2 KORINTƐ 13 - WE NU GALE 1995

Tala wenɔ 'da Polo

¹ Kɛ gɛ sɛ a talɛ gɛnɛ kɛ mi nɛ sɛ 'da nɛ i ni. Wa kɔma kɔ 'Buki 'da Gale na: “Fala kɛ wele da ngbɛ ɛ nde, nɛ ma wia na otemɔɛ bɔa, tabi talɛ wa tɔ̃ gulu we ni do'do, sɛ nɛ nɛ 'bili ma de.”

² Mi do we we tɔ̃ ma hã winɔ kɛ wa dɛa zi 'dã mɛ ni, do ogele winɔ vɛ. Nɛ mi tɔ̃a zi 'bɔ ma hã nɛ 'da fala kɛ mi nɛa zi bɔa gɛnɛ 'da nɛ i ni. Kɔ ngangga ni, mi sanga nɛ i mɔ bina, nɛ mi tɔ̃ 'bɔ mbé nɛ na: Fala kɛ mi gili tɛ mi i mɔ, nɛ nde mi ĩ́ sɛ 'bako hã winɔ ni gɔ.

³ Na mɛ ni, nɛ mi be sɛ hã nɛ na, Kristo wele we hã nɛ do wala 'da mi. Kristo mbɔ̀kɔ̀ do nɛ gɔ, a be ngawi 'da a sanga nɛ bia.

⁴ Gbãlã we, wa bɛlɛ zi a ngɔ finda te, we kɛ a a wele, a mbɔ mbɔka. Kɔ ngangga ni, a do kpasi we duzu ngawi 'da Gale. Nɛ lɛ mbɔkɔ tɛ 'bɔ mbɔka, we kɛ lɛ a wele ɔ nɛ a ni. Nɛ nde lɛ be sɛ hã nɛ na, lɛ do kpasi fala nɛ kpo do a, we duzu ngawi 'da Gale.

⁵ Ma wia na, nɛ yamba dɛa to tɛ nɛ we ĩ na, nɛ do kɔ̃a we boe nde. Kafi bina, nɛ ĩ sɛ na, Yezu Kristo kɔ nɛ boe. Kɔ ní gɔ, nɛ nde nɛ kɔ̃a zu li a do bɛlɛ.

⁶ Kɛ 'da lɛ, mi bia hã nɛ na, lɛ a ngbongbo wi nɛ tonɔ 'da Kristo, nɛ mi lengge na, nɛ ĩ fala nɛ.

⁷ Kɔ lɛ aka Gale na, da dɛ kɔ nɛ dɛ́ 'dã mɔ gɔ. Mba gɔ, lɛ fà we 'dafa we 'da lɛ li owinɔ gɔ, nɛ nde lɛ kɔ̃a tati nɛ na, nɛ dɛ de mɔ. Gɛnɛ kɔ winɔ wa zɔ lɛ ɔ nɛ lɛ ĩ̀ ti dɛ to gɔ, nɛ nde we bina.

⁸ We kɛ lɛ wè tɛ 'danga gbãlã we 'da Gale gɔ, nɛ nde lɛ dɛ na, ma yɛ'bɛ dɛ dati.

⁹ Lɛ dɛ yangga 'da fala kɛ lɛ zɔ na, lɛ mbɔka, nɛ nde nɛ do ngawi boe ni. Nɛ lɛ aka Gale na, a gã 'da kɔ̃a we 'da nɛ dɛ dati.

¹⁰ Kɔ mi kɔma mbɛti gɛ hã nɛ dati kɛ na, mi hɔ 'da nɛ i ni, we kɛ mi kɔ̃̀ na, mi nɛ i mɔ, nɛ mi hã kili hã nɛ gɔ. Mba gɔ, Gale hã ngawi hã mi we 'dafa do nɛ na, kɔ̃a we 'da nɛ gã dɛ dati fai, nɛ nde a hã̀ zi na, mi 'danga kɔ̃a we 'da nɛ 'danga gɔ.

¹¹ Onyae, do ndɔti nɛ, mi tɔ̃ hã nɛ na, nɛ dúngú do dia nɛ! Nɛ 'dáfá dɛa mɔ tɛ nɛ na, ma we ngboo. Nɛ ngándá sila ngba nɛ, nɛ nu nɛ ɔ́ kpo, nɛ nɛ dɛ́ na do ngba nɛ. Nɛ Gale, kɛ a a wele kɔ̃a zã do wele gɛa sila ni, a sɛ do nɛ kpo.

¹² Nɛ fáná ongba nɛ, nɛ nɛ úfú zala ngba nɛ, ɔ nɛ kɛ ma wia do owinɔ 'da Gale ni. Owinɔ 'da Gale, wanɔ i nga gɛ vɛ, wa tumba tɛ mɛ 'bɔ balɛ hã nɛ.

¹³ E kɔ dia zã 'da Nwa Yezu Kristo 'bana do nɛ, nɛ kɔ̃a zã 'da Gale ma fɔmɔ nɛ, nɛ Hi Wi Santo 'da Gale mba li nɛ vɛ́ kpo.