2 KORINTƐ 6 - WE NU GALE 1995

¹ Kɔ lɛ winɔ kɛ lɛ dɛ toe fala nɛ kpo do Gale ni, lɛ aka nɛ na, da dɛ kɔ dia zã kɛ Gale bia hã nɛ ni, ma ɔ́ yala iko gɔ.

² We kɛ Gale tɔ̃a kɔ 'Buki 'da a na: “'Da fala kɛ mi zi do dia zã dɛ 'da owinɔ, nɛ mi zila gɛlɛ mɔ. 'Da fala kɛ mi tɛa we kpasa owinɔ, nɛ mi amba zu mɔ.” Hã nɛ zɔ́! Sɔɛ gɛ a ngba soe kɛ Gale nɛ be do dia zã 'da a hã owinɔ. Sɔɛ gɛ a ngba soe kpa kpasi.

³ Na mɛ ni, kɔ toe 'da lɛ, lɛ kɔ̃̀ we dɛ mɔ kɛ ma fo wele li wala 'da Gale ni gɔ, dɔ winɔ wa kɔ́'dɔ́ toe lɛ dɛ ni gɔ.

⁴ Nɛ nde lɛ dɛ mɛnɔ vɛ, nɛ ma be na, lɛ a wi dɛa tonɔ 'da Gale. Lɛ kunu sila lɛ kɔ ngamɛnɔ, do 'bakonɔ, do zɛla tɛnɔ wa hã hã lɛ ni.

⁵ Wa zɛa zi lɛ, nɛ wa a lɛ bɔlɔkɔ, nɛ wa dãlã sila winɔ na, wa fi balia zu lɛ. Lɛ dɛa zi nganda dɛa to, nɛ mbe 'da fala kpo, nɛ lɛ ɔ̀ yala gɔ, nɛ lɛ nyɔ̀ngɔ̀ 'bɔ mɔ gɔ.

⁶ Lɛ bia hã winɔ na, lɛ a wi dɛa tonɔ 'da Gale, we duzu kɛ sila lɛ a sa, nɛ lɛ ĩ ti mɔ, nɛ lɛ do du sila, do dia zã. Nɛ Hi Wi Santo 'da Gale kɔ lɛ boe, nɛ lɛ kɔ̃a gɛnɛ winɔ ngboo.

⁷ Lɛ be gbãlã we 'da Gale hã winɔ, nɛ Gale hã ngawi 'da a hã lɛ. Lɛ ba bɔlɔ zu dɛa mɔ dɛ kɔ̃ lɛ ɔ nɛ mɔ bolo ni, we bi do Owi sɛnɛ lɛ, do we amba do ngɔ kili tɛ lɛ.

⁸ Ombe winɔ wa mɔmɔ lɛ, nɛ ombe wa dɔnggɔ lɛ. Owele wa 'danga zu li lɛ, nɛ ombe wa tɔ̃ dia zu li lɛ. Wa zɔ lɛ ɔ nɛ owi 'bili bɛlɛ ni, nɛ nde lɛ tɔ̃ gbãlã we.

⁹ Wa zɔ lɛ ɔ nɛ wa ĩ̀ ti lɛ gɔ ni, nɛ nde wa ĩ ti lɛ ĩ. Lɛ ɔ li wa nɛ ofio ni, nɛ nde lɛ 'bana do tunu li lɛ. Wa hã zɛlɛ tɛ hã lɛ, nɛ nde wa gbɛ̀ lɛ gbɛa gɔ.

¹⁰ Lɛ ɔ li wa nɛ Owi 'bako ni, nɛ nde lɛ fai do yangga. Wa zɔ lɛ nɛ́ Owi sã ni, nɛ nde Owele wena wa hɔa wi kpamɔ li Gale we duzu lɛ. Ma ɔ nɛ kɛ fo mɔ mɔ́ lɛ bina ni, nɛ nde lɛ zɔ̀lɔ̀ mɔ kpo gɔ.

¹¹ Aa onya lɛ, Owi Korintɛ, lɛ hũi sila lɛ hã nɛ, nɛ lɛ tɔ̃a we zã lɛ vɛ́ hã nɛ.

¹² Nɛ nde nɛ nganda sila nɛ, nɛ nɛ hũ̀i ma hã lɛ gɔ.

¹³ Kɔ mi tɔ̃ mbula gɛ hã nɛ, ɔ nɛ nɛ a obe zã mi ni na, nɛ kɔ̃ gɛnɛ lɛ ɔ nɛ kɛ lɛ kɔ̃a do gɛnɛ nɛ ni, nɛ nɛ tɔ̃ we zã nɛ vɛ hã lɛ.

Polo tɔ̃a mbula ha Owi Korintɛ

¹⁴ Nɛ tɛ mbà tɛ dɛa mɔ do owinɔ kɛ wa kɔ̃̀ zu li Kristo gɔɛ ni gɔ, we kɛ nɛ wè kɔ̃ do wa gɔ. De mɔ wia tɛ ɔ fala nɛ kpo do 'dã mɔ nde? Nɛ sa fala wia tɛ mba ngbɛ ɛ do tũ fala nde?

¹⁵ Kristo wia tɛ mba ngɔ we do Satana nde? Wi mɔ́ Gale wia we mba tɛ mɔ do wi bɛ gɛnɛ Gale nde?

¹⁶ We mɔ́ kpikima tɛ tɔa 'da Gale boe nde? Tɔa 'da Gale wele kpasi, wi a lɛ, ɔ nɛ kɛ a ngboo a tɔ̃a na: “Mi ɔ sɛ dɛ sanga winɔ 'da mi, nɛ mi yɛnggɛ sɛ fala nɛ kpo do wa. Mi sɛ a Gale 'da wa, nɛ wa sɛ a winɔ 'da mi” ni.

¹⁷ We duzu ma, Nwa Gale tɔ̃a na: “Nɛ yú wa, nɛ nɛ fó tɛ nɛ sanga wa. Nɛ tɛ kɔ̀lɔ̀ do mɔ ndinɔ 'da wa gɔ. Nɛ dɛ́ na mɛ ni, nɛ mi kɔ̃ sɛ gɛnɛ nɛ.

¹⁸ Mi sɛ a baa nɛ, nɛ nɛ sɛ a benɔ 'da mi. Mi Nwa Gale, kɛ mi do nganda vɛ̃ ni, mi tɔ̃a ni.”