2 Onwanɔ 11 - WE NU GALE 1995

Atali hɔa nwa tɛ Yeruzalɛmɛ

¹ Atali, naa nwa Ahazia nɛa we zele na, be 'da a fia ni, nɛ a ba nu a na, wa gbɛ obe zã nwa Ahazia vɛ̃ do'do.

² Nɛ boko nya nwa Ahazia, li a a Yoseba, be 'da Yoramɛ nwa ngɔ nù Yuda nɛa we zɔ na mɛ ni, nɛ a ba Yoasi, be 'da nwa Ahazia do kɛ zã wa, nɛ a usu a kɔ mbe 'bili tɔa ɔi kɔ Tɛmpɛloe. A usu a i mɔ fala nɛ kpo do mbe wuko we dala a. Nɛ Atali ĩ̀ we nɛ gɔ.

³ Nɛ Yoseba usu be ni dɛ kɔ tɔa Tɛmpɛloe 'da nwa gbaa sabɛlɛ gazɛlɛ, do 'da kɛ Atali dungu zi nwa ngɔ nùi ni.

Yoasi hɔa nwa

⁴ Ma hɔa kɔ sambo sabɛlɛ dɛa to nwa 'da Atali, nɛ nganga Yoyada tombo hã ogã wi ngɔ osodanɔ, kɛ wa zɔ mɔ tɛ nwa, do tɛ tɔa 'da a ni na, wa tɛ dɛ kɔ tɔa Tɛmpɛlo nga sɛ. Wa hɔa, nɛ a ba zã zu we do wa, nɛ a tɔ̃ hã wa na, wa kana tɛ wa ngɔ we ni. Nɛ 'do ki ni, nɛ a be be 'da nwa Ahazia hã wa,

⁵ nɛ a ba nu a hã wa na: “Nɛ zɔ́ mɛ kɛ ma wia na nɛ dɛ ma ni, ma kɛ. Ma hɔ tɛ kɔ̃ tũ kpe tɛ wi, nɛ nɛ winɔ kɛ nɛ do dɛa to ngba soe nɛ ni, nɛ kɛ̃ sanga tɛ ngba nɛ talɛ. Nɛ kuti ngɔ gili sodanɔ wa zɔ mɔ tɛ tɔa 'da nwa,

⁶ nɛ bɔa ngɔ gili ombe wa yolo dɛ nu ngbo Surɛ, nɛ talɛ ngɔ gili wanɔ, wa yolo dɛ nu tɔa kɛ ma do 'do wanɔ wa zɔ mɔ tɛ tɔa 'da nwa ni. Na mɛ ni, nɛ ngɔ gili osodanɔ vɛ̃ talɛ ni, wa zɔ sɛ mɔ na, wele kpo tɛ lè kɔ ngbo Tɛmpɛloe gɔ.

⁷ Nɛ ngɔ gili osodanɔ bɔa kɛ wa do dɛa to kɔ̃ tũ kpe tɛ wi bina ni, wa yolo sɛ kɔ ngbo Tɛmpɛloe we zɔ mɔ tɛ nwa Yoasi.

⁸ Nɛ nɛ kala sɛ mɔ bi bole 'da nɛ dɛ kɔ̃ nɛ, nɛ nɛ linggi a, nɛ nɛ kã a falanɔ vɛ̃ kɛ a nɛ yɛnggɛ nɛ ni. Kɔ fala wele yamba kɔlɔ do a, nɛ nɛ gbɛ́ wi ni.”

⁹ Nɛ ogã wi ngɔ sodanɔ wa dɛa nɛ́ kɛ nganga Yoyada ba zi do nu a hã wa ni. Wa ngɛma li osodanɔ 'da wa, owanɔ kɛ wa do to kɔ̃ tũ kpe tɛ wi, do wanɔ kɛ wa do to kɔ̃ tũi ni bina ni, nɛ wa nɛ do wa 'da nganga Yoyada i.

¹⁰ Wa hɔa i mɔ, nɛ Yoyada kala osɛlɛnɔ do ongelenɔ zi olo nwa Davidi, kɛ wa a zi ma kɔ tɔa Tɛmpɛloe 'da NWA Gale ni, nɛ a kɛ̃ ma vɛ̃ hã ogã wi ngɔ sodanɔ.

¹¹ Nɛ osodanɔ wa nɛ, nɛ wa yolo dɛ nu tɔa Tɛmpɛloe, nɛ wa gbã korr dɛ dati nɛ ni, we zɔ mɔ tɛ nwa Yoasi. Nɛ nde lɔnggɔ fɛlɛ wa kpɔ nu ngbɛ ɛ kpɔa gɔ.

