2 KORINTƐ 4 - WE NU GALE 1995

Gale ia gã kpamɛ 'da a kɔ lɛ

¹ Ɔ nɛ kɛ Gale bia dia zã 'da a hã lɛ, nɛ a hã dɛa toe gɛ hã lɛ ni, lɛ wè tɛ mbɔkɔ nɛ gɔ.

² Lɛ bɛa gɛnɛ mɛnɔ kɛ ma dɛ tɛ ɛ do usu nɛ, nɛ ma hã sape ni. Lɛ kɔ̃̀ we dɛ mɔ tɛ lɛ do 'dã hã gɔ, nɛ lɛ 'dángá we nu Gale gɔ. Nɛ nde lɛ be gbãlã we 'da Gale dɛ wila fala, takɔ winɔ wa kɔ̃ gɛnɛ lɛ li Gale.

³ Kɔ fala kɛ ombe winɔ wa zélé gulu Dia Sakoe lɛ be ma gɛ gɔ, nɛ nde ma we duzu kɛ wa ngɔ wala fio.

⁴ Owinɔ ni wa kɔ̃̀ zu li Gale gɔ, we kɛ 'dã gale ngɔ nùi gɛ, a bi gbãlã zã wa do'do. A dɛa na, dɔ wa zɔ́ tɛlɛ tɛ kɛ Dia Sakoe yele ngɔ nùi gɛ, nɛ ma be dɔ̃lɔ̃ li 'da Kristo, kɛ a ba tɛlɛ tɛ Gale ngboo ni gɔ.

⁵ Lɛ bé a we 'da lɛ wele nɛ gɔ, nɛ nde lɛ be we 'da Yezu Kristo na, a a Nwa. Nɛ lɛ, lɛ hɔa Owi dɛa tonɔ 'da nɛ, we duzu Kristo.

⁶ Gale kɛ a tɔ̃a zɛ́ na: “E kɔ sa fala yele kɔ tũ fala” ni, a 'bɔ a dɛa na, ma yele kɔ sila lɛ, nɛ ma fĩ li lɛ we ĩ ti yele ngbala dɔ̃lɔ̃ li 'da a, kɛ ma ndele bula li Kristo ni.

⁷ Nɛ nde lɛ winɔ kɛ Gale ia gã kpamɛ 'da a kɔ lɛ ni, lɛ ɔ nɛ kpana iko ni. Nɛ ma be hã winɔ na, ngawi 'da lɛ kɛ ma nɛa ngɔ mɔ vɛ́ ni, ma yula 'da Gale, ma yòlò dɛ kɔ lɛ iko gɔ.

⁸ Lɛ kpa 'bako kpi do kpi, nɛ nde ma nɛ́ ngɔ lɛ gɔ. Sila lɛ ɔ ngɔ ngbũu, nɛ nde lɛ 'bana tɛ gbini zã lɛ do Gale fai.

⁹ Owinɔ wa tɛ zɛlɛ tɛ lɛ, nɛ nde Gale lá lɛ gɔ. Wa lo lɛ nù, nɛ nde lɛ fé gɔ.

¹⁰ Lɛ hɔ fɛna fio fai na wa gbɛ lɛ, ɔ nɛ kɛ wa gbɛa zi do Yezu ni. Nɛ winɔ wa zɔ lɛ, nɛ wa ĩ na, Yezu fè gɔ, a 'bana kɔ lɛ.

¹¹ Li dungu nza 'da lɛ vɛ́, lɛ hɔ fɛna fio fai we duzu Yezu Kristo, takɔ kili tɛ lɛ kɛ ma fe sɛ ni, ma be na Kristo fè gɔ.

¹² Na mɛ ni, fio tɛ ngɛ'dɛ lɛ, nɛ nde nɛ do kpasi.

¹³ Wa kɔma kɔ 'Buku 'da Gale na: “Mi kɔ̃a zi zu li Gale, ma kɛ mi bia we 'da a ni.” Kɔ lɛ tɛ mɛ 'bɔ, lɛ kɔ̃a zu li Gale na mɛ ni, ma kɛ lɛ be we 'da a ni.

¹⁴ Lɛ ĩ na, Gale kɛ a tunu zi Nwa Yezu kɔ fio ni, a tunu sɛ 'bɔ lɛ kɔ fio, fala nɛ kpo do Yezu, nɛ a mba sɛ lɛ do nɛ vɛ dɛ kɛ zã a li nza i.

¹⁵ Ngamɛnɔ ni vɛ ma kpa lɛ we duzu nɛ. Na mɛ ni, nɛ Gale be dia zã 'da a hã owinɔ, nɛ wa dɛlɛ dɛ dati, nɛ wa dɔnggɔ a, nɛ wa hã iɔ̃nae hã a fai.

Wele kpasa we kɔ̃a we

¹⁶ We duzu ma, lɛ mbɔ́kɔ́ fala kpo gɔ. Mba gɔ, gɛnɛ kɔ kili tɛ lɛ tɛ 'danga nɛ gɛɔ do gɛɔ, nɛ nde sila lɛ tɛ nganda dɛ dati fai.

¹⁷ Obe zɛlɛ tɛnɔ kɛ lɛ kpa ma ngangga gɛ, nɛ ma la dɔ̃ iko ni, ma 'dafa lɛ we kpa gã dɔ̃lɔ̃ li kɛ ma 'bana sɛ fai, nɛ ma nɛa ngɔ zɛlɛ tɛnɔ ni fala dɛlɛ wena ni.

¹⁸ Mba gɔ, lɛ a sila lɛ ngɔ mɛnɔ kɛ lɛ zɔ́ gɔ ni, nɛ lɛ lénggé do kɛnɔ lɛ zɔ zɔa ni gɔ. Mɛnɔ kɛ wa zɔ zɔa ni, ma 'báná gbaa gɔ, nɛ nde kɛnɔ wa zɔ́ gɔ ni, ma 'bana sɛ fai.