2 Onwanɔ 10 - WE NU GALE 1995

Yehu gbɛa obe zã nwa Akabɛ

¹ Obe zã nwa Akabɛ tɛ kɔ le Samaria wa zi 'bu wa sambo. Nɛ ngba soe kpo, nɛ Yehu dɛa mbɛti, nɛ a tombo ma tɛ Samaria hã ogã winɔ, do okumu lenɔ, do owinɔ wa dala obe zã Akabɛ ni. Nɛ a kɔma kɔ mbɛti na:

² “Obe zã Akabɛ vɛ̃ wa ɔ kɔ le 'da nɛ, kɛ gba ngbo zi ma takpa. Nɛ nɛ do ngilingili, do mbalata, do omɔ bi bolo boe. Kɔ fala kɛ mbɛti mi tumba gɛ ma hɔ 'da nɛ i nde,

³ nɛ nɛ zɔ sanga obe zã Akabɛ, nɛ nɛ saka wele kɛ a wia ngboo do nwa ni, nɛ nɛ e a ngɔ kpongbo nwa olo baa a. Nɛ nɛ 'dafa tɛ nɛ we bi zu a, do zu nu fɛlɛ kula 'da a.”

⁴ Ogã wi ngɔ Samaria wa nɛa we tɔlɔ mbɛti ni, nɛ kili ba wa wena, nɛ wa tɔ̃ na: “Lɛ nɛ dɛ fala bi bolo do Yehu nɛ nde? Onwa bɔa wa bi zi do a zãa, tɔlɔ do lɛ gɛ nde?”

⁵ Nɛ ogã wi ngɔ tɔa 'da nwa, do ogã wi ngɔ sodanɔ kɔ le ni, do okumunɔ, do owi dala obe zã Akabɛ ni, wa tombo to hã Yehu na: “Lɛ gɛ a wi dɛa tonɔ 'da mɔ, lɛ kɔ̃a we dɛ vɛ̃ a olo nu mɔ. Nɛ nde lɛ sáká sɛ 'bɔ mbé nwa gɔ. Kɔ mɔ dɛ́ mɛ kɛ mɔ lingga we dɛ ma ni iko.”

⁶ Yehu nɛa we zele toe ni, nɛ a dɛ 'bɔ mbé mbɛti hã wa na: “Fala kɛ nɛ kɔ̃ we si 'do mi, we dɛ mbulanɔ 'da mi nde, nɛ nɛ 'bili gɛlɛ obe zã nwa Akabɛ vɛ̃, nɛ bindɛ do kpo kpo sa gɛ, nɛ nɛ tɛ sɛ do zu wa hã mi dɛ Yizreɛlɛ nga.” Owi dala obe zã nwa Akabɛ 'bu wa sambo ni, wa zi a ogã wi kɔ le Samaria.

⁷ Hã fala kɛ wa nɛa we kpa mbɛti 'da Yehu ni, nɛ wa kala obe zã nwa Akabɛ, nɛ wa 'bili gɛlɛ wa vɛ̃, nɛ wa ngɛmɛ zu wa dɛ kɔ ogã sanggi, nɛ wa tombo do nɛ hã Yehu dɛ Yizreɛlɛ i.

⁸ Yehu zila na, wa tɛa do zu obe zã Akabɛ ni, nɛ a ba nu a na, wa ngɛmɛ ma dɛ ngɔ ngbɛ ɛ do ngɔ gili nɛ bɔa, dɛ kɛ zã nu ngbo le, nɛ ma ɔ dɛ di ni gbaa bindɛ sɛ nɛ de.

⁹ Fala nɛa we sa titole belee, nɛ a la dɛ nu ngbo le i, nɛ a tɔ̃ hã owinɔ kɛ wa zi di ni ni na: “Wi a mi hã mi dɛa zi nga zu dɛ tɛ nwa Yoramɛ, nɛ mi gbɛ zi a. Nɛ nde we mɔ́ nɛ tɛ nɛ bina. Kɔ we duzu owinɔ gɛ, wi gbɛa wa a wio nde?

