2 Onwanɔ 17 - WE NU GALE 1995

Oze hɔa nwa ngɔ nù Israɛlɛ

¹ Ahazɛ ɔa tɛ to nwa 'da a ngɔ nù Yuda sabɛlɛ 'bu ngɔ nɛ bɔa, nɛ Oze, be 'da Ela hɔ nwa ngɔ nù Israɛlɛ. Nɛ a dɛa zi to nwa tɛ kɔ le Samaria 'do sabɛlɛ kusi.

² Oze dɛa zi 'bɔ mɔ kɛ ma dè tɛ nwa gɔ ni, nɛ nde a dɛ̀ ɔ nɛ kɛ 'da onwa ngɔ Oisraɛlɛ zi dati ni gɔ.

³ Nɛ Salmanazarɛ, nwa ngɔ nù Asiri nɛa, nɛ a bi Oze, nɛ a ba nùi, nɛ a e mbula ngɔ winɔ, nɛ a ba nu a na, sabɛlɛ kpo kpo, nɛ wa futa tako hã ɛ.

⁴ Nɛ 'do nɛ, nɛ Oze ba zã zu Salmanazarɛ, nɛ a tombo Owi to hã nwa ngɔ nù Ezipeto kɛ a ɔ tɛ kɔ le Saisi ni na, a gbaka ɛ. Oze tumba toe ni do'do, nɛ a bɛ̃ we futa tako hã Salmanazarɛ. Kɔ Salmanazarɛ nɛa we zɔ ni, nɛ a tombo, nɛ wa ba Oze, nɛ wa fi a bɔlɔkɔ.

⁵ 'Do nɛ, nɛ nwa Salmanazarɛ do osodanɔ 'da a wa tɛa we bi nù Israɛlɛ, nɛ wa linggi le Samaria, nɛ wa ɔ dɛ di ni 'do sabɛlɛ talɛ.

⁶ Nɛ do ndɔti sabɛlɛnɔ talɛ ni, nɛ a ba le. Mɛ ni dɛa zi tɛ̃ ɛ, nɛ nde Oze ɔa tɛ to nwa 'da a sabɛlɛ kusi ia. Nɛ nwa Salmanazarɛ kala Oisraɛlɛ, nɛ a tombo wa kɔlɔ 'duli tɛ ngɔ nù Asiri. A a ombe winɔ ngɔ nù Hala, nɛ a a ombe kɛ zã nu lì Habɔrɛ tɛ ngɔ nù Gozanɛ, nɛ a a tala wa tɛ kɔ lenɔ ngɔ nù Medi.

Gulu kɛ nù Israɛlɛ 'danga ni

⁷ Oisraɛlɛ wa kpa ngamɛ ni, we kɛ wa dɛa zi 'dã mɔ dɛ 'da NWA Gale 'da wa, kɛ a fua zi wa ti kɔ̃ nwa ngɔ nù Ezipeto, nɛ a dɛ na, wa hɔ nza ngɔ nùi ni, hã wa la ni. Mba gɔ, wa dɔnggɔ zi gale bɛlɛnɔ,

⁸ nɛ wa dɛ zi 'dã mɛnɔ olo Okanana, kɛ NWA ndaka zi wa, takɔ a hã nùi olo wa ni hã obe Israɛlɛ ni. Nɛ wa dɛa zi 'bɔ mbulanɔ kɛ onwa ngɔ nù Israɛlɛ wa ia ngɔ wa ni.

⁹ Wa dɛa zi 'dã mɔ kpi do kpi kɛ ma dè tɛ nwa gɔ ni. Wa dɛa zi fala dɔnggɔ do gale bɛlɛnɔ kpa do kɔ lenɔ vɛ̃. Yolo do kɔ be lenɔ gbaa we hɔ kɔ gã lenɔ, nɛ nde falanɔ ni zi boe.

¹⁰ Nɛ wa ndɛngɛlɛ zi ota dɛ ngɔ ngbɛ ɛ, nɛ wa zĩ okpikima gale Asera kpa do ngɔ kalanɔ, kɛ ote hã gɔlɔ ngɔ nɛ boe ni vɛ̃.

