2 KORINTƐ 3 - WE NU GALE 1995

Polo bia gulu mbé gba tɔkɛ kɛ Gale gba do owinɔ ni

¹ Tabi nɛ tɔ̃ sɛ na, lɛ ndua dɔnggɔ 'bɔ tɛ lɛ mbé nɛ nde? Lɛ kɔ̃̀ we dɛ ɔ nɛ kɛ ombe gele wi nɛ tonɔ wa dɛ ni gɔ. Lɛ kɔ̃̀ na, wele kɔmɔ mbɛti ngɔ lɛ hã nɛ, tabi nɛ kɔmɔ mbɛti ngɔ lɛ hã ogele winɔ we be na, lɛ a ngbongbo wi nɛ tonɔ 'da Kristo ni gɔ.

² We kɛ nɛ ngboo, nɛ a mbɛti 'da lɛ kɛ wa kɔma ma dɛ kɔ sila lɛ, nɛ winɔ vɛ́ wa wia we tɔlɔ ma, nɛ wa ĩ ti we kɔ nɛ.

³ Mɛ a gbãlã we na, nɛ a mbɛti kɛ Kristo kɔma, nɛ a ia dɛ kɔ̃ lɛ na, lɛ dɛ do toe 'da lɛ. Mbɛti ni, a kɔ̀mɔ̀ do lì mbɛti gɔ, nɛ nde a kɔma do Hi Wi 'da Gale kɛ a fé fio gɔ ni. A kɔ̀mɔ̀ ma dɛ ngɔ ta dɛ wila fala gɔ, nɛ nde a kɔma kɔ sila Owele.

⁴ Lɛ tɔ̃ ní mba gɔ, lɛ gbini zã lɛ do Gale do wala 'da Kristo.

⁵ Lɛ ĩ na, lɛ wè tɛ dɛ mɛnɔ ni do ngawi 'da lɛ wele nɛ gɔ, nɛ nde wi a Gale hã a hã ngawi nɛ hã lɛ.

⁶ A hã ngawi hã lɛ na, lɛ be do gulu mbé gba tɔkɛ kɛ a gba do owinɔ ni. Mbé gba tɔkɛ ni, ma yòlò kɔ mbɛti mbula gɔ, nɛ nde ma yula 'da Hi Wi Santo. Mba gɔ, mbɛti mbula kã wele dɛ tɛ fio, nɛ Hi Wi hã kpasi hã wele.

⁷ Do 'da fala kɛ Gale kɔma zɛ́ mbula 'da a do mbɛti dɛ ngɔ otanɔ ni, nɛ yele ngbala dɔ̃lɔ̃ li 'da a yele zɛ́. Nɛ sanga li Mɔizɛ ndele zɛ́ wena, nɛ obe Israɛlɛ wa wè zɛ́ tɛ soko sanga li a gɔ. Ĩ na, yele ngbala ni, 'do nɛ nyɛlɛ̀ zi gɔ. Kɔ nɛ́ kɛ mbula kɛ ma kã wele dɛ tɛ fio ni, ma do dɔ̃lɔ̃ li wena ní ni,

⁸ ní a dɔ̃lɔ̃ li dɛa toe 'da Hi Wi Santo ma nɛ́ sɛ ngɔ ki ni fala dɛlɛ wena gɔ nde?

⁹ Mba gɔ, fala kɛ mbula kɛ ma fi wele li ngbangga ni, ma do dɔ̃lɔ̃ li wena, nɛ toe 'da Hi Wi Santo kɛ ma kpasa wele ti ngbangga ni, ma sɛ do dɔ̃lɔ̃ li nɛ ngɔ ki ni fala dɛlɛ wena gɔ nde?

¹⁰ Gbãlã we, mɛnɔ kɛ ma zi do dɔ̃lɔ̃ li dati wena ni, ma 'bɔ do mbé dɔ̃lɔ̃ li bina, we kɛ mbé mɔ hɔa, nɛ ma do dɔ̃lɔ̃ li nɛa ngɔ ã kɛnɔ vɛ́.

¹¹ Mba gɔ, fala kɛ mbula kɛ ma wè zi we 'bana fai gɔ ni, ma zi do dɔ̃lɔ̃ li boe, nɛ dɛa toe 'da Hi Wi Santo, kɛ ma 'bana sɛ fai ni, ma nɛ́ sɛ ngɔ ki ni do dɔ̃lɔ̃ li fala dɛlɛ wena gɔ nde?

¹² Kɔ nɛ́ kɛ lɛ gbini zã lɛ ní ni, kili wele we dɛ wila fala bá 'bɔ lɛ gɔ.

¹³ Lɛ ɔ̀ nɛ Mɔizɛ, kɛ a gu zɛ́ tuli li a na, da dɛ kɔ Oisraɛlɛ wa zɔ́ ndɔti ndele sanga li ɛ gɔ ni gɔ. Mba gɔ, sanga li a wè zi tɛ ndele fai gɔ.

¹⁴ Nɛ nde gbãlã zã obe Israɛlɛ bi zi do'do, nɛ wa ĩ́ zi ti gulu mɛnɔ ni gɔ. Nɛ gbaa ti a do sɔɛ gɛ, li wa tɛ hũ̀i gɔ. Ma kɛ, fala wa tɔlɔ 'Buku à Gba Tɔkɔ 'da Gale ni, nɛ nde tulu 'bana tɛ kele li wa. Tati a wi kɛ a kɔ̃ zu li Kristo ni, sɛ nɛ tuli ni fo tɛ́ ɛ li a de.

¹⁵ Gbãlã we, tia do sɔɛ gɛ, fala kɛ wa ma ngɔ tɔlɔ 'buku mbulanɔ 'da Mɔizɛ, nɛ nde tuli ni ma kila li wa do'do.

¹⁶ Nɛ nde 'Buku 'da Gale tɔ̃a na: “Fala kɛ wele siki li ɛ dɛ 'da Nwa, nɛ tuli ni fo tɛ ɛ li a.”

¹⁷ Ĩ na, Nwa kɛ wa sa li a ni, wi a Hi Wi Santo. Kɔ falanɔ vɛ kɛ Hi Wi 'da Nwa tɛ nɛ ni, winɔ wa 'bɔ a ngbá ti mbula gɔ.

¹⁸ Nɛ lɛ winɔ vɛ kɛ tuli fua tɛ ɛ li lɛ ia ni, yele ngbala dɔ̃lɔ̃ li 'da Nwa yele tɛ lɛ, nɛ ma kifi lɛ na, lɛ we kɔ̃ do Nwa. Nɛ dɔ̃lɔ̃ li ni, ma gã kɔ lɛ dɛ dati gã fai. Nɛ mɛnɔ ni vɛ, wi dɛ ma kɔ lɛ, wi a Hi Wi 'da Nwa.