2 Onwanɔ 16 - WE NU GALE 1995

Ahazɛ nwa ngɔ nù Yuda

¹ Peka, be 'da Rɛmalia ɔa tɛ to nwa 'da a ngɔ nù Israɛlɛ sabɛlɛ 'bu ngɔ nɛ sambo, nɛ Ahazɛ, be 'da Yotamɛ hɔ nwa ngɔ nù Yuda.

² A hɔa nwa, nɛ nde a do sabɛlɛ 'bu nɛ bɔa. Nɛ a dɛa to nwa 'da a tɛ Yeruzalɛmɛ 'do sabɛlɛ 'bu ngɔ nɛ gazɛlɛ. Ahazɛ dɛ̃ zi dia mɔ ɔ nɛ kɛ 'da yaa a Davidi ni gɔ. A dɛa zi mɔ kɛ ma dè tɛ NWA Gale 'da a gɔ ni.

³ A dɛa zi kpo kpo 'dã mɛ olo onwa ngɔ nù Israɛlɛ zi dati ni. Nɛ gã 'dã mɛ kɛ a dɛa ma ni, mɛ a kɛ a gbɛa bulu be 'da a ngboo, nɛ a hã a do dɔnggamɔ hã ogalenɔ 'da a. A dɛa ni, mba gɔ, we kɛ a zɔa zi ma kɔ̃ Okanana, kɛ nwa ndaka zi wa ngɔ nù 'da wa, nɛ a hã ma hã obe Israɛlɛ ni.

⁴ Nwa Ahazɛ gbɛa zi 'bɔ osa'de, nɛ a hã do dɔnggamɔ, nɛ a dɔ 'bɔ fũ yɔmbɔ tɛ fala wa 'dafa we dɔnggɔ do gale bɛlɛnɔ tɛ ngɔ kalanɔ kɛ ote hã gɔ̃lɔ̃ ngɔ nɛ boe ni.

⁵ Nɛ Rɛsinɛ, nwa ngɔ nù Siri, do Peka, nwa ngɔ nù Israɛlɛ, wa mba ngba wa, nɛ wa nɛ we bi Ahazɛ tɛ Yeruzalɛmɛ i. Wa hɔa i mɔ, nɛ wa linggi le, nɛ wa bi ma. Gɛnɛ kɔ na mɛ ni, nɛ nde wa nɛ̀ ngɔ Ahazɛ gɔ.

⁶ Do kpo ngba soe ni, nɛ Rɛsinɛ, nwa ngɔ nù Siri, bi le Elatɛ, nɛ a ba ma, nɛ a ndaka Oyuda kɛ wa ɔ kɔ le ni, nɛ a hã ma hã Oedɔmɛ, nɛ wa dɛa le 'da wa dɛ di ni. Nɛ wa 'bana dɛ kɔ le ni fai tia do sɔɛ gɛ.

^7-8 Nwa Ahazɛ nɛa we zɔ ni, nɛ a kala mɔ mbali do fɛ̃a mɔ bole kɛ wa a ma kɔ tɔa Tɛmpɛloe, do kɛnɔ wa a ma tɛ fala usu mbili kɔ tɔa 'da nwa i ni, nɛ a tombo do ma hã Teglatɛ-Falasarɛ, nwa ngɔ nù Asiri, nɛ a na: “Aa nwa, mi a be 'da mɔ. Mi ɔ nɛ wi dɛa to 'da mɔ ni. Mɔ zɔ́ nwa ngɔ nù Siri, do wele kɛ ngɔ Oisraɛlɛ wa bi mi. Kɔ mɔ kɔ, nɛ mɔ tɛ, hã mɔ kpasa mi ti kɔ wa.”

⁹ Nwa ngɔ nù Asiri nɛa we zele ni, nɛ a kɔ̃a gɛnɛ toe 'da Ahazɛ. Nɛ a kulu ngɔ, nɛ a nɛ, nɛ a bi le Damasi tɛ Siri, nɛ a ba ma. Nɛ a kala owinɔ kɔ le ni vɛ̃, nɛ a tombo wa kɔlɔ 'duli tɛ kɔ le Kirɛ. Nɛ a ba Rɛsinɛ, nwa ngɔ nù Siri, nɛ a gbɛ a.

¹⁰ 'Do nɛ, nɛ nwa Ahazɛ nɛ 'da nwa Teglatɛ-Falasarɛ tɛ Damasi i. A hɔa i mɔ, nɛ a zɔ gbagala kɛ wa dɛa ma dɛ di ni ni, nɛ a dɛ hi nɛ dɛ li nwá mbɛti, nɛ a we 'da du nɛ vɛ̃, nɛ a tombo ma hã nganga Uria tɛ Yeruzalɛmɛ i.