¹¹ Nɛ wa gbɛ 'bɔ osa'de we dɔnggɔ do ogalenɔ do falanɔ ni kpo kpo vɛ̃. Wa dɛa kpasaa ɔ nɛ kɛ 'da owinɔ zi dati wa, kɛ nwa ndaka wa ngɔ nùi 'da wa ni. Nɛ 'dã mɛnɔ kɛ wa dɛa ni, ma nɔ̃lɔ̃ zi zã nwa wena.

¹² Gɛnɛ kɔ nwa bɛ̃a zi na, wa tɛ dɔnggɔ okpikimanɔ gɔ, nɛ nde wa kɔ̃̀ zi we la fala dɔnggɔ ma gɔ.

¹³ NWA zɔa ní, nɛ a tombo owi gba olo nu a hã Oisraɛlɛ do Oyuda we mbese wa na, wa la fala 'dã dɛa mɔ tɛ wa, hã wa dɛ mbulanɔ kɛ ɛ Gale, ɛ hã zi ma hã oyaa wa, do kɛ ɛ hã 'bɔ ma hã wa do wala 'da Owi gba olo nu ɛ ni.

¹⁴ Gɛnɛ kɔ ní, nɛ nde wa kɔ̃̀ zi we zele nɛ gɔ. Zu wa nganda zi 'bɔ ɔ nɛ zu oyaa wa, kɛ wa gbìnì zi zã wa do NWA Gale 'da wa gɔɛ ni.

¹⁵ Wa bɛ̃a gɛnɛ mbulanɔ 'da Gale, do gba tɔkɛ kɛ a gba zi do oyaa wa ni. Nɛ wa kɔ̃ zi 'bɔ we zele we kɛ a tɔ̃ ma hã wa ni gɔ. Wa dɔnggɔ zi okpikima yala iko, nɛ wa ngboo ni, wa hɔa tɛ mɛ 'bɔ Owele yala. Nɛ gɛnɛ kɔ NWA ba nu a hã wa na, wa tɛ nɛ 'dɔkɔlɔ 'dã dɛa mɔ tɛ owinɔ kɛ zã wa ni gɔ, nɛ nde wa bɛ̃a.

¹⁶ Nɛ wa gbini mbulanɔ 'da NWA Gale 'da wa vɛ̃. Wa kala mɔ bolo, nɛ wa dolo obe ngɔmbɔ bɔa, nɛ wa sɛ kpikima gale Asera, nɛ wa gu nù ti osɔla, nɛ wa dɔnggɔ gale Bala.

¹⁷ Nɛ wa gbɛ bulu benɔ do boko benɔ 'da wa, nɛ wa dɔ wa we dɔnggɔ do gale bɛlɛnɔ. Nɛ wa nɛ 'da Owi dɛ sɔ̃ kpi do kpi, nɛ wa dɛa 'bɔ ogele 'dã mɔ kɛ ma 'danga tɛ NWA, nɛ wa nɔ̃lɔ̃ zã a wena.

¹⁸ NWA zɔa ní, nɛ a kɔ̃ zi 'bɔ we zɔ wa li a mbé nɛ gɔ. Nɛ a ndaka wa, nɛ a a wa gele fala, nɛ a la dɛ ngɔ nùi ni tati a nu kpala Yuda iko.

¹⁹ Nɛ nde Owi ngɔ nù Yuda wa gbini zi tɛ mɛ 'bɔ mbulanɔ 'da NWA Gale 'da wa. Nɛ wa kɔ̃a zi gɛnɛ dɛa mɔ olo Okanana, kɛ ma lia zi sanga Oisraɛlɛ ni.

²⁰ Gulu nɛ a NWA da kɔ̃ ɛ tɛ obe Israɛlɛ vɛ̃, nɛ a e wa dɛ kɔ̃ ogele winɔ na, wa 'danga mɛnɔ 'da wa, nɛ wa hã sape hã wa. Do ndɔti nɛ, nɛ a ndaka wa ngɔ li a, nɛ a a wa ndũu nyɛlɛ do a.

