2 KORINTƐ 8 - WE NU GALE 1995

Ma wia na wele gala Eklezia do yangga

¹ Onyae, lɛ kɔ̃a na nɛ ĩ ti tɛlɛ tɛ kɛ Gale bia dia zã da a hã oeklezianɔ ngɔ nù Masedɔanɛ ni.

² Onga mɔ kpi do kpi ma yamba zi sila winɔ 'da Gale i mɔ, nɛ nde wa zi do yangga wena fai. Gɛnɛ kɔ wa a Owi sã iko, nɛ nde wa hã zi mbili wena.

³ Gbãlã we, mi tɔ̃ hã nɛ na, wa hã mbili ɔ nɛ kɛ ma wia do wa ni, nɛ ma nɛa 'bɔ ngɔ kɛ wa wia sɔ we hã ma ni. Nɛ wa hã ma do dia sila iko.

⁴ Nɛ wa dala nu wa hã lɛ wena na, lɛ hã wala hã wa, kɔ wa mba do lɛ we gala winɔ 'da Gale tɛ ngɔ nù Yude i.

⁵ Wa hã mɔ nɛa ngɔ kɛ lɛ lingga zi na, wa wia tɛ hã nɛ ni. Wa hã zi tɛ wa hã Gale dati, nɛ 'do nɛ, nɛ wa hã tɛ wa hã lɛ, ɔ nɛ kɛ zã Gale kɔ̃a ni.

⁶ Ma kɛ lɛ tɔ̃a hã Tito na, a nɛ 'da nɛ i, we ngɛmɛ mbili ɔ nɛ kɛ a ndua zi nyanga dɛ ma ni, takɔ nɛ sɔkpɔ to gbaka ngba wi ni do dia nɛ.

⁷ Mba gɔ, nɛ do mɛnɔ vɛ́ wena: Nɛ do kɔ̃a we dɛ 'da Gale, nɛ nɛ ĩ ti be we 'da a, nɛ ĩ ti mɔ wena, nɛ hã tɛ nɛ vɛ li dɛa toe 'da Gale, nɛ nɛ kɔ̃ gɛnɛ lɛ wena. Kɔ ma wia na, nɛ hã 'bɔ tɛ nɛ vɛ we dɛa to gbaka ngba wi gɛ.

⁸ Mi è ma hã nɛ ɔ nɛ mbula gɔ, nɛ nde mi be tɛlɛ tɛ kɛ ombe winɔ gele falanɔ wa bi we gala do ongba wa ni, takɔ nɛ zɔ, tabi kɔ̃a zã 'da nɛ a ngbongbo kɔ̃a zã nde?

⁹ Mba gɔ, nɛ ĩ ti dia zã 'da Nwa Yezu Kristo, kɛ a a wi kpamɔ, nɛ a ba tɛ a nɛ́ wi sã we nɛ, takɔ sã 'da a dɛ na, nɛ hɔ Owi kpamɔ ni.

¹⁰ Na mɛ ni, mi tɔ̃ linggamɛ 'da mi ngɔ we ni hã nɛ na, ma dia fɛ̃ na, nɛ 'bana tɛ dɛ toe kɛ nɛ ndua zi dɛ ma kɔ sabɛlɛ la zi dɛ gɛ ni, hã ma e. Mba gɔ, nɛ a nɛ kpa zi linggamɔ dɛ toe ni dati, nɛ nɛ zi 'bɔ a nɛ ndua ma dati.

¹¹ Kɔ ma wia na, nɛ wɛlɛ toe ni do dia sila vɛ̃, hã ma e. Nɛ hã́ tɛ nɛ we dɛ ma ɔ nɛ kɛ nɛ ndua zi nɛ ni, nɛ nɛ hã mbili we do kpamɛnɔ 'da nɛ.

¹² We duzu kɛ 'da fala kɛ wele hã mɔ do dia sila, nɛ Gale kɔ̃ gɛnɛ ma, nɛ a lengge tati nɛ do mɛnɔ kɛ wele do ma ni, nɛ nde a lénggé do kɛnɔ wele do ma bina ni gɔ.

