2 YOANƐ 1 - WE NU GALE 1995

¹ Wi a mi, wi zɔ mɔ tɛ eklezia, mi kɔma mbɛti gɛ hã mɔ, Naa lɛ kɛ Gale saka mɔ gɛ, do obenɔ 'da mɔ, kɛ mi kɔ̃a gɛnɛ nɛ nɛ ge nde ni. Nɛ tati a mi zu mi kpo hã mi kɔ̃a gɛnɛ nɛ iko gɔ, nɛ nde winɔ vɛ kɛ wa ĩ ti gbãlã we 'da Gale ni, wa kɔ̃a gɛnɛ nɛ tɛ mɛ 'bɔ.

² Mba gɔ, gbãlã we 'da Gale kɔ sila lɛ boe, nɛ ma 'bana sɛ dɛ kɔ sila lɛ fai.

³ E kɔ Baa lɛ Gale do Be 'da a Yezu Kristo, wa be dia zã hã lɛ do nɛ, nɛ wa ĩ 'bako hã lɛ, nɛ wa dɛ na, lɛ ɔ do gɛ̃a sila. E kɔ ma dɛ tɛ́ ɛ na mɛ ni we lɛ, kɛ lɛ ĩ ti gbãlã we 'da Gale, nɛ lɛ kɔ̃a 'bɔ gɛnɛ ngba lɛ ni.

Lɛ kɔ̃ gɛnɛ ngba lɛ do gbãlã we

⁴ Mi dɛa yangga wena we zele na, ombe benɔ 'da mɔ wa dɛ gbãlã we dɛa mɔ, ɔ nɛ kɛ Baa lɛ Gale ba do nu a hã lɛ ni.

⁵ Ngangga ni, mi tɔ̃ hã mɔ, Naa lɛ na, lɛ kɔ̃́ gɛnɛ ngba lɛ. Mbula mi kɔma hã mɔ gɛ, mɛ a mbé mbula gɔ, nɛ nde mɛ a ã mbula kɛ lɛ zila zi dati belee, ndo do kɛ lɛ kɔ̃a zu li Yezu ni.

⁶ Nɛ zɔ́, wi kɛ a kɔ̃ gɛnɛ Gale, nɛ a dɛ sɛ mbulanɔ 'da a. Nɛ kpo mbula kɛ nɛ zila zi dati belee ni, mɛ a kɛ na, nɛ kɔ̃́ gɛnɛ ongba nɛ fai.

⁷ Mi tɔ̃ we gɛ hã nɛ, we kɛ Owi 'bili bɛlɛnɔ wa kpa do ngɔ nù gɛ vɛ, nɛ wa kɔ̃̀ we 'da Yezu Kristo na, a hɔa wele, nɛ a tɛa ngɔ nù gɛ ni gɔ. Nɛ wi kɛ a tɔ̃ na mɛ ni, a a wi ɔlɔ wi, nɛ a a wi sɛnɛ Yezu Kristo.

⁸ Kɔ li nɛ sɔ̃́, da dɛ kɔ tonɔ vɛ kɛ nɛ dɛa hã Yezu ni, ma ɔ́ yala iko gɔ, nɛ nde nɛ dɛ́ na, nɛ kpa si mɔ olo nɛ gã wena.

⁹ Wi kɛ a 'bànà dɛ kɔ bia wenɔ kɛ Yezu Kristo bia zi hã lɛ ni iko gɔ, kɔ a e ogele we dɛ ngɔ nɛ, nɛ nde a kɔ̃̀ gɛnɛ Gale gɔ. Nɛ wi kɛ a 'bana dɛ kɔ bia wenɔ kɛ Yezu Kristo bia zi hã lɛ ni, a kɔ̃a gɛnɛ Baa lɛ Gale, nɛ a kɔ̃a 'bɔ gɛnɛ Be 'da a.

¹⁰ Kɔ fala kɛ mbe wele hɔ 'da nɛ, kɔ a be gele we olo ki ni, nɛ nɛ tɛ kɔ̃̀ gɛnɛ a kɔ tɔa 'da nɛ gɔ, nɛ nɛ tɛ hã̀ 'bɔ balɛ hã a gɔ.

¹¹ Mba gɔ, wele kɛ a hã balɛ hã a, nɛ nde a mba do a ngɔ 'dã dɛa mɛ 'da a.

Ndɔti wenɔ

¹² Mi do we nu mi we tɔ̃ hã nɛ wena, nɛ nde mi kɔ̃̀ we kɔmɔ ma hã nɛ do mbɛti gɔ. Mi kɔ̃a we nɛ dɛ 'da nɛ i, nɛ lɛ wele we nu ngba lɛ do nɛ, takɔ yangga dunu kɔ sila lɛ.

¹³ Benɔ 'da Boko nya mɔ, kɛ Gale saka zi 'bɔ a ni, wa hã balɛ hã mɔ.