¹⁰ Nɛ ĩ na, fie kɛ wa fia gɛ ma be na, wenɔ vɛ̃ kɛ NWA tɔ́a zi dɛ ngɔ nu fɛlɛ Akabɛ ni, ma dɛa tɛ̃ ɛ. NWA Gale dɛa mɛnɔ vɛ̃ kɛ a tɔ́a zi we nɛ do wala 'da Elia, wi gba olo nu a ni.”

¹¹ A nɛa we da nu a tɛ we ni, nɛ a gbɛ tala nu fɛlɛ Akabɛ kɛ wa ɔ zi tɛ Yizreɛlɛ ni vɛ̃. Nɛ a gbɛ 'bɔ ogã winɔ zi ti a ni, do oyali ngba a, do onganganɔ 'da a vɛ̃, nɛ a là gbãlã wele kpo gɔ.

Yehu gbɛa mbe wi nanɔ 'da Ahazia

¹² 'Do nɛ, nɛ Yehu yolo Yizreɛlɛ, nɛ a la dɛ Samaria. A hɔa tɛ mbe fala kpo wa sa li nɛ na: “Fala 'da owi fɔmɔ onadalamɔ,”

¹³ nɛ a kpa ngba a do mbe Owi nanɔ 'da Ahazia, nwa ngɔ nù Yuda, nɛ a aka wa na: “Nɛ a owio nde?” Nɛ wa gese na: “Lɛ a Owi nanɔ 'da Ahazia, hã lɛ nɛ tɛ Yizreɛlɛ we zɔ Yezabɛlɛ, wuko 'da nwa, do ombe wi nanɔ 'da nwa.”

¹⁴ Yehu zila ni, nɛ a ba nu a na, owinɔ 'dɛ ɛ wa kala winɔ ni. Nɛ owinɔ 'da Yehu wa kala wa, nɛ wa gbɛ wa, nɛ wa da wɔlɔ wa kɔ mbe kɔ kpo dɛ di ni. Owinɔ ni zi vɛ̃ a Owele 'bu wa nalɛ ngɔ wa bɔa, nɛ a là zi gbãlã wele kpo sanga wa ni do tunu li a gɔ.

Yehu kpa ngba a do Yonadabɛ

¹⁵ Nɛ Yehu kulu ngɔ di ni, nɛ a la 'bɔ dɛ dati. A hɔa sanga wala i, nɛ a zɔ Yonadabɛ, be 'da Rekabɛ tɛ tɛ dɛ 'da a nga. Wa nɛa we kpa ngba wa, nɛ Yehu hã balɛ hã a, nɛ a aka a na: “Mɔ kɔa gɛnɛ mi nɛ kɛ mi kɔa do gɛnɛ mɔ ni nde?” Nɛ Yonadabɛ kɔ na: “Ĩi, mi kɔa gɛnɛ mɔ.” Nɛ Yehu na: “Ni a lɛ tó nu kɔ̃ ngba lɛ.” Nɛ wa tua nu kɔ̃ ngba wa. 'Do nɛ, nɛ Yehu na: “Mɔ kũ kɔ ngilingili 'da mi.” A kũ do'do, nɛ Yehu tɔ̃ hã a na:

¹⁶ “Mɔ kpé fala nɛ kpo do mi, nɛ mɔ zɔ sɛ tɛlɛ tɛ kɛ mi hã tɛ mi vɛ̃ we duzu NWA Gale ni.” Nɛ wa la do a dɛ Samaria.

¹⁷ Wa hɔa i mɔ, nɛ Yehu gbɛ tala onu fɛlɛ Akabɛ kɛ wa ɔ zi di ni ni, nɛ a kumu wa vɛ̃, ɔ nɛ kɛ NWA Gale tɔ̃a zi do wala 'da Elia, wi gba olo nu a ni.

