2 Onwanɔ 12 - WE NU GALE 1995

Yoasi hɔa nwa ngɔ nù Yuda

^1-2 Yehu dɛa to nwa 'da a ngɔ nù Israɛlɛ 'do sabɛlɛ sambo, nɛ Yoasi hɔ nwa ngɔ nù Yuda. Fala kɛ a hɔa nwa, nɛ nde a zi do sabɛlɛ sambo. Nɛ a dɛa zi to nwa 'da a 'bu sabɛlɛ nalɛ tɛ Yeruzalɛmɛ. Li naa a zi a Sibia, boko Bɛrseba.

³ Nɛ kɔ dungu nza 'da Yoasi vɛ̃, a dɛa mɔ kɛ ma dia tɛ NWA ni, we duzu kɛ nganga Yoyada dala zi a do dia dala wi ngboo.

⁴ Gɛnɛ kɔ na mɛ ni, nɛ nde a 'dàngà zi falanɔ kɛ wa 'dafa we dɔnggɔ do ogale bɛlɛnɔ ni gɔ. Nɛ winɔ wa 'bana zi tɛ gbɛ sa'de, do dɔ fũ yɔmbɔ dɛ di ni, we dɔnggɔ do ogale bɛlɛnɔ.

Yoasi 'dafa tɔa Tɛmpɛloe

⁵ Ngba soe kpo, nɛ Yoasi tɔ̃ hã onganganɔ na: “Nɛ mbá li mbilinɔ vɛ̃ kɛ winɔ wa tɛ do nɛ kɔ tɔa Tɛmpɛloe, we dɔnggɔ do Gale ni. Nɛ ngɛ́mɛ́ li mbili kɛ wa futa we gɔnɔ zu wa, do kɛ wa kpua mbulu nɛ, do mbili kɛ wa hã ma do kɔ sila wa iko ni.

⁶ Nganga kpo kpo a kala sɛ ma kɔ̃ winɔ kɛ a dɛ toe hã wa ni, nɛ a e ma we 'dafa do falanɔ kɛ ma 'danga tɛ tɔa Tɛmpɛloe ni.”

⁷ Yoasi ɔa tɛ to nwa sabɛlɛ 'bu nɛ bɔa ngɔ nɛ talɛ, nɛ nde onganganɔ wa dɛ̃ mɔ kpo we 'dafa falanɔ kɛ ma 'danga tɛ tɔa Tɛmpɛloe ni gɔ.

⁸ A zɔa na mɛ ni, nɛ a sa mɔ hã Yoyada mba do mbe onganganɔ, nɛ a aka wa na: “Gulu kɛ nɛ 'dàfà tɔa Tɛmpɛloe gɔ we ge nde? Yolo do sɔɛ gɛ, mi kɔ̃ 'bɔ na, nɛ 'be tɛ mbilinɔ kɛ winɔ wa tɛ do ma hã nɛ ni gɔ. Nɛ nde nɛ é ma, takɔ Owi dɛa tonɔ wa 'dafa do falanɔ kɛ ma 'danga tɛ tɔa Tɛmpɛloe ni.”

⁹ Nɛ onganganɔ wa kɔ̃a gɛnɛ nɛ. Nɛ wa kɔ̃a na lo kálá sɛ 'bɔ mbili kɔ̃ winɔ gɔ, nɛ lo lé sɛ kɔ dɛa to 'dafa tɔa Tɛmpɛloe gɔ.

¹⁰ Nɛ Yoyada kɛ a zi a nganga ni, a ba sanduku, nɛ a gbo holo ngɔ mɔ nu nɛ, nɛ a e ma dɛ kɛ zã gbagala do ngɔ ngawili kɔ̃, dɛ fala kɛ winɔ wa le nɛ dɛ kɔ Tɛmpɛlo i ni. Nɛ onganganɔ kɛ wa yolo we zɔ mɔ tɛ nu tɔa ni, wa ma ngɔ kala mbilinɔ kɛ owinɔ wa tɛ do ma we tɔa 'da nwa ni, nɛ wa ngɛmɛ ma dɛ kɔ sanduki ni.

¹¹ Kɔ fala kɛ wa zɔ na, mbili ma dɛla kɔ sanduki, nɛ wa mbese wi kɔmɔ mbɛtinɔ 'da nwa do gã nwa nganga na, wa tɛ we kala mbili, hã wa tɔlɔ ma.