²¹ NWA nɛa we kɛ̃ sanga nù Israɛlɛ do nù Yuda, kɛ Davidi dungu zi nwa ngɔ nɛ ni do'do, nɛ Oisraɛlɛ wa saka Yeroboamɛ, be 'da Nɛbatɛ do nwa 'da wa. Ĩ na, Yeroboamɛ hã a dɛa zi na, Oisraɛlɛ wa bɛ̃ we zele mbula nu NWA, nɛ a tumba zi Oisraɛlɛ we dɛ 'dã mɔ.

²² Nɛ wa là zi fala dɛ 'dã mɛnɔ kɛ Yeroboamɛ dɛa zi ni gɔ.

²³ NWA zɔa ní gbaa, nɛ a ndaka wa ngɔ li a, nɛ a a wa ndũu nyɛlɛ do a, ɔ nɛ kɛ a mbisa zi wa do wala 'da Owi gba olo nu a ni. A dɛa zi na, Oasiri wa tɛ, nɛ wa kala Oisraɛlɛ ngɔ nùi 'da wa, nɛ wa tombo wa kɔlɔ 'duli tɛ Asiri, nɛ wa 'bana dɛ i mɔ fai.

Oasiri wa nɛa we ɔ ngɔ nù Samaria

²⁴ Nwa ngɔ nù Asiri kala Owi kɔ le Babilɔnɛ do Owi kɔ le Kuta, Ava, Hamatɛ do Sɛfarvaimɛ, nɛ a a wa tɛ kɔ lenɔ ngɔ nù Samaria takɔ wa ɔ dɛ fala olo Oisraɛlɛ kɛ a tumba wa kɔlɔ 'duli ni. Nɛ ogele winɔ ni, wa kala lenɔ 'da Oisraɛlɛ ni, nɛ wa dɛ tɔanɔ 'da wa dɛ di ni.

²⁵ Nɛ kɔ ɔi 'da wa di ni gbaa ni, wa dɔnggɔ NWA Gale gɔ. Gulu nɛ hã Gale tumba ogbɔgbɔ, nɛ wa gbɛ mbe sanga owinɔ ni.

²⁶ Nɛ Owele wa tombo to hã nwa ngɔ nù Asiri na, owinɔ kɛ a kala zi wa, nɛ a a wa ngɔ nù Samaria i ni, wa ĩ̀ ti dɛ sambala 'da gale ngɔ nùi i mɔ ni gɔ, kɔ gale ni tumba ogbɔgbɔ, kɔ wa tɛ gbɛ wa.

²⁷ Nwa nɛa we zele ni, nɛ a ba nu a na, wa ba mbe nganga kpo sanga onganganɔ kɛ wa kala zi wa, nɛ wa tumba wa kɔlɔ 'duli ni, hã wa gese a dɛ Samaria i, nɛ a ɔ dɛ di ni fai, we be tɛlɛ tɛ kɛ wa wia we sambala gale ni hã owinɔ.

²⁸ Ma kɛ mbe kpo sanga onganganɔ ni nɛa zi, nɛ a ɔ dɛ kɔ le Betɛlɛ ni, nɛ a ma ngɔ be tɛlɛ tɛ kɛ wa wia we sambala NWA Gale ni hã wa.

²⁹ Gɛnɛ kɔ na mɛ ni, nɛ nde owinɔ ni wa 'bana zi tɛ dolo okpikima galenɔ 'da wa, nɛ wa zĩ ma dɛ kɔ tɔa sambalanɔ kɛ Owi Samaria wa dɛa zi ma ni. Nu fɛlɛ kula kpo kpo dolo zi kpikima 'da a, nɛ a zĩ ma kɔ le kɛ a ɔ nɛ ni.