¹² 'Do ki ni, nɛ Yoyada nɛa, nɛ a kpa Yoasi, nɛ wa hɔ do a, nɛ a gu ndasa nwa zu a, nɛ a hã 'buku mbulanɔ hã a. A dɛa na mɛ ni do'do, nɛ a a nɔ zu a, nɛ a e a do nwa. Nɛ owinɔ vɛ̃ wa ma ngɔ zɛ kɔ̃ wa, nɛ wa he mɔ na: “E kɔ nwa 'bana nza fai!”

¹³ Atali nɛa we zele zɛ nu wi 'da owi zɔ mɔ tɛ nwa, mba do Owi kɔ lenɔ, nɛ a kulu ngɔ, nɛ a wɛlɛ tɛ̃ a dɛ 'da winɔ nu tɔa Tɛmpɛloe i.

¹⁴ Kɔ a nɛa we ka mɔ, nɛ a zɔ mbé nwa, nɛ nde a yula dɛ tɛ bɛlɛduma tɔa kɛ ma sakata nu tɔa Tɛmpɛloe, dɛ fala kɛ Onwanɔ wa yolo do nɛ fai ni. Nɛ ogã wi ngɔ sodanɔ do Owi dama mɔtũlũnɔ, wa yula dɛ kɛ zã a ni, nɛ owi dama mɔtũlũnɔ tɛ dama nɛ. Nɛ owinɔ vɛ̃ wa ma ngɔ zɛ nu wa do yangga. Kɔ Atali nɛa we zɔ ni, nɛ a ɛ̃ tulu tɛ̃ a, nɛ a he mɔ na: “Nɛ gbɛa mi ia! Nɛ gbɛa mi ia!”

¹⁵ Nɛ Yoyada ba nu a hã ogã wi ngɔ sodanɔ na, wa ba a sanga owinɔ, hã wa gbɔtɔ a dɛ nza i. Nɛ a tɔ̃ hã wa na: “Fala kɛ wele yamba kɔlɔ do a, nɛ nɛ gbɛ́ wi ni.” Yoyada dɛa zi ni, we duzu kɛ a kɔ̃̀ zi na, wa gbɛ a dɛ kɔ ngbo Tɛmpɛloe ni gɔ.

¹⁶ Nɛ ogã wi ngɔ sodanɔ wa ba Atali, nɛ wa la do a dɛ nu tɔa 'da nwa i. Wa nɛa we hɔ dɛ nu ngboe li nɛ a Ngbo 'da Ombalatanɔ ni, nɛ wa gbɛ a dɛ di ni.

¹⁷ 'Do nɛ, nɛ Yoyada dɛa na, nwa do owinɔ 'da a, wa gba tɔkɔ do NWA Gale, takɔ wa hɔ owinɔ 'da a fai. Nɛ a dɛa zi 'bɔ na, nwa gba tɔkɔ do owinɔ 'da a.

¹⁸ Wa dɛa ni do'do, nɛ owinɔ wa la dɛ fala kɛ tɔa sambala 'da Bala se'de ni, nɛ wa 'danga ma vɛ̃. Nɛ wa gbini 'bɔ sanga ogbagalanɔ do okpikimanɔ di ni ni. Nɛ wa ba Matanɛ, nganga 'da Bala, nɛ wa gbɛ a dɛ dati gbagalanɔ ni. 'Do nɛ, nɛ Yoyada a Owele na, wa zɔ mɔ tɛ Tɛmpɛloe 'da NWA Gale.

¹⁹ Nɛ a mba 'bɔ li ogã wi ngɔ sodanɔ, do owinɔ wa zɔ mɔ tɛ nwa do tɛ tɔa ni na, wa kã nwa dɛ nu tɔa 'da a i, nɛ tala owinɔ vɛ̃ wa kpia dɛ 'do wa ni. Wa hɔa i mɔ, nɛ wa le do nu ngboe kɛ Owi zɔ mɔ tɛ nwa wa 'bɔ dɛ se'de ni, nɛ Yoasi le, nɛ a dungu nù ngɔ kpongbo nwa.

²⁰ Nɛ owinɔ vɛ̃ wa ma ngɔ dɛ yangga. 'Do kɛ wa gbɛa zi Atali dɛ kɔ ngbo 'da nwa ni, nɛ le kpa gɛ̃a dungu.