¹² Kɔ wa tɔlɔ mbilinɔ ni do'do, nɛ wa kala ma hã onwa ngɔ Owi dɛ to tɔa Tɛmpɛloe. Nɛ owinɔ ni wa kala mbilinɔ, nɛ wa futa do owi 'dafa tɔa Tɛmpɛloe. Wi zi a Owi kabindanɔ,

¹³ do owi dɛ tɔanɔ, do Owi gba tanɔ. Nɛ wa kala zi 'bɔ mbili ni, nɛ wa oso do te do ta, takɔ wa 'dafa do falanɔ kɛ ma 'danga tɛ tɔa Tɛmpɛloe ni. Ni a mbili ni ma zi we oso do mɛnɔ vɛ̃ kɛ ma wia zi na, wa 'dafa do tɔa Tɛmpɛloe ni.

¹⁴ Nɛ nde wa wè zi we kala mbilinɔ ni we oso do osani, do omɔ bi do mwinda, do obila kpɔ do tɔkɔ sa'denɔ, do mɔtũlũ, tabi mbé gele mɔ kɛ wa dɛa ma do fɛ̃a mɔ bolo, tabi do mɔ mbali ni gɔ.

¹⁵ Wa hã zi mbilinɔ ni vɛ̃ hã onwa ngɔ wi dɛa tonɔ na, wa 'dafa do tɔa Tɛmpɛloe.

¹⁶ Kɔ wa hã ma hã wa do'do, nɛ nde wa áká 'bɔ wa ngɔ tala mbili kɛ wa futa do Owi dɛa tonɔ ni gɔ, we kɛ owinɔ ni wa a Owi bɔlɔ zu.

¹⁷ Nɛ we gele mbilinɔ kɛ winɔ wa hã zi ma olo li dɔnggamɛ kɛ ma wia na, wa hã sɔ ma hã Gale, takɔ a fo ku'da 'dã mɛ zu wa ni, wa á ma kɔ sanduki ni gɔ. Wele mbili ki ni zi a mɔ́ onganganɔ.

Tala sabɛlɛ dɛa to nwa 'da Yoasi

¹⁸ Do kɔ sabɛlɛnɔ ni, Hazaɛlɛ, nwa ngɔ nu Siri, nɛa do osodanɔ 'da a, nɛ a bi le Gatɛ, nɛ a ba ma. 'Do ki ni, nɛ a 'dafa 'bɔ tɛ̃ a we bi Yeruzalɛmɛ.

¹⁹ Fala kɛ nwa Yoasi nɛa we zele we nɛ, nɛ a ngɛmɛ li mɔ olo gã golenɔ vɛ̃, kɛ oyaa a nwa Yozafatɛ, do Yoramɛ do Ahazia, wa hã zi ma hã NWA Gale ni, nɛ a mba do kɛ a do tɛ̃ a a hã zi ma ni. Nɛ a kala 'bɔ mɔ mbalinɔ kɛ wa a zi ma kɔ 'bili tɔa usu do kpamɛ, kɔ tɔa Tɛmpɛloe ni, nɛ a mba li ma do kɛ kɔ tɔa nwa 'da a ni. A ngɛmɛ li mɛnɔ ni vɛ̃ do'do, nɛ a tombo ma hã nwa Hazaɛlɛ we gɛ̃ do sila a. Kɔ nwa Hazaɛlɛ nɛa we zɔ ni, nɛ a yapa linggamɔ zu a, nɛ a nɛ 'bɔ we bi le Yeruzalɛmɛ gɔ.

²⁰ Tala mɛnɔ vɛ̃ kɛ Yoasi dɛa ni, wa kɔma ma kɔ 'buki li nɛ a: “Dɛa tonɔ 'da onwa ngɔ nù Yuda.”

^21-22 Ombe gã wi ngɔ sodanɔ 'da Yoasi wa ba zã zu a, nɛ mbe Owele bɔa sanga wa ni, Yozabadɛ, be 'da Simeatɛ, do Yɛhɔzabadɛ, be 'da Sɔmɛrɛ, wa gbɛa zi Yoasi tɛ kɔ le Bɛtɛ-Milo, nɛ wa mi a ngɔ mabi'donggo 'da nu fɛlɛ a tɛ kɔ Gba Ngbo nwa 'da Davidi. A fia do'do, nɛ be 'da a Amasia dungu nwa olo a.