³⁰ Owinɔ kɛ wa yula zi kɔ le Babilɔnɛ ni, wa dula kpikima Sukɔtɛ-Bɛnɔtɛ, nɛ owi Kuta wa dolo kpikima Nɛrgalɛ, nɛ Owi Hamatɛ wa dolo kpikima Asima,

³¹ nɛ Owi Ava wa dolo kpikima Nibazɛ do Tartakɛ. Nɛ owi Sɛfarvaimɛ, wa gbɛa zi obenɔ 'da wa, nɛ wa dɔ wa do dɔnggamɔ hã Adramelɛkɛ do Anamelɛkɛ, kɛ wa zi a galenɔ 'da wa ni.

³² Nɛ kpo kpo owinɔ ni vɛ̃ wa dɛ zi kili NWA Gale 'da Oisraɛlɛ, nɛ wa dɔnggɔ 'bɔ a. Nɛ wa saka Owele dɛ kɔ wa ni na, wa hɔ nganga, nɛ wa hã dɔnggamɔ hã ogale bɛlɛnɔ kɔ tɔa sambala ngɔ kalanɔ i.

³³ Ĩ na, wa dɔnggɔ zi NWA Gale, nɛ wa tɛ dɔnggɔ 'bɔ ogale olo yaa wa, ɔ nɛ kɛ wa dɔnggɔ zi wa ngɔ nùnɔ wa yula nɛ ni.

³⁴ Nɛ obe zã wa wa 'bana tɛ dɛ ã dɛa mɔ olo yaa wa fai tia do sɔɛ gɛ. Wa dɔnggɔ NWA Gale do wala olo nɛ gɔ, nɛ wa dɛ́ 'bɔ mbulanɔ kɛ NWA Gale hã zi ma hã obe zã Yakɔbɔ, kɛ mbe 'bɔ li a a Israɛlɛ ni gɔ.

³⁵ NWA gba zi tɔkɔ do obe zã Yakɔbɔ, nɛ a ba nu a hã wa na: “Nɛ tɛ dɔnggɔ ogele gale gɔ, nɛ nɛ tɛ gù nù ti wa, nɛ nɛ dɛ to hã wa gɔ. Nɛ nɛ tɛ hã̀ dɔnggamɔ hã wa kpo gɔ.

³⁶ Nɛ dɔnggɔ sɛ tati a mi NWA Gale zu mi kpo. Mi a mi fua nɛ ngɔ nù Ezipeto do ngawi 'da mi kɛ ma nɛa ngɔ mɔ vɛ̃ ni. Nɛ wi kɛ nɛ gu sɛ nù ti a, nɛ nɛ hã dɔnggamɔ hã a ni sɛ tati a mi zu mi kpo.

³⁷ Nɛ tũ kpo kpo, nɛ dɛ sɛ mbulanɔ kɛ mi bia zi ma, nɛ mi kɔma zi hã nɛ ni vɛ̃. Nɛ nɛ dɛ zĩ na, nɛ tɛ dɔnggɔ ogele galenɔ gɔ.

³⁸ Tɛ nɛ tɛ èlè ngɔ gba tɔkɛ kɛ mi gba zi do nɛ ni gɔ. Mi dala 'bɔ nu mi hã nɛ na, nɛ tɛ dɔnggɔ ogele gale gɔ.

³⁹ Nɛ dɔnggɔ tati a mi NWA Gale 'da nɛ zu mi kpo, we kɛ wi a mi zu mi kpo hã mi wia we fo nɛ ti kɔ̃ Owi sɛnɛ nɛ vɛ̃.”

⁴⁰ Gɛnɛ kɔ wa zila ni vɛ̃, nɛ nde wa kɔ̃̀ zi we dɛ nɛ gɔ. Nɛ wa 'bana zi tɛ dɛ ã dɛa mɛnɔ olo oyaa wa ni fai.

⁴¹ Wa mba zi dɔnggɔ NWA Gale fala nɛ kpo do dɔnggɔ okpikimanɔ 'da wa. Nɛ obe zã wa wa 'bana tɛ dɛ na mɛ ni fai tia do sɔɛ gɛ.