2 Onwanɔ 13 - WE NU GALE 1995

Yoakazɛ hɔa nwa ngɔ nù Israɛlɛ

¹ Yoasi, be 'da Ahazia, ɔa tɛ to nwa 'da a ngɔ nù Yuda sabɛlɛ 'bu nɛ bɔa ngɔ nɛ talɛ, nɛ Yoakazɛ, be 'da Yehu hɔ nwa ngɔ nù Israɛlɛ. Nɛ a ɔa tɛ to nwa 'da a tɛ kɔ le Samaria sabɛlɛ 'bu ngɔ nɛ sambo.

² Yoakazɛ dɛa zi mɔ kɛ ma dè tɛ nwa gɔ ni. A là fala dɛ 'dã mɛnɔ kɛ Yeroboamɛ, be 'da Nɛbatɛ dɛ zi ma, nɛ a tumba Oisraɛlɛ we dɛ 'dã mɛnɔ ni gɔ.

³ Nɛ sila NWA nɔ̃lɔ̃ dɛ tɛ Oisraɛlɛ, nɛ a ba wala hã Hazaɛlɛ, nwa ngɔ nù Siri, do be 'da a Bɛnɛ-Hadadɛ na, wa bi Oisraɛlɛ, nɛ wa e wa ti mbula 'da wa 'do nɛ nyɛlɛ.

⁴ Yoakazɛ nɛa we zɔ ni, nɛ a ala nu a hã NWA Gale, nɛ NWA zila sambala 'da a, tua kɛ a zɔa tɛlɛ tɛ kɛ nwa ngɔ nù Siri zɛlɛ do tɛ Oisraɛlɛ ni.

⁵ Nɛ a tombo mbe wi kpe dati Oisraɛlɛ, nɛ wi ni fua wa kɔ zɛlɛ tɛ ti kɔ̃ Osiri, nɛ nù Israɛlɛ kpa dungu fio ɔ nɛ kuti kɛ zi dati ni.

⁶ Gɛnɛ kɔ na mɛ ni, nɛ nde Oisraɛlɛ wa là fala dɛ 'dã mɛnɔ kɛ Yeroboamɛ do nu fɛlɛ kula 'da a wa dɛ zi ni gɔ. Wa tumba zi Oisraɛlɛ we dɛ 'dã mɔ. Wa fò zi kpikima gale Asera gɔ, wa la zi ma dɛ Samaria ni fai.

⁷ 'Do kɛ nwa Yoakazɛ bi zi do Osiri ni, nɛ osodanɔ 'da a wa 'bànà zi 'bɔ dɛlɛ gɔ. A 'bana zi do Owi kũ mbalata 'bu wa mɔlɔ, nɛ ngilingili 'bu, mba do gele osoda koto 'bu. Mba gɔ, nwa ngɔ nù Siri gbɛ zi wa wena, nɛ a ma zi wa ti nyanga a, ɔ nɛ kɛ wele ma do fumbɛlɛ li wala ni.

⁸ Tala mɛnɔ vɛ̃ kɛ Yoakazɛ dɛa ni, wa kɔma ma kɔ 'buki li nɛ a: “Dɛa tonɔ 'da onwa ngɔ nù Israɛlɛ.” Nɛ kɔ 'buki ni, wa tɔ̃a 'bɔ we mɛnɔ a dɛa ni vɛ̃, do kpã sila kɛ a zi do ma ni.

⁹ A fia do'do, nɛ wa mi a ngɔ mabi'donggo 'da nu fɛlɛ a kɔ le Samaria. Nɛ be 'da a Yoasi dungu nwa olo a.

Yoasi hɔa nwa ngɔ nù Israɛlɛ

¹⁰ Yoasi ɔa tɛ to nwa 'da a ngɔ nù Yuda sabɛlɛ 'bu nɛ talɛ ngɔ nɛ sambo, nɛ Yoasi be 'da Yoakazɛ, hɔ nwa ngɔ nù Israɛlɛ. Nɛ a ɔa tɛ to nwa 'da a tɛ kɔ le Samaria sabɛlɛ 'bu ngɔ nɛ gazɛlɛ.

¹¹ Yoasi dɛa zi mɔ kɛ ma dè tɛ nwa gɔ ni. A là fala dɛ 'dã mɛnɔ vɛ̃ kɛ Yeroboamɛ, be 'da Nɛbatɛ dɛ zi ma, nɛ a tumba Oisraɛlɛ we dɛ 'dã mɔ ni gɔ.

¹² Tala mɛnɔ vɛ̃ kɛ Yoasi dɛa ni, wa kɔma ma kɔ 'buki li nɛ a: “Dɛa tonɔ 'da onwa ngɔ nù Israɛlɛ.” Nɛ kɔ 'buki ni, wa tɔ̃a 'bɔ we mɛnɔ a dɛa ni vɛ̃, do kpã sila kɛ a zi do ma li bole kɛ a bi zi do Amasia, nwa ngɔ nù Yuda ni.

