2 KORINTƐ 12 - WE NU GALE 1995

Yezu bia mɔ li Polo

¹ Gɛnɛ kɔ mi ĩ na, fo gulu dɔnggɔ tɛ mi bina ni, nɛ nde ma wia na, mi dɔnggɔ 'bɔ tɛ mi mbé nɛ. Mi kɔ̃a we tɔ̃ usu mɛnɔ kɛ Nwa bia ma hã mi kɔ yalɛ, do kɛnɔ a bia ma hã mi do ogele wala ni hã nɛ.

² Mi ĩ ti mbe wi 'da Kristo kpo, kɛ 'do nɛ la sɔɛ gɛ sabɛlɛ 'bu ngɔ nɛ nalɛ, nɛ Nwa Yezu ba a gbaa kɔ li nza i ni. (Mi ĩ̀ gɔ, tabi a ba zi a dɛ ngɔ i ngboo, tabi a bia zi mɔ li a iko nde, nɛ nde Gale zu a kpo a ĩ ki ni.)

³ Mi ĩ na, Gale ba zi wi ni gbaa, nɛ a e a tɛ Paradizo li nza i. (Mi tɔ̃ 'bɔ na, mi ĩ̀ gɔ, tabi a ba zi a dɛ ngɔ i ngboo, tabi a bia zi mɔ li a iko nde, nɛ nde Gale zu a kpo a ĩ ki ni.)

⁴ Nɛ a zila owenɔ kɛ wa wè tɛ tɔ̃ ma do lɛnggɛ nu wi gɔ, nɛ wa hã̀ 'bɔ wala hã wele na, a tɔ̃ ma gɔ ni.

⁵ Nɛ mi wia tɛ dɔnggɔ tɛ mi do wi ni we mɛnɔ kɛ Gale bia ma hã a ni, nɛ nde we mi, mi wè tɛ dɔnggɔ tɛ mi do tɛ mi wele nɛ gɔ. Mɛ mi wia tɛ dɔnggɔ tɛ mi do ma, mɛ a mbɔka 'da mi.

⁶ Kɔ mi kɔ̃ sɔ 'bɔ we dɔnggɔ tɛ mi, nɛ nde mi wélé sɔ lɛnggɛ nɛ́ wi bɔ gɔ, we kɛ mi tɔ̃ sɔ a gbãlã we. Kɔ mi kɔ̃̀ we dɔnggɔ tɛ mi gɔ, we kɛ mi kɔ̃̀ na, owinɔ wa lengge we ngɔ mi nɛ ngɔ kɛ wa zele mi tɛ tɔ̃ nɛ, tabi wa zɔ mi tɛ dɛ nɛ ni gɔ.

⁷ Omɛnɔ kɛ Gale bia hã mi ni, mɛ a mɔ ɔ ɔngba, nɛ ma wia sɔ we hã gã zu hã mi. Nɛ nde Gale hã zɛlɛ hã mi na, dɔ mi hɔ́ wi gã zu gɔ. Nɛ zɛlɛ ni ma zɛlɛ mi ɔ nɛ wa dumu mi do tɛ́ ni. Nɛ ma ɔ nɛ wi nɛ to 'da Satana zɛ mi zɛa fai na, da dɛ kɔ mi dɛ́ gã zu gɔ ni.

⁸ Mi aka Nwa we ma fala talɛ na, a fo zɛlɛ ni tɛ mi do'do.

⁹ Nɛ nde a gisa hã mi na: “Dia zã 'da mi dɛ 'da mɔ ma wia do mɔ, we duzu kɛ ngawi 'da mi ma be tɛ́ ɛ wena kɔ mbɔka 'da mɔ.” Ma kɛ mi do yangga we dɔnggɔ tɛ mi ngɔ mbɔka 'da mi, takɔ ngawi 'da Kristo ma 'bana do mi.

¹⁰ Nɛ we duzu ma, mi do yangga 'da fala kɛ mi mbɔkɔ, tabi Owele wa dã mi, tabi mi kɔ 'bako, tabi wa zɛlɛ tɛ mi, tabi mi kɔ ngamɔ we zu li Kristo ni. Mba gɔ, 'da fala kɛ mi mbɔkɔ, nɛ nde ngawi 'da Kristo kɔ mi boe.

Sila Polo dɛ ngɔ we winɔ tɛ Korintɛ

¹¹ Mi wila we ɔ nɛ wi bɔ, nɛ nde ma yula ngɔ nɛ. We kɛ ma wia sɔ na, nɛ a nɛ tɔ̃ we ngɔ mi. Gɛnɛ kɔ mi a gbãlã wele gɔ, nɛ nde owinɔ nɛ zɔ wa nɛ́ gã wi nɛ tonɔ 'da Kristo, nɛ nɛ ɔngbɔ wa ni, wa nɛ̀ ngɔ mi gɔ.