¹³ Mi kɔ̃̀ na, nɛ kala bi 'bulu kɛnɔ nɛ do ma ni vɛ́ we gala do ogele wele, takɔ nɛ te sã gɔ. Nɛ nde ma wia na, winɔ vɛ wa kpasa we kɔ̃.

¹⁴ Do ngba soenɔ gɛ, nɛ do kpamɔ boe, kɔ ma wia na nɛ gala owinɔ kɛ wa zɔla ni. Kɔ ngba soe kɛ nɛ te sã, hã wa kɔ kpamɔ nde, nɛ wa gala sɛ tɛ mɛ 'bɔ nɛ. Na mɛ ni, nɛ nɛ we sɛ kɔ̃.

¹⁵ Ma ɔ nɛ kɛ wa kɔma kɔ 'Buki 'da Gale na: “Wi kɛ a kala zi nyɔngɔmɔ wena ni, ma dɛ̀lɛ̀ zi 'bɔ kɔ̃ a wena gɔ, nɛ wele kɛ a kàlà zi dɛlɛ gɔ ni, a zɔ̀lɔ̀ zi 'bɔ nyɔngɔmɔ gɔ.”

Tito do ongba a wi dɛa tonɔ

¹⁶ Lɛ dɔnggɔ Gale kɛ a hã zi kpã sila hã Tito we gala nɛ, ɔ nɛ kɛ lɛ dɛ 'bɔ ma dɛ 'da nɛ ni.

¹⁷ A kɔ̃a we dɛ mɛ kɛ lɛ aka a we nɛ ni. Nɛ tati a ki ni iko gɔ, a do wɔ wena we gala nɛ. A kɔ̃a do tɛ a wele nɛ na, ɛ nɛ 'da nɛ i.

¹⁸ Nɛ lɛ tumba a fala nɛ kpo do mbe nya lɛ, kɛ oeklezianɔ vɛ wa dɔnggɔ a wena, we dɛa to be Dia Sakoe a dɛ ni.

¹⁹ Nɛ oeklezianɔ wa saka 'bɔ a na, a yɛnggɛ do lɛ we gala lɛ tɛ dɛa to ngɛmɛ mbili we Owi sãnɔ. Lɛ dɛ toe ni we hã dɔ̃lɔ̃ li hã Nwa Yezu Kristo, do we be na, lɛ do wɔ we gala onya lɛ.

²⁰ Nɛ lɛ dɛ nganda wena na, da dɛ kɔ wele kɔ́'dɔ́ lɛ ngɔ tɛlɛ tɛ kɛ lɛ ngɛmɛ do li gã mbilinɔ gɛ, tabi lɛ kɛ do ma ni gɔ.

²¹ Lɛ kɔ̃̀ na, dia mɛ lɛ dɛ ni, ma de tati a li Nwa iko gɔ, nɛ nde ma de 'bɔ li winɔ.

²² Lɛ tumba winɔ bɔa ni fala nɛ kpo do mbe nya lɛ, kɛ lɛ yamba a fala dɛlɛ wena, nɛ lɛ zɔa na, sila a kpãlã kɔ dɛa tonɔ 'da Gale wena ni. Nɛ ngangga gɛ, sila a nganda 'bɔ dɛ dati, we kɛ a gbini zã a do nɛ wena.

²³ Nɛ kɛ 'da Tito, a a yali ngba mi, nɛ a dɛ to fala nɛ kpo do mi we gala nɛ. Nɛ ogele onya lɛ ni, wa a owinɔ kɛ oeklezianɔ wa tumba wa, nɛ toe 'da wa ma hã dɔ̃lɔ̃ li hã Kristo.

²⁴ Kɔ nɛ bé hã wa na, nɛ kɔ̃a gɛnɛ wa ngboo, takɔ oeklezianɔ wa ĩ na, lɛ dɔnggɔ tɛ lɛ do nɛ gbãlã we.