2 KORINTƐ 7 - WE NU GALE 1995

¹ Aa oyali ngba mi, Gale kpua mbuli ni hã lɛ, kɔ ma wia na, lɛ bɛ̃ gɛnɛ 'dã mɛnɔ vɛ́, kɛ ma hã ndi kɔ kili tɛ wi, do hi wi ni. Lɛ dɛ́ kili Gale, nɛ lɛ 'dáfá dɛa mɔ tɛ lɛ, nɛ lɛ fá we dungu nɛ́ owinɔ 'da a ngboo.

Yangga 'da Polo

² Nɛ hṹi sila nɛ hã lɛ! Lɛ dɛ̀ 'dã mɔ do wele kpo sanga nɛ ni gɔ, lɛ zɛ̀lɛ̀ mbe sila wele kpo gɔ, lɛ ɔ̀lɔ̀ mbe wele sanga nɛ ni we kpa mɔ kɔ̃ a gɔ.

³ Mi tɔ̃́ ní we hã sape hã nɛ gɔ. Mba gɔ, mi tɔ̃a sɔ hã nɛ dati na, nɛ a owinɔ kɛ nɛ ngɔ sila lɛ. Nɛ gɛnɛ kɔ fio tabi kpasi, nɛ nde lɛ do nɛ fala nɛ kpo.

⁴ Mi do kafi ngɔ nɛ bina, nɛ mi dɔnggɔ tɛ mi do nɛ. Nɛ kɔ 'bakonɔ vɛ́ lɛ kpa ni, nɛ nde mi mbɔ́kɔ́ gɔ, nɛ mi do yangga wena.

⁵ Mba gɔ, lɛ hɔa ngɔ nù Masedɔanɛ i, nɛ lɛ zi do dungu fio bina. Lɛ kpa zi ngamɔ kpi do kpi. Owi sɛnɛ lɛ wa zi tɛ bi do lɛ, nɛ lɛ zi do linggamɔ kili kɔ sila lɛ wena.

⁶ Nɛ nde Gale kɛ a nganda sila Owi 'bakonɔ ni, a nganda zi sila lɛ 'da fala kɛ nya lɛ Tito hɔa ni.

⁷ Nɛ tati a ki ni iko gɔ, nɛ nde wenɔ vɛ́ kɛ Tito tɔ̃a ngɔ nɛ ni, ma hã 'bɔ kpã sila hã lɛ wena. A tɔ̃a tɛlɛ tɛ kɛ nɛ nganda do sila a ni, do tɛlɛ tɛ kɛ nɛ do wɔ we zɔ 'bɔ tɛ mi sanga nɛ mɔ ni, do 'bakoe kɛ nɛ do ma we mɛnɔ ma la zi ni, do kɛ nɛ kɔ̃a we bi ngɔ mi ni. Kɔ we duzu ki ni, ma kɛ yangga 'da mi gã dɛ dati.

⁸ Kɔ gɛnɛ kɔ mbɛti 'da mi hã zi 'bako hã nɛ, nɛ nde mi sà tɛ mi tɛ kɛ mi kɔmɔ ma ni gɔ. Mi wia zi tɛ sa tɛ mi kpaa, we kɛ mi zɔa na mbɛti ni ma hã zi 'bako hã nɛ be sĩ.

⁹ Nɛ nde ngangga gɛ, mi do yangga iko. Mi do yangga we 'bakoe kɛ mbɛti 'da mi hã zi hã nɛ ni gɔ, nɛ nde we kɛ 'bakoe 'da nɛ ni dɛa na, nɛ kifi dɛa mɔ tɛ nɛ. Gale gala nɛ do wala 'bakoe ni. Na mɛ ni, lɛ dɛ̀ zi nɛ 'danga gɔ.

¹⁰ Mba gɔ, fala kɛ Gale hã 'bako hã wele, kɔ 'bakoe ni kpasa wi ni, nɛ gulu kɛ wi ni wia tɛ sa tɛ ɛ ni bina. Nɛ nde fala kɛ wele dungu do 'bako we mɛnɔ nù gɛ, nɛ 'bakoe ni wia we gbɛ a.

¹¹ Nɛ nɛ dungu zi do 'bako ɔ nɛ kɛ zã Gale kɔ̃a ni, hã nɛ zɔ́ tɛlɛ tɛ kɛ 'bakoe ni ma 'dafa nɛ ni. Gbãlã we, nɛ kpa ngawi, nɛ nɛ dɛa nganda wena we be dia gulu we 'da nɛ. Zã nɛ nɔ̃lɔ̃ we mɛnɔ ma la zi ni, nɛ kili ba nɛ. Nɛ nɛ do wɔ we zɔ mi, nɛ nɛ ba tɛ nɛ we dɛ mɛ kɛ zã Gale kɔ̃a ni. Nɛ nɛ hã etumbu hã wi dɛ 'dã mɛ sanga nɛ ni. Mɛnɔ nɛ dɛa ni, ma be na, nɛ zi kɔ mɛnɔ ma la ni bina.

¹² Nɛ nde mi kɔ̀mɔ̀ zi mbɛti ni hã nɛ we duzu wi kɛ a dɛa 'dã mɛ, tabi we wele kɛ wa dɛa 'dã mɛ dɛ 'da a ni gɔ. Mi kɔmɔ zi ma hã nɛ, takɔ nɛ ĩ ti dia zã kɛ nɛ do ma dɛ 'da lɛ li Gale ni.

¹³ Kɔ we duzu ki ni, ma kɛ mɛ nɛ dɛa ni, ma hã kpã sila hã lɛ ni. Nɛ lɛ kpà tati a kpã sila iko gɔ, nɛ nde sila lɛ dunu do yangga we zɔ na, Tito yula 'da nɛ i, nɛ a si do yangga we mɛnɔ vɛ̃ nɛ dɛa hã a, do kɛ nɛ mbɔkɔ sila a ni.

¹⁴ Mi dɔnggɔ zi tɛ mi hã a we duzu nɛ, nɛ nɛ kala sape li mi. Nɛ́ kɛ wenɔ lɛ tɔ̃a zi ma hã nɛ ni, mɛ vɛ́ a gbãlã we ni, na mɛ ni, dɔnggɔ tɛ wi kɛ lɛ dɔnggɔ zi hã Tito we duzu nɛ ni, mɛ 'bɔ a gbãlã we.

¹⁵ 'Da fala kɛ Tito ma ngɔ lengge do tɛlɛ tɛ kɛ nɛ kɔ̃a zi gɛnɛ a, nɛ nɛ zila we nu a, nɛ nɛ dɛa kili a ni, nɛ kɔ̃a zã 'da a dɛ 'da nɛ ma gã dɛ dati.

¹⁶ Nɛ sila mi dunu do yangga, we kɛ mi wia tɛ gbini zã mi do nɛ kɔ mɛnɔ vɛ.