¹¹ Uria kpa ma, nɛ a ba, nɛ a zɔ ma, nɛ a dɛ mbé gbagala ɔ nɛ tɛlɛ tɛ kɛ nwa Ahazɛ tumba hi nɛ hã a ni. A dɛa mbé gbagala ni, nɛ ma e dati kɛ na Ahazɛ yolo Damasi i hã a si ni.

¹² Nɛ nwa nɛa we kpolo tɛ̃ a dɛ Yeruzalɛmɛ nga, nɛ a zɔ gbagala ni, nɛ a nɛ,

¹³ nɛ a do tɛ̃ a ngboo, a dɔ sa'de ngɔ nɛ, nɛ a mba do dɔnggamɔ fũ do dɔ̃ we dɔnggɔ do Gale. Nɛ a gbɛ 'bɔ sa'de we be dɛa na, nɛ a kpã tɔkɔ sa'de ni tɛ gbagala.

¹⁴ 'Do nɛ, nɛ nwa ba nu a na, wa fo gbagala kɛ wa dula do tũ mɔ bole, nɛ wa hã zi do dɔnggamɔ hã NWA Gale ni, hã wa e ma gele fala. A tɔ̃a ni mba gɔ, gbagala ni, ma zi dɛ tɛ nu tɔa Tɛmpɛloe, dɛ ngbala mbé gbagala do tɔa Tɛmpɛloe. Ahazɛ ba nu a na, wa fo ma di ni, kɔ wa e ma do 'do mbé gbagala do si gbãlã ngɔ.

¹⁵ Nɛ 'do nɛ, nɛ Ahazɛ ba 'bɔ nu a hã nganga Uria na: “Yolo sɔɛ gɛ, mɔ dɛ sɛ to 'da mɔ ngɔ gã mbé gbagala gɛ. Nɛ mɔ dɔ sɛ sa'de do titole kpo kpo, nɛ mɔ hã dɔnggamɔ fũ do gɛ̃a wese kpo kpo. Nɛ mɔ dɔ sa'de, nɛ mɔ hã dɔnggamɔ fũ we mi nwa. Nɛ mɔ dɔ 'bɔ sa'de, nɛ mɔ hã dɔnggamɔ fũ do dɔ̃ we owinɔ. Mɔ kpã sɛ tɔkɔ sa'denɔ ni vɛ̃ tɛ gbagala. Nɛ nde we duzu gbagala tũ mɔ bole ni, mɔ e sɛ ki ni hã mi na, mi zɔ do gulu mɛnɔ kɛ Gale kɔ̃a ni.”

¹⁶ Nɛ nganga Uria dɛa mɛnɔ vɛ̃ kɛ nwa Ahazɛ ba nu a hã a na, a dɛ ni.

¹⁷ Nɛ nwa Ahazɛ tombo 'bɔ na, wa 'bili sanga manzanza kɛ wa dula ma do tũ mɔ bolo, nɛ wa dɛa ma do ngilingilinɔ kɔ tɔa Tɛmpɛloe we a gba saninɔ ngɔ ma ni, nɛ wa fo gba saninɔ ni do'do. Nɛ kɔ tɔa Tɛmpɛloe ni, mbe mɔ kpo zi 'bɔ di ni boe, ma ɔ korr nɛ gba sani ni, nɛ wa dula zi ma do tũ mɔ bolo, nɛ wa e dɛ li 'do owili ngɔmbɔnɔ 'bu ngɔ wa bɔa. Nɛ nwa ba 'bɔ nu a na, wa fo ma di ni, hã wa e ma ngɔ mbe tanɔ dɛ bulu nù ni.

¹⁸ 'Do nɛ, nɛ nwa fua da kɛ wa dɛa zi ma kɔ ngbo tɔa Tɛmpɛloe na, owinɔ wa dungu ti nɛ do kɔ̃ tũ kpe tɛ wi ni. Nɛ a kpe 'bɔ nu ngboe kɛ nwa le do nɛ dɛ kɔ tɔa Tɛmpɛloe si dɛ nza nga ni. A dɛa zi na mɛ ni, takɔ ma de tɛ nwa ngɔ nù Asiri.

¹⁹ Tala mɛnɔ vɛ̃ kɛ Ahazɛ dɛa ni, wa kɔma ma kɔ 'buki li nɛ a: “Dɛa tonɔ 'da onwa ngɔ nù Yuda.”

²⁰ Ahazɛ fia, nɛ wa mi a ngɔ mabi'donggo 'da nu fɛlɛ wa tɛ kɔ Gba Ngbo nwa 'da Davidi. Nɛ be 'da a Ezekiasi dungu nwa olo a.