2 KORINTƐ 5 - WE NU GALE 1995

¹ Lɛ ĩ na, kili tɛ wi nùi 'da lɛ, ma ɔ nɛ tɔa nù ni, ma 'danga sɛ. Nɛ nde gɛnɛ kɔ ma 'danga, nɛ Gale a 'dafa sɛ mbé tɔa hã lɛ li nza i. Mɛ a tɔa kɛ a ngboo a dɛa ma, nɛ ma 'dángá sɛ fala kpo gɔ ni.

² Nɛ lɛ bi tɛ lɛ ngangga ni, we kɛ lɛ kɔ̃a we hɔ nza kɔ tɔa lua nùi, hã lɛ le kɔ mbé tɔa tɛ li nza i, hã ma kele lɛ.

³ Kɔ fala kɛ ma kele lɛ, nɛ nde lɛ 'báná sɛ 'bɔ do kũlĩ tɛ lɛ gɔ.

⁴ Kɔ nɛ́ kɛ lɛ 'bana kɔ kili tɛ lɛ, kɛ ma ɔ nɛ tɔa nùi ni, lɛ tɛ he tɛ lɛ ɔ nɛ kɛ lɛ a ti dĩ tole ni. Ĩ na, lɛ kɔ̃̀ we fo kili tɛ lɛ, kɛ mɛ a nùi ni do'do gɔ. Nɛ nde lɛ kɔ̃a na, lɛ he'de mbé kili tɛ wi ɔ nɛ wele he'de mbé tulu dɛ ngɔ ã nɛ ni. Na mɛ ni, nɛ kili tɛ wi kɛ ma fe fia ni, ma kifi sɛ mbé kili tɛ wi kɛ ma fé sɛ 'bɔ gɔ ni.

⁵ Nɛ nde wi a Gale hã a dɛa vɛ́ na mɛ ni, we hã mbé kili tɛ wi ni hã lɛ, nɛ a hã Hi Wi hã lɛ ɔ nɛ mbe nu dia mɛnɔ kɛ a 'dafa we hã ma hã lɛ li nza i ni.

⁶ We duzu ma, ma kɛ lɛ do kpã sila fai ni. Lɛ ĩ na, nɛ́ kɛ lɛ 'bana kɔ kili tɛ wi nùi gɛ ni, lɛ nyɛla do tɔa 'da Nwa Yezu nyɛla.

⁷ Mba gɔ, gɛnɛ kɔ lɛ zɔ̀ ma zɔa gɔ, nɛ nde lɛ dungu do kɔ̃a we dɛ 'da a.

⁸ Gbãlã we, lɛ gbini zã lɛ do Nwa, nɛ lɛ kɔ̃a sɔ na, lɛ hɔ nza kɔ kili tɛ wi nùi gɛ, nɛ lɛ nɛ dɛ 'da Nwa i.

⁹ Nɛ nde linggamɛ 'da lɛ kpo na, gɛnɛ kɔ lɛ hɔ nza kɔ kili tɛ wi nùi gɛ we la dɛ 'da a i, tabi lɛ 'bana dɛ kɔ nɛ nde, nɛ lɛ dɛ tati a mɛ kɛ ma hã yangga hã a ni.

¹⁰ Mba gɔ, ma wia na, lɛ vɛ́ lɛ yolo dati a, takɔ a 'bili we 'da lɛ. Nɛ wele do wele a kpa sɛ dia mɔ, tabi 'dã mɔ olo mɛnɔ a dɛa ma li dungu nza 'da a ngɔ nù gɛ ni.

Gale dɛa na do lɛ do wala 'da Kristo

¹¹ Lɛ ĩ na, ma wia na wele dɛ kili Nwa, ma a lɛ dɛ nganda wena we be gbãlã we 'da a hã winɔ. Gale ĩ ti we kɔ̃ zã lɛ vɛ, nɛ mi lengge na, nɛ tɛ mɛ 'bɔ, nɛ ĩ ti lɛ do kɔ sila nɛ de wena.

¹² Lɛ kɔ̃̀ 'bɔ we dɔnggɔ tɛ lɛ dati nɛ gɔ, nɛ nde lɛ fa na, nɛ kpa wala we dɔnggɔ tɛ nɛ do lɛ. Na mɛ ni, nɛ nɛ we sɛ tɛ gese nu we hã owinɔ kɛ wa dɔnggɔ tɛ wa do mɛnɔ winɔ wa zɔ ma zɔa, nɛ nde wa lénggé do mɔ kɔ sila wi ngboo gɔ ni.

¹³ Kɔ fala kɛ lɛ ɔ nɛ oyɔndɔ wi gbãlã we nde, nɛ nde lɛ hɔa na mɛ ni we duzu Gale. Kɔ fala kɛ lɛ a Owi gbisa zu nde, nɛ nde lɛ hɔa na mɛ ni we gala nɛ.

¹⁴ Mba gɔ, kɔ̃a zã 'da Kristo lia lɛ, nɛ ma tombo lɛ we dɛ mɛ kɛ zã Gale kɔ̃a ni. We kɛ lɛ ĩ na, wele kpo fia zi we winɔ vɛ, nɛ winɔ vɛ́ wa fia fala nɛ kpo do a.

¹⁵ A fia we winɔ wa 'bana nza ni vɛ, takɔ kpasi 'da winɔ ni, ma tɛ ɔ̀ 'bɔ we wa wele nɛ gɔ, nɛ nde ma ɔ we wele kɛ a fia, nɛ a tunu kɔ fio we wa ni.

¹⁶ We duzu ma, ngangga gɛ, lɛ zɔ́ a kili tɛ wele iko gɔ. Gɛnɛ kɔ lɛ zɔ zi Kristo dati ɔ nɛ wele ni, nɛ nde dɔ̃ ni, lɛ zɔ́ 'bɔ a na mɛ ni gɔ.

¹⁷ Fala kɛ wele hɔ wi 'da Kristo, nɛ nde a hɔa mbé wele ia. Ã mɛnɔ zi ni ma la, nɛ mbé mɛnɔ ma hɔa.

¹⁸ Nɛ mɛnɔ ni vɛ ma yula 'da Gale. A 'dafa sanga tɛ̃ a do lɛ do wala 'da Kristo, nɛ a hã to hã lɛ na, lɛ fa we 'dafa sanga a do ombé wele.

¹⁹ We duzu kɛ do wala 'da Kristo, nɛ Gale lènggè do 'dã mɛnɔ 'da winɔ gɔ, nɛ a 'dafa sanga tɛ̃ a do wa vɛ. Nɛ a saka lɛ we tɔ̃ to nɛ hã winɔ.

²⁰ Ma kɛ lɛ yɛnggɛ we be we 'da Kristo, ɔ nɛ Owi nɛ tonɔ 'da Gale ngboo ni. Mba gɔ, Gale ngboo a sa mɔ hã nɛ do wala 'da lɛ. Kɔ lɛ aka nɛ do zu li Kristo na, nɛ e Gale, hã a 'dafa sanga tɛ̃ a do nɛ.

²¹ Kristo zi do 'dã mɔ bina, nɛ Gale ia ku'da 'dã mɛ 'da lɛ dɛ zu a, takɔ lɛ mba li ngba lɛ do a, kɔ lɛ hɔ wi bɔlɔ zu li Gale.