2 Onwanɔ 1 - WE NU GALE 1995

Gale hã etumbu hã nwa Ahazia

¹ Nwa Akabɛ nɛa we fe do'do, nɛ Omoabɛ wa bɛ̃ we ɔ ti mbula 'da Oisraɛlɛ.

² Mbe ngba soe kpo, nɛ Ahazia, nwa ngɔ nù Israɛlɛ yula ti mɔnggɔlɔ ba etazɛ 'da a tɛ Samaria, nɛ a te nù, nɛ a kpa dani wena. A nɛa we te nɛ, nɛ a tombo mbe Owi to na, wa nɛ hã wa aka Bala-Zɛbubɛ, gale kɔ le Ekroni na, ɛ kpasa sɛ tɛ dani ɛ kpa gɛ nde?

³ Nɛ anzɛ 'da nwa nɛa, nɛ a tɔ̃ hã Elia, wi Tisbe na: “Mɔ nɛ́ hã mɔ kpa Owi nɛ tonɔ 'da nwa tɛ Samaria, nɛ mɔ tɔ̃ hã wa na: ‘Gulu kɛ nɛ nɛ we aka Bala-Zɛbubɛ, gale kɔ le Ekroni we ge nde? Ní a nɛ lengge na, fo Gale ngɔ nù Israɛlɛ gɛ bina nde?’

⁴ Nɛ mɔ tɔ̃ 'bɔ hã nwa ngɔ nù Israɛlɛ na, NWA tɔ̃a hã a na, a kúlú sɛ 'bɔ ngɔ ngɔ te zɛlɛ 'da a gɔ, a fe sɛ!” Nɛ Elia nɛa, nɛ a dɛ mɛ kɛ nwa tɔ̃a we nɛ hã a ni.

⁵ Nɛ owi nɛ tonɔ wa zila we kɛ Elia tɔ̃a ni, nɛ wa kpolo tɛ wa. Kɔ wa hɔa, nɛ nwa aka wa na: “Gulu kɛ nɛ kpolo 'bɔ tɛ nɛ we ge nde?”

⁶ Nɛ wa gese na: “Mbe wele kpo kpa lɛ, nɛ a tɔ̃ hã lɛ na, lɛ si hã lɛ tɔ̃ hã mɔ na, NWA tɔ̃a na: ‘Gulu kɛ mɔ tumba Owele we aka Bala-Zɛbubɛ, gale kɔ le Ekroni we ge nde? Ní a mɔ lengge na, fo Gale ngɔ nù Israɛlɛ gɛ bina nde? Kɔ we duzu ma, mɔ kúlú sɛ 'bɔ ngɔ ngɔ te zɛlɛ 'da mɔ gɔ, mɔ fe sɛ!’ ”

⁷ Nɛ nwa Ahazia aka wa na: “Wi kɛ a kpa nɛ, nɛ a tumba nɛ do toe gɛ, tɛlɛ tɛ̃ a ɔ nɛ nde?”

⁸ Nɛ wa gese hã a na: “A hi'da tulu kɛ wa dɛa ma do sala samo, nɛ a kpua 'dɛ̃ 'dɛ tili a.” Nɛ Ahazia he mɔ na: “Wi ni sɛ a Elia, wi Tisbe a ni!”

⁹ Ma kɛ a tumba mbe wi ngɔ osodanɔ kpo, do osoda 'bu wa mɔlɔ we ba Elia. Wa nɛa, nɛ wa kũ dɛ ngɔ kala fala Elia dungu nɛ ni, nɛ wi ngɔ osodanɔ tɔ̃ hã a na: “Aa mɔ, wi gba olo nu Gale, nwa Ahazia ba nu ɛ na, mɔ zĩlĩ!”

