2 KORINTƐ 11 - WE NU GALE 1995

Polo tɔ̃a we 'da Owi be we bɛlɛnɔ

¹ Mi aka nɛ na, nɛ é mi, kɔ mi wele mbe we nɛ́ wi bɔ ni. Nɛ kɔ̃, nɛ nɛ kúnú sila nɛ ngɔ mi kpa.

² Mi dɛ bɔnɛ 'do nɛ, nɛ mɛ a bɔnɛ kɛ ma yula 'da Gale. Mba gɔ, nɛ ɔ nɛ 'bundu be zɔnga kɛ mi kɔ̃a we hã a hã wi wili kpo na, a ba a ni. Nɛ wi wili ni, wi a Kristo.

³ Nɛ mi do kili na, da dɛ kɔ hã zã 'da nɛ 'dángá, ɔ nɛ kɛ gɔ̃ɛ dɛa zɛ́ 'dã hã zã, nɛ a 'danga do hã zã 'da Eva ni gɔ, dɔ nɛ lá fala gã kɔ̃a zã 'da nɛ dɛ 'da Kristo gɔ.

⁴ Mi tɔ̃a ni we kɛ mi zɔa na, fala kɛ wele hɔ 'da nɛ, kɔ a be we si ngɔ gele Yezu, do gele Hi Wi, do gele Dia Sako kɛ ma si tɛ ɛ do kɛnɔ lɛ bia zi ma hã nɛ ni, nɛ nɛ kɔ̃ gɛnɛ ma vɛ́ kɔ̃a iko.

⁵ Mi lengge na, owinɔ kɛ nɛ zɔ wa nɛ́ ogã wi nɛ tonɔ 'da Kristo ni, wa nɛ̀ ngɔ mi gɔ.

⁶ Gɛnɛ kɔ mi ĩ̀ ti wele we ngboo gɔ, nɛ nde mi zɔ̀lɔ̀ hã zã gɔ. Mi bia ma hã nɛ fala dɛlɛ wena, do walanɔ vɛ.

⁷ Mi bia zi Dia Sakoe 'da Gale hã nɛ do dia sila iko, nɛ mi ba zi tɛ mi dɛ nù, takɔ mi ba nɛ dɛ ngɔ. Kɛ mi dɛa zi hã nɛ ni, mɛ a 'dã mɔ nde?

⁸ Ogele eklezia wa gala zi mi do mbili we dɛ to hã nɛ. Ma ɔ nɛ kɛ mi nyɔngɔ mbili 'da wa we gala nɛ ni.

⁹ Nɛ 'da fala kɛ mi zi 'da nɛ i, nɛ mi zɔla zi mbili ni, nɛ mi gɔ̀ zi mɔ kɔ̃ wele kpo sanga nɛ ni gɔ. We duzu kɛ onya lɛ kɛ wa yula zi tɛ Masedɔanɛ i, wa gala mi do mɛnɔ vɛ̃ kɛ mi zɔla ni. Mi kɔ̃̀ zi na, mi e dĩ tole zu nɛ gɔ, nɛ mi dɛ́ sɛ ma fala kpo gɔ.

¹⁰ Kɔ nɛ́ kɛ gbãlã we 'da Kristo kɔ mi boe ni, mi tɔ̃ hã nɛ na, ngɔ nù Akai vɛ́, wele kpo wé sɛ we ga mi na, mi tɛ dɔ̀nggɔ̀ tɛ mi ngɔ we gɛ gɔ ni gɔ.

¹¹ Gulu kɛ mi tɔ̃a ní ni we ge nde? Tabi mi kɔ̃̀ gɛnɛ nɛ gɔ nde? Gale ĩ na, mi kɔ̃a gɛnɛ nɛ kɔ̃a.

¹² Nɛ mɛ mi dɛ ni, mi dɛ sɛ ma fai, takɔ ma kpe nu owinɔ kɛ wa dɔnggɔ tɛ wa na, lo dɛ toe ɔ nɛ kɛ lɛ dɛ gɛ ni.

¹³ Owinɔ ni, wa a ongbongbo wi nɛ tonɔ 'da Kristo gɔ, wa dɛ toe 'da wa do bɛlɛ, nɛ wa be tɛ wa na, lo a ngbongbo wi nɛ tonɔ 'da Kristo.

¹⁴ Nɛ mɛ a mɔ ɔ ɔngba gɔ, we kɛ gɛnɛ kɔ Satana ngboo, a wia we kifi tɛ a, nɛ a ɔ nɛ anzɛ kɛ a do yele ngbala ni.

¹⁵ Ní a nɛ tɛ ɔ̀ngbɔ̀ do kɛ na, Owi dɛa tonɔ 'da a wa be tɛ wa li winɔ nɛ́ bɔlɔ zu wi dɛa to ni gɔ. Nɛ nde ndɔti wa ma sɔkpɔ sɛ do tɛlɛ tɛ kɛ wa dɛ ma ni.

Polo dɔnggɔ tɛ́ a do ngamɛnɔ a kpa ni

¹⁶ Mi gbangba 'bɔ 'da kɛ mi tɔ̃a ni, da dɛ kɔ wele lénggé na mi a wi bɔ gɔ. Kɔ fala kɛ nɛ lengge na, mi a wi bɔ nde, nɛ nɛ zɔ wá mi na mɛ ni, takɔ mi dɔnggɔ mbe tɛ mi bi sĩ.

