2 KORINTƐ 9 - WE NU GALE 1995

Mbili we gala do winɔ 'da Gale ngɔ nù Yude

¹ Nɛ nde ma wè na, mi kɔmɔ 'bɔ we hã nɛ ngɔ mbili kɛ owinɔ wa da ma, we gala do winɔ 'da Gale tɛ Yude i ni gɔ.

² We kɛ mi ĩ ti wɛ 'da nɛ we gala ongba nɛ ni, nɛ mi dɔnggɔ tɛ mi do nɛ hã Omasedɔanɛ. Mi tɔ̃a zi hã wa na, owinɔ ngɔ nù Akai wa ngɛma mbɔkɔ mbili 'da wa ma la dɛ sabɛlɛ kpo ia. Nɛ kɔ̃a zã 'da nɛ ma hã tɛ 'bɔ kpã sila hã ombe sanga wa wena we dɛ na mɛ ni.

³ Kɔ mi tumba onya lɛ gɛ 'da nɛ i na, dɔ olo dɔnggɔ tɛ wi 'da mi ma ɔ́ li winɔ yala iko gɔ. Nɛ nde mi kɔ̃a na, nɛ 'dáfá mbɔkɔ mbili 'da nɛ, ɔ nɛ kɛ mi tɔ̃a zi hã nɛ, nɛ nɛ dɛa ni.

⁴ We kɛ ní gɔ, kɔ fala kɛ lɛ hɔ 'da nɛ i do ombe Masedɔanɛ, kɔ lɛ kpa nɛ, nɛ nde nɛ tɛ 'dàfà mɛnɔ ni gɔ, nɛ sape ma ba sɛ li lɛ wena. We kɛ lɛ a zi linggamɛnɔ 'da lɛ vɛ́ dɛ ngɔ nɛ. Nɛ sape ma ba sɛ 'bɔ li nɛ wele nɛ.

⁵ Ma kɛ mi aka zi onya lɛ ni na, wa la 'da nɛ i dati, takɔ wa 'dafa mbili zi nɛ da ma ni. Kɔ fala kɛ mi nɛ hɔ ma, nɛ nde nɛ ngɛma li ma vɛ ia, nɛ ma be sɛ na, nɛ hã ma do dia zã ngboo, nɛ nde wele ngbɔ̀kɔ̀ nɛ we nɛ ngbɔka gɔ.

⁶ Kɔ nɛ lénggé do we gɛ sɛ! Wele mi kpalɛ bi sĩ, nɛ a 'bɛlɛ sɛ tɛ mɛ 'bɔ ma bi sĩ iko, kɔ a mi a gã, nɛ a 'bɛlɛ sɛ tɛ mɛ 'bɔ a gã.

⁷ Kɔ ma wia na, wele do wele hã mbili ɔ nɛ kɛ a kɔ̃a do sila a dati Gale we hã ma ni. Nɛ a tɛ hã̀ ma do 'bako kɔ sila a, tabi we kɛ wa ngbɔkɔ a we nɛ ngbɔka gɔ. We duzu kɛ Gale kɔ̃a gɛnɛ wele kɛ a hã mɔ do yangga ni.

⁸ Gale do ngawi we hã odia mɔ hã nɛ kpi do kpi, takɔ 'da fala fai, nɛ ɔ do mɛnɔ vɛ kɛ ma wia do nɛ ni. Nɛ tala nɛ 'bana 'bɔ kɔ̃ nɛ, we dɛ do de dɛa mɔ kpi do kpi.

⁹ Ma ɔ nɛ kɛ wa kɔma kɔ 'Buki 'da Gale na: “A kɛ gba dɔa mɛnɔ 'da a hã owi sãnɔ, nɛ dia dɛa mɛ 'da a ma 'bana sɛ fai” ni.

¹⁰ Gale a hã kpalɛ hã wi wa fɔ, nɛ a hã nyɔngɔmɔ hã a we nyɔngɔ ma. Na mɛ ni, a hã sɛ tɛ mɛ 'bɔ ode mɛnɔ hã nɛ, nɛ a dɛ sɛ na, ma dɛlɛ dɛ dati fai, takɔ nɛ dɛ do bɔlɔ zu dɛa mɛnɔ, nɛ ma ko ode mɔ hã ongba nɛ wena.

¹¹ Gale a hã sɛ ode mɔ hã nɛ a gã, takɔ nɛ kɛ tɛ mɛ 'bɔ hã ongba nɛ a gã, kɔ wa hã iɔ̃nae hã Gale we duzu nɛ 'da fala lɛ tombo sɛ do ma hã wa ni.

¹² We duzu kɛ de dɛa toe kɛ nɛ dɛ ni, ma gálá sɛ owinɔ 'da Gale kɛ wa zɔla ni iko gɔ, nɛ nde ma dɛ sɛ 'bɔ na, Owele wena wa dɔnggɔ Gale we de dɛa mɛnɔ 'da a.

¹³ Mba gɔ, de mɛnɔ nɛ dɛ ma ni, ma be sɛ hã winɔ na, nɛ a Owi kɔ̃a we ngboo, nɛ wa dɔnggɔ sɛ Gale we tɛlɛ tɛ kɛ nɛ kɔ̃a do gɛnɛ Dia Sakoe 'da Kristo, nɛ nɛ dɔnggɔ ma ni. Nɛ wa dɔnggɔ sɛ 'bɔ Gale we duzu tɛlɛ tɛ kɛ nɛ kɛ sanga dia mɛnɔ 'da nɛ hã wa do ogele winɔ vɛ, do dia sila ngboo ni.

¹⁴ Wa sambala sɛ Gale we duzu nɛ, nɛ wa kɔ̃ sɛ gɛnɛ nɛ wena, we duzu gã dia zã Gale bia hã nɛ ni.

¹⁵ E kɔ lɛ dɔnggɔ Gale we duzu dia mɛ kɛ a hã hã lɛ, nɛ ma nɛa ngɔ mɔ vɛ ni.