¹⁰ Nɛ Elia gese hã a na: “Nɛ́ kɛ mi a wi gba olo nu Gale ni, ma wia na, nyɛa we yolo li nza i, hã ma zĩlĩ, hã ma bɛlɛ mɔ do osodanɔ 'da mɔ 'bu wa mɔlɔ gɛ, hã nɛ kumu!” Nɛ nyɛa we yolo li nza i do ti, nɛ ma zĩlĩ, nɛ ma bɛlɛ wi ngɔ sodanɔ, do osodanɔ 'da a 'bu wa mɔlɛ ni.

¹¹ Kɔ nwa Ahazia nɛa we zele ni, nɛ a tombo 'bɔ gele wi ngɔ osoda, do mbé osoda 'bu wa mɔlɔ we ba Elia. Nɛ wi ngɔ sodanɔ ni tɔ̃a hã Elia na: “Mɔ, wi gba olo nu Gale, nwa Ahazia ba nu ɛ na, mɔ zĩlĩ dɔ̃ dɔ̃!”

¹² Nɛ Elia gese na: “Nɛ́ kɛ mi a wi gba olo nu Gale ni, ma wia na, nyɛa we yolo li nza i, hã ma zĩlĩ, hã ma bɛlɛ mɔ do osodanɔ 'da mɔ 'bu wa mɔlɔ gɛ, hã nɛ kumu!” Nɛ yolo tɛ li nza i, nɛ Gale tumba nyɛa we do ti, nɛ ma zĩlĩ, nɛ ma bɛlɛ wi ngɔ sodanɔ, do sodanɔ 'da a 'bu wa mɔlɛ ni.

¹³ Fala talɛ kɛ, nɛ Ahazia tumba 'bɔ gele wi ngɔ osoda kpo, do osoda 'bu wa mɔlɔ. Owinɔ ni wa kũ dɛ ngɔ kala i, nɛ wa kpa Elia, nɛ wi ngɔ sodanɔ gu gba zugolo, nɛ a ala nu a hã a na: “Aa wi gba olo nu Gale, mɔ kɔ̃, nɛ mɔ tɛ gbɛ̀ mi do osodanɔ 'da mi 'bu wa mɔlɔ gɛ gɔ!

¹⁴ Mi ĩ na, nyɛa we yula li nza i, nɛ ma zĩlĩ, nɛ ma bɛla owi ngɔ osodanɔ bɔa sɔ dati ni, do osodanɔ 'da wa. Kɔ mi ala nu mi hã mɔ na, mɔ kpasa mi!”

¹⁵ Nɛ anzɛ 'da NWA tɔ̃ hã Elia na: “Mɔ tɛ dɛ̃ kili gɔ. Mɔ zĩ́lĩ́ hã mɔ nɛ do a!” Elia zĩlĩ, nɛ a nɛ do wi ngɔ sodanɔ tɛ 'da nwa Ahazia i,

¹⁶ nɛ a tɔ̃ hã a na: “NWA tɔ̃a na, mɔ tumba Owi to we aka Bala-Zɛbubɛ, gale ngɔ le Ekroni, ɔ nɛ kɛ fo Gale ngɔ nù Israɛlɛ gɛ bina ni. Gulu nɛ a mɔ kúlú sɛ ngɔ ngɔ te zɛlɛ 'da mɔ gɔ, mɔ fe sɛ!”

¹⁷ Na mɛ ni, nɛ Ahazia fia ɔ nɛ kɛ NWA tɔ̃a do wala 'da Elia ni. Ahazia zi do bulu be bina, nɛ nya a Yoramɛ dungu nwa olo a. A hɔa nwa do kɔ bɔa sabɛlɛ to nwa 'da Yoramɛ, be 'da Yozafatɛ, nwa ngɔ nù Yuda.

¹⁸ Tala mɛnɔ vɛ̃ kɛ Ahazia dɛa ni, wa kɔma ma kɔ 'buki li nɛ a: “Dɛa tonɔ 'da onwa ngɔ nù Israɛlɛ.”