¹⁷ Gbãlã we, wenɔ mi nɛ tɔ̃ nɛ ni, ma yòlò 'da Nwa gɔ. Nɛ́ kɛ ma wia na mi dɔnggɔ tɛ mi ni, mi nɛ wele we ɔ nɛ wi bɔ ni.

¹⁸ Owinɔ wena wa dɔnggɔ tɛ wa do mɛnɔ nù gɛ, ma kɛ mi nɛ dɔnggɔ tɛ mɛ 'bɔ tɛ mi ni.

¹⁹ We kɛ nɛ a Owi hã zã, nɛ nɛ ĩ ti kunu sila nɛ ngɔ oyɔndɔ winɔ wena.

²⁰ Mba gɔ, gɛnɛ kɔ Owele wa zɔ nɛ ɔ nɛ ongbá, tabi wa kala mɛnɔ kɔ̃ nɛ do 'dã hã, tabi wa ɔlɔ nɛ, wa dɛ wali ngɔ nɛ, wa zɛ sanga li nɛ, nɛ nɛ kunu sila nɛ iko!

²¹ Nɛ sape tɔ̃ ma ba li mi ba, we kɛ sila mi ngàndà gɔ, mi wè tɛ dɛ ki ni gɔ! Kɔ nɛ́ kɛ ombe winɔ wa dɛ́ kili dɔnggɔ tɛ wa gɔ ni, mi wè tɛ mɛ 'bɔ tɛ dɛ kili dɔnggɔ tɛ mi gɔ. Mi tɔ̃ wenɔ gɛ ɔ nɛ mi a wi bɔ ni.

²² Wa dɔnggɔ tɛ wa na, lo a Ohebre, nɛ nde mi tɛ mɛ 'bɔ a Hebre! Wa a Oisraɛlɛ, nɛ nde mi tɛ mɛ 'bɔ a be Israɛlɛ! Wa a obe zã Abrahama, nɛ nde mi tɛ mɛ 'bɔ a be zã a!

²³ Wa a wi dɛa tonɔ 'da Kristo, nɛ nde mi nɛ wele we ɔ nɛ wi bɔ ni na, mi nɛa ngɔ wa do ki ni. Mi dɛa to nɛa ngɔ wa, mi lia bɔlɔkɔ fala dɛlɛ wena, wa zɛa mi do zufa ndala, nɛ mi hɔa fɛna fio fala dɛlɛ wena. Mi kpa ngamɛnɔ ni vɛ́ nɛa ngɔ wa.

²⁴ Oyudanɔ wa zɛa mi zufa 'bu nɛ talɛ ngɔ nɛ kusi, na mɛ ni fala mɔlɔ.

²⁵ Oroma wa zɛa mi do zufa fala talɛ, nɛ winɔ wa lua mi do ta we gbɛ mi fala kpo. Nɛ masua bindi do mi fala talɛ, nɛ mi ɔa dɛ 'dɔ lì gbaa tũ kpo vɛ̃.

²⁶ Mi hɔ fena fio kɔ yɛlinɔ 'da mi wena. Mi hɔa fɛna fio tɛ hɛa lìnɔ, do kɔ̃ Owi zũnɔ, do onya mi Yudanɔ, do ogele winɔ, do owinɔ kɛ wa 'bili bɛlɛ na lo a winɔ 'da Kristo ni. Mi hɔa fɛna fio kɔ ogã lenɔ, do ozamɛnɔ, do ngɔ gba lìnɔ.

²⁷ Mi dɛa onga dɛa to, nɛ tɛ mi zɛlɛ wena. Mbe 'da falanɔ wena, mi wè zi tɛ ɔ yala gɔ. Mi ɔa zi wɔ, do wɔ lì, nɛ fala dɛlɛ wena, mi kpà zi fala we nyɔngɔ mɔ gɔ. Mi zɔla zi tulu, nɛ mi ɔa gɛɛ.

²⁸ Mi wè tɛ tɔlɔ ma vɛ gɔ. Nɛ tũ kpo kpo, mi 'bɔ tɛ ba dĩ tole eklezianɔ vɛ.

²⁹ Fala kɛ wi Kristo kpo mbɔkɔ, nɛ mi mbɔkɔ tɛ mɛ 'bɔ. Tabi wi Kristo te kɔ 'dã mɔ, nɛ mi kpa 'bako wena.

³⁰ Kɔ tabi ma we na, mi dɔnggɔ tɛ mi nde, nɛ mi dɔnggɔ sɛ tɛ mi do mɛnɔ kɛ ma hã mbɔka hã mi ni.

³¹ Gale, Baa Nwa Yezu ĩ na, mi 'bílí bɛlɛ gɔ. E kɔ li a dɔ̃lɔ̃ fai!

³² 'Da fala mi zi Damasi i ni, nɛ gã wi kɛ a dɛ zi toe 'da nwa Aretasi ni, a a zi Owele tɛ nu gã le na, wa 'bɔ we ba mi.

³³ Nɛ ombe wele wa usu zi mi, nɛ wa fi mi kɔ fã, nɛ wa zumu mi do li wolo ngbo nu le, nɛ mi yu kɔ̃ a.