ Ogalenɔ 'da owi Hamatɛ do Owi Arpadɛ wa a do nde? Nɛ wanɔ 'da Owi Sɛfarvaimɛ do Owi Hena, do Owi Ava wa a do nde? Gulu kɛ mbe gale kpo bɛ̃ zu le Samaria gɔ we ge nde?

³⁵ 'Da fala kɛ nwa ngɔ nù Asiri kala nùnɔ kɔ̃ ogele winɔ ni, nɛ gale mɔ́ wa kpo àmbà zu ma gɔ. Kɔ gulu kɛ nɛ lengge na, NWA Gale a amba sɛ zu le Yeruzalɛmɛ we ge nde?”

³⁶ Do 'da fala nɛ ni, nɛ Owi Yeruzalɛmɛ kɛ wa zi di ni ni vɛ̃, wa kpia nu wa, nɛ wele kpo gèsè we gɔ. Wa dɛa ɔ nɛ kɛ nwa Ezekiasi tɔ́a zi hã wa ni.

³⁷ Nɛ Eliakimɛ, do Sɛbna, do Yoa, wa ɛ̃a tulu tɛ wa, nɛ wa kpolo tɛ wa, nɛ wa gba olo nu gã wi ngɔ osoda Asiri hã nwa Ezekiasi.