Yehu gbɛa sambala 'da owi dɔnggɔ gale Bala

¹⁸ Yehu sa zi mɔ hã winɔ vɛ̃ kɛ wa ɔ kɔ le Samaria ni na, wa mba li ngba wa. Wa mba ngba wa do'do, nɛ a tɔ̃ hã wa na: “Nwa Akabɛ dɔnggɔ zi gale Bala. Nɛ nde mi dɔnggɔ sɛ 'bɔ a nɛ ngɔ ki ni.

¹⁹ Kɔ nɛ sá mɔ hã Owi gba olo nu gale Bala, do owinɔ kɛ wa dɔnggɔ a ni, do onganganɔ 'da a na, wa tɛ 'da mi nga sɛ. Nɛ dɔ wele kpo zɔ́lɔ́ gɔ, we kɛ mi nɛ hã gã dɔnggamɔ hã Bala. Kɔ wi kɛ a hɔ̀ gɔ, nɛ wa gbɛ sɛ a.” Wenɔ kɛ Yehu tɔ̃a ni, a dɛ zi 'dã hã, takɔ a gbɛ winɔ wa dɔnggɔ gale Bala ni vɛ̃.

²⁰ Ma hã a ba zi nu a na, wa sa mɔ we gã mba li ngba wi we dɔnggɔ Bala. Nɛ ma dɛa zi tɛ̃ ɛ na mɛ ni,

²¹ nɛ wa tombo to ngɔ nù Israɛlɛ vɛ̃, nɛ Owi dɔnggɔ gale Bala wa tɛa vɛ̃, wele kpo zɔlɔ gɔ. Wa hɔa, nɛ wa le vɛ̃ dɛ kɔ tɔa sambala 'da Bala, nɛ tɔa dunu ngurr.

²² Yehu zɔa ni, nɛ a ba nu a hã wi zɔ mɔ tɛ tulunɔ kɛ wa he'de we dɔnggɔ do Bala ni na, a kɛ̃ ma hã owinɔ kɔ tɔa ni vɛ̃.

²³ A kɛ̃a do'do, nɛ Yehu do tɛ̃ a ngboo fala nɛ kpo do Yonadabɛ, be 'da Rekabɛ, wa le kɔ tɔa sambala i. Nɛ Yehu tɔ̃ hã owinɔ 'da Bala na: “Nɛ zɔ́ na, dɔ wi mɔ́ NWA Gale kpo lé kɔ tɔa gɛ gɔ, nɛ nde winɔ wa le tati a owinɔ 'da Bala iko.”

²⁴ 'Do nɛ, nɛ Yehu do Yonadabɛ wa le we dɔ osa'de we dɔnggɔ do Bala. Mɛ ni, nɛ nde Yehu a sɔ osoda 'bu wa ngbɛ'dɛ'dɛ nu tɔa nza i ia, nɛ a tɔa hã wa na, ɛ e sɛ winɔ gɛ vɛ̃ dɛ tambala kɔ̃ nɛ. Kɔ fala kɛ mbe soda kpo ka mɔ tɛ wele iko, kɔ a yu, nɛ soda ni a fe sɛ olo li a.

²⁵ Yehu do Yonadabɛ wa hã odɔnggamɛnɔ ni vɛ̃ ia do'do, nɛ Yehu ba nu a hã osodanɔ do ogã wi ngɔ wa na: “Nɛ lé, hã nɛ gbɛ owinɔ gɛ vɛ̃, dɔ wele kpo hɔ́ nza do tunu li a gɔ.” Nɛ osodanɔ wa lia do mɔ bolonɔ 'da wa dɛ kɔ wa, nɛ wa gbɛ winɔ vɛ̃, nɛ wa da wɔlɔ wa nza. 'Do nɛ, nɛ wa le dɛ fala kɛ ma sa wena tɛ kɔ tɔa sambala 'da Bala ni,

²⁶ nɛ wa ba kpikima Asera, nɛ wa hɔ do ma dɛ nza i, nɛ wa fi we se'de, nɛ ma bɛlɛ.