¹³ A fia do'do, nɛ wa mi a ngɔ mabi'donggo 'da onwa ngɔ nù Israɛlɛ, tɛ kɔ le Samaria. Nɛ be 'da a Yeroboamɛ dungu nwa olo a.

Elize fia

¹⁴ Elize tia do zɛlɛ fio. Nɛ Yoasi, nwa ngɔ nù Israɛlɛ zele we nɛ, nɛ a nɛ we zɔ a. A hɔa i mɔ, nɛ a bili dɛ ngɔ a, nɛ a 'be zu 'baka a, nɛ a ma ngɔ he ma, nɛ a na: “Aa baa mi, baa mi! Mɔ a ngawili kɔ̃ Israɛlɛ, mɔ hã zi ngawi hã Oisraɛlɛ nɛa ngɔ ngilingilinɔ, do owi kũ mbalatanɔ 'da mi vɛ̃!”

¹⁵ Nɛ Elize tɔ̃ hã a na: “Mɔ nɛ́, hã mɔ fa nzabele, nɛ mɔ kala do okpili, hã mɔ tɛ nɛ.” Nɛ nwa nɛa, nɛ a kala ma, nɛ a tɛ do nɛ.

^16-17 Nɛ Elize tɔ̃ hã a na: “Mɔ hũi li holo tɔa kɛ ma si 'biti gba wese ni.” Nɛ nwa hũi li hole ni, nɛ Elize tɔ̃ na: “Mɔ bá nzabele 'da mɔ hã mɔ mana ma!” Nɛ nwa ba nzabele 'dɛ ɛ dɛ kɔ̃ ɛ, nɛ Elize a kɔ̃ a ngɔ kɔ̃ nwa, nɛ a tɔ̃ na: “Mɔ dá!” Kɔ nwa nɛa we da kpili ni, nɛ Elize he mɔ na: “Kpili kɛ mɔ da ni, ma be na NWA sɛ fala nɛ kpo do mɔ kɔ bole kɛ mɔ bi sɛ do Osiri ni. Do ngbongbo nɛ, mɔ bi sɛ wa, nɛ mɔ nɛ sɛ ngɔ wa tɛ kɔ le Afɛkɛ, nɛ mɔ kumu sɛ wa vɛ̃.”

¹⁸ 'Do ki ni, nɛ Elize tɔ̃ hã nwa na, a kala tala Okpilinɔ ni, hã a zɛ ma do nù. Nɛ nwa kala, nɛ a zɛ do nù fala talɛ, nɛ a da kɔ̃ a.

¹⁹ Elize zɔa ni, nɛ zã a nɔ̃lɔ̃, nɛ a tɔ̃ na: “Gulu kɛ mɔ zɛ̀ ma fala mɔlɔ tabi gazɛlɛ gɔ we ge nde? Mɔ zɛ sɔ ní, sɛ nɛ mɔ nɛ sɔ ngɔ Osiri ngboo de. Nɛ nde mɔ nɛ sɛ ngɔ wa fala talɛ iko.”

²⁰ Elize fia, nɛ wa mi a. Sabɛlɛ kpo kpo, nɛ ngɔ gili Owi zũ ngɔ nù Moabɛ, wa le zi tɛ ngɔ nù Israɛlɛ.

²¹ Nɛ ngba soe kpo, nɛ Owele wa nɛ we mi fio, nɛ wa kpa ngba wa do Owi zunɔ ni. Kɔ Owi mi fie ni wa nɛa we zɔ owi zunɔ, nɛ wa da wɔlɛ dɛ kɔ zunu Elize ni, nɛ wa yu. Kɔ wɔlɔ wi ni nɛa we dĩ tɛ gbãlã Elize, nɛ fie tunu, nɛ a kulu ngɔ.

Oisraɛlɛ wa bi Osiri

²² Hazaɛlɛ, nwa ngɔ nù Siri zɛla zi tɛ Oisraɛlɛ kɔ sabɛlɛnɔ vɛ̃ kɛ Yoakazɛ zi a nwa ngɔ nù Israɛlɛ ni.

²³ Nɛ nde 'do nɛ, nɛ nwa Gale ĩ 'bako hã Oisraɛlɛ. A lingga gba tɔkɛ kɛ a gba zi do Abrahama, Izaka do Yakɔbɔ ni, nɛ a mbɔkɔ wa, nɛ a kɔ̃ zi we kumu wa gɔ. Nɛ ta zu a èlè 'bɔ ngɔ wa gɔ gbaa tia do sɔɛ gɛ.

²⁴ Nwa Hazaɛlɛ nɛa we fe nɛ, nɛ be 'da a Bɛnɛ-Hadadɛ dungu nwa olo a.

²⁵ Nɛ Yoasi, nwa ngɔ nù Israɛlɛ kulu ngɔ, nɛ a bi Bɛnɛ-Hadadɛ, nɛ a nɛ ngɔ a fala talɛ. Nɛ Yoasi kala lenɔ 'da Oisraɛlɛ, kɛ Hazaɛlɛ kala zi ma kɔ̃ nwa Yoakazɛ ni vɛ̃.