¹² Mba gɔ, 'da fala kɛ mi zi sanga nɛ ni, nɛ mi kunu zi sila mi kɔ ngamɛnɔ vɛ́, nɛ Gale dɛa zi ogba sɔ̃ mɔ, do oɔngbamɔ do wala 'da mi wena. Nɛ mɛnɔ ni vɛ ma be na, mi a wi nɛ to 'da Kristo do ngbongbo nɛ.

¹³ Mɛ mi dɛa hã ogele eklezianɔ, kɔ mi dɛ̀ ma hã nɛ gɔ ni a ge nde? Tati a kɛ na, mi kɔ̃̀ zi we gɔ mɔ kɔ̃ nɛ, kɔ mi hã dĩ tole hã nɛ gɔ. Kɔ fala kɛ mi dɛ̀ zi de gɔ, nɛ nɛ mbɔkɔ mi!

¹⁴ Mi kɔla fala nɛ talɛ gɛnɛ 'da mi 'da nɛ i ia. Nɛ mi kɔ̃ sɛ 'bɔ we kpa mɔ kɔ̃ nɛ gɔ. We kɛ mi kɔ̃̀ we kpa mbili kɔ̃ nɛ gɔ, mi kɔ̃a gɛnɛ kili tɛ nɛ ngboo. Mba gɔ, ma wè na obe wa fa mbili we dala do wele wa gɔ, nɛ nde Owele benɔ wa a wa fa mbili we dala do obenɔ 'da wa.

¹⁵ Kɔ we mi, mi wia tɛ ɔ do yangga fala kɛ ma we na, mi 'dɔlɔ kpamɛnɔ 'da mi vɛ̃, nɛ mi 'dɔlɔ 'bɔ kili tɛ mi dɛ ngɔ nɛ we gala do kɔ̃a we 'da nɛ ni. Kɔ nɛ́ kɛ mi kɔ̃ gɛnɛ nɛ wena ni, nɛ gulu kɛ nɛ kɔ̃̀ gɛnɛ mi gɔ we ge nde?

¹⁶ Nɛ ĩ na, mi ɔ̀ zi nɛ dĩ tole we nɛ gɔ. Nɛ dɛ do kɛ ombe wa tɔ̃ na, mi dɛa zi 'dã hã, takɔ do 'do, nɛ mi kpa mɔ kɔ̃ nɛ ni nɛ nde?

¹⁷ Owinɔ kɛ mi tombo zi wa hã nɛ ni, wa ɔla zi mbe nɛ, nɛ wa kala mɛnɔ 'da nɛ we si do ma hã mi nde?

¹⁸ Mi aka zi Tito na, a nɛ 'da nɛ i, nɛ mi tumba zi a do nya lɛ wele kɛ nɛ ĩ ti a ni. Nɛ Tito kala zi mɔ kɔ̃ nɛ, nɛ a si do ma hã mi nde? Lɛ do Tito, lɛ dɛ zi toe do sila lɛ kpo, nɛ dɛa mɔ tɛ lɛ wia zi kɔ̃.

¹⁹ Yolo zi belee, nɛ tɛ lengge na, lɛ fa we 'dafa we 'da lɛ dati nɛ iko nde? Nɛ nde ma a ni gɔ. Onyae, lɛ tɔ̃ wenɔ gɛ dati Gale, ɔ nɛ kɛ Kristo kɔ̃a ni, takɔ kɔ̃a we 'da nɛ gã dɛ dati.

²⁰ Mi do kili na, dɔ mi nɛ hɔ 'da nɛ i, nɛ nde dɛa mɔ tɛ nɛ si tɛ ɛ do kɛ zã mi kɔ̃a ni, nɛ nɛ bɛ̃ tɛ mɛ 'bɔ gɛnɛ kɛ 'da mi gɔ. Mi do kili na, da dɛ kɔ kpawe, do bɔnɛ, mãlã, ba kafi ngba wi, dɛla, o'dã we, gã zu, do yia dɛa mɔ lé sanga nɛ gɔ.

²¹ Nɛ mi 'bɔ do kili na, dɔ mi nɛ hɔ 'da nɛ i, nɛ mi kpá sape li Gale gɔ. Nɛ mi he sɛ kɔ̃a we duzu ombe gili winɔ sanga nɛ ni, kɛ wa dɛa zi 'dã mɛnɔ, nɛ wa là fala nɛ gɔ, nɛ wa 'bana tɛ dɛ mɔ sape, do yɛnggɛ vĩ zu yali, do dɛ 'dã mɛnɔ vɛ́ ni.