²⁷ Nɛ wa gbini sanga ta kɛ wa zĩ ma we dɔnggɔ do Bala ni, nɛ wa gbini 'bɔ tɔa sambala ngboo ni, nɛ wa dɛ ma do tɔa sabele. Nɛ wa 'bana tɛ yu nza kɔ tɔa ni tia do sɔɛ gɛ.

²⁸ Yehu dɛa zi na mɛ ni, nɛ wa wè zi 'bɔ tɛ dɔnggɔ gale Bala ngɔ nù Israɛlɛ gɔ.

²⁹ Gɛnɛ kɔ ni, nɛ nde Yehu là zi fala dɛ kpo kpo 'dã mɛnɔ kɛ Yeroboamɛ, be 'da Nɛbatɛ dɛa zi, nɛ a tumba obe Israɛlɛ we dɛ 'dã mɔ ni gɔ. Wa dula kpikima obe ngɔmbɔ do mɔ mbali, nɛ a e ma kɔ le Betɛlɛ do Danɛ, nɛ wa dɔnggɔ zi ma ɔ nɛ ogale ni. Nɛ Yehu kɔ̃̀ zi we la fala mɛ ni gɔ.

³⁰ Ma kɛ NWA Gale tɔ́a hã Yehu na: “Mɔ dɛa do nu fɛlɛ Akabɛ ɔ nɛ kɛ mi kɔa ni. Mɔ dɛ de wena. Gulu nɛ a mi kpua mbulu hã mɔ na, obe zã mɔ wa dungu sɛ nwa olo mɔ gbaa, we hɔ ngɔ okanggadɔkɔ mɔ, sɛ nɛ de.”

³¹ Gɛnɛ kɔ ni, nɛ nde Yehu dɛ́ zi mbula 'da NWA Gale 'da obe Israɛlɛ do sila a vɛ̃ gɔ. Nɛ a là fala dɛ 'dã mɛnɔ kɛ Yeroboamɛ dɛa zi ma, nɛ a tumba Oisraɛlɛ we dɛ 'dã mɔ ni gɔ.

Yehu fia

³² Do kpo ngba soe ni, nɛ NWA Gale ma ngɔ yɛnggɛ kɔ 'bili tɛ nùi 'da obe Israɛlɛ. Nɛ a ba wala hã Hazaɛlɛ, nwa ngɔ nù Siri na, a bi obe Israɛlɛ, hã a nɛ ngɔ wa dɛ ngɔ nùi 'da wa ni.

³³ Nɛ Hazaɛlɛ bi wa, nɛ a ba 'bili tɛ nùi kulu lì Yɔrdanɛ, gbaa we hɔ tɛ le Arɔɛrɛ, kɛ ma ngɔ lì Arnoni, do si ba gɔtɔ. Fala ni zi a nù Galadɛ, do Basanɛ, kɛ nu kpala Rubɛnɛ, do Gadɛ do Manase, wa dɛa zi le 'da wa se'de ni.

³⁴ Tala mɛnɔ vɛ̃ kɛ Yehu dɛa ni, wa kɔma ma kɔ 'buki li nɛ a: “Dɛa tonɔ 'da onwa ngɔ nù Israɛlɛ.” Nɛ kɔ 'buki ni, wa tɔ̃a 'bɔ we mɛnɔ a dɛa ni vɛ̃, do kpã sila kɛ a zi do ma ni.

³⁵ Yehu ɔa zi kɔ le Samaria, tɛ dɛ to nwa ngɔ nù Israɛlɛ 'do 'bu sabɛlɛ bɔa ngɔ nɛ ngbɛ'dɛ'dɛ.

³⁶ Yehu fia, nɛ wa mi a kɔ le Samaria. Nɛ be 'da a Yoakazɛ dungu nwa olo a.